"Heydər Əliyev: Böyük azərbaycanlı"

Yeni Azərbaycan Partiyasının təşkilatçılığı ilə bu adda keçirilən konfransda dahi şəxsiyyətin dövlətimiz, xalqımız qarşısındakı xidmətləri bir daha diqqətə çatdırılaraq bildirildi ki, nə qədər Azərbaycan dövləti, xalqı var, Heydər Əliyev ürəklərdə yaşayacaq

Dünən Yeni Azərbaycan Partiyasının təşkilatçılığı ilə müasir Azərbaycan dövlətinin qurucusu, ulu öndər Heydər Əliyevin anadan olmasının 90-cı ildönümü ilə əlaqədar "Heydər Əliyev: Böyük azərbaycanlı" " mövzusunda konfrans keçirildi.

Konfrans iştirakçıları öncə Fəxri xiyabana gələrək ümummilli lider Heydər Əliyevin xatirəsini yad etmiş, məzarı önünə əklil və qızıl gül dəstələri qoymuşlar. Görkəmli oftalmoloq alim Zərifə xanım Əliyevanın xatirəsi də yad edilmiş, məzarı önünə qızıl gül dəstələri düzülmüşdür.

Sonra "Gülüstan" sarayında Prezident Administrasiyasının məsul işçilərinin, nazirlərin, komitə sədrlərinin, Milli Məclisin deputatlarının və media nümayəndələrinin iştirakı ilə davam edən tədbiri giriş sözü ilə açan Yeni Azərbaycan Partiyasının sədr müavini - icra katibi, Milli Məclisin deputatı Əli Əhmədov bildirdi ki, həmişə olduğu kimi Azərbaycanın hər bir bölgəsində, ümumiyyətlə azərbaycanlıların yaşadığı hər yerdə müstəqil Azərbaycan dövlətinin qurucusu, Yeni Azərbaycan Partiyasının yaradıcısı, ulu öndər Heydər Əliyevin xatirəsi yad edilir, ona insanların hörmət və məhəbbəti bir daha ifadə olunur. "Azərbaycan tarixinə şöhrət gətirən parlaq simaların sırasında Heydər Əliyevin yeri və rolu xüsusi görünməkdədir. Azərbaycanın müasir tarixi və onun gələcək perspektivləri bilavasitə Heydər Əliyevin adı, onun müəyyənləşdirdiyi siyasət, əsasını qoyduğu inkişaf konsepsiyası ilə əlaqədardır. Heydər Əliyev böyük bir epoxadır. Bu epoxanın əhəmiyyətli bir hissəsi, təxminən 40 ili artıq tarixdir. Ancaq düşünürük ki, Heydər Əliyev epoxası yalnız tarix deyil, daha çox gələcəkdir, Azərbaycanın və xalqımızın gələcək taleyini, perspektivlərini müəyyənləşdirən qüdrətli amildir. Hər bir şəxsiyyətin miqyası onun xalqın tarixində oynadığı rolla nə dərəcədə müəyyən olunursa, o qədər də, bəlkə də ondan artıq dərəcədə ölkənin, dövlətin və xalqın gələcək taleyinə təsir göstərmək perspektivləri, imkanları ilə müəyyənləşmiş olur. Heydər Əliyevin Azərbaycan tarixində dərin izi ilə yanaşı təbii ki, bizim hər birimizin inamı bundan ibarətdir ki, xalqımızın gələcək taleyinə daha böyük və uzunmüddətli dövrlərdə təsiretmək imkanlarına malikdir."

