Qələbələr partiyası

Dahi şəxsiyyət Heydər Əliyevin yaradıcısı olduğu Yeni Azərbaycan Partiyası biri-birini əvəzləyən uğurları ilə bu mövqeyini daha da möhkəmləndirir

Dahi şəxsiyyət Heydər Əliyevin 90 illik yubileyinin ölkəmizdə yüksək səviyyədə qeyd olunması onun dövlətimiz, xalqımız qarşısındakı xidmətlərinə verilən böyük dəyər, ümumxalq sevgisi və ehtiramının göstəricisidir. Ümummilli liderin “Nə qədər ki Azərbaycan var, mən də varam. Mən isə Azərbaycanda əbədi olacağam” fikri də onun bu xidmətlərinin böyüklüyündən, vətəninə, xalqına məhəbbətindən qaynaqlanırdı. Bu gün böyük inamla və fəxr hissi ilə qeyd edirik ki, müstəqil Azərbaycan Heydər Əliyevin şah əsəridir.

Ulu öndər Heydər Əliyevin siyasi fəaliyyətinin mühüm bir hissəsi yaradıcısı olduğu Yeni Azərbaycan Partiyası ilə bağlıdır. Həqiqətdə Yeni Azərbaycan Partiyasının yaranması ulu öndər Heydər Əliyevin 90-cı illərin əvvəllərində hakimiyyətə qayıdışı ideyası ilə eyniyyət təşkil edir. Müstəqilliyimizin ilk illərində ölkəmizdə yaşanan durum ümummilli lider Heydər Əliyevin hakimiyyətə qayıdışını zərurətə çevirmişdir. YAP-ın yaranması isə bu zərurətin əslində təşkilatlanma forması idi. Ulu öndər Heydər Əliyev 19 noyabr 1994-cü ildə keçirilən Yeni Azərbaycan Partiyasının yaradılmasının ikinci ildönümü münasibətilə ümumrespublika müşavirəsində bir daha partiyanın yaranmasını zəruri edən səbəbləri açıqlayaraq bildirmişdir: “Şübhəsiz ki, Yeni Azərbaycan Partiyasının yaranması mənim adım ilə bağlıdır və bu, mənim iştirakımla olmuşdur. Lakin mən həmişə həqiqəti sevmişəm və həyatım da həqiqət üzərində qurulmuşdur. Buna görə də bildirmək istəyirəm ki, Yeni Azərbaycan Partiyasının yaranması mənim təşəbbüsümlə olmayıbdır. Bu partiyanın yaranması Azərbaycanın demək olar əksər bölgələrində, şəhərlərində, rayonlarında, əmək kollektivlərində yaranan əhval-ruhiyyədən irəli gəlmiş bir hadisədir.”

Yeni Azərbaycan Partiyasının təsis konfransı 1992-ci il noyabrın 21-də Naxçıvan şəhərində keçirilib. Azərbaycanın müxtəlif regionlarından təşəbbüs qruplarının 550-dən artıq nümayəndəsinin iştirak etdiyi konfrans Yeni Azərbaycan Partiyasının təsis edilməsi haqqında qərar qəbul etmişdir. Heydər Əliyev konfrans nümayəndələri tərəfindən açıq səsvermə yolu ilə Yeni Azərbaycan Partiyasının Sədri seçilmişdir.

YAP yaranandan cəmi 6 ay sonra partiyanın yaradıcısı, xalqımızın ümummilli lideri Heydər Əliyev xalqın təkidli tələbi ilə hakimiyyətə qayıtdı və xalqımızın ulu öndərə, onun yaratdığı partiyaya bağladığı ümidlər ardıcıl olaraq həyata keçirilməyə başladı. Yeni Azərbaycan Partiyası iqtidar partiyasına çevrilərək ölkənin siyasi həyatında tutduğu mövqeyini möhkəmləndirmiş, kütləvi siyasi qüvvəyə çevrilərək ictimai həyatın bütün sahələrində tərəqqiyə nail olmaq məqsədilə yüksək fəallıq nümayiş etdirmişdir.

“YAP sınaqlardan çıxmış, böyük və şərəfli yol keçmiş, indi artıq Azərbaycan cəmiyyətində özünəməxsus yer tutmuş bir partiyadır.” Ulu öndər Heydər Əliyevin bu fikri ölkəmizin ictimai-siyasi həyatında mühüm rol oynayan, illər keçdikcə sıraları kəmiyyət və keyfiyyət baxımından daha da möhkəmlənən, ən başlıcası milyonların partiyasına çevrilən Yeni Azərbaycan Partiyasının dünəninə, bu gününə və gələcəyinə bələdçilik edir.

