Günün tələbi: Gənclər yüksək biliyə və təcrübəyə malik olmalıdır

Oğuz «Yay məktəbi»nin iştirakçıları təqdimatlarda fəal iştirakları ilə bu çağırışa yüksək səviyyədə əməl etməkdə israrlı olduqlarını nümayiş etdirirlər

YAP Gənclər Birliyinin təşkil etdiyi «Yay məktəbi»nin Oğuz turu işini uğurla davam etdirir. İyulun 3-də «Seçki kampaniyası və Azərbaycan gəncləri» mövzusunda təqdimat keçirilib. Qrup rəhbəri YAP Siyasi Şurasının üzvü, «İki sahil» qəzetinin baş redaktoru Vüqar Rəhimzadə qonaqları salamladıqdan sonra mövzuya uyğun olaraq bu gün ölkəmizin demokratik inkişafından, seçki qanunvericiliyinin təkmilləşdirilməsi istiqamətində atılan biri-birindən əhəmiyyətli addımlardan bəhs edib.

Bildirib ki, ölkəmizdə seçkilərin demokratikliyini, azad və şəffaflığını təmin edən təkmil seçki qanunvericiliyi mövcuddur, dövlətimiz hər zaman qabaqcıl ölkələrin təcrübəsinin öyrənilməsinə və hər bir yeniliyin Seçki Məcəlləsində öz əksini tapmasına maraq göstərir. Demokratik seçkiləri hər bir dövlətin mütərəqqi inkişafının və sabit vətəndaş cəmiyyətinin əsası kimi dəyərləndirən dövlət başçısı İlham Əliyev hər zaman bu fikri önə çəkir ki, ölkədə bütün işlər müasir tələblərə uyğun şəkildə aparılmalıdır.

Tədbirdə çıxış edən YAP-ın icra katibinin müavini, Milli Məclisin deputatı Siyavuş Novruzov bildirib ki, ölkədə siyasi mübarizə sivil qaydalarla tənzimlənir. 22 illik müstəqillik tarixinə malik olan Azərbaycanın ötən dövr ərzində müxtəlif sahələrdə həyata keçirilən islahatlar nəticəsində qazandığı uğurlar seçki sisteminin də təkmilləşməsinə, beynəlxalq standartlara uyğun qurulmasına, eləcə də seçki qanunvericiliyinin sistemləşdirilməsinə mühüm təsir göstərib. Sözsüz ki, bu təkmilləşmənin əsası 1995-ci ildə Konstitusiyanın qəbulu ilə başlanmışdır. Belə ki, sənəddə bu sahədə əsas prioritetlər müəyyən edilmiş, onları rəhbər tutaraq Azərbaycanda bərabər seçki hüququ əsasında gizli səsvermə yolu ilə azad və mütəmadi keçirilən seçkilərin hüquqi bazası yaradılmışdır. 1997-ci ildən başlayaraq müasir standartlara cavab verən seçki qanunvericiliyinin təsis edilməsi məqsədilə Azərbaycan hökuməti ATƏT-in Demokratik Təsisatlar və İnsan Hüquqları Bürosu ilə yaxından əməkdaşlıq etmişdir. 2001-ci ilin yanvarında Azərbaycan demokratik prinsiplərin inkişafı ilə məşğul olan Avropa Şurasına tamhüquqlu üzv qəbul olunduqdan sonra ölkəmizin seçki sisteminin təkmilləşdirilməsi ilə bağlı əməkdaşlıq çərçivəsi daha da genişləndirilmiş və bu prosesə Avropa Şurasının Venesiya Komissiyası da cəlb edilmişdir. Səmərəli əməkdaşlıq nəticəsində 2003-cü ilin mayında Azərbaycan Respublikasının Seçki Məcəlləsi qəbul edilmişdir. Bu sənəd beynəlxalq təşkilatlar tərəfindən yüksək qiymətləndirilərək, Venesiya Komissiyasının və ATƏT-in Demokratik Təsisatlar və İnsan Hüquqları Bürosunun yekun rəyində bildirilmişdir ki, Seçki Məcəlləsi seçkilərin və referendumun keçirilməsi üçün beynəlxalq meyarlara və ən yaxşı təcrübələrə uyğun olan hərtərəfli çərçivələr nəzərdə tutur. Ölkədə keçirilən seçkilərin əvvəlki seçki prosesləri ilə müqayisəli təhlilindən də bu gerçəklik özünü qabarıq şəkildə büruzə verir.

