Azərbaycana beynəlxalq baxış xalqımızın rəyi ilə üst-üstə düşür

Dağıdıcı ünsürlər şəxsi maraqlarına xidmət edən dezinformasiyaları dövriyyəyə buraxmaqla ictimai fikri çaşdırmağa çalışsalar da, həqiqəti ört-basdır etməyin mümkünsüzlüyünün şahidinə çevrilirlər

Dövlət başçısı İlham Əliyev Bakıda XX Beynəlxalq “Xəzər neft, qaz, neftayırma və neft kimyası” sərgi-konfransının açılış mərasimində Azərbaycanın ötən dövr ərzində qazandığı uğurları diqqətə çatdıraraq bildirmişdir: “Əlbəttə, bu nailiyyətlərin təməlində neft amili dayanır. Amma sadəcə olaraq neft amili kimi deyil, neftdən uğurlu istifadə edən dövlət siyasəti dayanır. Çünki dünyada neft-qaz hasil edən, ixrac edən ölkələr çoxdur. Hesab edirəm ki, Azərbaycan təcrübəsi böyük təqdirə layiqdir.”

Keçirilən beynəlxalq əhəmiyyətli bu kimi tədbirlər Azərbaycanın malik olduğu imkanların dünyaya təqdimatında əhəmiyyətli rol oynayır. Təbii ki, bugünkü Azərbaycanı 20 il bundan öncəki Azərbaycanla müqayisə etmək qeyri-mümkündür. İqtisadi qüdrətini günbəgün artıran ölkəmizin beynəlxalq münasibətlər sistemində yeri və rolu da artmaqdadır. Bunun təsdiqi olaraq XX Beynəlxalq “Xəzər neft, qaz, neftayırma və neft kimyası” sərgi-konfransı ilə əlaqədar Prezident İlham Əliyevə ünvanlanan təbrik məktublarında əksini tapan fikirləri qeyd etmək istərdik. ABŞ prezidenti Barak Obamanın təbrik məktubunda qeyd olunur: “Azərbaycanın təbii sərvətlərinin beynəlxalq bazarlara çıxarılması məqsədilə ötən dövr ərzində qoyulmuş iri həcmli investisiyalar qlobal enerji təchizatının sabitləşdirilməsi işinə xidmət etmiş, Azərbaycanın müstəqilliyi və iqtisadi inkişafına töhfə vermişdir. Azərbaycanın beynəlxalq tərəfdaşları ilə möhkəm münasibətləri sayəsində mühüm enerji layihələri həyata keçirilmiş və bu layihələr Azərbaycanı dünya bazarının önəmli neft təchizatçısına və regionun mühüm qaz mənbəyinə çevirmişdir. Qarşıdan gələn ildə “Şahdəniz” layihəsinin ikinci fazası və planlaşdırılan Trans-Anadolu qaz kəməri layihəsi Azərbaycanı, eyni zamanda, Avropanın mühüm qaz təchizatçısı mövqeyinə daha da yaxınlaşdıracaqdır. Azərbaycanın neft sərvəti şaxələndirilmiş iqtisadiyyatının inkişafına xidmət etmək, qanunun aliliyinin gücləndirilməsi və Azərbaycan xalqının həyat səviyyəsinin daha da yaxşılaşdırılması potensialına malikdir. Azərbaycan ABŞ-ın simasında sadiq tərəfdaşa malikdir və Sizinlə uzun illər əməkdaşlıq əzmindəyəm.”

Böyük Britaniya və Şimali İrlandiya Birləşmiş Krallığının Baş naziri Devid Kemeronun təbrikində bildirilir: “Mən ölkələrimiz arasında ticarət əlaqələri üzərində qurulmuş möhkəm, davamlı ikitərəfli münasibətləri alqışlayıram. Qarşıdan gələn illər ərzində Azərbaycanın enerji ehtiyatları Avropa və dünya iqtisadiyyatında getdikcə daha mühüm rol oynayacaqdır. Azərbaycan bu ehtiyatların hər kəsin naminə istifadə etdiyi bir dövrdə daha çox əhəmiyyət kəsb edir. 2013-cü il dünya səviyyəli “Şahdəniz” yatağının istismarının davam etdirilməsi və Avropaya yekun kəmər marşurutu üzrə bir sıra mühüm qərarların qəbul edilməsi nəticəsində “Cənub qaz dəhlizi”nin reallaşması baxımından mühüm il olacaqdır. Azərbaycanın yaxın dostu və tərəfdaşı kimi, mən qarşıdan gələn uzun illər ərzində sabit enerji mənbəyinin təmin edilməsi istiqamətində səy göstərilməsində iştirak edənlərə yeni uğurlar arzulayıram.”