Yeni Azərbaycan Partiyasının yaradılmasının 15 illiyi şərəfinə ziyafətdəki çıxışı zamanı Prezident İlham Əliyev bir daha partiyanın hansı zərurətdən yarandığını diqqətə çatdıraraq bildirmişdir: “Yeni Azərbaycan Partiyası müxalifət partiyası kimi yaradılmışdı. Ancaq indiki müxalifətdən fərqli olaraq, biz dövlətə, dövlətçiliyə yox, o vaxtkı antimilli iqtidara müxalifətdə idik. Deyə bilərəm ki, Yeni Azərbaycan Partiyası Azərbaycanda siyasi davranış, siyasi mədəniyyət nümunəsini göstərmişdir. Biz müxalifətdə əlimizdə daş-kəsəklə yox, əlimizdə qələmlə çalışırdıq. İdeyalarımızı, fikirlərimizi öz çıxışlarımızda, məqalələrdə, ictimai tədbirlərdə irəli sürürdük. Bugünkü müxalifətdən fərqli olaraq, biz maksimum dərəcədə siyasi mədəniyyət göstərmişdik. Siyasi opponentləri təhqir etməmişdik, onlara fiziki xəsarət yetirməmişdik. Biz, sadəcə, xalqın iradəsinə arxalanaraq, Azərbaycanın uğurlu gələcəyinə çalışırdıq.”

Ulu öndər Heydər Əliyevin hakimiyyətə qayıdışı, Yeni Azərbaycan Partiyasının iqtidar partiyası kimi fəaliyyəti Azərbaycanın bugünkü uğurlarını təmin edən ən başlıca şərt olmuşdur. 1993-2003-cü illər Azərbaycan tarixinə dirçəliş illəri kimi daxil olub. İqtisadi sahədə yaşanan tənəzzül aradan qaldırıldı, siyasi proseslər müsbət məcrada inkişaf etməyə başladı. Ölkəmizdə siyasi plüralizm, demokratiya, söz azadlığı bərqərar oldu. Çoxpartiyalı sistemin yaradılmasında Yeni Azərbaycan Partiyasının rolu inkaredilməzdir. Bir sözlə, Yeni Azərbaycan Partiyası öz mövqeyini başqa partiyaları zəiflətməklə yox, öz fəaliyyəti ilə təmin etdi.

Həmin çıxışında tarixdə şəxsiyyətlərin roluna xüsusi diqqət yönəldən Prezident İlham Əliyev ulu öndər Heydər Əliyevin fəaliyyətini buna bariz nümunə kimi qeyd etmişdir: “Bütün dövrlərdə - həm 1970-ci illərdə və 1980-ci illərin əvvəllərində Azərbaycan Kommunist Partiyasının rəhbəri olduğu dövrdə, həm də müstəqil Azərbaycanın Prezidenti kimi Heydər Əliyev öz fəaliyyəti ilə doğma xalqına xidmət etmişdir.” Hakimiyyətinin hər iki dövründə xalqa, vətənə xidmət ulu öndər Heydər Əliyevin fəaliyyətinin əsasını təşkil edib.

Ölkədaxili proseslərə Yeni Azərbaycan Partiyası çox böyük təsir edir. Partiyanın sıralarında 600 min üzv birləşir. Bu, Heydər Əliyev ideyalarına, Prezident İlham Əliyevin həyata keçirdiyi siyasətin gələcəyinə inamın göstəricisidir. Yeni Azərbaycan Partiyasının 1998, 2003 və 2008-ci il prezident, 1995, 2000, 2005 və 2010-cu il parlament, 1999, 2004 və 2009-cu il bələdiyyə seçkilərində uğur qazanmasını şərtləndirən də məhz bu amillərdir. “Ona görə iqtidar partiyasıyıq ki, bizim siyasətimiz xalq siyasətidir. Deyə bilərəm ki, biz ümumxalq partiyasıyıq. Çünki Azərbaycanın qarşısında duran bütün məsələlərdə biz fəal iştirak edirik. Biz öz əməyimizlə bu siyasəti aparırıq” deyən Prezident İlham Əliyev bildirir ki, siyasət ilk növbədə, praktik işlərdir. “Bizim əməlimiz, bizim işlərimiz, verilən sözlərə sadiqliyimiz - bütün bunlar, əlbəttə, Yeni Azərbaycan Partiyasının nüfuzunu da qaldırır və deyə bilərəm ki, onu Azərbaycanın siyasi səhnəsində yeganə ciddi siyasi qüvvəyə çeviribdir.”

20 ildən artıq dövrə nəzər salarkən bu faktı qeyd etməliyik ki, tarix bu partiyanı qələbələr qazanmaq üçün yaradıb. Ötən bu müddət ərzində YAP daim qalib olub, hər bir sınaqdan, çətinliklərdən qalib çıxıb və özünü Azərbaycan xalqına qaliblər partiyası kimi tanıdıb.