"Əlbəttə, Heydər Əliyevin Azərbaycana rəhbərlik etdiyi dövrlərdə bütün sahələrdəki yüksək inkişaf və bu inkişafın nəticələri ölkədə hər kəsə məlumdur" söyləyən Ə.Əhmədov bildirdi ki, eyni zamanda Azərbaycan vətəndaşlarının Heydər Əliyev ideyalarına, Heydər Əliyevin müəyyənləşdirdiyi siyasətə dərindən inam həm də ona görə diqqət çəkəndir ki, bu ideyalar Azərbaycanın gələcəyinə, xalqımızın gələcək taleyinə də böyük müsbət təsir göstərmək imkanındadır. "Hesab edirəm ki, belə bir qənaətin formalaşması yalnız nəzəri düşüncələr və müddəalara söykənmir, eyni zamanda son 10 il ərzində onun ideyaları əsasında Azərbaycanın böyük inkişaf mərhələsini dəf etməsi ilə əlaqədardır. Ötən on il ərzində Azərbaycan onun müəyyənləşdirdiyi ideyaların və siyasətin Heydər Əliyevin layiqli davamçısı Prezident İlham Əliyev tərəfindən həyata keçirilməsi nəticəsində böyük inkişaf mərhələsi keçib. İqtisadiyyat yüksək sıçrayışla inkişaf edib. İqtisadi inkişaf zəminində əhalinin rifah halı əhəmiyyətli dərəcədə yaxşılaşıb. Azərbaycan dövləti daha güclü, qüdrətli və əzəmətli olub, regional liderə çevrilib, dünya birliyində özünə layiqli yer tutub. Eyni zamanda Azərbaycanın gələcək perspektivləri geniş şəkildə xalqımızın qarşısında açılmaqdadır. Beləliklə də, Azərbaycan vətəndaşları Heydər Əliyev ideyalarının və onun müəyyənləşdirdiyi siyasətin yenə də Azərbaycana və xalqımıza xidmət etdiyini görür və bu xidmətin uzun illər davam edəcəyinə, Heydər Əliyev epoxasının Azərbaycan xalqının taleyini uzun illər müşaiyət edəcəyinə inanır."

YAP sədrinin müavini qeyd etdi ki, Heydər Əliyevin xatirəsinə həsr olunmuş 11-ci konfrans keçirilir. "Bu konfransın mövzusunu müəyyənləşdirərkən "Heydər Əliyev: Böyük azərbaycanlı" mövzusunun üzərində dayandıq. Hesab etdik ki, Heydər Əliyevin Azərbaycan dövləti və xalqı qarşısındakı xidmətlərini ən ümumiləşdirilmiş şəkildə ifadə etmək üçün uğurlu məfhumlardan biri böyük azərbaycanlı ola bilər. Azərbaycanın qüdrətini, gücünü, möhtəşəmliyini bu sözdən daha yaxşı ifadə etmək mümkün deyil. Azərbaycanın Heydər Əliyevin müəyyənləşdirdiyi konsepsiya əsasında bundan sonra da inkişaf mərhələsini yaşayacağını da bu ifadədən yaxşı əks etdirmək mümkün deyil. "Heydər Əliyev: Böyük azərbaycanlı" mövzusu əsasında təşkil olunan konfransda sözsüz ki, ulu öndər Heydər Əliyevin ayrı-ayrı sahələrin inkişafı istiqamətində gördüyü işlər, əldə olunan uğurlar bir daha diqqətə çatdırılacaq."

Baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov bildirdi ki, dövləti qurub-yaradan, məhv olmaq təhlükəsindən xilas edən, mənalı ömrünü xalqına sədaqətlə xidmətə həsr edən, həyatda məqsədi qurub-yaratmaq olan insanlar dahi şəxsiyyətlərdir. Tarixi isə belə şəxsiyyətləri çox nadir hallarda yetişdirir və həm də bu xoşbəxtlik tək-tək xalqa nəsib olur. "Xalqımız xoşbəxtdir ki, XX əsr Azərbaycana, xalqımıza 2 böyük və əvəzolunmaz nemət bəxş etmişdir: dövlət müstəqilliyi və əbədi lider. Dövlət müstəqilliyi hər bir xalqın həyatında ən dəyərli nemətdir. Bu dəyərli neməti əldə etmək nə qədər çətindirsə, onu qorumaq, möhkəmləndirmək bir o qədər çətin, ağır və mürəkkəbdir. Bu mühüm tarixi vəzifənin öhdəsindən isə yalnız sözün əsl mənasında həqiqi lider gələ bilər. Bəli, XX əsrin Azərbaycana, xalqımıza, dünyaya bəxş etdiyi ən böyük vətəndaş, dahi şəxsiyyət, müdrik siyasi xadim, xalqımızın əbədi lideri, dünənin, bu günün və sabahın aparıcı siyasi qüvvəsi olan Yeni Azərbaycan Partiyasının yaradıcısı Heydər Əliyevdir. 90 illik bir zaman axarını vərəqlədikcə açıq-aydın görürük ki, Heydər Əliyev böyük siyasət qalasının ən uca zirvəsini fədakarlıqla fəth edə bilmişdir. Ulu öndər kiçik bir məmləkətin adını bütün dünyaya tanıtmağa nail olmuşdur. O, qəlbi daim bəşəri duyğularla döyünən ümüumbəşər övladı, ən böyük azərbaycanlı idi. Dünya siyasət meydanında cərəyan edən proseslərə təsir baxımından dahi siyasətçi həmişə öz sözü, öz çəkisi, öz dəst-xətt ilə seçilmişdir. XX əsrin sonlarında Azərbaycanda dövlətçilik ənənələrinin bərpa edilib zənginləşdirilməsi, Azərbaycanın dövlət müstəqilliyinin möhkəmləndirilməsi, onun əbədi, dönməz xarakter alması, ölkəmizin dinamik iqtisadi inkişaf yolu ilə inamla irəliləməsi, beynəlxalq nüfuzunun sürətlə artması, strateji müttəfiqlərin qazanılması Heydər Əliyevin uzaqgörən və zəngin siyasi fəaliyyəti sayəsində mümkün oldu."

