Əsrin yarısını başa vurmaq xoşbəxtlikdir

Əməkdar mədəniyyət işçisi, İrəvan Dövlət Azərbaycan Dram Teatrının direktoru İftixar Piriyev sahib olduğu bu xoşbəxtliyi daha da zənginləşdirmək arzusundadır

Həyatın mənası çox və yaxud az yaşamaqda deyil, yaşadığın mühitdə, cəmiyyətdə öz yerini tutmaq, mövqeyini müəyyən etmək və başqaları üçün nümunə olmaqdan ibarətdir. Təbii ki, hər kəs ona bəxş olunan ömrü özünəməxsus tərzdə yaşayır. Seçdiyi sənət, tutduğu mövqe isə bu özünəməxsusluğa daha bir çalar gətirir. 50 illik yubileyini qeyd edən İrəvan Dövlət Azərbaycan Dram Teatrının direktoru İftixar Piriyev yarıməsrlik ömrün xarakteristikasını qısaca da olsa belə təqdim edir. Söhbətimizə “50 illik ömür yaşamaq özü bir xoşbəxtlikdir” fikri ilə körpü salan İ.Piriyev bildirdi ki, yaşanan ömrü geri qaytarmaq mümkün olmadığı üçün ötən illərin, ayların, günlərin, ən əsası saniyələrin belə hər biri insan üçün əziz və doğma olmalıdır.

“Beşinci onilliyin zirvəsindən geri baxdıqda daha çox hansı anlara qayıtmaq istərdiniz” sualımıza cavab olaraq İ.Piriyev bildirdi ki, yarıməsrlik dövrün 17 ili orta məktəb illərinə təsadüf edir. O illər ki, bir növ həyata hazırlıq dövrü hesab olunur. Həmin dövrün bu gün də yaddaşımda qalan və məni özünə cəlb edən maraqlı hadisələri olub. Amma tale belədir ki, yaşanan ömrü geriyə qaytarmaq mümkün deyil. Bu baxımdan ömrümün ötən hər bir günü - uğurlu, uğursuz, sevincli, kədərli olmasından asılı olmayaraq mənim üçün yaddaqalandır. Çünki bu mənim taleyimdir, qismətimdir. İnsanlar var ki, sevincli anlarını dəyərləndirir, kədərli anlarını xatırlamaq belə istəmir. Bu mümkün deyil. İnsan ömrü ilin fəsillərinə bənzəyir. Yəni qarlı qışın güllü-çiçəkli, təravətli baharı olduğu kimi insan taleyinin də qəmli, kədərli, sevincli anları biri-birini əvəz edir.

Musahibim onu da qeyd etdi ki, şeirlərində də bu məqama tez-tez müraciət edir. İnsan ömrünün mənası sevinc- kədər qidası ilə tənzimlənir.

“Düşünürəm ki, yaşadığım ömürdə yaratdıqlarım da var, yaratmaq istəyib, amma buna nail olmadıqlarım da. Sözsüz ki, qarşıdakı illərdə onların həyata keçirilməsinə müvəffəq olacağam” söyləyən İ.Piriyev qeyd etdi ki, televiziya tamaşaları, seriallar, bədii filmlər, radio verilişləri, bunlar toplum şəklində aktyorluq sənəti ilə bağlı sənət nümunələridir.

Bədii yaradıcılıqla da məşğul olduğunu söyləyən yubilyar vurğuladı ki, bir neçə şeirlər kitabı işıq üzü görüb. Çoxlu publisistik məqalələri qəzetlərdə, jurnallarda dərc olunub. Ümumiyyətlə, orta məktəb illərində hekayələr yazmağa maraq göstərən İ.Piriyev sonralar isə miniatürlər yazmaqla yaradıcılığını davam etdirib. Tələbəlik illərində uzun müddət Gürcüstanda Azərbaycan dilində dərc olunan “Sovet Gürcüstanı” qəzetinin Azərbaycan üzrə ştatdankənar müxbiri olub. Tez-tez həmin qəzetdə müxtəlif mövzularda yazılarla çıxış edib. Həmçinin Azərbaycan mətbuatında da elmi, bədii yazıları işıq üzü görüb. 1997-ci ildə “Yaşadığım bu ömür” adlı şeirlər kitabı işıq üzü görüb. 2003-2004-cü illər arasında “Nə qəribə yuxuymuş” şeirlər kitabı, elə o dövrdə ulu öndər Heydər Əliyevə həsr olunmuş “Böyük Turanın himni” poeması kitab halında çapdan çıxıb.