O da aydındır ki, qarşıdakı illər üçün hədəflər müəyyənləşdirilərkən ötən illərin uğurlarının təhlilinə böyük zərurət yaranır. Dövlətimizin düzgün təmələ əsaslanan siyasəti nəticəsində yaşadığımız il daim əvvəlki ildən daha böyük uğurlarla zəngin olur. Prezident İlham Əliyevin vurğuladığı kimi, hər sahə üzrə proqramların mövcudluğu, onların xalq tərəfindən dəstəklənməsi və yüksək səviyyədə icrası uğurların davamlılığına böyük stimul verir. Həmin proqramlarda prioritetlər müəyyənləşdirilir, onların icra mexanizmləri və sərf olunacaq maliyyə vəsaitləri öz əksini tapır.

Beynəlxalq tədbirlərin təşkilində Yeni Azərbaycan Partiyasının rolu hər zaman yüksək dəyərləndirilir. 2011-ci ildə Yeni Azərbaycan Partiyasının təşkilatçılığı ilə 30 ölkədən 60-a yaxın nümayəndənin iştirakı əsasında “Modernləşmə siyasəti: yeni iqtisadi və sosial çağırışlar” adlı beynəlxalq konfrans günümüzün aktual, beynəlxalq ictimaiyyəti düşündürən məsələlər ətrafındakı müzakirələrin aparılması, Azərbaycanın qazandığı uğurların təqdimatı baxımından xüsusi əhəmiyyət kəsb etdi. Dövlət başçısının tədbir iştirakçılarına ünvanladığı təbrik məktubunda da bildirilmişdir ki, bəşəriyyətin üzləşdiyi qlobal problemlər ənənəvi iqtisadi və sosial inkişaf modelinə yenidən baxmağı tələb edir. Gələcək nəsillərin inkişaf və rifah içində yaşaması bugünkü çağırışlara düzgün cavabların tapılmasından çox asılıdır. Bu səbəbdən dünyanın 30-dan artıq ölkəsindən gəlmiş nümayəndələrin iştirakı ilə sözügedən çağırışlar ətrafında fəal dialoqun təşkil edilməsi təqdirəlayiq hadisədir. Dövrümüzün aktual problemlərinə çevrilən yeni iqtisadi və sosial çağırışlara dair fikir mübadiləsi aparmaq niyyəti ilə Bakıya toplaşan siyasətçilər, alimlər, ictimai xadimlər ölkəmizdə həyata keçirilən islahatlar və onların nəticələrini əyani olaraq görmək imkanına malik oldular. Dövlət başçısının tədbir iştirakçılarına məktubda bu inam da ifadə olunmuşdur ki, müxtəlif milli təcrübələr barəsində təqdimatlar müasir cəmiyyəti düşündürən problemlərin həllinə yönəlmiş səylərə əhəmiyyətli dəstək ola bilər.

Beynəlxalq əhəmiyyətli tədbirlər davamlılığı ilə diqqət çəkir. Ötən il Yeni Azərbaycan Partiyasının 20 illik yubileyi ərəfəsində partiyanın təşkilatçılığı ilə Asiya Siyasi Partiyalarının Beynəlxalq Konfransı adlı qurumun VII Baş Assambleyasının ölkəmizdə keçirilməsi də əhəmiyyətli hadisələrdən oldu.

Qeyd edək ki, beynəlxalq əməkdaşlıq YAP-ın fəaliyyətinin əsas istiqamətlərindəndir. Asiya Siyasi Partiyalarının Beynəlxalq Konfransı ilə Yeni Azərbaycan Partiyası arasında sıx əməkdaşlıq ələqaləri mövcuddur. YAP Asiya Siyasi Partiyalarının Beynəlxalq Konfransının Daimi Komitəsinin 18 nəfərdən ibarət İdarə Heyətinin üzvlərindən biridir. Baş Assambleyanın Bakıda keçirilməsinı şərtləndirən əsas amil də məhz Azərbaycanın bugünkü uğurlu inkişafıdır.

20 ildən artıq şərəfli yol keçən, bütün çətinliklərdən, fırtınalardan uğurla çıxan Yeni Azərbaycan Partiyasını qarşıdakı onilliklərdə daha möhtəşəm nailiyyətlər gözləyir. YAP da öz proqramını daim yeniləşdirir, populist vədlərdən uzaq olduğunu nümayiş etdirir. Ölkəmiz 2013-cü il prezident seçkiləri ərəfəsindədir. Hər zaman vurğulandığı kimi, siyasət görülən işlər, real məsələlərdir. Azərbaycanın bugünkü uğurları cənab İlham Əliyevin bu il keçiriləcək prezident seçkilərində də xalqın dəstəyini qazanaraq yenidən Prezident seçiləcəyinə əsas verir. Bu qələbə növbəti illər üçün nəzərdə tutulan hədəflərə çatmağa yol açmaqla yanaşı, Yeni Azərbaycan Partiyasının qələbələr partiyası olduğunu bir daha təsdiqləyəcək. Dövlətə, xalqa xidməti fəaliyyətinin önündə saxlayan Yeni Azərbaycan Partiyasına milyonların sevgisi şəksizdir.

Yeganə Əliyeva

İki sahil.- 2013.- 9 may.- S.18.