Hər iki təbrikdə müstəqil Azərbaycana, Prezident İlham Əliyevə dəstək açıq şəkildə ifadə olunur. Təbii ki, bu dəstəyi şərtləndirən əsas amil dövlətimizin düşünülmüş və məqsədyönlü siyasəti nəticəsində biri-birindən əhəmiyyətli uğurlara imza atmasıdır.

Dövlət başçısı İlham Əliyevin çıxışlarında hər zaman səsləndirdiyi bu fikri də qeyd etmək istərdik: “Biz daha da güclü olmalıyıq və oluruq. Beynəlxalq mövqelərimizi möhkəmləndiririk, dünya miqyasında böyük dəstəyə malikik... Biz indi dünyada yeni tərəfdaşlar əldə edirik və görürük ki, bizim üçün, əməkdaşlıq üçün ənənəvi olmayan qitələrdən də Azərbaycana böyük maraq vardır.” Azərbaycan dövlətinin bu mövqeyi ən yüksək tribunalardan bəyan edilir ki, ölkəmiz ancaq bərabərhüquqlu münasibətləri qəbul edir: “Əgər kimsə fikirləşirsə ki, öz iradəsini bizə qəbul etdirə bilər, səhv edir. Biz ancaq bərabərhüquqlu, qarşılıqlı maraqlar, bir-birinin işinə qarışmamaq prinsiplərini qəbul edirik.”

Bu gün Azərbaycanın beynəlxalq əhəmiyyətli tədbirlər üçün ideal məkan seçilməsi də beynəlxalq nüfuzunun, siyasi çəkisinin göstəricisidir. “Biz dünya miqyasında çox vacib bir diskussiya meydanını yarada bilmişik” söyləyən dövlət başçısı İlham Əliyev Azərbaycanın hərtərəfli inkişafının bu uğurda rolunu xüsusi vurğulayır. İqtisadiyyatın düzgün əsaslar üzərində qurulması nəticəsində Azərbaycan dünyanı bürüyən iqtisadi və maliyyə böhranından uğurla çıxdı. Ölkəmiz iqtisadi artımı ilə dünyanın diqqət mərkəzində dayandı. Qeyd edək ki, iqtisadi və mailyyə böhranının geniş vüsət aldığı 2009-cu ildə ölkəmizdə iqtisadi artım 9,3 faiz, 2010-cu ildə isə 5 faiz təşkil etdi. Azərbaycan dövlətinin həyata keçirdiyi iqtisadiyyatın şaxələndirilməsi siyasəti beynəlxalq səviyyədə də təqdir olunur. Ölkəmizin yeni iqtisadi və sosial çağırışların müzakirəsi üçün əsas məkan seçilməsində də bu amilin rolu inkaredilməzdir. İnkişafın Azərbaycan modeli beynəlxalq səviyyədə tanınır və dəstəklənir. Beynəlxalq tədbirlərdə, forumlarda qeyd olunur ki, hazırkı dövrün əsas çağırışı yoxsulluqla mübarizədir ki, Azərbaycanın bu sahədə həyata keçirdiyi tədbirlər və onların uğurlu nəticələri təqdirəlayiqdir. Ölkəmizin bu üstünlüyü hər zaman önə çəkilir ki, Azərbaycan təbii ehtiyatlarla zəngin olan ölkədir və bu resurslardan səmərəli şəkildə istifadə edilir. Yoxsulluq səviyyəsi bu gün 6 faizdir. Bu onun nəticəsidir ki, maddi resurslar insan kapitalına çevirilir.

Sürətlə inkişaf edən, dəyişən dünyada xalqlar və dövlətlər yaxınlaşır, insanlar və talelər birləşir. Bu yaxınlaşmaya hər bir ölkənin verdiyi dəstək hədəflərə çatmaq üçün stimul rolunu oynayır. Bu gün Azərbaycanın müxtəlif mədəniyyətlərin, sivilizasiyaların qovşağında yerləşməsi, zəngin təbii resurslara malik olması əlaqələrin inkişafında, beynəlxalq tədbirlərin keçirilməsi üçün əsas məkan seçilməsində əhəmiyyətli rol oynayır.

Azərbaycanın artan nüfuzunun təsdiqi kimi, bu günə qədər ölkə iqtisadiyyatına qoyulan investisiyaların həcminin 140 milyard dollardan artıq olmasını da qeyd edə bilərik. Bunun 52 milyard dolları neft-qaz sektorunun payına düşür. Dövlət başçısı İlham Əliyev daim çıxışlarında bildirir ki, investisiyaların həcminin artırılmasında təbliğatın rolu böyükdür. Elə ölkələr var ki, Azərbaycanın malik olduğu iqtisadi imkanlar barədə o qədər də ətraflı məlumata malik deyil. Biznes forumların keçirilməsi bu baxımdan əhəmiyyətli hadisə kimi qeyd olunur. Eyni zamanda İnvestisiya Şirkətinin fəaliyyəti də onə çəkilir. Qurum ölkəmizin neft-qaz, eyni zamanda qeyri-neft sektoru sahəsində malik olduğu imkanların dünyaya təqdimatında mühüm rol oynayır. Bu gün qeyri-neft sektoruna yatırılan investisiyaların həcminin artması da deyilənlərin təsdiqidir. Azərbaycan investisiya cəlbediciliyini qorumaqla yanaşı, investisiya yatıran ölkə kimi də tanınır.