S.Novruzov qeyd edib ki, qəbul olunan sənədlərin daim təkmilləşdirilməsinə maraq göstərən dövlətimiz Seçki Məcəlləsində də yeniliklərin öz əksini tapmasına çalışır. 2005 və 2010-cu il parlament, 2008-ci il prezident seçkiləri zamanı Seçki Məcəlləsinə edilən əlavə və dəyişikliklər, eyni zamanda 2005-ci ildə seçki praktikasının təkmilləşdirilməsi, seçkilərin hazırlanması və keçirilməsi ilə bağlı təxirəsalınmaz tədbirlər haqqında sərəncamların imzalanması Azərbaycan dövlətinin demokratik, dünya standartlarına uyğun seçkilərin keçirilməsində necə maraqlı olduğunu ortaya qoyur. Ölkədə keçirilən seçkilərdə yeni təcrübələrin tətbiqi- barmağın gözəgörünməyən mürəkkəbə boyanması, yerli və beynəlxalq təşkilatlar tərəfindən «exit poll»un keçirilməsi, seçki məntəqələrində veb-kameraların quraşdırılması və s. kimi addımlar da bu istəyin göstəricilərindəndir.

YAP-ın icra katibinin müavini qeyd edib ki, seçkilərin mahiyyətcə bir-birilə qırılmaz surətdə bağlı olan müxtəlif mərhələlərdən ibarət mürəkkəb proses olduğunu nəzərə alsaq, bu mərhələlərin demokratikliyini, şəffaflığını təmin etmək üçün də ciddi addımlar atılır. Azərbaycan dövlətinin seçkiləri izləmək üçün daha çox xarici müşahidəçilərin iştirakında maraqlı olması, bununla bağlı həmin qurumlara müraciətlər ünvanlaması daim təqdir olunub. Beynəlxalq qurumlar seçki proseslərində uzunmüddətli və qısamüddətli müşahidə missiyaları ilə təmsil olunurlar. Onlar özlərinin ilkin və yekun rəylərində seçkilərin nəticələri ilə bağlı fikirlərini açıqlayırlar. Ümumi rəy bu olur ki, Azərbaycan dövləti seçkilərin beynəlxalq standartlara uyğun keçirilməsi üçün ciddi səylər göstərir.

Ölkəmizin mühüm siyasi kampaniya-prezident seçkiləri ərəfəsində olduğunu qeyd edən S.Novruzov bildirib ki, digər seçki prosesləri kimi bu kampaniyanın da yüksək fəallıq, demokratik şəraitdə keçirilməsi üçün zəruri olan bütün addımlar atılır. Seçki fəallığının artırılmasında gənclərin rolunu xüsusi vurğulayan S.Novruzov qeyd edib ki, yeniliyə, müasirliyə üstünlük verən Azərbaycan gəncləri daim ölkəmizdə bu yeniliyin, inkişafın şahidi olur.

Bildirilib ki, bu gün sıralarında 600 mindən artıq üzvü birləşdirən Yeni Azərbaycan Partiyasının üzvlərinin 40 faizini gənclər təşkil edir. Gənclərin seçki proseslərində fəallığı hər zaman yüksək dəyərləndirilir. Gələcəyə böyük inamla irəliləyən Azərbaycan gəncləri cənab İlham Əliyevin ətrafında sıx birləşərək, həyata keçirilən siyasətə dəstəklərini ölkənin inkişafına, tərəqqisinə töhfələri ilə təsdiqləməyə çalışırlar.

