AŞPA sədri: Ümumdünya Mədəniyyətlərarası Dialoq Forumunun Azərbaycanda keçirilməsi ölkə üçün böyük uğurdur

Ümumdünya Mədəniyyətlərarası Dialoq Forumunun Azərbaycanda keçirilməsi ölkə üçün böyük uğurdur.

Bu fikirləri AŞPA-nın bazar ertəsi öz işinə başlayan yaz sessiyası çərçivəsində keçirdiyi mətbuat konfransında qurumun sədri Mövlud Çavuşoğlu Azərbaycandakı vəziyyətə münasibət bildirərkən deyib.

“Öncə Azərbaycan hakimiyyətini ölkədə Ümumdünya Mədəniyyətlərarası Dialoq Forumunun keçirilməsi münasibətilə təbrik edirəm. Bu, Azərbaycan üçün böyük uğur idi. Bu mövzu mənim diqqət yetirdiyim prioritet məsələlərdən biridir. Buna gorə Forumda iştirak etməyə qərar verdim. Bu toplantı həm təşkili, həm də iştirakçılar baxımından yüksək səviyyədə keçirildi”, - Çavuşoğlu deyib.

AŞPA sədri Azərbaycanda ümumi vəziyyətin ölkə üzrə həmməruzəçilər tərəfindən nəzarətdə saxlandığını bildirib.

“Azərbaycanda ümumi vəziyyətə gəldikdə, ölkə üzrə həmməruzəçilər vəziyyəti nəzarətdə saxlayırlar. Bu yaxınlarda onlar Azərbaycana səfər ediblər. Mən Azərbaycana son səfərim zamanı ölkə Prezidenti cənab İlham Əliyev, xarici işlər naziri və Milli Məclisin sədri ilə görüşmək imkanı əldə etdim. Görüşlər zamanı AŞPA tərəfindən demokratiya və insan hüquqlarına dair veriləcək bütün lazımi mesajları onların diqqətinə çatdırdım. Bundan başqa, aparılacaq vacib islahatları da diqqətə çatdırdım. Eyni zamanda, bu yaxınlarda mitinqlər zamanı həbs edilmiş şəxslərin tezliklə azad olunması məsələsi də müzakirə edildi. Bu məsələdə müsbət təminatlar aldım. Mən xüsusilə, Milli Məclis sədrindən lazım olan qanun layihələrinin qəbul edilməsinin zəruriliyini xahiş etdim. Bu məsələ son parlament seçkiləri ilə bağlı hesabatda da əksini tapıb. Bundan başqa, Azərbaycanın xarici işlər nazirinin müavini ilə Belarusdakı vəziyyət haqqında da müzakirələr apardım. Bildiyiniz kimi, Azərbaycan Avropa İttifaqının “Şərq tərəfdaşlığı” proqramına daxildir, halbuki Belarus bu proqramdan kənar edilib. Mən onunla AŞ ilə Belarus arasındakı münasibətlərə dair fikir mübadiləsi apardım. Ondan Azərbaycanın bu məsələdə vasitəçi rolu oynayaraq, Mİnskdən müsbət addımların atması istiqamətində səy göstərməyi xahiş etdim. Mən bütün üzv ölkələrdən Belarusda hadisələrin müsbət inkişaf etməsi üçün addımlar atmağı xahiş etmişəm”, - AŞ PA sədri əlavə edib.

İki sahil.-2011.- 12 aprel.- S. 19.