Ölkəmizlə iqtisadi əməkdaşlıqda maraqlı olan dövlətlərin sayı günbəgün artır. Keçirilən zirvə görüşləri, biznes forumlar, eyni zamanda dövlət başçılarının qarşılıqlı səfərləri ölkələrin malik olduqları potensial barədə daha dolğun məlumatların əldə olunmasına zəmin yaradır. Azərbaycanın ev sahibliyi etdiyi tədbirlər davamlılığı ilə diqqət çəkir. Bu, bir daha belə bir reallığı təsdiqləyir ki, möhkəm təmələ əsaslanan siyasətin nəticəsi olaraq iqtisadi və siyasi mövqeyini günbəgün möhkəmləndirən, demokratik inkişafı ilə nümunə olan ölkəmizin qarşısında daim yeni-yeni imkanlar açılır, hədəflərə çatmaq üçün zəruri olan bütün əsaslar mövcuddur.

Azərbaycana beynəlxalq baxış xalqımızın rəyi ilə üst-üstə düşür. Yalnız xalqına güvənən, onun maraqlarını qoruyan və bu maraqları qlobal siyasətin tələbləri ilə uzlaşdırmağı bacaran dövlət rəhbəri həm dünyada bir lider kimi qəbul olunur, həm də öz xalqının milli lideri statusuna yüksəlir.

Azərbaycanın uğurlarını hər zaman qısqanclıqla qarşılayan daxili bədxahlarımız bu gün ənənələrinə sadiqlik nümayiş etdirərək ictimai fikri çaşdırmaq üçün dərindən-qabıqdan çıxırlar. Guya dünyanı yönləndirən dövlətlər Azərbaycanda hakimiyyəti dəyişmək qərarına gəlib və növbəti prezident seçkilərində müxalifətə güclü dəstək verəcəklər. Dağıdıcıların bu sayıqlamarı ictimai fikirdə onlara qarşı mənfi rəyi daha da artırır. Dövlətinin, xalqının mənafeyini, milli maraqları düşünən kəs heç zaman xəyanət yolunu tutmaz. Dağıdıcı ünsürlər hər addımlarında riyakarlıqlarını, xəyanətkarlıqlarını nümayiş etdirirlər. Siyasi qısqanclıq hissindən qayanaqlanan əsassız təbliğatları heç zaman ictimaiyyətə inandırıcı görünə bilməz. Çünki xalq fərziyyələrə deyil, reallığa dəyər verir. Reallıq isə budur ki, yazının əvvəlində də qeyd etdiyimiz kimi, Azərbaycanın beynəlxalq aləmdə yeri və rolu günbəgün artır. Bu günlərdə ölkəmizdə keçirilən “Azərbaycan-ABŞ: Gələcəyə baxış” Forumunda da ölkəmizin bu uğuru əsaslı şəkildə diqqətə çatdırıldı. Hansı ki, bu Forum da dağıdıcı ünsürlər və onların tabeliyində olan mətbu orqanlar tərəfindən qərəzli şəkildə şərh olundu. Foruma qatılan senatorların, konqresmenlərin ABŞ Administrasiyasının mövqeyinə təsir etmək imkanında olmadığını bildirməklə Azərbaycanın uğuruna qısqanclıqlarını açıq-aşkar büruzə verən dağıdıcılar özlərini qınaq hədəfinə çevirdilər. Hər halda siyasi savadsızlıqlarından yaranan bu düşüncələrini bir kənara qoyub, tədbirə obyektiv qiymət vermək istəsəydilər, bunun fərqində olardılar ki, iki ölkənin 21 illik diplomatik münasibətinə baxış, perspektivlərin müəyyənləşdirilməsi üçün əhəmiyyətli olan bu tədbir Azərbaycan və ABŞ hökumətinin birgə səylərinin nəticəsidir. Səsləndirilən fikirlər də hər iki dövlətin mövqeyini əks etdirir.

Bütün bunların fonunda bir daha dağıdıcıların təbliğatlarının şəxsi maraqlarına xidmət edən dezinformasiyalar olduğu təsdiqlənir.

Yeganə Əliyeva

İki sahil.- 2013.- 6 iyun.- S.3.