Bu günün reallıqları, inkişaf tempi, perspektivlər

Azərbaycanın bugünkü inkişaf yolu ulu öndər Heydər Əliyevin 18 il əvvəl xilaskarlıq missiyasını üzərinə götürməklə başlanıb

Bu il Azərbaycanın dövlət müstəqilliyinin yenidən bərpa olunmasının 20 ili tamam olur. Dövlət başçısı İlham Əliyevin Azərbaycanın dövlət müstəqilliyinin bərpasının iyirmiillik yubileyinin ölkəmizin həyatında müstəsna əhəmiyyət daşıyan ictimai-siyasi hadisə olduğunu önə çəkərək, müstəqillik illərində ölkəmizin keçdiyi zəngin inkişaf yolunda qazandığı parlaq nailiyyətlərin təbliğini təmin etmək məqsədi ilə imzaladığı “Azərbaycan Respublikasının dövlət müstəqilliyinin bərpasının iyirminci ildönümü haqqında” sərəncamda da ötən dövr ərzində hər sahədə qazanılan uğurlarımız geniş təhlil olunur, bu nailiyyətlərin gələcəyə böyük inamla baxmağa əsas verdiyi bildirilir.

Hələ ötən əsrin 70-ci illərindən başlayaraq ulu öndər Heydər Əliyevin strategiyasına uyğun respublikamızda həyata keçirilən genişmiqyaslı proqramlar müasir iqtisadi potensialın formalaşdırılmasına, sosial-mədəni həyatın canlandırılmasına və milli mənəvi dəyərlərin dirçəldilməsinə yönəldilərək gələcək müstəqilliyimizin təmin olunması üçün zəmin hazırlamışdı. Sovetlər birliyinin dağılmasının qaçılmaz şəkil alması onun tərkibinə daxil olan bütün müttəfiq respublikalara müstəqillik əldə etmək imkanı yaratdı. Azərbaycan 1991-ci il oktyabrın 18-də qəbul etdiyi “Azərbaycan Respublikasının Müstəqilliyi haqqında Konstitusiya Aktı” ilə Azərbaycan Xalq Cümhuriyyətinin varisi olduğunu bəyan edərək öz dövlət müstəqilliyini və suverenliyini beynəlxalq aləmə bildirdi.

Yenicə müstəqillik qazanmış hər bir dövlətin qarşısında həllivacib məsələlər dayanır. Bu vəzifələrin yüksək səviyyədə yerinə yetirilməsi, qarşıya qoyulan məqsədə nail olmaq üçün düzgün yol seçmək mütləqdir. Bu yolun düzgün müəyyənləşdirilməsi isə ölkəyə rəhbərlik edən liderdən asılıdır. Müstəqilliyimizin ilk illərində ölkəyə şəxsi maraqlarını dövlətin mənafeyindən üstün tutan qüvvələrin rəhbərlik etməsi, bunun nəticəsi olaraq geniş vüsət alan hərc-mərclik, iqtisadiyyatın zəiflədilməsi və milli sərvətlərin talan edilməsi dərin siyasi və iqtisadi-sosial böhranla nəticələndi. Azərbaycan parçalanmaq, bir dövlət olaraq dünya xəritəsindən silinmək təhlükəsi ilə üz-üzə qaldı. Belə bir çətin məqamda xalq öz xilaskarına-ulu öndər Heydər Əliyevə üz tutdu. Dahi şəxsiyyətin xalqın səsinə səs verib, ölkəni düşdüyü bu çətin durumdan xilas etmək üçün ciddi səylər göstərməsi bir daha bu reallığı təsdiqlədi ki, onun üçün hər şeydən əziz xalqıdır, Vətənidir, torpağıdır.

