SÖZƏ ÜRƏK DOSTU, CAN SİRDAŞI

DEYƏN ŞAİR 60 YAŞINA ÇATDI

...1971-ci ilin payız günləri idi. Onda dünyanın ən gözəl çağıydı, onda tələbə idik. Toplaşardıq Naxçıvan şəhərindəki Hüseyn Cavid adına kinoteatrın həyətindəki bağa: Rafiq Babayev, İnqilab Orxan, Asim Yadigar, Zeyqəm Vüqar... bir də mən. Şeir oxuyardıq, oxunanlara fikir söyləyər, münasibət bildirərdik.

Bizdən fərqli olaraq, öz şeirlərini əzbərdən söyləyirdi Asim. Hamı diqqətlə dinləyirdi onu, yeri gələndə iradlar da bildirilirdi - razılaşırdı da, razılaşmırdı da. İnsafən, şerləri daha çox səmimi, yaddaqalan, qəlboxşayan, qəlbəyatan idi. Onda “yada düşəndə ürəyin tellərini sızladan” tələbəlik həyatını yaşayırdıq, onda bizim 16-17 yaşımız var idi... Bu gün isə Asim artıq ömrünün altmışıncı pilləsindədir.

Bu müddətdə Asim şeirdən-şeirə, kitabdan-kitaba püxtələşmiş, yeniləşmiş, şeiri-sənəti həmişə uca tutan şairlərdən olmuşdur. Özünün də etiraf etdiyi kimi: “Mən sözlə oynayıram. O, sözlə ki, dünən vardı, bu gün var, sabah da olacaq. Dünəndən bu günə yol gələn, bu gündən sabaha yol başlayan söz mənim üçün canlı bir varlıqdır. Dərdimi onunla bölüşə bilirəmsə, onu deyib qurtarandan sonra bir azacıq rahat nəfəs ala bilirəmsə - sözə ürək dostu, can sirdaşı deməyim, bəs nə deyim? Mən sözün quluyam, ona bəndəlik etmək mənim üçün xoşdur”.

Sözə “ürək dostu, can sirdaşı” deyən Asim Yadigar 5 yanvar 1954-cü ildə Şərur rayonunun Püsyan kəndində anadan olmuş və həmin kənddəki orta məktəbi bitirmişdir. Hələ şagird ikən ədəbiyyata olan marağını tanınmış şair, əmisi Əliyar Yusiflidən aldığı məsləhətlər daha da artırmışdır. Elə bu həvəslə də orta təhsilini başa vurduqdan sonra sənədlərini Naxçıvan Dövlət Pedaqoji İnstitutunun (indiki Naxçıvan Dövlət Universitetinin) filologiya fakültəsinə vermiş və orada əyani təhsil almışdır.

Ali məktəb illərində Naxçıvanda “gur yanan” poeziya tonqalının istisində Asim Yadigar da “qızınmış”, bu gün Azərbaycan elmində və ədəbiyyatında özünəlayiq yerlər tutmuş İsa Həbibbəyli, Akif İmanlı, Elman Həbib, Əbülfəz Muxtaroğlu, Vaqif Məmmədov, Muxtar Qasımzadə kimi istedadlı şair və yazıçılarla birgə ədəbi dərnəklərdə, ədəbi məclislərdə iştirak etmiş, şeirlər oxumuşdur.

Naxçıvan Dövlət Pedaqoji İnstitutunu bitirdikdən sonra 7 il Qıvraq kənd orta məktəbində Azərbaycan dili və ədəbiyyatı müəllimi işləyən Asim Yadigar şagirdlərinə dilimizin və ədəbiyyatımızın zənginliklərini öyrətməklə yanaşı, bədii yaradıcılıq sahəsində də uğurlar qazanmışdır. Şeirləri mətbuatda, müxtəlif toplu və almanaxlarda çap olunmuş, radio və televiziyada səslənmişdir. Onun yaradıcılığı haqqında Xalq yazıçısı Hüseyn İbrahimov, ədəbiyyatşünas alim Yavuz Axundlu, şairlərdən Hüseyn Razi, Əliyar Yusifli, Kəmalə Ağayeva və başqaları xoş sözlər demişlər.

Asim Yadigar 1982-ci ildən 1989-cu ilə kimi Azərbaycan Yazıçılar Birliyinin Naxçıvan bölməsində məsləhətçi, Naxçıvan Muxtar Respublikası Televiziya və Radio Verilişləri Komitəsində “Ədəbi-bədii proqramlar” baş redaksiyasının baş redaktoru vəzifələrində çalışmışdır. 2007-ci ilin yanvar ayından isə Naxçıvan Yazıçılar Birliyinin sədridir.

O, qədim yurd yerlərimizdə yaşayan nənələrimizin, babalarımızın söz boğçasından topladığı şifahi xalq ədəbiyyatı nümunələrini bugünkü nəslə çatdırmışdır. Azərbaycan Yazıçılar Birliyi üzvlərinin, neçə-neçə istedadlı məktəblinin, tələbənin ilk şeirlərinin dinləyicisi olmuş, onlara “Uğurlu yol” yazmış, kitablarını redaktə etmişdir.

