“ARDNŞ Yay məktəbi-2011” layihəsi uğurla başa çatmışdır

Layihə iştirakçılarına sertifikatlar təqdim olundu

“Əgər inkişaf etmiş ölkələrin təcrübəsinə nəzər salsaq görərik ki, həmin ölkələrin uğurlarının təməlində ideya, fikir, innovasiya, elmi-texniki tərəqqi dayanır. Biz də ölkəmizdə müxtəlif istiqamətlərdə islahatlar apararkən müasirləşməyə üstünlük veririk. Müasir dövlətin qurulması elmin inkişafı olmadan mümkün deyildir.” Prezident İlham Əliyev elmin, təhsilin və iqtisadiyyatın birliyinin yaradılmasını qarşıya mühüm vəzifə kimi qoyur. Yeni texnologiyaların tətbiqinin uğurların davamlılığının təmin edilməsində vacib amillərdən biri olduğunu nəzərə alsaq, kadr hazırlığının günümüzün əsas tələbi olduğu birmənalıdır.

Kadr hazırlığı ölkə iqtisadiyyatının inkişafına töhfələr verən ARDNŞ-in də fəaliyyətinin əsas istiqamətlərindəndir. Perspektivli gənc neftçi mütəxəssislərin yetişdirilməsi, istedadlı tələbələrin neft-qaz sənayesi üzrə müasir elmi və təcrübi biliklərə yiyələnməyə həvəsləndirilməsi məqsədilə ARDNŞ tərəfindən ölkədə fəaliyyət göstərən bütün ali təhsil müəssisələrinin tələbələri üçün təqaüd təsis edilməsi, ölkə Prezidenti İlham Əliyevin tapşırığına əsasən 2006-cı ildən Təqaüd Proqramının həyata keçirilməsi deyilənlərin təsdiqidir. Proqram çərçivəsində hər il 50 tələbəyə xarici ölkələrin ən nüfuzlu universitetlərində neft ixtisasları üzrə təhsil almaq imkanı yaradılır. Tələbələr Təqaüd Proqramında iştirak etməklə, həmçinin təhsillərini başa vurduqdan sonra regionun ən nüfuzlu şirkətlərindən olan ARDNŞ-də ixtisasları üzrə işləmək imkanı əldə edirlər.

Artıq ötən ildən bu proqram çərçivəsində “Yay təcrübəsi” və “Yay məktəbi” layihələri həyata keçirilir. Dünən ARDNŞ prezidenti Rövnəq Abdullayevin “Yay məktəbi” layihəsinin iştirakçıları ilə görüşü keçirildi.

ARDNŞ-in prezidenti layihənin iştirakçılarını salamladıqdan sonra şirkətin kadr hazırlığı istiqamətində atdığı addımlardan geniş bəhs etdi. Bildirdi ki, ötən ildən başlayaraq keçirilən “Yay təcrübəsi” və “Yay məktəbi” layihələri də görülən işlərin tərkib hissələrindəndir. Məqsəd ölkə daxilində və xaricdə təhsil alan tələbə və gənc mütəxəssislərin enerji sektoruna marağını artırmaqdır.

Artıq “Yay məktəbi” layihəsinin başa çatdığını qeyd edən R.Abdullayev bildirdi ki, iki həftə ərzində iştirakçıların əldə etdikləri bilik onların gələcək fəaliyyətinə təsirsiz olmayacaq. Bu müddət ərzində onlar şirkətin vitse-prezidentləri ilə görüşlər keçirmiş, ARDNŞ-in fəaliyyət istiqamətləri və görülən işlər barədə dolğun məlumatlar əldə etmiş, idarə və müəssisələrdə olaraq istehsalat prosesi ilə yaxından tanış olmuşdular. Bunlar tələbələrə həm təhsillərini davam etdirdikləri, həm də işlədikləri müddətdə təhsillə iqtisadiyyatın birliyini yaratmaqda yardımçı olacaq.

R.Abdullayev ötən illə müqayisədə builki “Yay məktəbi”nin iştirakçılarının sayında və müddətində nəzərə çarpan dəyişikliyi önə çəkərək bildirdi ki, bu, bir daha ARDNŞ-in kadr hazırlığına xüsusi diqqət yetirdiyini təsdiqləyir. Layihə iştirakçıları ilə keçirilən görüşlərdən ümumi qənaət bu olmuşdur ki, onların təəssüratları böyükdür. Gənclərin bilik qazanmaqla yanaşı öz aralarında səmimiyyət qurmaları, müxtəlif mövzularda müzakirələr aparmaları intellektual səviyyələrinin artmasına da öz müsbət təsirini göstərəcək.

Azərbaycan hələ qədim dövrlərdən bütün dünyada odlar diyarı, neft ölkəsi kimi tanınmış, dünya neft tarixinə bir çox yeniliklərlə imza atıb.