Ulu öndər Heydər Əliyev 1993-cü ildə xalqın təkidli tələbi ilə hakimiyyətə qayıdışından sonra seçdiyi düzgün yolla Azərbaycanı xaosdan sabitliyə, iqtisadi tənəzzüldən tərəqqiyə doğru apardı. Heydər Əliyev bildirirdi: “Mənim həyatım da, fəaliyyətim də yalnız və yalnız Azərbaycanın müstəqilliyinin qorunub saxlanılmasına, ölkəmizin bu ağır vəziyyətdən qalxmasına həsr olunacaqdır. Mənim başqa məqsədim, amalım yoxdur. Bunu isə mən xalqla birlikdə, xalqın dəyərli insanları, hörmətli adamları ilə, xalqın irəli çəkdiyi nümayəndələri ilə birlikdə edə bilərəm.”

Ulu öndər iyunun 9-da Naxçıvandan Bakıya gəldi, sonra isə qanlı hadisələrin mahiyyətini öyrənib vətəndaş müharibəsinin alovlanmasının qarşısını almaq üçün Gəncəyə getdi. Heydər Əliyevin həm Bakıda, həm də Gəncədə əhali ilə görüşlərinin, AXC-Müsavat hakimiyyəti üzərinə qalxmış Surət Hüseynovla apardığı danışıqların nəticəsi bu oldu ki, Bakıya yürüş edən silahlı dəstələr geri qaytarıldı, vətəndaş müharibəsi təhlükəsi sovuşdu, xalqda sabaha inam yarandı. Xalqına arxalanan ulu öndər Heydər Əliyev bu birlik sayəsində bugünkü inkişafın təməlini qoydu.

Bu günlərdə enerji sektorunda mühüm hadisə kimi dəyərləndirilən 18-ci Xəzər neft, qaz, neftayırma və neft kimyası sərgisində çıxışında dövlət başçısı İlham Əliyev bir daha müstəqilliyimizin ilk illərində Azərbaycanın yaşadığı bu ağır durumu diqqətə çatdıraraq bildirmişdir: “Müstəqilliyə qovuşanda ölkəmiz əlbəttə ki, yeni çağırışlarla üzləşmişdir. Müstəqilliyimizin ilk illəri ölkəmiz üçün çox ağır keçmişdir. Ölkədə qeyri-sabit vəziyyətin mövcud olduğu, vətəndaş müharibəsinin başlandığı, total böhranın hökm sürdüyü bir zamanda Azərbaycan müstəqil ölkə kimi ilk addımlarını atmağa başlamışdır. Əlbəttə ki, ölkəmizin gələcəyi üçün lazımi tədbirlərin görülməsi böyük bir zərurət idi. Azərbaycanın bəxti gətirmişdir ki, ölkəmiz üçün həlledici anlarda böyük dövlət xadimi, ulu öndər Heydər Əliyev Azərbaycanın rəhbərliyinə gəlmişdir. Dövlətimizin və dövlətçiliyimizin əsasları məhz onun siyasəti nəticəsində formalaşmışdır. Azərbaycanda dövlətçiliyin əsasları qoyulmuş, hüquqi dövlət quruculuğu prosesi başlanmışdır. Ölkədə siyasi və iqtisadi islahatlar aparılmağa başlanmışdır. Ölkəmizin iqtisadi müstəqilliyinin əldə edilməsi üçün konkret addımlar atılmağa başlanmışdır. Onların içində ən mühüm və tarixi əhəmiyyətə malik olan hadisə 1994-cü ildə “Əsrin kontraktı”nın imzalanması idi.”

Ulu öndər Heydər Əliyev sabitliyi hər bir inkişafın əsası kimi önə çəkərək, uğurlu daxili siyasəti nəticəsində ölkədə ictimai-siyasi sabitliyi yaratdı. Dövlət müstəqilliyimizi möhkəmləndirmək, xarici dövlətlərlə iqtisadi-siyasi münasibətləri yeni müstəvidə inkişaf etdirmək, Ermənistan-Azərbaycan döyüş bölgəsində atəşkəsə nail olmaq, güclü ordu yaratmaq üçün imkanları artırmaq qarşıda dayanan əsas vəzifələr idi. Bu vəzifələrin yüksək səviyyədə yerinə yetirilməsi üçün ilk növbədə atəşkəs sazişinin imzalanmasının vacibliyi önə çəkildi. 1994-cü ilin mayın 12-də ulu öndər Heydər Əliyevin gərgin səyləri nəticəsində Ermənistanla Azərbaycan arasında atəşkəs sazişi imzalandı.

