Prezident İlham Əliyev: Azərbaycan xalqı xoşbəxt, firavan yaşamağa layiqdir

Hər bir vətəndaş respublikamızın ictimai, siyasi, iqtisadi həyatında fəal iştirak etməklə, baş verən prosesləri yaxından izləməli, ölkəmizin bütün sahələrdə qazandığı uğurlara sevinməklə yanaşı bu uğurların qazanılmasında öz töhfələrini verməlidir. Azərbaycan cəmi 21 ildir müstəqillik əldə edib. Ölkəmizin bu illər ərzində sürətli inkişaf yoluna baxmaq üçün bəzi statistik məlumatlara müraciət etmək istəyirəm.

Müstəqilliyimizin ilk illərində Azərbaycan beynəlxalq aləmdə kasıb ölkələrdən hesab olunurdu, ölkə əhalisinin 50%-ə qədəri kasıblıq həddi səviyyəsində yaşayırdı, dövlət büdcəsi 1,5-2,0 milyard dollar səviyyəsində, ölkədə işsizliyin səviyyəsi yüksək və inflyasiyanın səviyyəsi 30% həddində idi. Ermənistanın işğalçılıq siyasəti nəticəsində öz yurd-yuvalarından didərgin düşmüş qaçqın və köçkünlərimiz dözülməz, ağır şəraitlərdə çadır düşərgələrində, vaqonlarda, bəzi qeyri-yaşayış obyektlərində məskunlaşmışdılar. Onlar əsasən beynəlxalq hümanitar təşkilatların yardımları hesabına yaşayırdılar. İqtisadiyyat bərbad vəziyyətdə idi, ölkənin müdafiə qabiliyyəti aşağı səviyyədə idi, orduda hərc-mərclik hökm sürürdü.

Bir tərəfdən Ermənistanın işğalçılıq siyasəti nəticəsində torpaqlarımızın 20%-nin işğal edilməsi, digər tərəfdən Azərbaycanı sevməyən, onun müstəqilliyini istəməyən dövlətlərin siyasəti, təzyiqləri ölkəmizin daxilində sapı özümüzdən olan dağıdıcı müxalifətin “fəaliyyəti” Azərbaycanı parçalanmaq, bir dövlət kimi məhv olmaq təhlükəsi ilə üz-üzə qoymuşdu. Lakin bu ağır vaxtda xalqın istəyi və tələbi ilə ulu öndər Heydər Əliyev hakimiyyətə gəldikdən sonra ölkəmizdə vəziyyət kökündən dəyişməyə başladı. Qısa bir müddət ərzində ulu öndər bütün bu hərc-mərcliyə, özbaşınalığa son qoydu, həm iqtisadiyyatda, həm ordu quruculuğunda əsaslı dönüş yaratdı. Beynəlxalq aləmdə siyasi vəziyyəti düzgün, uzaqgörənliklə qiymətləndirərək dövlətin siyasi kursunda dəyişiklik etdi.

