Qış turizmində yeniliklər olacaq?

Turizm deyilərkən əsasən yay mövsümü ağıllara gəlsə də, istirahətini qışa saxlayan və bu mövsümü üstün tutan şəxslər də var ki, bu da qış turizminin son illər daha da irəliləməsinə imkan və şərait yaradır.

Ümumdünya Turizm Təşkilatının statistikasına əsasən, hər il dünya üzrə turistlərin təxminən 30-35%-i istirahət mərkəzlərinə məhz qış aylarında üz tuturlar. Əsasən İsveçrə, Skandinaviya ölkələri, Çexiya, Kanada, ABŞ və Rusiya qış turizminin yüksək inkişaf etdiyi ölkələr hesab olunur. Azərbaycanda qış turizminin elə də çox yaşı olmasa da, bu gün ölkəmiz dünyanın bu sahədə böyük uğurlar əldə etmiş dövlətləri ilə rəqabət edə biləcək potensialdadır.

Son illər Azərbaycanda yüksək turizm infrastrukturunun formalaşdırılması istiqamətində ardıcıl tədbirlər həyata keçirilir. Statistikaya görə, qış aylarında istirahətə üstünlük verənlərin sayı ölkə üzrə ümumi turistlərin təxminən 10%-ni təşkil edir.

Dövlət başçısının təşəbbüsü ilə ölkədə qış turizminin inkişafı məqsədilə 2009-cu ildə Qusar rayonundan 30 kilometr şimalda, dəniz səviyyəsindən 2500 metr yüksəkdə “Şahdağ” Qış-Yay Turizm Kompleksinin tikintisinə başlanıldı. 5 minə yaxın turisti eyni zamanda qəbul edə biləcək obyektin müasir standartlara cavab vermək iqtidarında olması atılan addımların nə qədər dəqiq hesablanmasına sübutdur. Qış idman növlərinin: əsasən, xizəksürmənin inkişafına təkan verəcək bu unikal obyektdə süni qaryaratma avadanlıqları quraşdırılıb. Düşən yağıntının miqdarından asılı olmayaraq, qış mövsümündə xizək yollarının açıq qalmasına şərait yaradacaq belə qurğular dünyanın bütün tanınmış qış kurortlarında mövcuddur. Dağ relyefi ilə kəsişən yol isə beynəlxalq keyfiyyət və təhlükəsizlik standartlarına müvafiq olub, ilin bütün fəsillərində nəqliyyatın maneəsiz gedişinə şərait yaradır.

Qusarla yanaşı, Azərbaycanın əsas turizm marşrutlarından sayılan Qəbələdə də qış turizminin inkişafı istiqamətində sistemli tədbirlər həyata keçirilir. Rayonun turizm potensialının möhkəmləndirilməsi məqsədilə “Tufan” dağ-xizək yay-qış istirahət kompleksinin inşası buna əyani sübutdur. Dağlıq ərazidə istirahət üçün əlverişli şəraitə malik olacaq bu sağlamlıq-turizm obyekti Qəbələ şəhərindən təxminən dörd kilometr aralıdadır. Kompleksin inşa edilməsi turistlər üçün ilin bütün fəsillərində ekskursiya və digər istirahət imkanlarını təmin etməklə yanaşı, onların qış idman növləri ilə məşğul olmalarına da şərait yaradacaq. Mədəniyyət və Turizm Nazirliyinin Turizm İdarəsinin şöbə müdiri Vüqar Şıxməmmədovun yerli mətbuata verdiyi məlumata əsasən, yeni mövsümdə turistləri bir çox yeniliklər gözləyir: “Ötən ilin qış aylarında “Şahdağ” qış-yay turizm kompleksindən 50 minə yaxın insan istirahət etmişdir. Bu il isə bu rəqəmlərin artacağı gözlənilir. Nəzərə alsaq ki, bu il kompleksdə yeni mehmanxanaların açılışı nəzərdə tutulub, infrastruktur genişlənir, ona görə də turistlərin də marağı artır. Ölkədə qış turizminin inkişafı naminə görülən işlər Azərbaycanlıların ölkəmizdə istirahətə üstünlük verməsinə gətirib çıxarır. Bu il qış turizmi ilə bağlı bir sıra yeniliklər olacaq. Yeni idman növləri yaradılacaq, mehmanxanalar açılacaq, sürpriz proqramlar təşkil olunacaq, atla gəzintilər və s. təşkil ediləcək.”

Bütün bunlardan başqa, hazırda Zaqatala, Şəki, Balakən və Daşkəsən rayonlarının ərazisində də qış turizminin inkişafına imkan verəcək müasir tipli kurortlar inşa olunur. Bütün bunlar regionlarda yeni iş yerlərinin açılması, vətəndaşların faydalı məşğulluğunun təmin edilməsi baxımından mühüm dividentlər vəd edir.

Nilufər Mustafaqızı

İki sahil.- 2013.- 19 dekabr.- S.15.