Yeni ili harada qarşılayaq?

Qış turizminin “qızmar” qiymətləri

Yerli turistlərin xaricə üz tutmalarının başlıca səbəbi Azərbaycanda fəaliyyət göstərən turizm mərkəzlərinin düzgün qiymət siyasəti formalaşdıra bilməməsidir

2014-cü ilin gəlişinə bir neçə gün qalıb. Paytaxt Bakı təzə ilin gəlişinə təmtəraqla hazırlaşır. Artıq paytaxtın müxtəlif yerlərində Yeni il yolkaları quraşdırılıb. Nazirlər Kabineti də bayramın gəlişi münasibəti ilə dekabrın 31-dən yanvarın 7-dək qeyri-iş günü elan edib. Hamı bu fürsətdən yararlanıb, Yeni ili maksimum yaddaqalan keçirmək istəyir. Düzdür, əksəriyyət Yeni ili öz evində qarşılamağa üstünlük versə də, bir qisim insanlar da var ki, onlar təzə ili müxtəlif restoranlarda, ölkənin müxtəlif bölgələrində olan istirahət mərkəzlərində, eləcə də xarici ölkələrdə qarşılamağa çalışır. Bəs görəsən, Yeni ili restoranlarda keçirmək və müxtəlif turpaketlər neçəyə başa gəlir?

Hazırda Azərbaycanın əksər bölgələrinə Yeni ili keçirmək üçün axın var. Mingəçevir, Lerik, Qəbələ, Nabran, Xəzərin sahillərində yerləşən restoran və otellərdə yeni ili keçirmək üçün müraciət edənlərin sayı çoxdur. Bu ildən Şahdağ yay-qış turizm obyektinin tam istifadəyə verilməsi, Azərbaycana turist axınının sayını artıracaq. Yeni ili xarici ölkələrdə qarşılamaq istəyənlər əsasən, iki qrupa bölünürlər. İsti sevən insanlar BƏƏ, soyuq sevənlər isə əsasən Gürcüstana gedirlər. Bu il azərbaycanlılar əsasən, Türkiyənin Uludağ ərazisinə, Avropa şəhərlərindən Barselona, Madrid (İspaniya), Roma, Milan (İtaliya), Praqa (Çexiya) və digər şəhərlərə axın edirlər.

Ölkə əhalisinin bir qismi paytaxt Bakıda Yeni ili qarşılamağı planlaşdırır. Bakıda da Yeni ili yalnız restoranda, istirahət mərkəzlərində qeyd etmək üçün isə qiymət o qədər də ürəkaçan deyil. Restoranların televiziya kanallarında efirə gedən reklamlarından aydın görünür ki, həmin gün şou-biznes nümayəndələrinin çıxışı ilə bir sıra restoranlarda Yeni il şousu olacaq. Məkanlardakı qiymətlər isə yeməyin menyusundan və yerlərdən asılıdır. Restoranlarda qiymətlər adambaşına 80-500 manat arasında dəyişir. Həmin rəqəmi ailə üzvlərinin sayına görə hesablasaq, məbləğin kifayət qədər yüksək olduğunu görərik.

Ancaq elə sakinlərimiz də var ki, Yeni ili dünyanın fərqli ölkələrində keçirməyə üstünlük verirlər. Buna görə də, bir çoxları turizm şirkətlərinin təklif etdikləri Yeni il turpaketlərindən yararlanırlar. Bu ərəfələrdə yerli turizm şirkətlərinin xarici ölkələrə təşkil etdiyi Yeni il paketlərinin qiymətləri də fərqlidir. Ölkənin ən tanınmış turizm şirkətlərindən aldığımız məlumata görə, bu günə qədər ən çox turpaketlər Türkiyə, Gürcüstan və digər postsovet ölkələrinə satılıb. Hər il olduğu kimi, bu il də qonşu Gürcüstana axının səbəbi nəqliyyat sisteminin rahatlığı, qış turizminin bu ölkədə inkişafı və qiymətlərin nisbətən ucuzluğudur. SİA-travel saytından aldığımız məlumata görə, Gürcüstanda “Tbilisi Courtyard by Marriott” otelində 3 günlük Yeni il istirahəti, yol xərcini və yemək xərcini özünüz ödəməklə 330 manata başa gəlir. ECTravel şirkəti isə Gürcüstanın Bakuriani bölgəsində bir nəfərlik bilet 7 gecə 8 gün qalmaqla 599 manata başa gəlir. Türkiyənin müxtəlif şəhərlərində təşkil edilən turların qiyməti isə fərqlidir. Məsələn, “Turizm.az” saytında qeyd olunur ki, Uludağda 6 gecə 7 gün bir nəfər üçün 810 manat, İstanbulda Yeni ili qarşılamaq üçün 4 gün üçün 320 manat sərf etmək lazımdır. Dubayda isə yeni il qarşılamaq tamam fərqlidir. Yəni burada qarsız yeni ili sevənlər 4 gün üçün 565 manat ödəməlidir.

