Yaponiyanın Gəncədə yeni layihəsi

Yaponiya ilə Azərbaycan arasında əlaqələr xoş məramlardan soraq verir və daha dolğun şəkildə inkişaf edir. Ötən gün Gəncə Sənət Təhsil Mərkəzində sözügedən qurumun infrastrukturunun yaxşılaşdırılması məqsədilə imzalanan saziş bir daha sübut etdi ki, hər iki dövlət arasında münasibətlər sözün həqiqi mənasında ən humanist köklərdən qaynaqlanır.

"Ot kökləri və İnsan Təhlükəsizliyi Qrant yardımı"nın bir hissəsi olaraq 2010-cu ildə bu mərkəz Yaponiya hökuməti tərəfindən təlim üçün müasir avadanlıqlarla təchiz edilmişdir. Yeni layihəyə görə mövcud binanın infrastrukturu tamamilə dəyişəcək.

Sazişin imzalanması üçün keçirilən tədbirdə Yaponiyanın Azərbaycandakı səfiri Şusuke Vatanabe və Gəncə şəhər İcra Hakimiyyətinin nümayəndələri iştirak etdi. Səfir çıxışında bildirdi ki, bu layihə də daxil olmaqla Azərbaycanda 138 layihə həyata keçirilib .

Şəhər İcra Hakimiyyətinin rəsmisi Ruslan Qardaşov çıxışında bildirdi ki, Yaponiya ilə Azərbaycan arasında əməkdaşlıq və Gəncədə görülən işlər bu münasibətlərin hərtərəfli qurulduğundan xəbər verir.

Sonda Yaponiyanın Azərbaycandakı səfiri Şusuke Vatanabe və Gəncə Sənət Təhsil mərkəzinin direktoru Kamran Ağamalıyev sazişə imza atdılar.

Qalib Rəhimli

İki sahil.-2011.-15 yanvar.-S.16.