Şair dostumuzun yaradıcılıq yollarında ilk uğuru 1988-ci ildə “Yazıçı” nəşriyyatında çap olunan “Zirvə yolu” kitabıdır. Bu kitabdan sonra Asim “Unut bu sevdanı”, “Oğul dağı”, “Hər şeyin sonu var”, “Midiyanın süqutu”, “Kalba Musa çeşməsi” kimi şeir və poemalar kitablarını oxucularına ərmağan etmişdir. Azərbaycan müstəqillik qazandıqdan, üzümüzə dost və qardaş qapıları açıldıqdan sonra Asim Yadigarın şeirləri, şeirlərindən ibarət kitabları İran İslam Respublikasında, Türkiyə Cümhuriyyətində də çap olunur və sevilə-sevilə oxunur.

Azərbaycan xalqının ümummilli lideri Heydər Əliyevin “Azərbaycan dünyaya Günəş kimi doğacaq” müdrik kəlamını öz şeirinə epiqraf seçən A. Yadigar sabaha inamla, dahi rəhbərə tükənməz məhəbbətlə yazır:

Dalğalanır Bayrağım, köksümə sığmır ürək,

Qəlbim toy libasında, bu toyu çaldıran var.

Öz-özünə qalxmayıb, ucalmayıb o Bayraq,

O Bayrağı bayraqtək ucaldan, qaldıran var.

“Azərbaycan Bayrağı”, “Bir bayraq altında...”, “Fəxri Xiyabanda düşüncələr”, “Hücum əmri ver mənə” kimi şeirlərində ulu rəhbərimiz Heydər Əliyevə, Azərbaycan xalqının dövlət atributlarına, Vətənə, onun hər qarış torpağına böyük səmimiyyət duyulur. Yaşadıqları şanlı və işıqlı ömürlərini xalqının xoş sabahına həsr etmiş şəxsiyyətlər haqqında yazdığı şeirlər də oxucular tərəfindən səmimi qarşılanıb. Bu mənada akademik Zərifə Əliyevanın əziz xatirəsinə həsr edilmiş “İşıq seli”, görkəmli dövlət xadimi və həkim Əziz Əliyevə yazılmış “İşıq ömrü yaşayanlar”, Hüseyn Cavidə həsr etdiyi “Ulu Cavid”, sevimli müəllimi, tarixi romanlarımızın tədqiqatçısı, filologiya elmləri doktoru, professor, Prezident təqaüdçüsü Yavuz Axundlunun 80 illik yubileyinə yazdığı “Əlimdədir hələ qələm” şeirləri oxucular tərəfindən layiqli qiymətini almışdır.

Hər birimizdə olduğu kimi, istedadlı qələm sahibi Asim Yadigarın da qəlbinin dərinliklərində bir qəm, bir nisgil, bir həsrət yaşayıbdır. Odlar Yurdu Azərbaycanımızı qılınc kimi ortadan bölən, tikanlı məftillərlə çarmıxa çəkilən Araz çayının üzərindən keçmək, parçalanmış Vətənin qoynunu dolaşmaq, qədim mədəniyyətimizi və abidələrimizi özündə qoruyub-saxlayan tacımız və vüqarımız Təbriz şəhərini görmək və qoynunda dolaşmaq şair üçün uzun illər əlçatmaz arzu olubdur. Nəhayət, Araz çayının üstündən adlayıb Cənubi Azərbaycana qovuşmağı şair ömrünün ən unudulmaz, ən çılğın, ən təbli günü hesab edir. “Təbrizim”, “Zəncanım”, “Tut ağacları”, “Türkmənçaya gedən yol”, “Açıq məktub”, “Ərk qalası”, “Mən dinə bilmirəm”, “Bu yol Təbriz yoludur” kimi şeirlərin doğum tarixi Arazdan keçilən gündən başlayır.

Şairin “A Məmməd Araz” şeirində Xalq şairinə böyük sevgi, yaradıcılığına məhəbbət hissləri tərənnüm olunmuşdur:

Ürəyimi göynədir həsrət yenə, dərd yenə,

Zamanın sillələri dəydi yaman sərt mənə,

Qayalaşıb, daşlaşıb yaşamaq öyrət mənə,

“Dərdimi dənə döndər, üyüt,

A Məmməd Araz”.

Şairin müxtəlif illərdə, ayrı-ayrı kitablarında 10 poeması nəşr olunmuşdur. Bu poemaların hər biri ayrı-ayrı mövzuları əhatə edir.

Naxçıvan Muxtar Respublikası Yazıçılar Birliyinin sədri, Naxçıvan Muxtar Respublikası Ali Məclisinin deputatı, istedadlı şair Asim Yadigarın 60 yaşı tamam olur. Özünün yazdığı kimi, çiçək zərifliyini, çiçək kövrəkliyini bayraq kimi başı üzərinə qaldırıb, könül varı ilə - şeirləri ilə bundan sonra da hələ neçə-neçə kitabları ilə görüşümüzə gələcəkdir. Hər bir şeiri könlümüzü ovudacaq, hər bir misrası, hər bir bəndi dodaqlarımızda səslənəcəkdir. Belə bir şairin oxucusu olduğumuz üçün özümüzü xoşbəxt sayacağıq.

İbrahim YUSİFOĞLU,

“Şərur” Ədəbi Birliyinin rəhbəri,

Azərbaycan Yazıçılar Birliyinin üzvü,

“Qızıl qələm” mükafatı laureatı

İki sahil.- 2013.- 26 dekabr.- S.13.