SW travel şirkəti Parisdə möhtəşəm Yeni il gecəsi üçün bir nəfər 1285 manat ödəyib 8 gün Fransanın paytaxtını gəzəcək. Praqada isə Yeni il bir nəfərə 1139 manata başa gələcək. Digər maraqlı fakt odur ki, Roma+Milan turunu “SİA travel” müştərilərinə dekabrın 29-dan yanvarın 4-dək 5 gün üçün 595 manata təklif edir. İlk baxışdan normal qiymət olduğu görünür. Lakin buraya 50 manat viza, 60 avro viza haqqı və aviabilet 480 manat əlavə olunur.

Maraqlı məqama çatdıq. İndi isə Yeni ili ölkənin bölgələrində keçirmək istəyənlərə şok xəbərimiz var. Ekspertlər hesab edirlər ki, yerli turistlərin xaricə üz tutmalarının başlıca səbəbi Azərbaycanda fəaliyyət göstərən turizm mərkəzlərinin düzgün qiymət siyasəti formalaşdıra bilməməsidir. Elə turizm obyektləri var ki, orada bir həftəlik istirahətin qiyməti qonşu xarici ölkələrdəki qiymətlərdən demək olar ki, fərqlənmir, bəzi hallarda üstələyir.

Yuxarıda qeyd olunan paytaxt Bakının restoranlarının qiymətləri, xarici ölkələrə Yeni il turları bir yana bizim daxili turlarımız bir yana. Burada qiymət qış olmasına baxmayaraq olduqca “qızmardır”. Azərbaycanda Yeni ili keçirmək istəyənlər əsasən, Nabrana, Qəbələ, Lerik, Şəki, İsmayıllı, Şamaxı, Qusar, Qax və digər rayonlara üz tuturlar. Qaxda yerləşən məşhur otellərin birində Yeni il şənliyi 29 dekabrdan yanvarın 1-nə qədər davam edir. Dörd gecənin qiyməti -2 nəfər üçün 800 AZN-dən 1500 AZN-ə qədərdir. 1 nəfər üçün turun qiyməti -330 AZN-dir.

Qəbələdə Semerana otelində 1 nəfərlik 1 gün 120 manatdan başlayır. Bundan başqa, Yeni il şousuna qatılmaq üçün əlavə pul ödənilir. Turagent şirkətinin saytının məlumatına görə Şəkidə 4 günlük istirahət 214 manatdan, Qusarda isə 4 günlük istirahət 410 manatdan başlayan qiymətlərə başa gəlir. Hələ bəzi otellərdə bu qiymətlərə yalnız səhər yeməyi daxildir. Yeni il şousu üçün isə əlavə pul ödənilir. “Turizm.az” saytından əldə etdiyimiz məlumata görə, Qusarın “Qayı Bulaq” otelində bir günlük bir nəfər 125 manat ödəməlidir.

Sonda qiymətindən və harada keçirməkdən asılı olmayaraq hər kəsə gözəl qış, xüsusilə də Yeni il istirahəti arzulayırıq.

Orxan Vahidoğlu

İki sahil.- 2013.- 24 dekabr.- S.31.