Tarixdə silinməz izlər qoyan dahi şəxsiyyət

Dünyada elə müdrik, elə uzaqgörən dövlət xadimləri olubdur ki, onlar öz ölkəsinin, millətinin taleyində mühüm rol oynayıblar.

Öz xalqlarının xilaskarları olublar. Müstəqil Azərbaycanın memarı ümummilli lider Heydər Əliyev də tarixdə dərin iz salmış dahi şəxsiyyətlərdən biridir.

Azərbaycan xalqının yaddaşında əbədi yaşayacaq böyük qətiyyət və iradə sahibi olmuş ulu öndər mürəkkəb və çətin vəziyyətlərdən ən düzgün, ən doğru yolu tapmağı bacarırdı. Onu uca zirvələrə qaldıran, lider səviyyəsinə yüksəldən ən yüksək və ali keyfiyyətlərdən birincisi doğma xalqına bağlılığı və inamı idi. Xalq da öz liderinə sadiq idi, ona inanırdı, onu özünə mayak bilirdi. Azərbaycanlı olmağı ilə həmişə fəxr edən ümummilli lider Heydər Əliyev bütün şərəfli ömrünü xalqının rifahına, Azərbaycanı qurmağa, yaratmağa və müstəqil ölkəsini dünyada tanıtmağa sərf etdi. Bütün gücünü, qüvvəsini dövlət quruculuğuna həsr etdi. Güclü, qüdrətli və yenilməz bir dövlət qurdu, tarixdə heç vaxt silinməyən dərin izlər qoydu.

XX əsrin 70-ci illərindən Azərbaycana rəhbərlik edən ümummilli lider Heydər Əliyevin yüksək təşəbbüskarlığı, müdrik siyasəti, səy və bacarığı sayəsində ölkəmiz sözün həqiqi mənasında, intibah dövrünü yaşamışdır. Həmin illər Azərbaycanın yüksəliş dövrü idi. Bu o vaxtlar idi ki, Azərbaycan Respublikası keçmiş Sovetlər Birliyinin tərkibində birbaşa Moskvadan - Kremldən idarə olunurdu. Lakin Heydər Əliyev ölkəmizin çiçəklənməsi və inkişafı naminə böyük çətinliklərlə də olsa, mərkəzin diqqətini, qayğısını məmləkətimizə yönəldə bilmişdi. Bu gün adi hal kimi qiymətləndirdiyimiz hər bir addımı o illərdə atmaq sarsılmaz iradə, qətiyyət və cəsarət, hər şeydən öncə isə böyük risk tələb edirdi. Böyük tarixi şəxsiyyət kimi ümummilli lider Heydər Əliyev bunu çox yaxşı bacarmışdı.

Sovetlər Birliyi dağılandan sonra Azərbaycan Respublikası da öz dövlət müstəqilliyini bərpa etdi. Amma artıq həmin günlərdə ölkəmiz Ermənistanla müharibə vəziyyətində idi. Əsrlər boyu həmişə torpaqlarımıza göz dikən erməni qəsbkarları yenə də yaranmış tarixi şəraitdən istifadə edərək öz havadarlarının köməkliyi ilə ölkəmizin iyirmi faiz ərazisini işğal etmişdir. O zaman Azərbaycana rəhbərlik edən şəxslər qətiyyətsizlik və iradəsizlik nümayiş etdirərək Silahlı Qüvvələri yarada bilmədilər. Bundan istifadə edən erməni qəsbkarları isə torpaqlarımızı zəbt etməkdə davam edirdilər.

1993-cü ilin iyununda gənc və müstəqil Azərbaycan dövləti dünyanın siyasi xəritəsindən silinmək təhlükəsi ilə üz-üzə qalmışdı. Zaman və vəziyyətin durumu, həyatın özü tələb edirdi ki, xalqı bu fəlakətdən qurtarmağa qadir olan bir şəxsiyyət hakimiyyətə gəlsin. Bu, həmin dövr idi ki, ölkədə hərc-mərclik, hakimiyyətsizlik hökm sürürdü. Məhz ölkəmiz, Vətənimiz üçün belə çətin və keşməkeşli bir zamanda milyonların dəvəti və təkidi ilə ümummilli lider Heydər Əliyev hakimiyyətə qayıtdı və heyrətamiz iradə, qətiyyət, güc nümayiş etdirərək ölkəni düşdüyü fəlakətdən xilas etməyə müvəffəq oldu. Ümummilli lider hakimiyyətə qayıdan kimi gərgin və səmərəli işlahatlara başladı. Uğurlar həyata keçirilən islahatlar qısa müddət ərzində ölkəmizin həyatının bütün sahələrində dönüş yaratdı. İstər hüquqi dövlət quruculuğu istiqamətində, iqtisadiyyatın dirçəldilməsi yolunda, istərsə də cəmiyyətdə kütləvi xarakter almış cinayət hallarının qarşısının alınmasına və həmçinin ən başlıcası ordu quruculuğu istiqamətində çox inamlı və qətiyyətli addımlar atılmağa başlandı.

