“Əsrin müqaviləsi”-əsrlərin müqaviləsi

Qabaqcıl texnika və texnologiyadan, bilik və təcrübədən isifadə etməklə “Mədəngeofizika” İdarəsi öz üzərinə düşən vəzifələri layiqincə və yüksək keyfiyyətlə yerinə yetirir

Ötən əsrin möcüzəsi kimi tarixə yazılan “Əsrin müqaviləsi”nin imzalanmasından 17 il ötür. Ümummilli lider Heydər Əliyev neft strategiyasını müəyyənləşdirməklə Azərbaycanın inkişafının, iqtisadi müstəqilliyinin əsasını qoydu.

“Əsrin müqaviləsi” Azərbaycanın hərtərəfli inkişafı, qlobal enerji bazarına inamla daxil olması, dünya iqtisadi sisteminə inteqrasiyanın təmin edilməsi üçün münbit zəmin yaratmış və iqtisadiyyatımızın digər sahələrinin də tərəqqisinə güclü təkan vermişdir. “Əsrin müqaviləsi” çərçivəsində görülən işlər ölkəmizə yönəldilən iri həcmli xarici investisiyalara, neft sektorunun tamamilə yeniləşməsinə, texniki və texnoloji cəhətdən inkişaf etməsinə möhkəm əsas yaratmışdır. Bu barədə Geofizika və Geologiya İdarəsinin “Mədəngeofizika” İdarəsinin rəisi Fəxrəddin İsmayılov fikirlərini bizimlə bölüşdü.

F.İsmayılov qeyd etdi ki, “Əsrin müqaviləsi”nin ölkəmiz üçün iqtisadi və siyasi əhəmiyyətini görmək, ən əsası düzgün qiymətləndirmək üçün həmin dövrdən ötən müddət ərzində Azərbaycanın keçdiyi inkişaf yoluna nəzər salmaq kifayətdir. Prezident İlham Əliyev bütün çıxışlarında neft gəlirlərində şəffaflığın təmin olunması məsələsinə diqqəti yönəldir, bunu vacib məsələ kimi qeyd edir. Yeni neft strategiyasında öz ümumi ifadəsini tapan “Əsrin müqaviləsi”nin imzalanması Azərbaycanın bazar iqtisadiyyatı yolunda irəliləməsi üçün zəmin yaratdı. “Əsrin kontraktının”nın imzalanmasından sonra çoxsaylı beynəlxalq müqavilələr imzalandı. Azərbaycan xarici investisiyalar üçün çox cəlbedici ölkə kimi özünü təsdiq etdi. F.İsmayılov yeni neft strategiyasının uğurla icrası ilə “Əsrin müqaviləsi”nin əsrlərin müqaviləsi olacağını vurğuladı. “Əsrin müqaviləsi” ilə qoyduğumuz təməl XXI əsrdə Azərbaycan xalqının inkişafı, firavan həyatı, müstəqil Azərbaycan dövlətinin suverenliyinin daha da möhkəmləndirilməsi üçün gözəl imkan yaradacaq.” Ulu öndər Heydər Əliyevin bu fikrinin davamı olaraq Prezident İlham Əliyevin söylədiyi “Deyə bilərəm ki, Azərbaycanın neft gələcəyi çox parlaqdır. Hesab edirəm ki, respublikamız bundan əldə etdiyi gəliri düzgün xərcləyəcək və beləliklə, iqtisadiyyatımızın bütün sektorları inkişaf edəcəkdir” fikirləri bir daha xatırladan Fəxrəddin İsmayılov bugünkü uğurlarımızın gələcəyə böyük inamla baxmağa əsas verdiyini bildirdi. O, qarşıdan gələn 20 sentyabr - Neftçilər günü münasibətilə ARDNŞ rəhbərliyini, Dövlət Neft Şirkətinin idarə və müəssisələrində çalışan çoxminli neftçi ailəsini təbrik etdi.

“Mədəngeofizika” İdarəsi ARDNŞ-in Geofizika və Geologiya İdarəsinin tərkibində fəailiyyət göstərir. İdarə respublikanın quru və dəniz sahələrində neft, qaz və su quyularında layların kollektor xüsusiyyətlərini öyrənmək üçün mədən-geofiziki tədqiqatlarını aparan, axtarış və kəşfiyyat qazma quyularında geofiziki üsullarla tədqiqat, qazıma prosesinə geoloji, geofiziki və geokimyəvi nəzarət, istismar quyularının işlənməsinə nəzarət, quyularda lay-sınaq və perforasiya-torpedləmə işlərini yerinə yetirən əsas müəssisədir. Qabaqcıl texnika və texnologiyadan, bilik və təcrübədən isifadə etməklə “Mədəngeofizika” İdarəsi öz üzərinə düşən vəzifələri layiqincə, operativ və yüksək keyfiyyətlə yerinə yetirir.

“Mədəngeofizika” İdarəsinin rəisi bildirdi ki, hazırda idarə quyularda geofiziki tədqiqatları aparmaq üçün lazımi istehsal bazasına, təcrübəli mütəxəssislərə, müasir avadanlığa malikdir. İdarə “Rusiya Federasiyasının istehsalı olan “KEDR” tipli, Amerika və İngiltərə istehsalı olan “İNTEQRA” və “GALOP” rəqəmli stansiyalar və yeni quyu cihaz və avadanlıqları ilə açıq və kəmər buraxılmış quyu lüləsində geofiziki tədqiqatların aparılması ilə biləvasitə məşğul olur. Ötən illərdə xarici şirkətlərlə aparılan birgə işlər neftçilərimiz üçün yeni texnologiyalara və qabaqcıl təcrübələrə yiyələnmək baxımından faydalı olmuşdur. Qazanılmış təcrübə, tətbiq olunan müasir texnologiyalar daha böyük nailiyyətlər üçün əsas yaratmışdır.”