Yubilyar onu da bildirdi ki, ulu öndər Heydər Əliyevə həsr etdiyi “Müstəqil vətənin memarı” poeması 9 dilə tərcümə olunmaqla üç kitab şəklində ( Avropa dilləri, Azərbaycan və türk dili, ərəb-fars) çapa hazırdı. Yaxın zamanlarda işıq üzü görəcək.

6 pyesin müəllifidir. Onlardan ikisi İrəvan Teatrının səhnəsində uğurla tamaşaya qoyulub.

1981-ci ildə Azərbaycan Dövlət Akademik Milli Dram Teatrında aktyorluq fəaliyyətinə başladığını bildirən İ.Piriyev qeyd etdi ki, 1999-2000-ci illərdə ulu öndər Heydər Əliyevin xüsusi tapşırığı ilə Mədəniyyət Nazirliyi tərəfindən Tbilisi Azərbaycan Dövlət Dram Teatrının bərpa prosesinə rəhbərlik etmək üçün iki il müddətinə Tbilisi şəhərinə ezam olunub. Hazırda həmin teatr ulu öndər Heydər Əliyevin adını daşıyır və uğurla fəaliyyət göstərir. İftixar Piriyev Tbilisi Teatrının bərpasında peşəkarlıqla apardığı iş prosesinin uğurlu nəticəsinə görə 2000-ci ildə C.Cabbarlı adına İrəvan Dövlət Azərbaycan Dram Teatrına direktor vəzifəsinə təyin olunmuş, hazırda da həmin teatrın aktyoru və direktorudur.

Müsahibim ötən müddətdə teatrın inkişafı istiqamətində atılan addımlardan bəhs edərək bildirdi ki, bu gün qarşımızda dayanan əsas məqsəd İrəvan Teatrını beynəlxalq səviyyədə tanıtmaq, imkanlarımızı genişləndirməkdir.

Dövlət başçısı İlham Əliyevin sərəncamı ilə teatrımızın 125 illik yubileyi təntənəli qeyd edildi. Sərəncamdan irəli gələn tədbirlər həyata keçirilərkən teatrın bir sıra aktyorları fəxri adlara layiq görüldü. Həmin ildə teatrın inkişafındakı xidmətlərinə görə İ.Piriyev də Əməkdar mədəniyyət işçisi fəxri adına layiq görülüb.

Yubileydən sonra teatrın yeni bir inkişafa istiqamətləndiyini bildirən İ.Piriyev söylədi ki, kollektivimiz ildə bir dəfə respublikanın bölgələrində qastrol səfərində olur. Bu, teatrın inkişafı, ictimaiyyətlə ünsiyyəti baxımından çox əhəmiyyətlidir. Bundan başqa qarşıda duran digər məqsəd teatrın respublikadan kənarda tanınması istiqamətində işlər aparmaqdır. Bununla bağlı Mədəniyyət və Turizm Nazirliyinin bir neçə layihəsi həyata keçirilib. Onlardan biri İ.Piriyevin müəllifi olduğu “Körpü” pyesidir. Əsər Qafqazda sülhün, əmin-amanlığın, milli münasibətlərin bərpasına həsr olunub. Tamaşada Bakı Teatr Şəbəkəsi, Gürcüstandan, Dağıstandan dəvət olunmuş aktyorlar iştirak edib. Tamaşanın premyeraları həm Bakıda, həm də Gürcüstanda keçirilib.

