Gəncliyə böyük önəm verən sivil, demokratik respublika

Yeni Azərbaycan Partiyası Sabunçu rayon təşkilatında keçirilən tədbirdə gənclər Heydər Əliyev ideyalarına sadiqliklərini, Prezident, YAP sədri İlham Əliyevlə həmrəyliklərini partiya sıralarına daxil olmaqla bir daha təsdiqlədilər

Yeni Azərbaycan Partiyası Sabunçu rayon təşkilatında “YAP və müasir Azərbaycan gəncliyi” mövzusunda toplantı keçirildi.

Mərasimi giriş sözü ilə açan və rayon gənclərinin elmdə, təhsildə, ictimai işlərdə qazandıqları uğurlar barədə məlumat verən YAP Sabunçu rayon təşkilatının sədri Mehriban Abasquliyeva bildirdi ki, Prezident, YAP sədri İlham Əliyevin müxtəlif sahələrdə uğur qazanmış bir qrup gənc və tələbə gənclər təşkilatlarının nümayəndələri ilə keçirdiyi görüş yeni nəslin təmsilçilərində daha böyük nailiyyətlər üçün stimul yaratmışdır. Görüşün ümummilli lider Heydər Əliyevin anadan olmasının 88 və müstəqilliyimizin 20-ci ildönümünə həsr olunduğunu diqqətə çatdıran təşkilat sədri vurğuladı ki, YAP Sabunçu rayon təşkilatında birləşən 7500-dən artıq üzvün 2500-nü gənclər təşkil edir:

- YAP-ın üzvü olmaqdan daim qürur duyan rayonumuzun gəncləri respublikada aparılan genişmiqyaslı quruculuq işlərində, partiyanın ətrafında möhkəm birləşərək sağlam əqidəli qüvvə kimi ölkənin ictimai-siyasi həyatında fəal iştirak edirlər. Prezident İlham Əliyevin imzaladığı sərəncama əsasən hazırlanacaq “Azərbaycan gəncliyi Dövlət Proqramı”nda konkret vəzifələrin yer alacağı barədə tövsiyələr yeni nəslin nümayəndələrini daha da ruhlandırmışdır.

Azərbaycanda görülən işlər, aparılan uğurlu siyasət ,ölkəmizin beynəlxalq aləmdə, dünya birliyində qazandığı böyük nüfuz göz qabağındadır. Sözsüz ki, bu tərəqqi, dinamik inkişafın aparıcı qüvvəsi olan, fəaliyyətinin əsas prinsiplərini yenilik və müasirlik təşkil edən Yeni Azərbaycan Partiyasına inam və etimadı daha da artırır.

Azərbaycanın müasir gəncliyini yenilməz qüvvə adlandıran Yeni Azərbaycan Partiyası sədrinin müavini, icra katibi, millət vəkili Əli Əhmədov gənclərlə bağlı fikirlərini açıqladı. Bildirdi ki, respublikamızın gələcək inkişaf perspektivləri, iqtisadiyyatımızın tərəqqisi, gələcək planlarımız, biri-birindən əhəmiyyətli islahat və layihələr gənclərin iştirakı ilə həyata keçiriləcək:

- Yeni Azərbaycan Partiyasında birləşən gənclərə böyük siyasi qüvvə kimi daim önəm verilir. YAP-da ürəyi vətənpərvərlik duyğuları ilə dolu olan bugünkü gəncliyin mövqeyinin müəyyənləşdirilməsi, potensialından səmərəli istifadə və özünü ifadə etməsi baxımından əlverişli mühit yaradılıb. Azərbaycanın dünəni olduğu kimi bu günü, sabahı da YAP-ın adı ilə bağlıdır. Partiyamız müasir gəncliyin həyat mövqeyinin müəyyənləşdirilməsi, gələcəyinin düzgün istiqamətləndirilməsi baxımından ən demokratik təşkilatdır.

YAP-ın gücü, əzəməti və gələcəyə olan perspektivləri xalqın ümumi rəyini ifadə edən ideyalara söykənir. Partiyanın yaradıcısı və qurucusu ümummilli lider Heydər Əliyev təşkilatın formalaşması üçün elə mükəmməl və əbədiyaşar prinsiplər müəyyənləşdirmişdir ki, bu göstəricilərdə partiya üzvlərinin və bütünlükdə xalqın partiyamıza, ölkəmizin gələcəyinə bəslədiyi bütün ümidlər ifadəsini tapır.

YAP-ın yarandığı o çətin dövrləri xarakterizə edən Əli Əhmədov bildirdi ki, xilaskar bir siyasi təşkilat kimi fəaliyyətə başlayan partiyamız ona bəslənilən ümidləri həmişə doğruldub. Partiya təsis olunduğu ilk günlərdən insanların istək və arzularını həyata keçirməklə vətəndaşları yaşadıqları bəlalardan xilas etmək missiyasını yerinə yetirdi. İnsanların bütün istək və arzuları, partiyanın qurucusu, xilaskar, ulu öndər Heydər Əliyevlə bağlı bütün niyyətləri, sabitlik və əmin- amanlığın yaradılması YAP ətrafında birləşənlərin birgə səyi ilə təmin olundu.