Ulu öndərin bu gərgin, ağır, böyük zəhmət tələb edən işlərinin nəticəsi olaraq Azərbaycanda stabil, etibarlı, beynəlxalq aləmdə tanınan, öz yeri olan dövlət formalaşdırdı. 1994-cü il sentyabr ayının 20-də bütün xarici və daxili təzyiqlərə baxmayaraq ümummilli lider Heydər Əliyevin gərgin əməyi və uzaqgörən siyasəti sayəsində Azərbaycan xalqının, dövlətinin tarixində şanlı bir səhifə yazıldı. Belə ki, dünyanın nəhəng neft şirkətlərinin iştirakı ilə “Əsrin müqaviləsi” imzalandı. Beləliklə, Azərbaycan xalqının, dövlətinin həm iqtisadi, həm siyasi inkişafının təməli qoyuldu. 2003-cü ildən Azərbaycan xalqının dəstəyi ilə Prezident seçilən İlham Əliyev əsası ümummilli lider Heydər Əliyev tərəfindən müəyyən edilən iqtisadi və siyasi kursu layiqincə davam etdirir. Cənab İlham Əliyev həmin ildə andiçmə mərasimində bəyan etmişdir ki, Azərbaycanın daha qüdrətli dövlətə çevrilməsi üçün Heydər Əliyevin siyasəti davam etdirilməlidir. Bu yerdə qardaş Türkiyə Respublikasının Baş naziri Rəcəb Tayyib Ərdoğanın Bakıda Türkiyə səfirliyinin yeni binasının və Atatürkün abidəsinin açılış mərasimində ölkə başçısı İlham Əliyev haqqında söylədiyi bir fikri vurğulamaq istərdim. O demişdir: “İlham Əliyev bacarıqlı və güclü dövlət başçısı olmaqla, eyni zamanda bir “baba” yadigarı və davamçısıdır...” Cənab İlham Əliyev hakimiyyətə gəlişi ilə Heydər Əliyev kursunu layiqincə davam etdirməklə yanaşı, eyni zamanda müasir dövrün siyasi və iqtisadi ab-havasına, beynəlxalq aləmin mövcud tələblərinə, Azərbaycanın milli mənafeyinə uyğun daxili və xarici siyasət həyata keçirir. Bu siyasətin nəticəsi olaraq Azərbaycan son bir neçə il ərzində çox sürətli inkişaf yolu keçmişdir. Müqayisə üçün statistik rəqəmlərə müraciət edək. Müstəqilliyin ilk illərində kasıb ölkələr arasında olan Azərbaycan hal-hazırda inkişaf etmiş ölkələrin sırasına qatılıb. Ölkədə yoxsulluğun səviyyəsi 4-5%-ə düşüb, işsizliyin sayı kəskin azalıb. Dövlət büdcəsi 20 milyard manat, inflyasiya 1,7% təşkil edir. Əhalinin həyat səviyyəsi durmadan artır. Bütün bunlar əsası ulu öndər tərəfindən qoyulan və Prezident İlham Əliyev tərəfindən uğurla davam və inkişaf etdirilən siyasət sayəsində mümkün olmuşdur.

Reallığa yüksək dəyər verən xalqımız bu gün Azərbaycanın böyük inkişaf yolunda olduğunu görür və qiymətləndirir. Cənab İlham Əliyev qeyd etmişdir ki, son illərin statistikası Azərbaycanın inkişafı barədə aydın təsəvvür yaradır. Hazırda ölkəmizin böyük quruculuq meydanına çevrilməsi iqtisadi uğurların təsdiqidir. Ulu öndər Heydər Əliyevin “İqtisadiyyatı güclü olan dövlət hər şeyə qadirdir” fikri Azərbaycanın bugünkü gerçəkliklərində öz təsdiqini tapır. Artıq Azərbaycan iqtisadi cəhətdən inkişaf etmiş güclü dövlətdir, regionun aparıcı dövlətinə çevrilmişdir. Ölkəmizin iştirakı olmadan bölgədə hansısa iqtisadi və siyasi layihənin həyata keçirilməsi mümkün deyil. Görkəmli dövlət xadimləri, diplomatlar Azərbaycanı Cənubi Qafqazın parlayan ulduzu kimi qiymətləndirirlər. Prezident İlham Əliyevin iqtisadi və siyasi sahədə siyasətinin əsas prioritetlərindən biri ölkəmizin qarşıdakı illərdə inkişaf etmiş dövlətlər sırasında birgə addımlamasıdır. Prezident hər zaman bildirir ki, inkişaf etmiş ölkələrdə paytaxtla regionlar arasında fərq olmur. Cənab İlham Əliyev Prezident kimi fəaliyyətə başladığı gündən regionların sosial-iqtisadi inkişafının sürətləndirilməsi istiqamətində atdığı addımların nəticəsidir ki, bu gün nəinki paytaxt Bakı, bölgələrimiz belə öz inkişafı ilə dünyanın diqqətindədir.