Ölkədə yaradılan sabitlik, normal biznes mühiti xarici investorları Azərbaycana cəlb etdi. 1994-cü ildə Azərbaycan çox riskli bir dövlət kimi tanınsa da, sonrakı illərdə xarici neft şirkətlərinin Azərbaycana dəvət edilməsi, onların investisiyalarının qorunması üçün lazımi tədbirlərin görülməsi, qanunvericilik sahəsində lazımi addımların atılması sayəsində bu gün ölkəmiz etibarlı tərəfdaş kimi mövqeyini möhkəmləndirməkdədir. 1994-cü ilin sentyabrında “Əsrin müqaviləsi”nin imzalanması ilə Azərbaycanın iqtisadi inkişafının təməli qoyuldu. Bu gün reallıq sayılan layihələr o illərdə əfsanəvi ideyalar kimi təqdim edilirdi. Bakı-Tbilisi-Ceyhan, Bakı-Tbilisi-Ərzurum nəinki Azərbaycanın inkişafını müəyyən etdi, eyni zamanda, bölgədə və regionda tamamilə yeni situasiyanı yaratdı. Dövlət başçısı İlham Əliyev ulu öndər Heydər Əliyevin müəllifi olduğu neft strategiyasının ölkəmizə qazandırdığı uğurları önə çəkərək bildirir ki, biz bütün imkanlardan istifadə edib daim irəliyə baxmalıyıq. Hər bir sahə üzrə proqramların mövcudluğu, onların xalq tərəfindən dəstəklənməsi gələcək uğurlara böyük yol açır. Bir sözlə, bu günün reallıqları ulu öndər Heydər Əliyevin vaxtilə söylədiyi “Əsrin müqaviləsi ilə qoyduğumuz təməl XXI əsrdə Azərbaycan xalqının inkişafı, firavan həyatı, müstəqil Azərbaycan dövlətinin suverenliyinin daha da möhkəmləndirilməsi üçün gözəl imkan yaradacaq” fikrini təsdiqləyir. 1995-ci ildən bu günə qədər ölkə iqtisadiyyatına ümumilikdə 97 milyard dollar investisiyanın qoyulması Azərbaycanın gələcəyinə olan inamın təsdiqidir. Ölkəmizdə iqtisadi sahədə əməkdaşlıqda maraqlı olan dövlətlərin sayı artmaqdadır. Tarixən neft ölkəsi kimi tanınan Azərbaycan bu gün beynəlxalq aləmdə qaz ixracatçısı kimi nüfuz qazanıb. Dünyanın enerji təhlükəsizliyinin təminatında oynadığı rol təqdir olunur. Təbii ki, bu uğurların əsasında düzgün qurulan siyasət dayanır. Ulu öndər Heydər Əliyev Azərbaycanın dövlət müstəqilliyini tarixi nailiyyət kimi dəyərləndirərək, onun qorunmasını, daha da möhkəmləndirilməsini hər bir Azərbaycan vətəndaşının qarşısında mühüm vəzifə kimi qoyurdu: “Heç bir qüvvə Azərbaycanın müstəqilliyini əlindən ala bilməz, bundan sonra heç bir qüvvə Azərbaycanın dövlət müstəqilliyini məhv edə bilməz.”

