Mezozoy nefti diqqət mərkəzindədir

Azərbaycan Neftçi Geoloqlar Cəmiyyətinin təşkil etdiyi seminarda Mezozoy neftinin axtarış problemləri haqqında geniş müzakirə aparılmışdır

Bu günlərdə ARDNŞ Geofizika və Geologiya İdarəsi Geofizika ETİ-nin kiçik akt zalında Azərbaycan Neftçi Geoloqlar Cəmiyyəti (ANGC) tərəfindən növbəti seminar keçirilmişdir. Tədbiri giriş sözü ilə açan Azərbaycan Neftçi Geoloqlar Cəmiyyətinin Rəhbər Komitəsinin və Amerika Neftçi Geoloqlar Assosiasiyasının Azərbaycan Bölməsinin sədri, ARDNŞ “Azneft” İstehsalat Birliyinin baş direktor müavini - baş geoloq, geologiya-mineralogiya elmləri doktoru, professor Akif Nərimanov ilk növbədə məlumat verdi ki, 2011-ci ilin aprel ayında Bakıda keçirilən elmi konfransda Mezozoy neftinin axtarış problemləri haqqında geniş müzakirə aparılmış və müzakirələr zamanı qərar qəbul olunmuşdu ki, bu məsələ ilə bağlı sentyabr ayında bir günlük xüsusi seminar təşkil edilsin.

- Bir sıra hazırlıq işlərindən sonra həmin seminar 27 sentyabr tarixində Geofizika ETİ-də baş tutdu, - deyə Akif Nərimanov qeyd etdi. - Tədbirdə ARDNŞ baş ofisinin, AMEA Geologiya İnstitutunun, Geofizika və Geologiya İdarəsinin, Geofizika ETİ-nin, “Neftqazelmitədqiqatlayihə” İnstitutunun, “Kompleks Qazma İşləri” Trestinin nümayəndələri iştirak edirlər.

Seminara sədrlik edən Akif Nərimanov daha sonra öz giriş çıxışında iştirakçılara məlumat verərək bildirdi: “Baxmayaraq ki, Azərbaycanda Mezozoy neftinin axtarışı ilə bağlı ümumi dərinliyi 1 mln. metrə yaxın 300-ə qədər dərin quyu qazılıb, lakin keçmişdə keyfiyyətsiz aparılan qazma və seysmik işlər nəticəsində Mezozoy çöküntülərinin ümumi qalınlığından yalnız 15-20%-i nisbətən öyrənilmiş hesab oluna bilər.”

Məsələnin vacibliyini və əhəmiyyətini diqqətə çatdıran A.Nərimanov seminar iştirakçılarını gələcəkdə həyata keçiriləcək geofiziki və geoloji kəşfiyyat-axtarış işlərinin başlıca istiqamətlərini müzakirə etməyə çağırdı. Tədbir iştirakçılarından Kəşfiyyatgeofizika idarəsinin direktoru, elmlər doktoru Namaz Yusubovun, elmlər namizədləri Şahvələd Köçərlinin, Baba Qarayevin Mezozoy neftinin axtarış problemlərinə dair məruzələri böyük maraqla dinlənildi.

Daha sonra seminar mövzü ətrafında geniş müzakirələrin aparılması və təkliflərin irəli sürülməsi ilə davam etdirildi. Müzakirələrdə akademik İbrahim Quliyev, professorlar Rahib Rəhmanov, Mikayıl Bağırov, Əli Novruzov, Akif Əliyev, öz sahələrində aparıcı mütəxəssislər kimi tanınan Yusif Şıxəliyev, Novruz Əhmədov, Xamis Yusifov, Əli Süleymanov çıxış edərək əldə olunan nəticələrlə, qazanılmış təcrübə ilə bölüşdülər, zəruri hesab etdikləri məlumatları seminar iştirakçılarına çatdıraraq öz təkliflərini irəli sürdülər.

Seminarın yekunu olaraq tədbir iştirakçıları Dövlət Neft Şirkətinin rəhbərliyi altında, mümkün qədər qısa müddətdə Mezozoy neftinin axtarışı ilə bağlı xüsusi geniş kompleks işlər proqramının tərtib olunması barədə yekdilliklə qərar qəbul etdilər. Tədbirdə Statoil, Total E&P Azərbaycan, GDF Suez şirkətlərinin nümayəndəri ilə yanaşı, həmçinin ADNA-nın tələbələri də iştirak edirdilər.

İlqar Məmmədli

İki sahil.- 2011.- 30 sentyabr.- S. 11.