Təqdimatda dağıdıcı ünsürlərin reallıqları inkar cəhdlərinə də münasibətini açıqlayan S.Novruzov bildirib ki, onların fəaliyyətinə diqqət yetirdikdə hər zaman oxşar olan bir məqamın şahidi oluruq. Bu məqamın daha çox hansı ərəfələrdə diqqəti çəkdiyi məlumdur. Ölkəmiz üçün əhəmiyyətli tədbirlərin keçirildiyi zamanlarda göstərilən canfəşanlıqlar onların uğurlarımıza qısqanclıq hisslərindən qaynaqlanan addımları kimi dəyərləndirilsə də, seçkilər zamanı canfəşanlıqları tamamilə başqa məqsədi daşıyır. Bu baxımdan ki, seçkinin bir sınaq imtahanı olduğunu dərk edən dağıdıcılar nüfuzlarının, sosial bazalarının yoxluğundan narahatlıq hissi keçirdiklərindən, ən əsası məğlubiyyətlərinin qaçılmaz olduğundan yeganə çıxış yolunu əks təbliğat kampaniyasının sürətini artırmaqda görürlər. Amma unudurlar ki, reallıqların fonunda fərziyyətləri ictimai fikrə həqiqət kimi sırımaları qeyri-mümkündür.

Milli Məclisin deputatı Rauf Əliyev çıxışında dövlət başçısı İlham Əliyevin «Seçkilərin nəticələri ölkədəki ab-havanı əks etdirir» fikrini önə çəkdi. Bu günə qədər ölkədə keçirilən seçkilərə diqqət yetirsək, hər zaman yeniliklərin şahidi olarıq. Beynəlxalq müşahidəçilərin fikirlərində də bu gerçəklik əksini tapır ki, demokratiyanın beşiyi kimi dəyərləndirilən ABŞ-da belə namizədlərə Azərbaycandakı qədər şərait yaradılmır.

O da bildirilib ki, seçkilərin elan olunması və namizədlərin irəli sürülməsi, qeydə alınması, seçkiqabağı təşviqat və s prosedurlar ölkədə yüksək səviyyədə təşkil olunur. Səsvermə mərhələsində seçicilərin öz seçim hüquqlarından sərbəst istifadə etmələri təmin olunur, hər kəs öz seçimində sərbəstdir. Yekun nəticə isə seçicilərin fəallığından, onların səslərindən asılıdır. Bu zaman namizədin nüfuzu, fəaliyyəti ona istəyinin gerçəkləşməsində yardımçı ola bilər.

YAP Siyasi Şurasının üzvü, YAP Xəzər rayon təşkilatının sədri Namiq Əhmədov isə bildirib ki, ötən dövrün uğurları irəliyə daha böyük inamla baxmağa əsas verir. Azərbaycan bu gün ən yüksək zirvələri fəth edir. Ulu öndər Heydər Əliyevin siyasi kursunun Prezident İlham Əliyev tərəfindən davam etdirilməsi uğurların davamlılığına əsas yaradır. Cənab İlham Əliyevin son on ildə gördüyü işlər, uğurlu nəticələr onun növbəti prezident seçkilərində də qələbəsini təmin edəcək. Azərbaycan növbəti beş ildə də cənab İlham Əliyevin rəhbərliyi ilə inkişaf edəcək, qarşıya qoyulan hədəfə nail olacaq. Azərbaycanı inkişaf etmiş ölkələr sırasında görmək başlıca hədəfdir.

Gənclər «Yay məktəbi»nin onlara verdiyi biliklərdən, təcrübədən, təqdimat üçün seçilən mövzudan məmnunluqlarını ifadə ediblər.

Yavər Məmmədova,

BDU-nun tələbəsi

- Azərbaycan gəncliyi dövlətin onlara diqqət və qayğısını yüksək dəyərləndirir. Dövlət başçısı İlham Əliyevin bu günlərdə imzaladığı «Gənclər üçün Prezident mükafatının təsis edilməsi haqqında» fərmanı da bu diqqət və qayğının əsas tərkib hissəsi kimi dəyərləndirilir. Biz gənclər dövlət başçısı İlham Əliyevin siyasətini dəstəkləyir, onun ətrafında sıx birləşərək, gələcəyə böyük inamla baxırıq. Ölkə reallıqlarını inkar yolunu tutan, öz şəxsi ambisiyalarını dövlətin, xalqın mənafeyindən, milli maraqlardan üstün tutan dağıdıcı ünsürlərin cəhdlərinin yersizliyi Azərbaycanın uğurları fonunda özünü qabarıq şəkidə büruzə verir.