Ulu öndər Heydər Əliyevin düşünülmüş və məqsədyönlü siyasətinin hazırda Prezident İlham Əliyev tərəfindən uğurla davam etdirilməsi Azərbaycanın qarşısında geniş imkanlar açır. Keçid dövrünü başa vuran respublikamız bu gün özünün uzunmüddətli inkişaf strategiyasının istiqamətlərini müəyyən edən bir ölkədir. Azərbaycan dünya miqyasında iqtisadi artım sürətinə görə ön sıralarda gedərək islahatçı ölkə kimi tanınır. Dünyanın nüfuzlu maliyyə qurumları hesabatlarında bu faktı xüsusi qeyd edirlər ki, Azərbaycanın inkişaf yolu, əldə etdiyi təcrübə digər ölkələrə nümunədir. Ölkəmizdə həyata keçirilən siyasətin alternativsizliyi beynəlxalq səviyyədə qeyd edilir.

Respublikamızda neft və qeyri-neft sektorlarının yüksəlişi, çoxşaxəli iqtisadiyyatın ahəngdar inkişafı təmin olunub. Ümumi daxili məhsul, büdcə və valyuta ehtiyatları ildən-ilə artmaqdadır. Bu gün dövlət büdcəmiz 20 milyard, valyuta ehtiyatımız isə 34 milyard dollardan artıqdır. Bazar iqtisadiyyatının əsas aparıcı qüvvəsi olan sahibkarlığın inkişafı dövlətin diqqətindədir. Güclü sahibkarlar sinfi və orta təbəqə yaranır. 2003-cü ildən bu günə qədər 900 mindən artıq yeni iş yeri açılıb. İşsizlik, məşğulluq problemlərinin həllinə xidmət edən Dövlət Proqramları uğurla icra edilir.

Bu gün yeganə problemimiz Ermənistan-Azərbaycan, Dağlıq Qarabağ münaqişəsidir. Təbliğatı real faktlara əsaslanan Azərbaycan dövləti sülh danışıqları səmərə vermədiyi təqdirdə hərb variantına üstünlük veriləcəyini istisna etmir. Bu inam ölkəmizin güclü, qüdrətli ordusunun olmasından irəli gəlir. Azərbaycanda ordu quruculuğu prosesi böyük uğurla gedir. Silahlı Qüvvələrimizin peşəkar hazırlıq səviyyəsi, maddi-texniki bazası və döyüş qabiliyyəti möhkəmləndirilir. Ölkəmizdə müdafiə sənayesi inkişaf etdirilir, ilk süni peykimizlə bağlı layihə həyata keçirilir.

Ümumi şəkildə qeyd edə bilərik ki, iyirmi illik inkişaf yolumuzun ən parlaq nəticəsi ondan ibarətdir ki, bu gün Azərbaycan, sözün əsl mənasında müstəqil ölkədir. Ölkəmizdə gerçəkləşdirilən siyasət daim Azərbaycan xalqının maraqlarına xidmət göstərir. Siyasətində müstəqil olan ölkənin böyük uğurlara imza atması və bu nailiyyətlərin davamlılığı qaçılmazdır.

Bu gün Azərbaycan ulu öndər Heydər Əliyevin seçdiyi yolla inamla irəliləyir. Azərbaycanın gələcəyinin yüksək ixtisaslı gənclərlə bağlı olduğunu önə çəkən dövlət başçısı İlham Əliyev bu istiqamətdə mühüm addımlar atır. Möhtərəm Prezidentimiz bildirir ki, kadr hazırlığı iqtisadi inkişafın səviyyəsinə uyğunlaşdırılmalıdır. Müasir texnologiyaların öyrənilməsi və tətbiqi mühüm vəzifə kimi qarşıya qoyulur. Prezident İlham Əliyevin fərmanı ilə “2007-2015-ci illər üçün Azərbaycan gənclərinin xarici ölkələrdə təhsil almaları ilə bağlı Dövlət Proqramı”nın təsdiqlənməsi və uğurla icrası da bu məqsədə xidmət edir.

