KARİKATURA SƏRGİSİ MARAQLA QARŞILANDI

Naxçıvan Muxtar Respublikası Rəssamlar Birliyinin Bəhruz Kəngərli adına sərgi salonunda ilk fərdi karikatura sərgisi açılmışdır.

Böyük demokrat yazıçı, “Molla Nəsrəddin” jurnalı ilə Şərqdə satirik publisistikanın əsasını qoymuş Cəlil Məmmədquluzadənin əsərlərinə həsr edilən sərginin müəllifi Naxçıvan Muxtar Respublikasının Əməkdar rəssamı, Naxçıvan Dövlət Universitetinin müəllimi Cavid İsmayılovdur. Üç gün davam edəcək sərgidə rəssamın dahi Cəlil Məmmədquluzadənin dram əsərlərinə, “Ucuzluq”, “Rus qızı”, “Usta Zeynal” kimi bir çox hekayələrinə, “Küpə”, “Papaq” felyetonlarına çəkilmiş karikaturaları yer almışdır.

Bu münasibətlə keçirilən tədbiri Naxçıvan MR Rəssamlar Birliyinin sədri, Azərbaycanın Əməkdar rəssamı, Naxçıvan Dövlət Universitetinin müəllimi Ülviyə Həmzəyeva giriş nitqi ilə açaraq sənət yoldaşını bu əlamətdar və şərəfli gün münasibətilə təbrik etmiş, gələcək fəaliyyətində daha böyük uğur və nailiyyətlərə imza atmağı arzulamışdır.

Naxçıvan Dövlət Universitetinin rektoru, akademik İsa Həbibbəyli rəssamın yaradıcılığından, muxtar respublikamızda gənc rəssamların yetişdirilməsi istiqamətində görülən işlərdən danıımışdır. Natiq, ali məktəb yetirməsi olan Cavid İsmayılovun yaradıcılığını yüksək qiymətləndirərək ona uca zirvələri fəth etməyi diləmişdir.

AMEA-nın müxbir üzvü, tarix elmləri doktoru Hacı Qadir Qədirzadə çıxış edərək rəssamın əsərlərində görkəmli karikaturaçılar Nəcəfqulu və Əzimzadə üslubunun müasir çalarlarının göründüyünü qeyd etmişdir.

Memarlıq ixtisası üzrə təhsil alan I kurs tələbəsi Qalib Abbasov müəllifi təbrik edərək əsərlərinin dərin düşündürücü qüvvəyə malik olması ilə tamaşaçı zövqünü oxşadığını demişdir.

Sonra sərgiyə baxış oldu.

Nərmin Cəfərova,

NDU-nun Mətbuat

şöbəsinin əməkdaşı

İki sahil.-2011.-8 aprel.-S.16.