ARDNŞ-lə İran Milli Qaz İxrac Şirkəti arasında qısamüddətli müqavilə imzalandı

Dünən ARDNŞ-in inzibati binasında Azərbaycan qazının İrana qısamüddətli nəqlinə dair Şirkətlə İran Milli Qaz İxrac Şirkəti arasında müqavilənin imzalanma mərasimi keçirildi.

ARDNŞ-in prezidenti Rövnəq Abdullayev İran Milli Qaz İxrac Şirkətinin baş direktoru Seyid Rza Kesaizadənin rəhbərlik etdiyi nümayəndə heyətini salamladıqdan sonra müqavilə barədə ətraflı məlumat verdi. Bildirdi ki, İranın Milli Qaz İxrac Şirkəti ilə imzalanan müqavilə iki hissədən ibarətdir: “Birinci mərhələ qısamüddətlidir. Bu sazişə əsasən sutkada İrana 1,2 milyon kubmetr qaz veriləcək. Sazişin bütün icra dövrü ərzində ARDNŞ İran tərəfinə ümumilikdə 100 milyon kubmetr həcmində qaz ixrac edəcək. Növbəti mərhələdə İrana uzunmüddətli qaz verilməsi nəzərdə tutulur. Bu əməkdaşlıq hər iki ölkə üçün əhəmiyyətlidir. İranla Azərbaycan yaxın qonşu və dost ölkələrdir. İki dövlət arasında enerji sektoru üzrə əlaqələr yüksək səviyyədə qurulub.» Uzun müddətdən bəri Naxçıvan Muxtar Respublikasının qaz təchizatında İranın mühüm rol oynadığını qeyd edən ARDNŞ-in prezidenti son dövrdə Azərbaycan qazının alqı-satqısına dair danışıqların uğurla davam etdirildiyini diqqətə çatdırdı.

R.Abdullayev bildirdi ki, bu müqavilələrin həyata keçirilməsi ilə İranın şimal bölgələrinin, Naxçıvanın qaz təminatına geniş imkanlar yaradılacaq.

Görüşdə iştirak edən İran İslam Respublikasının Azərbaycandakı fövqəladə və səlahiyyətli səfiri Məhəmmədbağır Bəhramini yeni əməkdaşlığın təməlinin qoyulması münasibətilə hər iki ölkənin rəhbərinə, xalqına təbriklərini çatdırdı. Yaxın gələcəkdə uzunmüddətli müqavilənin imzalanacağına əminliyini ifadə etdi. Eyni zamanda ARDNŞ-in prezidenti Rövnəq Abdullayevə, İran Milli Qaz İxrac Şirkətinin əməkdaşlarına minnətdarlığını bildirdi.

İran Milli Qaz İxrac Şirkətinin “Qaz Export” kompaniyasının baş direktoru Seyid Rza Kesaizadə ARDNŞ prezidenti Rövnəq Abdullayevi salamlayaraq qeyd etdi ki, qısa müddətdə müqavilənin imzalanmasına nail olmağımız böyük uğurdur. Bu kimi addımlar gələcəkdə əməkdaşlığımızın daha da genişləndirilməsi üçün işıqlı yoldur. Hər iki tərəf qaz sahəsində uzunmüddətli əməkdaşlığın genişləndirilməsində maraqlı olduğunu nümayiş etdirir. Münasibətlərimiz inkişaf edir, əməkdaşlıqda yeni prioritetlər müəyyənləşdirilir.

Seyid Rza Kesaizadə təmsil etdiyi şirkətin Azərbaycanda yanacaq-energetika sektorunda aparılan işləri diqqətlə izlədiyini bildirdi: “Azərbaycanın bu gün neft-qaz ixracatçısı kimi tanınması, dünyanın enerji təhlükəsizliyinin təminatında mühüm rol oynaması ölkəmizdə sevinclə qarşılanır. Təbii ki, bu da dövlətinizin uğurlu siyasətinin nəticəsidir.”

Son illər Azərbaycanın qeyd olunan sahədə əldə etdiyi uğurları yüksək dəyərləndirən Seyid Rza Kesaizadə ölkəmizin qısa müddətdə qaz idxal edən ölkədən qaz ixrac edən ölkəyə çevrilməsini xüsusi olaraq önə çəkdi. Söylədi ki, İranın enerji sahəsində hazırkı siyasəti dünya qaz bazarında aktiv iştirak etmək və bu sektorda qonşu ölkələrlə əməkdaşlığı genişləndirməkdən ibarətdir. 2010-cu ilin ilk günlərində Türkmənistanla İran arasında ikinci qaz kəmərinin istismara verilməsi mühüm hadisə kimi qeyd edildi. İranın təbii qaz ehtiyatlarına görə dünyada ikinci yerdə qərar tutduğunu vurğulayan Kesaizadə öz ölkəsinin şimal əyalətlərini qazla təmin etmək üçün Azərbaycan qazına ehtiyac duyduqlarını və bununla əlaqədar, ötən il ARDNŞ ilə İran Milli Qaz İxrac Şirkəti arasında memorandum imzalandığını bildirdi.

Mərasimdə Memorandum çərçivəsində tərəflər arasında qısamüddətli və uzunmüddətli qaz alqı-satqısına dair danışıqların uğurla aparıldığı qeyd edildi. Şirkətlər arasında Azərbaycan qazının İrana qısamüddətli nəqlinə dair sazişin hazır olduğu bildirildi.

O da qeyd edildi ki, Azərbaycan qazının İran İslam Respublikasına uzunmüddətli ixracı barədə müqavilənin hazırlanması prosesi də davam etdirilir, Şirkətin işçi qrupları bu istiqamətdə danışıqlar aparırlar. ARDNŞ tərəfindən Azərbaycanın qaz-nəql sistemində və yeraltı qaz anbarlarında aparılan yenidənqurma və rekonstruksiya işləri barədə də məlumat verildi. Bildirildi ki, hal-hazırda mövcud olan infrastruktur yüksək həcmdə qaz ötürülməsinə imkan vermir. Astarada kompressor stansiyasının genişləndirilməsi işləri həyata keçiriləcək, Hacıqabul-Astara boru xəttinin təmiri başa çatdırılacaq. Bu ilin payızında sutkada 3-5 milyon kubmetr İrana qaz vermək imkanı əldə olunacaq. Uzunmüddətli müqavilənin imzalanması yay aylarına təsadüf edəcək. Bu müqavilə əsasında qonşu dövlətə ilk olaraq 1,5 milyard kubmetr qaz veriləcək. Sonra bu həcmin artırılacağı nəzərdə tutulur.

ARDNŞ-in prezidenti İrana ixrac olunacaq qazın Şirkətin müstəqil işlədiyi yataqlarda həyata keçirdiyi xüsusi Qaz proqramı əsasında hasil olunduğunu bildirdi.

ARDNŞ-in prezidenti Rövnəq Abdullayev və İran Milli Qaz İxrac Şirkətinin baş direktoru Seyid Rza Kesaizadə müqaviləni imzaladılar.

Sonda tərəflər media nümayəndələrini maraqlandıran sualları cavablandırdılar.

Yeganə Əliyeva

İki sahil.- 2010.- 14 yanvar.- S. 2.