Bütün beynəlxalq təşkilatlar birmənalı şəkildə etiraf edirlər ki, cənab İlham Əliyev dövlət sükanı arxasına keçdikdən sonra Azərbaycanın inkişafı sürətlənib, ümumi daxili məhsul istehsalının artım tempinə görə dünyanın lider dövlətlərindən birinə çevrilib. Ölkəmizdə qeyri-neft sektoru sürətlə inkişaf edir. 2012-ci ildə qeyri-neft sektorunun inkişaf göstəriciləri 10%-dən çox olmuşdur. Bu onu göstərir ki, neft və qazdan əldə edilən gəlirlərdən iqtisadiyyatın şaxələndirilməsi üçün məqsədyönlü şəkildə istifadə edilməsi özünü doğruldur. Bu da ölkə büdcəsinin neftdən asılılığının aradan qaldırılması istiqamətində aparılan siyasətin prioritet sahələrindən biridir.

Dövlət başçısı İlham Əliyevin apardığı müdrik və uzaqgörən siyasətin nəticəsində Azərbaycan dünya birliyində özünə layiqli yer tutaraq söz sahibinə çevrilmişdir. Xəzər neftinin və qazının çoxvariantlı marşrutla dünya bazarına çıxarılmasına, tikinti, quruculuq və abadlıq işlərinin daha da genişləndirilməsinə, enerji və nəqliyyat təhlükəsizliyinin davamlılığına, ölkənin ərzaq təhlükəsizliyinin təmin olunmasına, sahibkarlığın inkişafına və yeni iş yerlərinin açılmasına, güclü və müasir ordu quruculuğuna, bütövlükdə Azərbaycanın sürətli və davamlı inkişafının yeni mərhələyə qaldırılmasına, ölkə vətəndaşlarının xoşbəxt yaşayışının etibarlı şəkildə təmin edilməsinə məhz bu siyasətin nəticəsində nail olunmuşdur.

Bir Lider və şəxsiyyət kimi İlham Əliyev xarakterinin ən bariz xüsusiyyətlərindən biri sözünün sahibi olmasıdır. Azərbaycan xalqı qəti əmindir ki, onun Prezidenti vəd veribsə, sözsüz yerinə yetirəcək.

“Azərbaycan xalqı xoşbəxt, firavan yaşamağa layiqdir və bundan ötrü əlimizdən gələni əsirgəməyəcəyik”- vədini də Prezident İlham Əliyev şərəflə yerinə yetirməkdədir.

Xarici siyasət sahəsində də cənab İlham Əliyev çox böyük uğurlar qazanıb. Məlum olduğu kimi, coğrafi mövqeyinə görə Azərbaycan çox mühüm strateji məkanda yerləşir. Müstəqilliyimizin birinci ilində səriştəsiz və naşı rəhbərlərin apardıqları birtərəfli, səriştəsiz siyasətin acı nəticələri Azərbaycan xalqının yaxşı yadındadır. Lakin ulu öndər Heydər Əliyevin hakimiyyətə gəlişi ilə həm daxili, həm də xarici siyasət sahəsində əsaslı dönüş edildi. Məhz ulu öndərin, sonralar isə onun layiqli davamçısı İlham Əliyevin apardıqları müdrik, düşünülmüş, uzaqgörən, məqsədyönlü və balanslaşdırılmış siyasət nəticəsində Azərbaycan xarici siyasətdə böyük uğurlar qazanmış və beynəlxalq aləmdə layiqli yer tutmuşdur. Məhz bu siyasətin nəticəsidir ki, Azərbaycan BMT üzvü olan 193 ölkədən 155-nin dəstəyini qazanaraq BMT Təhlükəsizlik Şurasına qeyri-daimi üzv seçilmişdir.

Ermənistan silahlı qüvvələrinin Azərbaycan torpaqlarına hərbi təcavüzü nəticəsində doğma yurdlarından didərgin salınmış bir milyon nəfərədək soydaşımızın bütün qayğıları, sosial problemləri, münaqişənin siyasi cəhətdən həlli Azərbaycan dövlətinin, onun Prezidentinin gündəlik qayğısına çevrilib. Prezident İlham Əliyev dövlət başçıları ilə keçirilən çoxsaylı görüşlərdə, beynəlxalq və yerli qurumların tədbirlərində mütləq bir hal kimi bu problemə toxunaraq, onu ölkədə bir nömrəli problem adlandırır.