Cavidan Heydərov,

Bakı Biznes Universtetinin tələbəsi

- Ölkə reallıqlarının içərisində olan və bu gerçəklikləri vətəndaşlıq təəssübkeşliyi baxımından dəyərləndirməyi bacaran hər kəs Azərbaycanın uğurlarından qürur duymalıdır. Təəssüflər olsun ki, sapı özümüzdən olan baltalar xarici antiazərbaycan qüvvələrin əlində oyuncağa çevrilərək bu reallıqları inkar edir, ölkənin demokratik imicinə zərbə vurmaq üçün dəridən-qabıqdan çıxırlar. Uğurlara qara eynəkdən baxan bu ünsürlər hər zaman ictimai qınaqla üz- üzədirlər. İctimai qınaq ən böyük cəza olsa da daxili bədxahlarımız hələ də bundan nəticə çıxarmaq barədə düşünmür. Bu da onların şəxsi ambisiyalarının quluna çevrilmələrinin sağalmaz xəstəlik olduğunu təsdiqləyir.

Dünyamin Kazımov,

gənc yazar, Prezident Təqaüdçüsü, jurnalist

- Dövlət başçısı İlham Əliyevin hər zaman qeyd etdiyi kimi, siyasət görülən işlər, real məsələlərdir. Son 10 ildə Azərbaycanın qazandığı uğurların miqyasının genişliyinə diqqət yetirsək, həyata keçirilən siyasətin möhkəm təmələ əsaslandığının bir daha şahidi olarıq. Azərbaycanın 155 ölkənin dəstəyini qazanaraq BMT Təhlükəsizlik Şurasına qeyri-daimi üzv seçilməsi ölkəmizə beynəlxalq baxışın hansı səviyyədə olduğunu ortaya qoyur. Xatırlasaq işğalçı Ermənistan da namizədliyini irəli sürmüşdür. Təbii ki, ölkəmizin qələbəsinin şəksiz olduğunu, heç bir sahədə Azərbaycanla rəqabət aparmaq imkanında olmadığını dərk edən işğalçı dövlət bu addımından geri çəkilmək məcburiyyətində qaldı. Azərbaycanın iqtisadi və siyasi uğurları tezliklə yeganə problemimiz olan Ermənistan-Azərbaycan, Dağlıq Qarabağ münaqişəsinin də ədalətli həllini təmin edəcək.

Bu gün dağıdıcı ünsürlərin öz fərdi mövqelərini xalqın adından təqdim etmələri ikrah doğurur. Reallıqların içərisində olan xalq bu ünsürlərin bir illik hakimiyyətləri dövründə Azərbaycanı hansı durumla üz-üzə qoyduqlarını yaxşı xatırlayır. Nə Azərbaycan 20 il bundan öncəki Azərbaycandır, nə də xalq həmin dövrdəki xalqdır. 22 illik müstəqillik tarixinə malik olan Azərbaycanın həyatında baş verən yeniliklər, inkişaf xalqın düşüncələrində də öz ifadəsini tapır. Xalq kimin kim olduğunu, hansı məqsədlər uğrunda mübarizə apardıqlarını çox yaxşı bilir. Cənab İlham Əliyevin namizədliyi rəsmi olaraq Yeni Azərbaycan Partiyasının V qurultayında irəli sürüldü. Bu təkcə partiyanın 600 mindən artıq üzvünün deyil, xalqın böyük əksəriyyətinin istəyinin ifadəsidir. Xalqımız tam əmindir ki, cənab İlham Əliyev növbəti prezident seçkilərində də böyük səs çoxluğu ilə yenidən Prezident seçiləcək, Azərbaycan daha möhtəşəm uğurlara imza atacaq.