Ə.Həsənov bildirdi ki, bütün mənalı həyatını Azərbaycanın tərəqqisinə, əhalinin güzəranının, rifah halının yaxşılaşdırılmasına həsr edən ümummilli lider Heydər Əliyevin ən böyük arzularından biri də Ermənistan-Azərbaycan, Dağlıq Qarabağ münaqişəsinin ədalətli həlli, zəbt olunmuş torpaqlarımızın erməni işğalçılarından azad edilməsi, bir milyondan artıq soydaşımızın öz doğma yurd- yuvalarına qayıtması idi. "O, bunun üçün daim var qüvvəsi ilə çalışırdı. Məhz Heydər Əliyevin diplomatiyası sayəsində münaqişənin əsil mahiyyəti, Azərbaycanın haqq səsi dünya ictimaiyyətinə çatdırıldı, Ermənistanın təcavüzkar siyasəti ifşa edilərək, qələbəmizin siyasi, diplomatik zəmini formalaşdırıldı, BMT Təhlükəsizlik Şurasının qətnamələri qəbul olundu”.

Bildirildi ki, son on ildə Heydər Əliyev siyasətinin Prezident İlham Əliyev tərəfindən uğurla davam etdirilməsi nəticəsində dövlətimiz öz daxili resursları üzərində güclü iqtisadi zəmin yaratmış və gələcəyə böyük ümidlərlə, nikbinliklə baxır.

Ə.Həsənov dövlətimizin Ermənistan-Azərbaycan, Dağlıq Qarabağ münaqişəsi nəticəsində öz doğma yurd-yuvalarından didərgin düşmüş soydaşlarımıza diqqət və qayğısından geniş bəhs etdi. Bu inam ifadə olundu ki, Prezident İlham Əliyevin səyləri nəticəsində ölkəmizin ərazi bütövlüyü bərpa ediləcək, işğaldan azad olunacaq ərazilərdə həyat tamamilə yenidən qurulacaq, soydaşlarımız öz doğma yurd-yuvalarına qayıdacaqlar. Bütün xalqımız kimi, məcburi köçkünlər də rəhbər, lider kimi yalnız cənab İlham Əliyevə inanır, etibar edirlər. Çünki Azərbaycana belə layiqli siyasi davamçını ulu öndər Heydər Əliyev bəxş etmişdir.

Milli Məclis sədrinin birinci müavini Ziyafət Əsgərov çıxışında ulu öndər Heydər Əliyevin "Mən həmişə fəxr etmişəm və bu gün də fəxr edirəm ki, mən azərbaycanlıyam" tezisini bir daha xatırlatdı. Bildirdi ki, Heydər Əliyevin azərbaycançılıq ideologiyasının əsas prinsiplərindən biri o idi ki, dilindən, dinindən, etnik mənsubiyyətindən və siyasi əqidəsindən asılı olmayaraq, Azərbaycan bütün azərbaycanlıların vətənidir.

Diqqəti ulu öndər Heydər Əliyevin xalqın təkidli tələbi ilə hakimiyyətə qayıtdığı dövrə yönəldən Z.Əsgərov bildirdi ki, dahi şəxsiyyət belə bir ağır vəziyyətdə ölkə daxilində siyasi sabitliyi təmin etmək, iqtisadi siyasətin prioritetlərini müəyyənləşdirmək, kompleks islahatlar proqramının həyata keçirilməsinə baza yaradan konsepsiya hazırlamaq kimi çətin vəzifənin öhdəsindən məharətlə gəldi. Bununla da əsaslı sosial-iqtisadi dəyişikliklərə start verildi.

