Çevik və məqsədyönlü xarici siyasət

Dövlət başçısı İlham Əliyev Nazirlər Kabinetinin 2013-cü ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunmuş iclasında qazanılan uğurların fonunda bu reallığı bir daha diqqətə çatdırdı ki, Azərbaycan dünya mərkəzlərindən birinə çevrilib

Nazirlər Kabinetinin 2013-cü ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunmuş iclasında ölkəmizin ayrı-ayrı sahələrdə qazandığı uğurları əsaslı şəkildə diqqətə çatdıran dövlət başçısı İlham Əliyev bu əminliyi ifadə etmişdir ki, cari ildə görüləcək işlər Azərbaycanı daha da böyük nailiyyətlərə gətirib çıxaracaq, əməkdaşlıq məkanına çevirəcək. Ölkəmizin beynəlxalq əhəmiyyətli tədbirlər üçün əsas məkan seçilməsi artan nüfuzunun, siyasi çəkisinin təsdiqidir. Bu günlərdə Bakıda keçirilən Ümumdünya İqtisadi Forumu bir daha Azərbaycanın malik olduğu imkanların dünyaya təqdimatında əhəmiyyətli rol oynadı.

Prezident İlham Əliyev müşavirədə bu məsələni xüsusi vurğuladı: “Bu Forum məhz Bakıda keçirilibdir. Yəni beynəlxalq aləm də Bakını regional mərkəz kimi tanıyır. Bu, reallıqdır. Ancaq bununla bərabər, mən bir daha demək istəyirəm ki, bizim istəyimiz də, niyyətimiz də və artıq görülən işlər də regional çərçivələrdən çoxdan çıxıbdır. Azərbaycanda həll olunan məsələlər, qəbul edilən qərarlar nəinki regionun inkişafına, qitədə gedən bəzi proseslərə də öz təsirini göstərir. Biz artıq ciddi beynəlxalq amilə çevrilmişik. Siyasi təşəbbüslər bizim razılığımız olmadan, bizim maraqlarımız təmin edilmədən öz həllini tapa bilir.”

Xarici siyasəti daxili siyasətin məntiqi davamı kimi dəyərləndirən dövlət başçısı İlham Əliyev çevik və məqsədyönlü siyasətin ölkəmizin daha da güclənməsinə yönəldildiyini bildirir. Azərbaycanın 155 ölkənin dəstəyini qazanaraq BMT Təhlükəsizlik Şurasına qeyri-daimi üzv seçilməsi ölkəmizin ayrı-ayrı sahələrdə qazandığı uğurların təqdimatı olmaqla yanaşı, həm də ikitərəfli və beynəlxalq təşkilatlar çərçivəsində əməkdaşlığın bugünkü səviyyəsinə işıq saldı. Təbii ki, 155 ölkənin dəstəyi, eyni zamanda 155 ölkənin Azərbaycanla əməkdaşlığına işarədir. Bu inamın əsasında ölkəmizin 21 illik müstəqillik tarixində keçdiyi uğurlu yol, əldə etdiyi təcrübə, bir sözlə, beynəlxalq səviyyədə təsdiqlənən və yüksək dəyərləndirilən inkişaf modeli dayanır.

Ölkə Prezidenti İlham Əliyev daim vurğulayır ki, dünya dəyişir, dünyada cərəyan edən proseslər müxtəlif istiqamətdə inkişaf edir. Ancaq təbiətin ümumi qanunları dəyişmir. Müstəqil ölkə kimi Azərbaycan bu gün də müstəqil siyasət aparır. Bu müstəqil siyasət, ilk növbədə, Azərbaycan xalqının iradəsinə əsaslanır: “Bizim bu illər ərzindəki ən böyük uğurumuz ondan ibarətdir ki, müstəqillik yolundan dönməmişik. Müstəqillik sadəcə olaraq dövlət atributları deyildir. Müstəqillik o deməkdir ki, ölkə müstəqil siyasət apara bilir, yoxsa yox. Xüsusilə, böyük güc mərkəzlərinin maraqlarının kəsişdiyi bir coğrafi məkanda yerləşən ölkələr üçün bu, aktualdır. Bu məkanda, bu qonşuluqda təbii sərvətlərlə zəngin olan Azərbaycan müstəqil siyasət aparır və aparacaqdır.”

