GÜCLÜ LİDER, GÜCLÜ AZƏRBAYCAN

İnsanlıq, Bəşərillk idealı,

Ləyaqəti, məsləki tərcümeyi - halı,

Heydər ocağının sönməz məşəli

Amal və əməl yolçusu,

Məramı-bütöv, müstəqil, qüdrətli Azərbaycan!

Müxtəlif dövrlədə dünyaya elə şəxsiyyətlər gəlir ki, onlar bir fenomen kimi, düha kimi cəmiyyətdə gördükləri işləri, əməlləriylə tarixin yaddaşında yaradıcı, qurucu kimi qalırlar.

Parlaq zəkası, yenilməz iradəsi, güclü məntiqi, yüksək kübarlılığı, ziyalılığı, zəngin biliyi, analitik təfəkkürü ilə seçilən və 20-ci yüzillikdə Azərbaycan xalqına “ALLAH payı” kimi bəxş edilən, insanlığın və müdrikliyin zirvəsində dayanan Heydər Əlirza oğlu Əliyev doğulduğu torpağın, mənsub olduğu xalqın haqq səsini bütün dünyaya çatdırdı və onu tanıtdı. O xalq xoşbəxtdir ki, onun ümummilli lideri var. Xalqımız Heydər Əliyev fenomeni, Heydər Əliyev zəkası, Heydər Əliyev şəxsiyyəti ilə daim fəxr etməyə, öyünməyə haqlıdır. Bir də onunla fəxr etməliyik ki, bu gün Heydər Əliyev yolunun layiqli davamçısı, insanlığı, bəşəriliyi özünə ideal seçən, ləyaqəti, məsləki, zəkası tərcümeyi- halı olan, Heydər ocağının sönməz məşəli, amal və əməl yolçusu, məramı bütöv, müstəqil, qüdrətli Azərbaycan olan, öz dəsti- xətti və rəhbərlik üslubu ilə seçilən İlham Əliyev kimi qətiyyətli, cəsarətli Prezidentimiz var.

İlham Əliyev prezident kimi ilk gündən bir sıra mühüm məsələləri həll etməli idi. Yeni prezident öz üzərinə olduqca böyük məsulliyyət götürmüşdü. Ölkə rəhbəri həm Heydər Əliyev tərəfindən əsası qoyulmuş dövlət qanunçuluğu prosesini bundan sonra daha uğurla davam etdirilməsini təmin etməli, həm də Azərbaycanın taleyüklü problemlərinin həlli istiqamətində konkret, eyni zamanda qətiyyətli addımlar atmalı idi. İntellektual, təcrübəli, iradəli, tədbirli dövlət başçısı kimi İlham Əliyev öz fəaliyyətini səmərəli qurmaq, vəzifəsini ləyaqətlə, şərəflə yerinə yetirmək, xalqın ona olan etimadını doğrultmaq üçün sınaq dövrü olan yüz gündə özünün gələcək strateji hədəflərini düzgün seçdi,ideoloji dayaqlarını müəyyənləşdirdi, sosial, maddi və mənəvi bazalar əsasında yeniləşdirilən inkişaf strategiyasını əsaslandırdı.

İlham Əliyev prezidentlik fəaliyyətinin ilk günündən buna qadir bir dövlət başçısı olduğunu sübuta yetirə bildi. İkitərəfli formada qurulan xarici siyasət bu gün bir çox ölkələr üçün nümunə ola bilər. Xarici siyasət bərabərhüquqlu, qarşılıqlı surətdə faydalı, hörmət və bir-birinin daxili işinə qarışmamaq prinsiplərinin üzərində quruldu.

Daxili siyasətlə bağlı ölkədə çox böyük işlər görüldü. Ölkədə siyasi islahatlar daha da dərinləşdirildi, keçən 10 il ərzində uğurlu iqtisadi islahatlar aparıldı, dünyanın ən sürətli iqtisadi inkişafına nail olundu.

Son 10 il ərzində Azərbaycanda bütün başqa istiqamətlərdə: Təhsil, səhiyyə, hüquq, mədəniyyət və sosial sahələrdə böyük nailiyyətlər əldə edildi. Beləliklə, ümummilli lider Heydər Əliyevin siyasi kursu, davamlı iqtisadi strategiyası dönmədən, ardıcıl, yüksək səviyyədə davam etdirildi. Özünə inam və şəxsi xidməti, yüksək insani amalları, güclü şəxsiyyəti, əsl liderlik keyfiyyətlərinə malik olan, müasir təfəkkürlü, dünya liderləri arasında özünün qətiyyəti, işgüzarlığı, mənəvi nüfuzu ilə seçilən İlham Əliyevə ölkəni müdrük idarə etməyə, Azərbaycanı dünya ölkələri içərisində sayılan, təcrübəsinə istinad olunan, günü-gündən çiçəklənən, dinamik inkişaf edən ölkə səviyyəsinə çatdırmağa imkan verdi.