Z.Əsgərov dövlət başçısı İlham Əliyevin ulu öndər Heydər Əliyevin 90 illik yubileyinin keçirilməsi barədə sərəncamında qeyd olunan fikirləri bir daha diqqətə çatdırdı: " Dünya iqtisadiyyatına uğurla inteqrasiya, ölkə daxilində iqtisadi liberallaşma, kredit reytinqlərimizin artması, iqtisadiyyatımızın rəqabət qabiliyyətinin yüksək mövqedə olması, büdcəmizin və valyuta ehtiyatlarımızın ildən-ilə çoxalması 1993-cü ildən etibarən Heydər Əliyev tərəfindən yeni prinsiplər əsasında qurulan iqtisadiyyatın sabitliyinin bariz nümunəsidir. Azərbaycanda qeyri-neft sektorunun uğurla inkişaf etdirilməsi də Heydər Əliyevin uzaqgörənliyinin məntiqi nəticəsidir. Postsovet məkanında analoqu olmayan cəsarətli qərarları ilə Heydər Əliyev torpağın şəxsi mülkiyyətə çevrilməsi ilə ölkəmizin ərzaq təhlükəsizliyini təmin etmiş oldu. Bu gün müxtəlif kənd təsərrüfatı komplekslərinin uğurlu fəaliyyəti onun aqrar siyasətinin parlaq təzahürüdür."

Çıxışda bir daha qeyd olundu ki, azadlıq, müstəqillik hər bir xalqın müqəddəs amalıdır. 1993-cü ilin iyununda xalqın təkidli tələbi ilə hakimiyyətə qayıdan Heydər Əliyevin müdrikliyi və əzmkarlığı sayəsində Azərbaycan parçalanmaq təhlükəsindən xilas oldu.

Dahi şəxsiyyətin Azərbaycan dövləti və xalqı qarşısındakı xidmətlərindən geniş bəhs edən Z.Əsgərov vurğuladı ki, məhz bu siyasətin bu gün Prezident İlham Əliyev tərəfindən uğurla davam etdirilməsi nəticəsində Azərbaycan ən yüksək zirvələri fəth edir.

O da bildirdi ki, müasir dövrümüzdə Azərbaycanın konstitusion dövlət kimi təşəkkül tapması ölkədə ictimai-siyasi prosesələrlə müşayiət olunan tarixi şəraiti və bu müstəvidə fəaliyyət göstərən siyasi liderin dinamik mübarizə xətti ilə bağlıdır. Konstitusiya mövcud dövlətin bütöv hüquq sisteminin özəyi kimi çıxış edən, ölkə vətəndaşlarının əksəriyyətinin maraq dairəsində olan ictimai həyatı və əsas dövlət qurumlarının fəaliyyətini tənzimləyən normativ hüquqi aktdır. Ulu öndər Heydər Əliyevin Konstitusiyanın hazırlanmasında, qəbul edilməsində gərgin liderlik əməyi və töhfəsi danılmazdır. Konstitusiyanın qəbulu dövlətçiliyimizin möhkəmləndirilməsi, Azərbaycanın dünya birliyində nüfuzunun daha da artması baxımından çox mühüm ictimai-siyasi hadisə kimi qiymtəndirilməlidir. Azərbaycan Konstitusiyasında müasir sivil cəmiyyətin inkişaf istiqamətlərini müəyyənləşdirən və konstitusiyalı quruluşun əsaslarını təşkil edən ideya və dəyərlər geniş şəkildə öz əksini tapmışdır.

Z.Əsəgrov Konstitusiyamızda insan hüquq və azadlıqlarının yüksək səviyyədə qorunmasına xidmət edən maddələrin çoxluq təşkil etdiyini önə çəkərək bildirdi ki, dövlətin ali məqsədi insanların hüquqlarını qorumaq, onların layiqli həyat səviyyəsini təmin etməkdir.

Milli Məclisin deputatı, Bakı Dövlət Universitetinin rektoru, YAP İdarə Heyətinin üzvü, akademik Abel Məhərrəmov bildirdi ki, yubileylər hesabat xarakteri daşıyır. Dahi şəxsiyyət Heydər Əliyevin 90 illik yubileyinin belə yüksək səviyyədə keçirilməsi onun Azərbaycan dövləti, xalqı qarşısındakı xidmətlərinə verilən dəyərdir.

A.Məhərrəmov dahi şəxsiyyətin təhsilin, elmin inkişafı istiqamətində gördüyü işlərdən, əldə olunan uğurlardan geniş bəhs etdi. Qeyd etdi ki, elm və təhsil ictimaiyyətinə göstərilən yüksək diqqət və qayğını, ölkəmizin bütün sahələrdə qazandığı böyük nailiyyətləri respubilkamızın nüfuzlu ali təhsil ocağı olan Bakı Dövlət Universitetinin çoxsaylı tələbə-müəllim heyəti də yaxından hiss edir və dərin rəğbət hissi ilə qarşılayır.

