Akademik Zərifə Əliyevanın 90 illik yubileyi qeyd edilib

Ötən gün YAP Qaradağ rayon təşkilatı və Qaradağ Rayon İcra Hakimiyyətinin (RİH) birgə təşkilatçılığı ilə görkəmli oftalmoloq, akademik Zərifə Əliyevanın 90 illik yubileyi ilə bağlı Qaradağ rayonunda yerləşən Heydər Əliyev Mərkəzində tədbir keçirilib.

Tədbir iştirakçıları öncə Fəxri xiyabana gələrək Azərbaycan xalqının ümummilli lideri Heydər Əliyevin və akademik Zərifə Əliyevanın məzarlarını ziyarət edib, abidələri önünə tər çiçəklər düzüblər.

Heydər Əliyev Mərkəzində davam edən tədbirdə çıxış edən Qaradağ RİH başçısının müavini Zəfər Əliyev Azərbaycan oftalmologiya elminin inkişafında misilsiz xidmətləri olmuş akademik Zərifə Əliyevanın zəngin həyat və fəaliyyətindən bəhs edib. Qeyd edib ki, akademik Zərifə Əliyeva gözəl həkim olmaqla yanaşı, həm də qayğıkeş xanım idi.

YAP Qaradağ rayon təşkilatı Qadınlar Şurasının sədri Təranə İsmayılova da çıxışında Azərbaycan tibb elminin, xüsusən də oftalmologiya elminin inkişafında akademik, dəyərli ziyalı Zərifə Əliyevanın misilsiz xidmətlər göstərdiyini tədbir iştirakçılarının diqqətinə çatdırıb. T.İsmayılova Azərbaycan qadınının ən gözəl nümunəsi olan Z.Əliyevanın bir ana kimi layiqli övladlar yetişdirərək cəmiyyətə bəxş etdiyini vurğulayıb.

YAP Qadınlar Şurasının sədr müavini Məhəbbət İbrahimova tibb elminin inkişafındakı xidmətləri ilə yanaşı, akademik Zərifə Əliyevanın xalqımızın ulu öndəri Heydər Əliyevin ömür-gün yoldaşı kimi böyük fədakarlıqlar göstərdiyini deyib.

Ailə, Qadın və Uşaq Problemləri üzrə Dövlət Komitəsinin şöbə müdiri Kamilə Əliyeva Azərbaycan qadınının akademik Zərifə Əliyevanın timsalında bu günümüzə və gələcəyimizə böyük örnək olduğunu diqqətə çatdırıb.

YAP Siyasi Şurasının üzvü, partiyanın Qaradağ rayon təşkilatının sədri Aydın Hüseynov görkəmli oftalmoloq alim, akademik Zərifə Əliyevanın bir həkim olaraq insanlara qarşı sonsuz qayğısının tükənməz olduğunu bildirərək qeyd etdi ki, o, ictimai əhəmiyyət kəsb edən məsələlərdə də həmişə böyük fəallıq nümayiş etdirərək nümunə obrazı yaradıb.

Nail Rəhimzadə

İki sahil.- 2013.- 26 aprel.- S.21.