İlham Əliyev son 10 ildə davam etdirdiyi siyasi, iqtisadi, mədəni yolun düzgün, uğurlu, ədalət, demokratiya, tərəqqi yolu olduğunu sübuta yetdi. Ölkə Prezidentinin Nazirlər Kabinetinin ilk iclasında iştirakı və çıxışı məsələlərin həmişə olduğu kimi, yenə də ölkə rəhbərliyi tərəfindən diqqətdə saxlanıldığını nümayiş etdirdi. İlham Əliyev çıxışında Azərbaycanın bundan sonrakı iqtisadi inkişafının konkret istiqamətlərini, aparılan islahatların ardıcıllığının təmin edilməsi yönümündə görüləcək işlərin prinsipal əsaslarını müəyyənləşdirdi.

İlham Əliyev “Azərbaycan Respublikasında sosial-iqtisadi inkişafın sürətləndirilməsi tədbirləri haqqında” fərman imzaladı. Bu fərman ölkədə sosial-iqtisadi inkişafı bütöv bir proses halında reallaşdırmağa imkan verdi. Bu gün Respublikamızda dayanıqlı, iqtisadi, mənəvi inkişaf artıq reallıqdır. Düzgün müəyyənləşdirilən sosial-iqtisadi siyasət ölkəmizi dayanıqlı inkişafa və tərəqqiyə aparır. 21 illik müstəqillik tarixinə malik olan ölkəmizin bu gün beynəlxalq aləmdə “iqtisadi möcüzələr” ölkəsi, Cənubi Qafqazın “parlayan ulduzu” kimi tanınması və mövqeyini möhkəmləndirməsi də ölkəmizdə İlham Əliyev tərəfindən həyata keçirilən siyasətin düzgünlüyünün təsdiqidir. Bir əsas məqamı da önə çəkmək zəruridir. 2008-ci ildən dünyanı bürüyən, nəticələri bu günə qədər davam edən iqtisadi və maliyyə böhranı hər bir ölkənin hansı imkanlara malik olduğunu nümayiş etdirdi.

Azərbaycan həmin dövrdə və bu gün də iqtisadi artımı ilə dünyanın diqqət mərkəzindədir. Təbii ki, bu da iqtisadiyyatın düzgün təmələ əsaslanmasından irəli gəlir. İlham Əliyev Yeni Azərbaycan Partiyasının beşinci qurultayındakı nitqində də bu inkişafı önə çəkərək göstərirdi: “Son 10 ildə Azərbaycan dünyada ən sürətli templərlə inkişaf etmişdir. İkinci belə ölkə dünya xəritəsində tapılmaz ki, Azərbaycan qədər uğurlar əldə edə bilsin. Bu uğurlar çoxşaxəlidir, bütün sahələri əhatə edir. Həm beynəlxalq, həm daxili siyasətlə, iqtisadi islahatlarla, siyasi islahatlarla bağlı hara baxsan Azərbaycan uğurla, inamla, sürətlə inkişaf edir, bu inkişaf artıq bütün mötəbər beynəlxalq təşkilatlar tərəfindən qeyd edilir, qiymətləndirilir.

Azərbaycanın təcrübəsi artıq ən müsbət təcrübə kimi öyrənilir” Neft gəlirlərinin qeyri neft sektorunun inkişafına yönəldilməsi iqtisadiyyatın şaxələndirilməsini təmin etməklə, ölkənin hərtərəfli inkişafına stimul verdi. Təsadüfü deyil ki, Azərbaycan bu gün Cənubi Qafqaz iqtisadiyyatının səksən beş faizinə sahibdir. Bu gün regionda ölkəmizin iştirakı olmadan heç bir iqtisadi, siyasi layihənin həyata keçirilməsi mümkün deyil. Bu, respublikamızın artıq siyasi çəkisinin, nüfuzunun möhkəmlənən mövqeyinin təsdiqidir. Bu gün ölkəmizdə siyasi və iqtisadi sahələrin möhkəm təməli formalaşmışdır.

