ARDNŞ prezidenti “İNEPO-AVRASİYA” Olimpiadasının iştirakçıları ilə görüşmüşdür

Ötən gün Azərbaycan Respublikası Dövlət Neft Şirkətinin (ARDNŞ) Baş ofisində şirkətin prezidenti Rövnəq Abdullayev “İNEPO-AVRASİYA” Ətraf Mühitin Mühafizəsi V Beynəlxalq Layihə Olimpiadasının iştirakçıları ilə görüş keçirdi.

İştirakçıları səmimi salamlayan ARDNŞ prezidenti Rövnəq Abdullayev artıq ənənəvi bir tədbirə çevrilmiş Olimpiadanın 2007-ci ildən keçirildiyini bildirdi: “Bizim üçün çox xoşdur ki, bir çox dövlətlərin nümayəndələri bu Olimpiadada iştirak edir. Bu da Olimpiadaya marağın yüksək olduğunu göstərir. Ümumiyyətlə, Azərbaycanda gənc nəslin sağlam şəkildə yetişməsi, onların düzgün təlim-tərbiyəsi, yüksək səviyyəli mütəxəssis olmaları üçün hər cür şərait yaradılıb. Dövlət Neft Şirkəti də bu istiqamətdə böyük işlər görür. “İNEPO-AVRASİYA” Ətraf Mühitin Mühafizəsi Beynəlxalq Layihə Olimpiadasının keçirilməsində başlıca məqsədimiz Prezident İlham Əliyevin 28 sentyabr 2006-cı ildə imzaladığı sərəncamla təsdiq edilmiş “Azərbaycan Respublikasında ekoloji vəziyyətin yaxşılaşdırılmasına dair 2006-2010-cu illər üçün kompleks Tədbirlər Planı”na uyğun olaraq, gənc nəsli ekoloji problemlər haqda məlumatlandırmaq, onlarda ətraf mühitə həssas münasibət formalaşdırmaq, məktəblilərə təbii, mədəni, tarixi və sosial-estetik dəyərlərin qorunması ruhunu aşılamaqdan ibarətdir.”

R.Abdullayev qeyd etdi ki, ARDNŞ Azərbaycan məktəblilərinin dünyanın müxtəlif olimpiadalarında iştirakını hər zaman dəstəkləyir. “İndiyə kimi 200-dən çox azərbaycanlı şagird dünyanın bir çox olimpiadasında iştirak edib və sevindirici haldır ki, nəticədə ölkəmizə 80-ə yaxın medal gətirilib. Təbii ki, bu işlərdə “Çağ” Öyrətim İşlətmələri Şirkətinin məktəbləri çox aktiv iştirak edirlər. Elə şirkətin rəhbərliyi də bu Olimpiadanın təşkilatçılarından biridir. İnanıram ki, Olimpiada yüksək səviyyədə keçiriləcək və gələn qonaqlar bu olimpiadada çox yaxşı iştirak edəcəklər.”

ARDNŞ prezidenti bildirdi ki, bu gün Azərbaycanda ekoloji problemlərin həllinə çox böyük diqqət göstərilir. “Azərbaycan neft ölkəsidir. 150 ildən artıqdır ki, ölkəmizdə açıq üsulla neft çıxarılması ekoloji tarazlığın pozulmasına gətirib çıxarıb. Bildiyiniz kimi, dünyada sənaye üsulu ilə ilk neft quyusu Azərbaycanda qazılıb, neftin boru xətti ilə daşınması Azərbaycanda həyata keçirilib, həmçinin ilk dəfə neftin tankerlərə doldurulub daşınması da ölkəmizdə baş verib. Hazırda biz böyük ekoloji layihələr həyata keçiririk. Siz bu layihələrlə tanış olacaqsınız. Hesab edirəm ki, bu olimpiadanın həm sizin, həm də Azərbaycan üçün müsbət təsiri olacaq. Həmçinin təbiətə münasibətdə siz gənclərin fikirlərindən bəhrələnmək də yaxşı olardı.”

“Çağ” Öyrətim İşlətmələri Şirkəti İdarə Heyətinin sədri Ənvər Özərən isə qeyd etdi ki, Azərbaycan dünya miqyasında belə Olimpiada keçirən nadir ölkələrdən biridir. “Təbii ki, Prezident İlham Əliyevin ekologiyaya diqqət və qayğısı belə bir Olimpiadanın keçirilməsinə zəmin yaratdı. Bu bir daha onu göstərir ki, Azərbaycan sadəcə neft ölkəsi deyil.”