Layihə iştirakçılarının bu müddətdə Azərbaycanın neft tarixi, neft sənayesinin keçdiyi inkişaf yolu barədə ətraflı məlumat əldə etdiyini vurğulayan R.Abdullayev bildirdi ki, bu gün Azərbaycan ulu öndər Heydər Əliyevin müəllifi olduğu neft strategiyasının uğurlarını yaşayır. Bu nailiyyətlərin gənclərə əsaslı şəkildə çatdırılması hazırda qarşımızda dayanan əsas vəzifələrdəndir.

R.Abdullayev layihə iştirakçılarının suallarını cavablandırdı. Bildirdi ki, gənclərin təkliflərini dinləmək, onların arzu və istəklərini öyrənmək önəmlidir. İnkişafı şərtləndirən əsas amillərdən biri ideyalardır. Yenilik tərəfdarı olan gənclərimiz sözsüz ki, öz yeni ideyaları ilə inkişafa, tərəqqiyə dəstək ola bilərlər. ARDNŞ hər zaman gəncləşmə siyasəti aparır. Çalışırıq ki, gənclərin ARDNŞ-də çalışmaları, gələcək karyeraları üçün lazımi şəraiti yaradaq. Gənclərlə keçirdiyimiz görüşlər hər iki tərəf üçün əhəmiyyətlidir.

O da qeyd edildi ki, neftçi əməyi dövlətimiz tərəfindən daim yüksək dəyərləndirilir. İqtisadiyyatımızın lokomativi olan ARDNŞ-də işləmək hər bir Azərbaycan gəncinin arzusudur. Bu gün ARDNŞ-in adı beynəlxalq şirkətlər sırasında çəkilir. Şirkətin müxtəlif ölkələrdə həyata keçirdiyi investisiya layihələri onun beynəlxalq nüfuzunun daha da artmasında əhəmiyyətli rol oynayır. Düşünürəm ki, gələcəkdə siz gənclərin Şirkətdə çalışması bu uğurların davamlılığına töhfə olacaq.

Bəxtiyar Budaqlı, ADNA-nın tələbəsi

- ARDNŞ-in rəhbərliyini, çoxminli neftçilər ailəsini qarşıdan gələn 20 sentyabr Neftçilər günü münasibətilə təbrik edirəm. “Yay məktəbi” ARDNŞ haqqında dolğun məlumatlar əldə etməyimizə geniş imkanlar açdı. Şirkətin beynəlxalq əlaqələri, bu və ya digər ölkədə həyata keçirdiyi investisiya layihələri məndə böyük qürur hissi yaratdı. Ölkəmizin iqtisadi imkanlarının artması onun beynəlxalq aləmdə mövqeyini daha da möhkəmləndirir. Biz gənclər bu uğurdan fərəh hissi keçirir, bilik və bacarığımızı artırmaqla gələcəkdə öz fəaliyyətimizlə ölkənin hərtərəfli inkişafına töhfə vermiş olacağıq.

Ülviyyə Quluzadə, ADNA-nın tələbəsi

- Bu kimi layihələrin təşkilinə görə ARDNŞ prezidentinə öz minnətdarlığımızı bildiririk. Ölkəmiz bu gün öz iqtisadi göstəriciləri ilə dünyanın diqqətindədir. Bu göstəricilər tərəqqinin təsdiqidir. İnkişafı daha da sürətləndirmək üçün isə yeni texnologiyaların tətbiqi zəruridir. Bu gün ARDNŞ belə layihələrin icrasına önəm verməklə gənclərin bilik və bacarığının artırılmasına, onların istehsalat prosesləri ilə yaxından tanış olmalarına böyük imkanlar yaradır. Bu gün biz “Yay məktəbi”ndən zəngin biliklə ayrılırıq. Azərbaycanın neft tarixi, eyni zamanda ARDNŞ haqqında məlumatlar əldə etməyimiz bizə qarşıdakı illərdə böyük dəstək olacaq.

ARDNŞ-in prezidenti R.Abdullayev bildirdi ki, hər bir işin öhdəsindən gəlmək mümkündür. Əsas ideya və onun reallaşmasına səy göstərməkdir. Bilik və bacarığın, məsuliyyətin vəhdətliyi şəraitində irəliyə doğru addımlamaq asandır. Sözsüz ki, bu layihələrin icrası öz bəhrəsini verəcək.

ARDNŞ-in birinci vitse-prezidenti, akademik Xoşbəxt Yusifzadə qeyd etdi ki, neft-qaz siyasəti dövlətin həm daxili, həm də xarici siyasətinin əsas tərkib hissəsidir. Bu gün neft-qaz sektoru intibah dövrünü yaşayır. Ulu öndər Heydər Əliyevin müəllifi olduğu neft strategiyasının hazırda ölkə Prezidenti İlham Əliyev tərəfindən uğurla davam etdirilməsi Azərbaycanın hərtərəfli inkişafını təmin etməklə yanaşı, əhalinin sosial müdafiəsinin gücləndirilməsi istiqamətində əhəmiyyətli addımların atılmasına stimul verir. Neft-qaz sənayesinin inkişafını daha da sürətləndirmək üçün istedadlı, bacarıqlı və perspektivli mütəxəssislərə tələbat artmışdır. ARDNŞ neftçi ixtisasına marağı daha da artırmaq məqsədilə çoxşaxəli fəaliyyət proqramı həyata keçirir. “Yay məktəbi” layihəsi də bu istiqamətdə həyata keçirilən tədbirlərdəndir.