Ailə, Qadın və Uşaq Problemləri üzrə Dövlət Komitəsinin sədri Hicran Hüseynova bildirdi ki, təsadüfi deyil ki, Heydər Əliyevin fəaliyyət istiqamətlərindən birini onun sosial siyasətində gender bərabərliyinin gücləndirilməsi həmişə ön planda olub. İndiki qlobal inkişaf zəminində dünyanın gender balansı böyük əhəmiyyət daşıyır. Ölkəmiz genderlə bağlı yeniliklərə ilk imza atan dövlətlərlə bir sıradadır. Bu gün dövrün iqtisadi-siyasi, elmi-mədəni səviyyəsi və sosial siyasətin gender aspekti ümummilli liderin uzaqgörən siyasətinin nəticəsi və qlobal təfəkkürünün cəmiyyətə verdiyi töhfələrdir.

Milli Məclisin Komitə sədri, Azərbaycan Dövlət İqtisad Universitetinin rektoru Şəmsəddin Hacıyev bildirdi ki, Azərbaycan inkişafında yeni mərhələyə qədəm qoyub. Yeni dövrün əsas hədəfi Azərbaycanı yaxın zamanlarda inkişaf etmiş ölkələr sırasında görməkdir.

Bildirildi ki, neft strategiyasının əsas tərkib hissəsi olan və qlobal əhəmiyyət daşıyan Bakı-Tbilisi- Ceyhan və Bakı-Tbilisi Ərzurum neft- qaz kəmərlərinin reallaşması ilə regional çərçivədən çıxaraq dünyəvi əhəmiyyəti ilə fərqlənən ölkəmizin investisiya imkanlarının artması da düşünülmüş siyasətin Prezident İlham Əliyev tərəfindən layiqincə davam etdirilməsinin nəticəsidir. Ölkə əhalisinin sosail müdafiəsinin mükəmməl və etibarlı şəkildə təmin edilməsi istiqamətində görülən işləri də diqqətə çatdıran Ş.Hacıyev vurğuladı ki, əsası ümummilli Heydər Əliyev tərəfindən qoyulmuş sosial siyasət 2003-cü ildən başlayaraq Prezident İlham Əliyev tərəfindən uğurla davam etdirilir. Sosial siyasət modeli ölkə əhalisini qlobal böhranlardan müdafiə edir və insanların daimi olaraq rifah halının yüksək saxlanılmasını labüdləşdirir. Respublikamızın biri-birini tamamlayan beynəlxalq münasibətlər sistemində, qlobal layihələrin reallaşmasında Azərbaycanın önəminin artması bu siyasətin uğurudur. Azərbaycanın dünya ölkələri sırasında sayılıb-seçilən, qüdrətli və zəngin bir dövlətə çevrilməsi ideyası dəyişib-yeniləşən zamanın tələbindən və gələcəyin inkişaf modelini aydın görə bilən strateji düşüncənin və siyasi iradənin vəhdətindən bəhrələnir.

Sonda YAP sədrinin müavini-icra katibi Əli Əhmədov bir daha çıxış edərək ulu öndər Heydər Əliyevin "Azərbaycan dünyaya günəş kimi doğacaq" fikrini xatırladaraq bildirdi ki, ulu öndərin uzaqgörənliklə qeyd etdiyi bu tezis həqiqətə çevrilib: "Doğrudanda da Azərbaycan sürətli inkişafı, dinamik yüksəlişi ilə dünyaya günəş kimi işıq saçır. İllər keçdikcə bu günəşin parıltısı daha da güclənir. Ümummilli lider Heydər Əliyev eyni zamanda bildirirdi: "Nə qədər ki Azərbaycan var, mən də varam. Mən isə Azərbaycanda əbədi olacağam!" Hər bir Azərbaycan vətəndaşı ulu öndərin müdrikcəsinə dediyi bu sözlərin həqiqət olduğunu qəbul edir. Azərbaycanın bugünkü reallıqları, sürətli inkişafımız, dövlətimizin gücünün, qüdrətinin durmadan artması, bütün bunlardan da ən vacib olan hər bir kəsin qəlbində Heydər Əliyevin xatirəsinə dərin hörmət ondan xəbər verir ki, dahi şəxsiyyət bizimlədir. Nə qədər Azərbaycan dövləti, xalqı var, Heydər Əliyev ürəklərdə yaşayacaq."

Yeganə Əliyeva

İki sahil.- 2013.- 7 may.- S.4-5.