Ölkəmizin bu gün dünyada yeri və rolunun artması, beynəlxalq münasibətlər sisteminin ən fəal üzvü kimi nüfuz qazanması da bu gerçəkliyi təsdiqləyir ki, iqtisadi müstəqillik siyasi müstəqillik üçün əsasdır: “Müstəqilliyi qoruyacağıq və möhkəmləndirəcəyik. Bunu etmək üçün bizim güclü iqtisadiyyatımız olmalıdır.” Dövlət başçısı İlham Əliyevin qeyd etdiyi kimi, ötən dövr ərzində iqtisadi sahədə inqilabi islahatlar aparılıb. Bunu sosial-iqtisadi göstəricilər də təsdiqləyir. Təkcə cari ilin birinci rübündə ümumi daxili məhsul 3,1 faiz, qeyri-neft sektoru 11,4 faiz artıb. İnflyasiya cəmi 1,2 faiz təşkil edir. Regional inkişaf proqramlarının uğurlu icrası nəticəsində 2004-cü ildən bu günə qədər bir milyon yüz mindən artıq yeni iş yeri açılıb ki, bunun da 30 mini cari ilin birinci rübündə yaradılıb. Əhalinin pul gəlirləri təxminən 6 faiz artıb. Ünvanlı sosial yardım proqramı icra edilir. 123 min ailə dövlətdən bu yardımı alır. Yoxsulluq səviyyəsi son on ildə 50 faizdən 6 faizə enib. Dövlət başçısının vurğuladığı kimi, ölkəmizdə aparılan iqtisadi islahatlar, iqtisadi liberallaşma, dünya iqtisadiyyatına inteqrasiya siyasəti xarici sərmayə qoyuluşuna gətirib çıxarıb. Cənab İlham Əliyev bu məsələdə beynəlxalq kredit agentliklərinin reytinqlərinin də az rol oynamadığını bildirir: “Çünki dünyanın aparıcı kredit agentlikləri keçən il Azərbaycanın kredit reytinqlərini artırmışlar. Bu da, deyə bilərəm ki, müasir dünya üçün çox nadir bir məsələdir. Çünki inkişaf etmiş ölkələrin bəzilərinin reytinqləri aşağı salınır, Azərbaycanın kredit reytinqləri isə yuxarı qaldırılır və bu da aparılmış iqtisadi islahatların nəticəsidir.” İqtisadi qüdrətini günbəgün artıran Azərbaycan regionda və dünyada söz sahibi olduğunu təsdiqləyir. Bu gün ölkəmizin beynəlxalq aləmdə təşəbbüsləri gerçəkləşdirən ölkə kimi tanınması, hansısa bir iqtisadi və siyasi layihənin Azərbaycanın iştirakı olmadan həyata keçirilməsinin mümkünsüzlüyü uğurlu siyasətin məntiqi nəticəsidir.

Müşavirədə Azərbaycanın beynəlxalq arenada əldə etdiyi uğurlardan geniş bəhs edən dövlət başçısı İlham Əliyev ölkəmizin BMT Təhlükəsizlik Şurasına qeyri-daimi üzv seçilməsini ölkəmizin dünya miqyasında nüfuzunun göstəricisi kimi dəyərləndirərək bildirdi ki, dövlətimiz qurumda bütün məsələlərlə bağlı öz prinsipial sözünü deyir. Dövlətin xarici siyasətinin prioritet məsələsi olan Ermənistan-Azərbaycan, Dağlıq Qarabağ münaqişəsinin həllində də dəyişməz mövqe müstəqil siyasətin, beynəlxalq hüquq normalarına hörmətlə yanaşmanın təsdiqidir. Azərbaycan BMT Təhlükəsizlik Şurasının qeyri-daimi üzvü seçilməklə Dağlıq Qarabağ münaqişəsinin tezliklə həlli imkanlarını artırdı. Dövlət başçısı İlham Əliyev bildirir ki, bizim mövqe ədalətli və beynəlxalq hüquq normalarına əsaslanan mövqedir. Bu mövqedən bir addım da geri çəkilməyəcəyik. Hər gün, hər ay Azərbaycanı qələbəyə yaxınlaşdırır. İşğalçı Ermənistan ölkəmizlə rəqabət aparmaq imkanında deyil. Ermənistanın əsas ümidi xarici qüvvələrə, erməni lobbisinə, onun havadarlarına və bəzi başqa ölkələrin dairələrinədir. İşğalçılıq siyasəti ucbatından bütün enerji layihələrindən təcrid olunan Ermənistan iqtisadi böhran içərisində çapalayır. Ölkədən kütləvi tərketmələr intensiv xarakter alıb.

Dünyanın ikili siyasətinin yaratdığı problemlərdən biri Dağlıq Qarabağ münaqişəsinin nizamlanması prosesinin uzanmasıdır. İşğalçı ölkənin beynəlxalq təşkilatların qərar və qətnamələrinə məhəl qoymaması və bunun qarşılığında ona qarşı hansısa təzyiqin göstərilməməsi daha böyük iddialarla yaşamasına stimul verir. Rəsmi Bakı daim bəyan edir ki, Azərbaycanın ərazi bütövlüyü, Dağlıq Qarabağa müstəqillik verilməsi məsələsi qətiyyən müzakirə mövzusu ola bilməz. Ermənistan tərəfi bunu nə qədər tez başa düşsə və maksimalist, qeyri-realist, qeyri-qanuni yanaşmalardan imtina etsə, bu, onlar üçün də, sülh prosesi üçün də bir o qədər faydalı olar.