İlham Əliyev “Azərbaycan gələcəkdə çox zəngin və qüdrətli ölkəyə çevriləcəkdir” vədini 10 ildə atdığı bir-birindən əhəmiyyətli addımları ilə doğrultdu.

İqtisadiyyatı inkişafın təməl daşı kimi önə çəkən dövlət başçısı iqtisadi artımı qeyri-neft sektorunun hesabına olmasını qarşıya çox mühüm vəzifə kimi qoydu, bu istiqamətdə vacib tədbirlər həyata keçirdi, ölkənin neft-qaz amilindən asılılığı getdikcə azaldı. Həyata keçirilən uğurlu islahatlar nəticəsində bu gün Azərbaycan dünya iqtisadiyyatının dayanıqlı bir parçasına çevrilib.

İqtisadiyyatın güzgüsü olan dövlət büdcəmiz 2013-cü ildə 2003-cü illə müqayisədə 1.3 milyard dollar artaraq 25 milyard dollara çatmışdır. Son 10 ildə Azərbaycan dünyanın ən uğurlu dövlətlərindən birinə çevrilmişdir. Ölkə ən dinamik iqtisadiyyat kimi yüksək mövqe sahibi olmuş və bu günə qədər də həmin mövqeyini qoruyub saxlaya bilmişdir. 10 il ərzində Azərbaycan iqtisadiyyatı 3 dəfə, dövlət büdcəsi isə təxminən 30 dəfə artmış, ölkədə yoxsulluq səviyyəsi 50 faizdən 5 faizə qədər endirilmişdir. Bu gün ölkəmizdə inkişafın Azərbaycan Modeli yaranmış, yüksək və dinamik sosial-iqtisadi sıçrayışa nail olunmuşdur. Bu isə, öz növbəsində, ölkəmizin beynəlxalq aləmdə imicinin tam formalaşmasına gətirib çıxarmışdı.İlham Əliyevin iqtisadi inkişaf konsepsiyasında əsas yerlərdən birini ölkə iqtisadiyyatına investisiyanın cəlb edilməsi tutur. Ölkə iqtisadiyyatına son 10 ildə qoyulan investisiyanın həcmi 130 milyard dollara yaxındır. İlham Əliyev tərəfindən irəli sürülən layihələr-enerji layihələri, iqtisadi-sosial layihələr, siyasi təşəbbüslər ölkəmizin uğurlu inkişafına yönəldilmişdir.

Həyata keçirilən infrastruktur layihələrin uğurlu tətbiqi nəticəsində regionların siması dəyişdi. Dövlət başçımızın təşəbbüsü ilə “Regionların sosial-iqtisadi inkişafı dövlət proqramı” qəbul edilmişdir. 2004-2008-ci illəri əhatə edən birinci proqram artıqlaması ilə icra edilmiş, kəndlərin inkişafı hesabına kəndlə şəhər arasındakı fərq əsaslı olaraq azaldılmışdır. İkinci dövlət proqramının (2009-2013) uğurla icrası Azərbaycanın hər tərəfli inkişafına həll edici töhvə vermişdir. Bu gün Azərbaycan iqtisadiyaytının çoxşaxəli iqtisadiyyat kimi inkişafı məhz bu proqramların hesabına mümkün olmuşdur. Hazırda regionlarda gedən canlanma, inkişaf, abadlıq, quruculuq işləri göz oxşayır.

Hər iki dövlət proqramını həyata keçirmək üçün İlham Əliyev son 10 ildə regionlara 300-ə yaxın səfər edib, 900-dan artıq tədbirdə, 660 dan artıq respublika əhəmiyyətli sənaye müəssisələrinin, obyektlərin təməlqoyma və açılış mərasimlərində şəxsən özü iştirak edib.

“Azərbaycan -2020 : gələcəyə baxış” inkişaf konsepsiyası qəbul edilmiş və həyata keçirilməyə başlamışdır. İlham Əliyev bu münasibətlə demişdir: “Biz gələcəyə baxırıq, bu gün Azərbaycanda icra edilən layihələr gələcəyə yönəldilibdir. Biz elə etməliyik ki, bundan sonra da 10 illiklər ərzində ölkəmizin uğurlu, dayanıqlı inkişafı təmin edilsin. Şübhə etmirəm ki, biz buna nail olacağıq” Təbii ki iqtisadi tərəqqi, sosial siyasətlə tamamlanır.