“Partiya yaranandan qısa müddət sonra ümummilli lider Heydər Əliyev Azərbaycanın Prezidenti seçildi. YAP-ın ideya əsaslarını təşkil edən taleyüklü məsələlərin ardıcıl olaraq həyata keçirilməsi imkanı genişləndi” söyləyən icra katibi vurğuladı ki, ölkədə siyasi sabitliyin yaranması, insanları narahat edən problemlərin həlli, iqtisadi tənəzzüldən xilas olmaq istiqamətləri dövlət siyasətinin əsasını təşkil etməklə YAP-ın proqram və nizamnaməsinin də başlıca prinsipləri kimi xalq tərəfindən dəstəkləndi:

- Azərbaycanı dağılmaq təhlükəsi həddinə çatdıran təhlükəli proseslər qarşıdurmalar ulu öndər Heydər Əliyevin müdrikliyi , qətiyyəti sayəsində aradan qaldırıldı. Bu gün də ölkə vətəndaşları tərəfindən dəstəklənən siyasi sabitlik mühiti yaradıldı. Bu müstəvidə Azərbaycan iqtisadiyyatının inkişafına təkan verən önəmli islahatlar həyata keçirildi. Ötən əsrin 90-cı illərinin əvvəllərində iqtidarda olan naşı “dövlət rəhbərlərinin” səriştəsizliyi üzündən Azərbaycanın xarici siyasət sahəsində üzləşdiyi çətinliklər aradan qaldırıldı. Region və iqtisadi cəhətdən daha inkişaf etmiş qüdrətli dövlətlərlə birbaşa əlaqələr yaradıldı. Ölkəmizə beynəlxalq dəstəyin əsası da məhz Heydər Əliyev uzaqgörənliyi sayəsində təşəkkül tapdı.

Qeyd olundu ki, Azərbaycanın hamını heyrətləndirən bugünkü iqtisadi inkişafının əsasını təşkil edən və Heydər Əliyev dühasının məhsulu olan neft strategiyasının həyata keçirilməsi ilə çoxları üçün əlçatmaz, reallığı təsəvvür edilməyən ən çətin problemlər aradan qaldırıldı. Bu strategiyaya maraq göstərən, neft müqavilələrində iştirak etmək istəyən dövlətlərin artması ilə Azərbaycana investisiya axını sürətləndi, sosial -iqtisadi inkişafın intibah dövrü başladı.

Ölkəmizin dünya birliyində mövqeləri möhkəmləndi. Azərbaycana getdikcə artan maraqların təməlində də ölkəmizin zəngin neft yataqlarına malik olması və bu təbii sərvətdən düzgün, xalqın maraqları, maddi-rifah halının yüksəlməsi və dövlətçiliyin möhkəmlənməsi naminə istifadənin düzgün istiqamətləndirilməsi amili dayanır.

- Azərbaycanın belə yüksək reytinqə sahib olması Heydər Əliyev ideyalarının təntənəsidir. Məhz bu ideyalar əsasında fəaliyyət göstərən YAP milli birlik, həmrəylik prinsiplərini əsas tutaraq yeni müasir Azərbaycan naminə fəaliyyət istiqamətlərini genişləndirdi. Bu gün də ölkəmiz bu prinsip və ideyalar əsasında inkişaf etdirilir. Bu ideyaların dəstəklənməsinin ən bariz nümunəsi isə Heydər Əliyev məktəbinin yetirməsi İlham Əliyevin Prezident seçilməsi oldu. Xalq ona dövlət başçısı kimi böyük ümid və etimad bəsləyərək ardınca inamla addımlayır.

Azərbaycanın son illərdə sürətli inkişafı barədə gənclərə açıqlama verən Əli Əhmədov vurğuladı ki, son yeddi ildə iqtisadi göstəricilərin 3 dəfə artması dünya təcrübəsində çox az hallarda rast gəlinən reallıqdır. Azərbaycan iqtisadiyyatının dinamik inkişafı, əhalisinin yaşayış səviyyəsinin yüksəlməsi ilə region və MDB respublikaları arasında fərqlənən qüdrətli bir ölkədir:

- İnsanların həyat səviyyəsinin keyfiyyəti müasir tələblərə uyğun dəyişilir. Ölkəmizin modernləşdirilməsi istiqamətində aparılan islahatlar nəticəsində tək paytaxtımız deyil, bütün bölgələrin siması gözəlləşir. Bu keyfiyyət dəyişikliyi bütün parametrlər üzrə hiss olunur. Müasirlik insanlarımızın həyatında, məişətində diqqəti cəlb edir. Bunlar Heydər Əliyev ideyalarına uyğun fəaliyyət prinsiplərinin reallaşması deməkdir. Bu ideyaları gerçəkləşdirən ulu öndərin varislik məktəbini davam etdirən Prezident İlham Əliyev siyasətidir. Bütün ölkə vətəndaşları dərk edirlər ki, ulu öndərin siyasəti bu günədək Azərbaycan xalqına xidmət etdiyi, ölkə əhalisinə rahat yaşam tərzi bəxş etdiyi kimi inkişafın, sabitliyin əsasını təşkil edən bu fundamental siyasət özünü doğruldur. Bu ideyalara sadiqlik göstərən YAP-ın ətrafında birləşən 500 mindən artıq sağlam əqidəli insan bu istiqamətdə üzərlərinə düşən vəzifələri aydın başa düşür və həyata keçirir.

Əli Əhmədov vurğuladı ki, partiyanın ətrafında hər cür fədakarlığa hazır olan insanların toplaşması, belə yüksək reytinq qazanması partiyanın yaradıcısının ideyalarına, təşkilatın sədri Prezident İlham Əliyevə tükənməyən inam və etimaddan qaynaqlanır:

Bu ideyalara sədaqət gənclər arasında daha böyükdür. YAP gənclərin ideya və ideallarının həyata keçirilməsi üçün nəhəng, siyasi cəhətdən sağlam və münbit təşkilatdır.

Yeni Azərbaycan Partiyası özünü ifadə etmək üçün sıralarımıza qoşulan hər bir gənc üçün siyasi təkmilləşmə məktəbidir. Gənclərin maraqlarına uyğun fəaliyyət proqramının həyata keçirilməsi üçün partiyamız böyük potensial və imkanlara malikdir. Həyata keçirilən bütün islahatların mərkəzində bu prinsiplər dayanır: Azərbaycanı inkişaf etdirmək, müasirləşdirmək və modernləşdirmək. Bu siyasəti yalnız gələcəyimiz olan gənclərin birgə iştirakı, birliyi və həmrəyliyi ilə həyata keçirəcəyik.

Bu tələb Prezident, YAP-ın Sədri İlham Əliyev ideyası və gənclər siyasətinin əsas bazasını təşkil edir. Prezident İlham Əliyevin sərəncamına əsasən 2011-2015-ci illərdə Azərbaycan gəncliyinin inkişafı ilə əlaqədar Dövlət Proqramının hazırlanması da yenilməz qüvvə olan yeni nəslə inam və etimaddan qaynaqlanır.

Son vaxtlar bəzi bədxah qüvvələrin Azərbaycanda siyasi sabitliyin pozulması üçün keçirdikləri qanunsuz aksiya və mitinqlərə toxunan Əli Əhmədov bildirdi ki, belə qaragüruhçulara layiqli cavab verən ölkə gəncləri Prezident İlham Əliyevlə həmrəyliklərini ifadə edərək radikal düşüncəli siyasətbazlara “yox” dedilər. Qərəzli niyyətlərini həyata keçirmək istəyən və Azərbaycanın müstəqilliyini istəməyən qüvvələrə xidmət edənlər bir daha dərk etdilər ki, Azərbaycanın gələcəyini etibar edəcəyimiz müasir gənclik Heydər Əliyev yolu ilə irəliləyərək, bu ölkəni inkişaf etdirməklə, respublikada sabitliyi qoruyan Prezident İlham Əliyev ətrafında daha sıx birləşir. Çünki Azərbaycan gəncliyə ən böyük önəm verən sivil, demokratik respublikadır.

Gənclər adından çıxış edən Yeni Azərbaycan Partiyası Sabunçu rayon təşkilatı Gənclər Birliyinin sədri Lamiyə Cəlilova, GB İdarə Heyətinin üzvü Məhəmməd Əsədov bildirdilər ki, bugünkü gənclik Heydər Əliyev yolu ilə inamla irəliləyərək Prezident İlham Əliyev siyasətini dəstəkləyir.

Tədbirdə ulu öndər Heydər Əliyevin anadan olmasının 88-ci ildönümünə həsr olunmuş inşa yazı olimpiadasının qalibləri - Lalə Hacıyeva, Gilas Mehdizadə, Şəmistan Heydərli fəxri diplom və hədiyyə ilə mükafatlandırıldılar. Sonda YAP-a daxil olan bir qrup gəncə üzvlük vəsiqələri təqdim olundu.

Yığıncaqda Yeni Azərbaycan Partiyası icra katibinin müavini, millət vəkili Mübariz Qurbanlı, YAP Gənclər Birliyinin sədri Seymur Orucov iştirak edirdilər.

Xuraman İsmayılqızı

İki sahil.- 2011.- 27 aprel.-S. 5.