Prezident tərəfindən Ermənistan-Azərbaycan, Dağlıq Qarabağ münaqişəsi ilə bağlı qəti mövqe ortaya qoyulub. Ölkə başçısı dəfələrlə bəyan edib ki, “Azərbaycanın ərazi bütövlüyü bərpa edilməlidir və biz hansı yolla olursa olsun işğal altında olan torpaqlarımızı işğaldan azad edəcəyik. Hələ ki, bunu siyasi yolla, danışıqlar vasitəsilə həll etmək istəyirik, lakin Azərbaycanın ərazi bütövlüyü heç vaxt danışıqlar predmeti olmayıb və bundan sonra da olmayacaq. Danışıqlar nəticə verməsə başqa yollardan istifadə ediləcək. Buna Azərbaycanın həm iqtisadi, həm də hərbi gücü yetərlidir.”

Ordu quruculuğuna, ölkənin hərbi gücünün artırılmasına xüsusi diqqət yetirilir. Dövlət büdcəsindən silahlı qüvvələrə ayrılan vəsait Ermənistanın dövlət büdcəsindən dəfələrlə çoxdur. Məcburi köçkünlərə xüsusi diqqət ayrılır, prioritet məsələlərdən biri kimi bu istiqamətdə ardıcıl, məqsədyönlü tədbirlər həyata keçirilib. Hələ 2003-cü il oktyabrın 1-də cənab İlham Əliyev prezident seçkiləri ərəfəsində ilk görüşünü Biləsuvar rayonu ərazisində məcburi köçkünlər üçün salınmış yeni qəsəbələrdə keçirərkən bəyan etmişdir. “Ölkədə bir dənə də olsun çadır düşərgəsi qalmayacaq.” Bu mənada “Qaçqın və məcburi köçkünlərin yaşayış şəraitinin yaxşılaşdırılması və məşğulluğunun artırılması məqsədi ilə Prezidentin sərəncamı ilə Dövlət Proqramı hazırlanıb. Bu proqrama uyğun olaraq Azərbaycan Respublikasının Dövlət Neft Fondu tərəfindən ayrılmış vəsait hesabına Azərbaycanın müxtəlif bölgələrində enerji, qaz, su təchizatı, digər zəruri sosial-mədəni və texniki infrastruktur sistemləri ilə təmin edilən yeni yaşayış məntəqələri inşa olunub.

1994-cü ildə ümummilli liderin təşəbbüsü ilə “Əsrin müqaviləsi”nin imzalanması ilə əsası qoyulan yeni neft strategiyasının uğurlu icrası nəticəsində Dövlət Neft Şirkəti “SOCAR” brendi ilə dünya bazarlarına daxil oldu. Bu gün ARDNŞ-in dünyanın bir çox ölkələrində nümayəndəlikləri var. Şirkət qlobal enerji layihələrinin əsas iştirakçısı və təşəbbüskarıdır.

Bildiyiniz kimi, qarşıdan prezident seçkiləri gəlir. Ölkə başçısı İlham Əliyevin 2003-2008-ci illərdə gördüyü işlər ona 2008-ci il prezident seçkilərində xalqın böyük əksəriyyətinin dəstəyini qazandıraraq yenidən Prezident seçilməsini şərtləndirmişdir. Heç şübhəsiz ki, bu siyasi kampaniyada da xalqımız cənab İlham Əliyevin namizədliyini dəstəkləyəcək. 2008-ci ildən bu günə qədər ötən dövr ərzində qazanılan nəticələrə diqqət yetirsək bir daha bu inamı qeyd edə bilərik ki, İlham Əliyevin 2013-cü il prezident seçkilərində qələbəsi şəksizdir.

Yusif Ələkbərov

İki sahil.- 2013.- 24 aprel.- S.14.