1994-cü il may ayının 12-də Ermənistan-Azərbaycan hərbi münaqişəsində atəşkəs haqqında müqavilə imzalandıqdan sonra Azərbaycanda ordu quruculuğu da çox sürətlənmişdir. İslahatların uğurlu nəticəsi kimi Silahlı Qüvvələrin maddi-texniki təminatı getdikcə yaxşılaşdı, şəxsi heyətin mənəvi-psixoloji hazırlığı daha da artdı, döyüş ruhu, qələbə əzmi xeyli yüksəldi. Bu gün tam inamla demək olar ki, muasir müstəqil dövlətimizin memarı və qurucusu ulu öndər Heydər Əliyev həm də qüdrətli Azərbaycan ordusunun yaradıcısıdır.

1994-cü ilin oktyabr və 1995-ci ilin mart hadisələri zamanı zabit və əsgərlərimizin Vətən qarşısındakı öz xidməti borclarını şərəf və ləyaqətlə yerinə yetirmələri bir daha sübut etdi ki, şəxsi heyət arasında müstəqillik amalı və hərbi anda sədaqət hissi, yeni mənəvi-psixoloji iqlim formalaşmışdır.

Bugünkü Azərbaycan ümummilli liderimiz Heydər Əliyevin çoxillik gərgin və uzaqgörən fəaliyyətinin məhsuludur. Məhz onun yaratdığı siyasi, iqtisadi, mədəni ölkəmiz 21-ci əsrə böyük inam və uğurlarla qədəm qoyub və bu gun də öz milli dövlətçiliyini daim inkişaf etdirir.

2003-cü il oktyabr ayının 15-də xalqın böyük dəstəyi ilə dövlət başçısı seçilən möhtərəm prezidentimiz İlham Əliyev ümummilli lider Heydər Əliyevin siyasi kursunu uğurla və ləyaqətlə davam etdirir. Azərbaycan Respublikasının Prezidenti İlham Əliyevin rəhbərliyi altında həyatımızın bütün sahələrində uğurlu islahatlar həyata keçirilir. Bölgələr durmadan inkişaf edir, rayonlarımız, şəhərlərimiz getdikcə gözəlləşir, abadlaşır. Yeni yollar çəkilir, körpülər salınır. İndi Azərbaycan dünyanın ən inkişaf etmiş ölkələri ilə yanaşı inamla addımlayır. Bu gün üçrəngli bayrağımız dünyanın bir çox beynəlxalq təşkilatlarının qarşısında əzəmətlə dalğalanır.

Ümummilli lider Heydər Əliyev siyasi kursunun layiqli davamçısı olan möhtərəm Prezidentimiz İlham Əliyevin rəhbərliyi altında başqa sahələrdə olduğu kimi ordu quruculuğunda da uğurlu islahatlar həyata keçirilir, Silahlı Qüvvələrə ayrılan vəsait ildən-ilə artırılır. Təkcə onu qeyd etmək kifayətdir ki, Azərbaycanın yalnız hərbi xərcləri Ermənistanın bütün dövlət büdcəsinə bərabərdir.

Ümummilli liderimiz Heydər Əliyevin xatirəsi hər birimizin qəlbində əbədi olaraq yaşayacaqdır. Ulu öndərin dövlət quruculuğu, ordu quruculuğu, iqtisadi islahatlar, milli şüurun dirçəlişi, ideologiyamızın inkişafı və formalaşması, gənclərimizin hərbi vətənpərvərlik tərbiyəsi və digər sahələrdəki siyasi irsi bu gün böyüməkdə olan nəsillər tərəfindən dərindən, diqqətlə öyrənilir və təbliğ olunur. XX əsrin ən böyük dühalarından olan görkəmli dövlət xadimi, nadir şəxsiyyət, xalqın xilaskarı ümummilli lider Heydər Əliyevin həyat yolu və siyasi fəaliyyəti hər birimiz üçün örnəkdir.

Tural Salmanov

İki sahil.- 2011.- 27 sentyabr.- S. 11.