İnsan Resursları Departamentinin rəisi Asif Bəkirli ARDNŞ rəhbərliyinə yaradılan şəraitə görə təşəkkürünü bildirdi. Ulu öndər Heydər Əliyevin “Azərbaycanın gələcəyi indiki gənclərə nəyi və necə öyrətməyimizdən asılıdır” fikrinin davamı olaraq ölkə Prezidenti İlham Əliyevin “Biz neft kapitalını insan kapitalına çeviririk” fikrini önə çəkən A.Bəkirli qeyd etdi ki, ARDNŞ gənclərə diqqət və qayğını fəaliyyətinin önündə saxlayır. Kadr hazırlığı məsələsinə xüsusi diqqət göstərilməsi də buna əyani sübutdur.

A.Bəkirli builki “Yay məktəbi” ilə ötənilki “Yay məktəbi”nin müqayisəli statistikasını diqqətə çatdırdı. Bildirdi ki, bu il həm iştirakçıların sayında, həm də layihənin icra müddətində dəyişiklik olmuşdur. Belə ki, ötən il iştirakçıların sayı 30 nəfər idisə, bu il həmin rəqəm 40-a çatdırılmışdır. Ötən il layihənin icra müddəti 7 gün olmuşdusa, bu il iki həftə müddətində həyata keçirilmişdir. Ötən il “Ramada” otelində keçirilən “Yay məktəbi” bu il 9 gün adı çəkilən oteldə, 5 gün isə Balakən rayonunda “Qubek” otelində davam etdirilmişdir. Layihənin həyata keçirilməsində məqsəd bəllidir. ARDNŞ-də böyük kadr potensialına ehtiyac var. Kadr hazırlığı istiqamətində çox mühüm işlər həyata keçirilir. “Yay məktəbi” təsdiq edilmiş proqram əsasında həyata keçirilmişdir. ARDNŞ-in fəaliyyət göstərdiyi enerji sektorunun bütün sahələrini - neft-qaz yataqlarının geologiya-geofizikası, quyuların qazılması, neft-qaz hasilatı, nəqli və saxlanması, neft-qaz emalı və neft kimyası, ekoloji normalar və alternativ enerji mənbələri, neft-qaz hasilatı və emalı sənayesinin iqtisadiyyatı, neft və neft məhsullarının satışını əhatə edən “Yay məktəbi” ARDNŞ-in iş mexanizmi barəsində tələbələrdə ümumi fikir yaradır. İştirakçılar Şirkətin məsul şəxslərinin mühazirələrini dinləmiş, praktiki məşğələlər keçirmişlər. “Yay məktəbi” dövründə gənclər üçün Şirkətin idarə və müəssisələrinə ekskursiyalar da təşkil olunmuşdur ki, bu da onların istehsalat prosesi ilə yaxından tanış olmasına imkan yaratmışdır. Bu il qeyd etdiyimiz kimi, “Yay məktəbi”nin iştirakçıları layihə çərçivəsində Balakənə də səfər etdilər. Sentyabrın 9-dan etibarən layihə “Qubek” otelində davam etdirilmişdir. Burada isə gənclər arasında intellektual oyunlar, idman yarışları keçirilmiş, onlar turist gəzintilərinə çıxmışdılar.

A.Bəkirli bildirdi ki, layihə iştirakçıları bu müddətdə təcrübə əldə etməklə, həmçinin ARDNŞ və onun strukturları ilə tanış olmaqla yanaşı çox böyük təəssüratlar da əldə etmişdilər. Gənclərə dövlətin, ARDNŞ-in diqqəti davamlıdır. Bu onlarda böyük fərəh hissi yaradır. Sözsüz ki, layihə müddətində gənclərin əldə etdikləri biliklər, xoş təəssüratlar onların neft sənayesinə maraqlarını artıracaq, gələcək fəaliyyətlərində müəyyən istiqamət olacaq.

A.Bəkirli bir daha gənclərə uğurlar arzuladı.

Layihə iştirakçılarından Azərbaycan Dövlət Neft Akademiyasının tələbələri Mehriban İbrahimova və Elşad Yolçuyev, Azərbaycan Dövlət Pedaqoji Universitetinin tələbəsi Aysel Qəribli, xaricdə təhsil alan Fərid Əliyev və başqaları çıxış edərək, “Yay məktəbi”nin həyatlarında yeni bir səhifə açdığını bildirdilər. Yaradılan şəraitə görə ölkə Prezidenti İlham Əliyevə, ARDNŞ prezidenti R.Abdullayevə minnətdarlıqlarını ifadə etdilər.

Sonda ARDNŞ-in birinci vitse-prezidenti, akademik Xoşbəxt Yusifzadə layihə iştirakçılarına sertifikatlar təqdim etdi.

Yeganə Əliyeva,

Nail Rəhimzadə,

İki sahil.- 2011.- 15 sentyabr.- S. 8-9.