Ə.Özərən qeyd etdi ki, Azərbaycan bir çox beynəlxalq olimpiadalarda iştirak edib. “Nəzərinizə çatdırım ki, 1994-cü ildən 2011-ci ilə qədər keçirilən olimpiadalarda Azərbaycan 435 medal qazanıb. SOCAR-ın sponsorluğu ilə Azərbaycan yalnız xarici dövlətlərdə keçirilən olimpiadalarda iştirak etməklə yanaşı, ölkə daxilində də beynəlxalq olimpiadalar keçirilir. Bu olimpiadaya isə 235 beynəlxalq dərəcəli layihə təqdim olundu və onlardan 57-si iştirak hüququ qazandı. Bununla yanaşı, olimpiadada iştirak edən layihələrin keyfiyyəti də ildən-ilə yüksəlir. Son 3 ildir ki, Azərbaycan məktəbləri də burada iştirak edirlər.”

Görüşdə çıxış edən Azərbaycan-Türkiyə Özəl Liseyləri Baş İdarəsinin rəisi Arif Gömləksiz də Olimpiadanın keçirilməsinin əhəmiyyətindən danışdı. Görüşdə ARDNŞ-in ölkədə ekoloji tarazlığın bərpa olunması istiqamətində apardığı genişmiqyaslı tədbirlərdən bəhs olundu. Qeyd edildi ki, şirkət Abşeron yarımadasının neftlə çirklənmiş ərazilərində intensiv təmizləmə və yaşıllaşdırma işləri həyata keçirir. ARDNŞ-in orta məktəb şagirdlərində neftçi peşəsinə həvəs oyatmaq istiqamətində apardığı işlər, xüsusilə kadr hazırlığı sahəsində həyata keçirdiyi Təqaüd Proqramları haqqında verilən məlumatlar iştirakçıların marağına səbəb oldu.

Sonra Olimpiadada iştirak etmək üçün müxtəlif ölkələrdən Bakıya gələn məktəblilər bu görüşlə bağlı ARDNŞ rəhbərliyinə minnətdarlıqlarını bildirdi, Azərbaycanla tanışlıqdan aldıqları xoş təəssüratdan danışdılar. Sonda Olimpiada iştirakçılarına ARDNŞ-in hədiyyələri təqdim olundu, Rövnəq Abdullayevlə xatirə şəkli çəkdirildi.

Qeyd edək ki, “İNEPO-AVRASİYA” Ətraf Mühitin Mühafizəsi I Beynəlxalq Layihə Olimpiadası 2007-ci ildə keçirilib, burada 17 ölkənin məktəbliləri iştirak ediblər. 2008-ci ildə baş tutmuş II Olimpiadaya 30, 2009-cu ildə keçirilmiş III Olimpiadaya 31, 2010-cu ildə keçirilmiş IV Olimpiadaya 33 ölkənin təmsilçiləri qatılıblar. Azərbaycanın qabaqcıl məktəblərinin şagirdləri bütün Olimpiadalarda uğurla çıxış edərək, birinci Olimpiadada 4 qızıl, 4 gümüş, 4 bürünc, ikinci və üçüncü Olimpiadalarda 4 qızıl, 8 gümüş, 12 bürünc, dördüncü olimpiadada isə 5 qızıl, 8 gümüş, 10 bürünc medal qazanıblar.

Bu il “İNEPO-AVRASİYA” Ətraf Mühitin Mühafizəsi V Beynəlxalq Layihə Olimpiadasına 35 ölkənin (Albaniya, İndoneziya, İran, Hindistan, Qazaxıstan, Gürcüstan, Litva, Makedoniya, Malayziya, Meksika, Nigeriya, Pakistan, Polşa, Rumıniya, Slovakiya, Türkiyə, Türkmənistan, Ukrayna və s.) məktəbli komandaları tərəfindən internet vasitəsilə 400-dən çox layihə təqdim edilib, onlardan 115-i yarışmaya qəbul olunub. Həmin layihələrin 58-i Azərbaycanın müxtəlif regionlarını təmsil edən şagirdlər tərəfindən hazırlanıb. Bu layihələr iştirakçı ölkələrin təcrübəli elm adamlarından ibarət komissiya tərəfındən qiymətləndiriləcək.

Ətraf Mühitin Mühafizəsi V Beynəlxalq Bakı Layihə Olimpiadasının təşkilat komitəsində ARDNŞ ilə birlikdə Təhsil Nazirliyi, Ekologiya və Təbii Sərvətlər Nazirliyi, İctimai Televiziya, “Çağ” Öyrətim İşlətmələri Şirkəti və “İNEPO-AVRASİYA” Ekoloji İctimai Birliyinin yer alması Azərbaycanda ekoloji problemlərin həllinə göstərilən diqqət və qayğının təzahürü kimi qiymətləndirilir.

Nail Rəhimzadə

İki sahil.-2011.-7 aprel.-S.4.