GƏNCƏDƏ NƏRİMAN HƏSƏNZADƏNİN 80 YAŞI QEYD EDİLDİ

Bir insan ömrünü girov qoymuşam, Bir şair ömrünü yaşamaq üçün... deyən Xalq şairi, Əməkdar incəsənət xadimi,”Şöhrət” ordenli Nəriman Həsənzadənin 80 yaşı tamam oldu.

Şairin yaradıcılığının əsas mövzusunu cəsarət, mübarizlik, sadəlik və insani hisslər təşkil edib.

Nəriman Həsənzadə gözünü dünyaya Ağstafa rayonunun Poylu kəndində açsa da, gəncliyi və həyatının ən qaynar illəri Gəncə ilə bağlı olub. Elə buna görə də Gəncədə şairin yubileyi xüsusi təntənə ilə qeyd edildi.

YAP Gəncə şəhər təşkilatının iclas zalında Şəhər İcra Hakimiyyəti və Gəncə Dövlət Universitetinin birgə keçirdiyi tədbir bir daha sübut etdi ki, şair Gəncəni sevdiyi qədər gəncəlilər də onu sevir, yaradıcılığına hörmətlə yanaşırlar.

Tədbirdən öncə Nəriman Həsənzadə mətbuat nümayəndələrinə bildirdi: ”Gəncə mənə çox doğmadır. Bu şəhərdə çox böyük dahilər yetişib. Həmişə Gəncəyə gələndə gəncliyimi, ilk və əbədi məhəbbətimi xatırlayıram. GDU-nun pillələrini qalxanda isə tələbəlik illərinə qayıdıram.”

GDU-nun rektoru, professor Elman Məmmədov çıxış edərək söylədi ki, Nəriman müəllim 1949-53-cü illərdə bizim universitetdə təhsil alıb: “Biz ali təhsil ocağının kollektivi olaraq şairin yaradıcılığı ilə həmişə qürur hissi keçirmişik.”

YAP Gəncə şəhər təşkilatının sədri, professor İsrafil İsmayılov qeyd etdi ki, bu gün bizim binanın iclas zalında möhtəşəm tədbir keçirilir. Arzu etdi ki, söz sənətinin, poetik dünyanın sərraflarından olan sairin 100 illik yubileyi də onu öz övladı kimi sevən Gəncədə məhz bu zalda eyni təntənə ilə keçirilsin.

Yazıçılar Birliyinin Gəncə bölməsinin sədri Məmməd Alim, GDU-nun filologiya fakültəsinin 1-ci kurs tələbəsi Lamiyə Əhmədova və başqaları çıxış edərək dedilər ki, Nəriman Həsənzadənin poeziyası zamanın ruhuna uyğun poeziyadır.

Şairin yubiley tədbirində akademik Budaq Budaqov, Əməkdar incəsənət xadimi, şair İlyas Tapdıq, xalq artisti Tariyel Qasımov, filoloq Rüstəm Kamal və başqa tanınmış ziyalılar iştirak edib. Şairin şeirlərinin ifası, muğam ustalarının təqdim etdiyi bir-birindən gözəl ifalar yubiley şənliyinə xüsusi şirinlik gətirdi.

Tədbirdə Xalq şairinə ayrı-ayrı kollektivlər tərəfindən hədiyyələr təqdim edildi.

Qalib RƏHİMLİ

İki sahil.- 2011.-7 aprel.-S.16.