F.İsmayılov vurğuladı ki, “Mədəngeofizika” İdarəsinin fəaliyyəti çoxşaxəlidir və Azərbaycanın bütün neft-qaz rayonlarını əhatə edir. Sifariş və yataqların dislokasiyasına uyğun olaraq ekspedisiyalar müxtəlif ərazilərdə yerləşdirilib: “Neft Daşları” MGE Neft Daşlarında, “Bahar” MGE Qum adasında, Səngəçal MGE Qobustanda, Azəri MGE Bayıl Limanında, Bakıxanov MGE Bakıxanovda, Siyəzən MGE Siyəzəndə və Şirvan MGE Şirvanda.

“Mədəngeofizika” İdarəsi yüksək ixtisaslı kadr potensialına malikdir və onlardan bəzisi xaricdə: Rusiyada (Qərbi Sibirdə), İranda (“Ənzəli” və “Meqdal-l”), Türkmənstanda (“Çeleken”), Qazaxıstanda (“Tengiz”) neft-qaz yataqlarının axtarışı, kəşfiyyatı və istismarında yaxından iştirak ediblər.

“Mədəngeofizika” İdarəsinin rəisi əlavə etdi ki, idarə xarici kampaniyalarla birgə geofiziki işlər aparır. İdarənin ixtiyarında müasir texnika və texnologiyanin, təcrübəli və bilikli mütəxəssislərin olması qarşıya qoyulan məsələlərin vaxtında, dəqiq və yüksək səviyyədə yerinə yetirməsinə imkan verir. Hal-hazırda “Mədəngeofizika” İdarəsi Azərbaycanda - “Kompleks Qazma İşləri” Trestinin, “Azneft” İB-nin və “Suraxanı Oyl”, “BinəqədiOyl”, “Şirvan Oyl”, “Azgerneft MM”, “MİP Qaraçuxur ƏŞ”, “Azəriyod”, “SOCAR AQŞ”, “Abşeron Oper. Kompani,” “Qalf Drilling” şirkətlərinin quyularında geofiziki tədqiqat və perforasiya işlərini aparır.

“Mədəngeofizika” İdarəsi Azərbaycanın dəniz akvatoriyasında 14 yataqda - (“Günəşli”, “Neft Daşları”, “Palçıq Pilpiləsi”, “8 Mart”, “Darvin Bankası”, “Pirallahı”, “Qərbi Abşeron”, “Qərb qırışığı”, “Şimal qırışığı”, “Səngəçal dəniz”, “Qum dəniz”, “Bulla dəniz”, “Duvannı dəniz” və “Bahar”). Quru ərazisində isə 35 yataqda (“Bibiheybət”, “Suraxanı”, “Balaxanı”, “Ramanı”, “Buzovna”, “Qala”, “Binəqədi”, “Qaradağ”, “Quşxana”, “Lökbatan”, “Puta”, “Tərsdəllər”, “Kalmas”, “Şabandağ”, “Gürgan”, “Umbakı”, “Xıllı”, “Neftçala”, “Cəfərli”, “Muradxanlı”, “Kirovdağ”, “Kürsəngi”, “Ələt”, “Hövsan”, “Nardaran”, “Qobustan”, “Zəyli”, “Zarat”, “Zığ”) mədən-geofiziki işləri aparır.

“Son zamanlar ARDNŞ Geofizika və Geologiya İdarəsinin təchizat məsələlərinə xüsusi diqqət yetirir” deyən F.İsmayılov məlumat verdi ki, dünya standartlarına cavab verən avadanlıqların alınıb istehsalata tətbiq edilməsi aparılan işlərin texniki səviyyəsini əsaslı surətdə yüksəltməyə imkan verir. (“LEUZA-2” tipli qazma prosesinə nəzarət stansiyası, PKS-5, PKS-7 tipli özüyeriyən karotaj qaldırıcısı, ASEP tipli dəniz stasionar karotaj qaldırıcısı “TUCKER” və “GOWELL” firmasının quyu cihazları, hiroskopik inklinometr və s.) Mədən-geofiziki məlumatların quyu başından idarənin emal və interpretasiya mərkəzinə operativ ötürülməsi üçün İdarə GPRS sistemi ilə tətbiq olunmuşdur. Bu proses uğurla davam etdirilir.

Hesabat ili ərzində idarə kollektivi respublikanın quru və dəniz ərazilərində fəaliyyətdə olan neft-qaz çıxarma və qazma işləri idarələrinin, müştərək və əməliyyat müəssisələrinin quyularında müqavilələr əsasında yüksək texnoloji səviyyədə mədən-geofiziki tədqiqatları, perforasiya-torpedləmə əməliyyatları, qazma prosesinə geoloji-texnoloji-geokimyəvi üsullarla nəzarəti və lay sınaq işləri aparır, xarici təşkilatlara məxsus olan partlayıcı, radioaktiv maddələrin saxlanılması və daşınması xidməti həyata keçirib.

Orxan Vahidoğlu

İki sahil.- 2011.- 8 sentyabr.- S. 11.