Nemət Abdullayev,

Masallı rayon gənci

- Gənclərin yeganə namizədi cənab İlham Əliyevdir. Biz dövlətin siyasətini dəstəkləyir, cənab İlham Əliyevin ətrafında sıx birləşərək, ölkəmizin gələcəyinə böyük inamla baxırıq. Bu dəstəyimizi qarşıdan gələn prezident seçkilərində fəallığımızla sübut edəcəyik.

Emil Əzizov,

Ağdaş rayon gənci

- Dağıdıcı müxalifətin fərziyyələri reallıqların fonunda sabun köpüyünü xatırladır. Nə qədər cəhdlər olunsa da yalanın həqiqət üzərində qələbəsi mümkünsüzdür. Azərbaycan inkişaf yolunda inamla irəliləyir, biz gənclər ölkəmizin uğurları ilə qürur duyuruq.

Ramiz Mahmudov,

Oğuz rayon gənci

- Seçkidən-seçkiyə «biz də varıq» prinsipi üzrə hərəkət edərək özlərini xalqa yaxın göstərməyə çalışan dağıdıcı müxalifət partiyaları bu həqiqəti çox yaxşı bilirlər ki, xalqa deyil, xarici himayədarlarına arxalananların aqibəti siyasi meydanın küncünə sıxılmaqdır. Bu günədək ölkədə keçirilən və xalqın iradəsinə əsaslanan seçkilərin nəticələri bunun təsdiqidir. 2013-cü il prezident seçkiləri bir daha bu reallığı ortaya qoyacaq.

Həbib Nəsirov,

ARDNŞ-in mühəndisi

- İqtisadiyyatı inkişafın təməl daşı kimi dəyərləndirən dövlət başçısı İlham Əliyev gənclərin böyük qüvvə olduğunu, Azərbaycanın gələcəyinin onlara məxsusluğunu, eyni zamanda müasir dövrün informasiya-kommunikasiya texnologiyaları əsri olduğunu önə çəkərək, yüksək ixtisaslı gənclərin yetişdirilməsini qarşıya mühüm vəzifə kimi qoyur. Dövlət başçısı bildirir ki, peşəkar kadrların hazırlanması bu gün nəinki təhsil sahəsində, yaxud da ki, hansısa ayrı bir neft-qaz sahəsində, ümumiyyətlə ölkə qarşısında duran ən vacib problemlərdən biridir və biz bütün sahələrdə buna nail olmalıyıq. Gənclərə diqqət və qayğı, onların təhsilinin inkişafına yönələn addımlar Azərbaycan Dövlət Neft Şirkətinin də fəaliyyətinin əsas tərkib hissələrindəndir. ARDNŞ-in həyata keçirdiyi «Yay məktəbi» və «Yay təcrübəsi» layihələri də gənc kadrların yetişdirilməsinə xidmət edən addımlardandır.

Bu diqqət və qayğını, ümumiyyətlə, ölkənin hərtərəfli inkişafını inkar etmək siyasi korluq və qərəzdir. Qərəzçiliyi, inkarçılığı fəaliyyətlərinin əsas istiqaməti kimi qəbul edən dağıdıcılar bu günə qədər ölkədə keçirilən seçki proseslərində xalqdan aldıqları «yox» cavabından nəticə çıxarsalar daha yaxşı olar.

Diskussiya şəklində davam edən təqdimatda bir daha qeyd olundu ki, ölkəmizin uğurları davamlıdır və bunun şərtləndirən əsas amil düşünülmüş və məqsədyönlü siyasətdir. Gənclər bu siyasətə dəstəklərini biliklərini artırmaq, təcrübələrini təkmilləşdirmək və çalışdıqları sahələrdə tətbiq etməklə təsdiqləməyə çalışırlar. Azərbaycanın gələcəyi gənclərlə bağlıdır.

Yeganə Əliyeva

İki sahil.- 2013.- 4 iyul.- S.12-13.