İ.Piriyev bildirdi ki, Mədəniyyət və Turizm Nazirliyinin digər layihəsi Azərbaycandan kənarda yaşayan soydaşlarımızla əlaqələr yaratmaq və onların qarşısında çıxış etməkdir:

-Bununla bağlı ötən il noyabrın 25-dən dekabrın 4-dək Gürcüstanda, martın 14-dən 27-dək isə 19 nəfərlik heyətlə Dərbənddə olduq. Tbilisidə də, Dərbənddə də çıxışlarımıza ulu öndər Heydər Əliyevə həsr olunmuş A.Babayevin “Xilaskar” əsəri ilə açılış etdik. Heydər Əliyev şəxsiyyəti, onun Azərbaycan xalqı, dövləti qarşısındakı xidmətləri, ən əsası dünyanın müxtəlif ölkələrində yaşayan soydaşlarımızın bir amal, məqsəd uğrunda, azərbaycançılıq ideyası ətrafında birliyinə nail olması hər birimiz üçün önəmlidir.

İ.Piriyev söylədi ki, Dərbənd Rayon Administrasiyasının rəhbəri Qurban Qurbanov kollektivi təkrar səfərə dəvət edib. Bu yaxınlarda, sentyabrın 19-dan oktyabrın 8-nə qədər 20 günlük Dərbənddə səfərdə olacaqlar.

Teatrın direktoru yaratdığı rollardan bəhs edərkən ulu öndər Heydər Əliyevin “Biri var ki, insan hər hansı bir əsəri özü oxusun, biri də var ki, onu canlı olaraq səhnədə görsün. Ona görə də teatrın həyatımızdakı rolu böyükdür”, Prezident İlham Əliyevin “Yüksək səhnə mədəniyyəti ilə seçilən Azərbaycan teatrının zəngin repertuarı sayəsində xalqımız milli ədəbiyyatın parlaq nümunələri ilə yanaşı, dünya ədəbi fikrinin inciləri ilə daha yaxından tanış olmaq imkanı əldə etmişdir. Ölkəmizin bir sıra digər sənət sahələrində qazandığı uğurlar ilk növbədə Azərbaycan teatrı ilə sıx bağlı olmuşdur” fikirlərini xüsusi önə çəkdi. Bildirdi ki, oynadığı rolların hər biri böyüklüyündən, kiçikliyindən asılı olmayaraq onun üçün əzizdir. S.Vurğun “Vaqif”- Əli bəy, V.Səmədoğlu “Yayda qartopu oyunu”- Niftalı, İ.Əfəndiyev “Büllur sarayda” və “Şeyx Məhəmməd Xiyabani”- Bayandur, Ayaz, V.Şekspir “K.Lir”- Edqar, N.Xəzri “Mirzə Şəfi Vazeh”, “Gecə döyülən qapılar”- Əkbər, Xəzər, J. Anuy “Medeya”- Oğlan, Anar “Sizi deyib gəlmişəm”, “Şəhərin yay günləri”- Vəliqulu, Namiq və digər rolları onun canlandırdığı obrazlar silsiləsinin bir neçə nümunəsidir. Hər rolu ilə tamaşaçı sevgisi qazanan İ.Piriyev bildirdi ki, çox zaman onu adı ilə yox, oynadığı rolla çağırırlar. Bu isə onda daha böyük ruh yüksəkliyi yaradır, yeni-yeni rollarla tamaşaçı qarşısına çıxmağa stimul verir.

İ.Piriyev bədii film, teleseriallar və teletamaşalarda da aparıcı və əsas rolları oynayıb. A.Rəhimovun “Canavar balası”, “Qırmızı qar” əsərlərində -Nofəl, Şef, Ə.Hacızadə “İtkin gəlin”-Əbdül, R.N.Güntəkin “Dodaqdan qəlbə”-Vədad, B.Vahabzadə “Yağışdan sonra”-Aslan, Ə.Əylisli “Ürək yaman şeydir”-Sərvər, Dilsuz “Oğulla görüş”- Oğul, bütünlükdə qırxa qədər aparıcı və əsas rol oynayıb.

Bunlar İftixar Piriyevin ömrünün beşinci onilliyinə qədər qazandığı uğurlarıdır. Özünün də qeyd etdiyi kimi yaşının üstünə əlavə olunan yaş onu heç zaman məyus etmir, əksinə daha da səylə çalışmağa, yeni-yeni yaradıcılıq uğurları əldə etməyə səsləyir.

Biz də öz növbəmizdə İ.Piriyevi ad günü münasibətilə təbrik edir, cansağlığı arzulayırıq.

Yeganə Əliyeva

İki sahil.- 2010.- 8 sentyabr.- S. 14.