Münaqişənin həllində ATƏT-in vasitəçilik missiyasını yerinə yetirməsinə baxmayaraq rəsmi Bakı bütün beynəlxalq təşkilatların potensialından səmərəli istifadə etmək niyyətini hər zaman ortaya qoyur. İşğalçı Ermənistan və ATƏT-in Minsk qrupu həmsədrləri Azərbaycan dövlətinin digər beynəlxalq təşkilatlarda Ermənistan-Azərbaycan, Dağlıq Qarabağ münaqişəsinin müzakirəyə çıxarılmasını Minsk qrupunun vasitəçilik missiyasından imtina kimi dəyərləndirsələr də rəsmi Bakı bunun qeyd olunan məsələyə aidiyyəti olmadığını bildirir. Mövqe tarixi ədalətə, həqiqətlərə əsaslananda təbii ki, diplomatik mübarizədə də üstünlük qazanmaq asandır. Bu gün dünya haqqın, ədalətin kimin tərəfində olduğunu görür və mövqeyini açıqlayır. Münaqişənin həllində dövlətin mövqeyi, xalqın iradəsi ilə yanaşı beynəlxalq dəstəyin rolu böyükdür. Xarici siyasətində beynəlxalq hüququn norma və prinsiplərinə üstünlük verən, bütün münaqişəli məsələlərin bu çərçivədə həllinə səy göstərən dövlətimiz daim işğalçı Ermənistandan beynəlxalq təşkilatların qəbul etdiyi qərar və qətnamələrə hörmətlə yanaşmağı, ədalətli mövqe nümayiş etdirməyi tələb edir. Müşavirədə də bu məsələyə diqqət yönəldən dövlət başçısı İlham Əliyev bildirdi ki, bizim ümidimiz öz gücümüzdür- Azərbaycan xalqıdır, haqq və ədalətdir, beynəlxalq hüquqdur və artan gücümüzdür.

Müşavirədə dövlət başçısı İlham Əliyev beynəlxalq ictimaiyyətin məsələnin həllində fəal iştirakından da geniş bəhs edərək bildirdi ki, beynəlxalq təşkilatlarda qarşıya qoyduğumuz vəzifələrə çatmışıq. Münaqişənin həlli üçün hərtərəfli hüquqi baza mövcuddur. BMT, Avropa Şurası, Avropa Parlamenti, İslam Əməkdaşlıq Təşkilatı və digər qurumlar Dağlıq Qarabağ problemi ilə bağlı qərar və qətnamələr qəbul edib. Bu ondan irəli gəlir ki, dünya tarixi faktlara söykənir, həqiqəti olduğu kimi qəbul edir və mövqeyini qəbul olunan qərar və qətnamələrdə ortaya qoyur.

Ötən il Azərbaycanın beynəlxalq uğurlarından biri Qoşulmama Hərəkatının zirvə görüşündə 120 ölkənin Ermənistan-Azərbaycan, Dağlıq Qarabağ münaqişəsinin yalnız və yalnız ölkələrin ərazi bütövlüyü çərçivəsində həll olunmasına dair qətnaməni qəbul etməsi oldu. “Dünyada 200-dən bir qədər çox ölkə vardır. Bunlardan 120-si ərazi bütövlüyümüzü dəstəkləyir, münaqişənin həllini yalnız bu prinsiplər əsasında görür. Əgər biz NATO-nun Çikaqo sammitinin qərarlarını, bəyannamələrini nəzərə alsaq, təbii ki, NATO-ya üzv olan ölkələr Qoşulmama Hərəkatının üzvü ola bilməz, orada da Ermənistan-Azərbaycan, Dağlıq Qarabağ münaqişəsinin yalnız ölkələrin ərazi bütövlüyü prinsipi əsasında həll olunması açıq şəkildə vurğulanmışdır. Yəni dünya birliyinin dörddə üç hissəsi məsələnin həllini yalnız ərazi bütövlüyü prinsipi əsasında görür. Əlbəttə, bu, çox ədalətli mövqedir və məsələnin həlli üçün başqa mövqe, başqa variant ola bilməz.” Dövlət başçısı Qoşulmama Hərəkatının zirvə görüşündə qəbul olunan qətnaməni böyük siyasi və diplomatik uğur kimi dəyərləndirərək, bildirir ki, bu sənəd digər beynəlxalq təşkilatların qəbul etdiyi qətnamələri daha da gücləndirir.

Ölkəmiz bu gün dünyada yeni tərəfdaşlar qazanır. Dövlət başçısı İlham Əliyevin müşavirədə xüsusi vurğuladığı kimi, əməkdaşlıq üçün Azərbaycana böyük maraq vardır. Azərbaycanın öz xarici siyasətində önəm verdiyi əsas prinsip qarşılıqlı hörmət və maraqdır. Azərbaycanın iqtisadi imkanlarının genişlənməsi fonunda hərbi qüdrətinin artması, diplomatik mübarizədə qələbəsi Dağlıq Qarabağ münaqişəsinin həllini yaxınlaşdıran başlıca amillərdəndir. Beynəlxalq aləmdə əldə olunan uğurların ümumiləşdirilmiş ifadəsi olaraq bildirildi ki, xarici siyasətlə bağlı prinsipial mövqeyimiz bütün istiqamətlər üzrə öz müsbət nəticələrini verir. Azərbaycan ədaləti bərpa edəcək və öz ərazi bütövlüyünü təmin edəcək.

Yeganə Əliyeva

İki sahil.- 2013.- 17 aprel.- S.3.