Gələcəyin ixtisaslı mütəxəssislərinin hazırlanması mexanizminin əsası məktəb illərində qoyulduğu üçün təhsil müəssisələrinin ən müasir İKT avadanlıqları ilə təmin olunmasına başlıca vəzifə kimi diqqət yetirilir. Heydər Əliyev Fondunun bu sahədə xidmətləri böyükdür.

Belə ki, Fondun “Yeniləşən Azərbaycana yeni məktəb” layihəsi çərçivəsində məktəb tikintisinə, yenidən bərpasına, dünya standartlarına cavab verən formada avadanlıqlarla təchiz edilməsinə göstərdiyi diqqət ölkə ictimaiyyəti tərəfindən yüksək dəyərləndirilir. Ulu öndər Heydər Əliyevin “Təhsil millətin gələcəyidir” fikrinin davamı olaraq Prezident İlham Əliyev bildirir ki, dünya təcrübəsi də bu həqiqəti təsdiqləyir ki, ölkənin inkişafında, tərəqqisində neft-qaz amili ilə yanaşı, elmi potensial, yeni texnologiyalar əsas yer tutur. Azərbaycan müasir, sivil ölkədir, dünyanın qabaqcıl ölkələrinin təcrübəsinin öyrənilməsinə və tətbiqinə xüsusi maraq göstərir. Biliyin əsası təbii ki, məktəblərdən qoyulur. Heydər Əliyev Fondunun prezidenti Mehriban xanım Əliyeva çıxışlarında bu fikri daim bəyan edir ki, təhsilin inkişafında bu amilə xüsusi diqqət yetirilməlidir. Məktəblilər dünya standartlarına cavab verən məktəblərdə dərs almalıdırlar. Qeyd olunan Proqram çərçivəsində yüzlərlə məktəb tikilib, lazımi avadanlıqlarla təchiz olunub, istifadəyə verilib.

Bir sözlə, bugünkü uğurlarımız ulu öndərimiz Heydər Əliyevin 18 il əvvəl xilaskarlıq missiyasını üzərinə götürməklə başlanıb. Bu yol Milli Qurtuluş yoludur. 15 iyunun tarixə Milli Qurtuluş Günü kimi daxil edilməsi də bu tarixin əhəmiyyətini, mahiyyətini açıqlayır.

Heydər Əliyevin siyasi kursunun layiqli davamçısı, möhtərəm Prezidentimiz İlham Əliyevin son yeddi ildən artıq dövr ərzində gördüyü işlər, Azərbaycanın əldə etdiyi uğurlar Qurtuluşdan başlanan böyük yolun davamı kimi dəyərləndirilir. Ötən bu dövrün statistikasına diqqət yetirən hər kəsin gözü qarşısında ölkə rəhbərinin xalq, dövlət, vətən naminə gördüyü böyük işlərin geniş mənzərəsi canlanır. Bu inkaredilməz həqiqətdir ki, ölkə rəhbərinin malik olduğu ən böyük kapital xalqın etimadıdır. 2003-cü il prezident seçkilərində xalqın böyük əksəriyyətinin etimadını qazanaraq Prezident seçilən cənab İlham Əliyev beş ildə gördüyü işlərlə, hər bir vədini konkret əməli işdə təsdiqləməklə 2008-ci ildə növbəti dəfə qələbəsini təmin etdi. İlk gündən “Biz Heydər Əliyev yolunu davam etdirəcəyik, bu yola daim sadiq qalacağıq” deyən Prezident İlham Əliyev Azərbaycanı sürətlə irəli aparır. Xalqımız bu günün uğurları fonunda yeganə problemimiz olan Ermənistan-Azərbaycan, Dağlıq Qarabağ münaqişəsinin də tezliklə öz müsbət həllini tapacağına əmindir.

İradə Hüseynova,

Təhsil nazirinin müavini,

tarix elmləri doktoru,

professor,

YAP Siyasi Şurasının üzvü

İki sahil.- 2011.- 13 iyun.- S. 6.