Şöhrəti də var, səfası da

"Naftalan" sanatoriyası sözlərini eşidəndə yadımıza qohum- qonşunun, ailə üzvlərimizin, həmsöhbətlərimizin, bu müalicə ocağından xoş, razılıq əlamətləri ilə dolu xatirələri düşür; "Cəmi bir dəfə olmuşam, hələ də xeyrini hiss edirəm", "Başqa ölkələrdən axışıb müalicəyə gəlirlər, biz burdan-bura gedib müalicə olunmamışıq", "Hələ Sovet vaxtı orda olmuşam, dizlərimin ağrısı da o vaxt getdi", "Qəbul etmədiyim dərman qalmayıb, sümüklərimin sızıltısı məni öldürürdü, sən demə, heç bir dərman lazım deyilmiş, iki kurs müalicə keçdim orda, elə bil anadangəlmə oldum."

"Naftalan" sanatoriyasının üstünlüyü etdiyin istirahətin əslində müalicə olmasındadır. Heç kəsə sirr deyil ki, bu müalicə ocağına tələbat həmişə böyük olduğundan yollayışları istənilən vaxt tapmaq çətin olmuşdur. İndi isə mənzərə tamam başqadır. Respublikamızda aparılan yenidənqurma, abadlıq, quruculuq, inşaat işləri nəticəsində yeni infrastruktur yaranmaqdadır. Naftalan qəsəbəsi də bu işlərdən kənarda qalmamışdır. Yeni yollar, yeni sosial obyektlər inşa edilmişdir. Əlavə korpusların tikilməsi "Naftalan" sanatoriyasının imkanlarını xeyli genişləndir-mişdir. Burada insanların rahatlığı üçün hər cür şərait yaradılmışdır. Neftçilərin tələbatları nəzərə alınaraq ARDNŞ rəhbərliyinin təşəbbüsü ilə Azərbaycan Neft və Qaz Sənayesi Işçiləri Həm-karlar ittifaqı Respublika Komitəsi sanatoriyanın korpuslarından biri olan "Qaşaltı" kompleksindən müqavilə əsasında istifadə etməyə qərar vermiş və bu təqdirəlayiq iş uğurla həyata keçməkdə-dir.

Ümummilli liderimiz Heydər Əliyevin adını daşıyan zavodumuzun xeyli sayda işçisi artıq sanatoriyada müalicə olunmuşdur. Onlar bu şəfa ocağında yaradılmış şəraitdən, müalicədən və "Qaşaltı" sanatoriyasının baş həkimi Xurşud Namazəliyevadan, "Naftalan" şöbəsinin müdiri Şahin Babayevdən, eləcə də poliklinika şöbəsinin müdiri Afət Dəmirovadan dönə-dönə razılıq edirlər. Bu insanların xoş sözləri, razılıqları sümük-oynaq xəstəliklərindən əziyyət çəkən digər işçiləri də müalicə olunmalarına və şəfa tapacaqlarına xeyli ümidləndirmişdir. Məhz bu səbəb-dən, müalicə olunmaq üçün yollayış almaq istəyən işçilər zavod Həmkarlar ittifaqına müraciət edirlər. Müraciətlərin hamısı müsbət qarşılanır və bu işçilər sanatoriyaya göndərilirlər.

Şahin Şıxəliyev, Hevdər Əlivev adına Bakı Neft Emalı Zavodu Həmkarlar İttifaqı

Komitəsinin təlimatçısı. Azərbavcan Jurnalistlər Birlivinin üzvü

İki Sahil.- 2011.- 3 dekabr.- S. 15.