Həyata keçirilən siyasətin əsasında Azərbaycan vətəndaşı-onun rifah halının yüksək səviyyəyə çatdırılması dayanır. Əmək haqları, pensiyalar ildən ilə artırılır, ünvanlı sosial yardım proqramı uğurla icra edilir. Hazırda 133 min ailə dövlətdən bu yardımı alır və hər bir ailə orta hesabla dövlətdən 117 manat müavinət alır. Əlbəttə, bunlar hər şey xalq üçün konsepsiyasını irəli sürən İlham Əliyevi qane etmir. “Əlbəttə mən çox istərdim ki, ünvanlı sosial yardıma ehtiyacı olan ailələrin sayı kəskin şəkildə azalsın” söyləyən dövlət başçısı bu əminliyi ifadə edir ki, ölkəmizin uğurlu inkişafı, yeni iş yerlərinin (son 10 ildə 1 milyon yüz mindən çox yeni iş yerləri açılıb)yaradılması, sosial proqramlar yaxın zamanlarda bu kateqoriyaya daxil olan insanların yaşayış səviyyəsini əhəmiyətli dərəcədə yaxşılaşdıracaq. Prezident İlham Əliyevin “Dövlət siyasətimizin mərkəzində Azərbaycan vətəndaşıdır. Hər şeyi biz Azərbaycan vətəndaşı üçün edirik. Budur bizim məqsədimiz.

Biz xalq üçün çalışırıq, qururuq, yaradırıq, ölkəmizi gücləndiririk. Biz istəyirik ki, Azərbaycan qüdrətli dövlətə çevrilsin, hamımız istəyirik, hər bir normal vətənpərvər adam bunu istəyir ki, mövqeyimiz daha da möhkəm olsun, gücümüz də artsın. Nəyə görə ? Ona görə ki insanlar daha yaxşı yaşasınlar. Budur əsas məqsəd. Bizim dövlətimiz nə qədər güclü olsa insanlar da özlərini o qədər rahat hiss edəcəklər, təhlükəsizlik şəraitdə yaşayacaqlar. Hiss edəcəklər, və edirlər ki, onların arxasında güclü Azərbaycan dövləti var ki, onları heç vaxt darda qoymaz, bütün zamanlarda onlara dəstək olacaq.” fikirləri qeyd olunanların ümumiləşdirilmiş ifadəsidir. Ötən 10 il aşkar şəkildə göstərdi ki, İlham Əliyevin gərgin fəaliyyəti dövründə bu amal reallaşmış, müstəqil və azad Azərbaycan sosial-iqtisadi inkişaf demokratik, hüquqi dövlət quruculuğu və siyasi sabitlik baxımından dünyanın sayılıb seçilən dövlətlərindən birinə çevrilmiş, dünya xəritəsində özünə layiqli yer tuta bilmişdir. Bu gün ölkəmizin beynəlxalq münasibətlər sistemində artan rolu yüksək qiymətləndirilir.

İlham Əliyev YAP-n 5-ci qurultayındakı nitqində göstərmişdir: “2003-2013-cü illərdə - son 10 il ərzində Azərbaycan beynəlxalq aləmdə ən böyük zirvələrə çata bilmişdir, dünyanın bir nömrəli qurumu olan BMT Təhlükəsizlik Şurasına üzv seçilmişdir. Bu, bizim diplomatiyamızın, siyasətimizin, dövlətçiliyimizin qələbəsidir, təntənəsidir. Dünyada bu qurumdan ali qurum yoxdur. Keçən ilin mayında Azərbaycan mötəbər quruma sədrlik etmişdir.” Azərbaycanla Avropa İttifaqı arasında əlaqələr uğurla davam etdirilir. Təbii ki, Azərbaycan hakimiyyətinin daxili və xarici siyasəti, Azərbaycanın hərtərəfli inkişafına yönəlmiş davamlı tədbirlər dünya ictimaiyyəti tərəfindən böyük rəğbətlə qarşılanır. Bu inkişafa stimul verən əsas amillərdən biri də ölkədə böyük vüsətlə aparılan demokratik islahatlardır.

Prezident İlham Əliyev bütün görüşlərində, məruzə və çıxışlarında hər zaman dünyaya bəyan edir ki, təkcə iqtisadi inkişafla kifayətlənmək olmaz, ölkədə iqtisadi və siyasi islahatlar vəhdətdə aparılmalı, ölkənin hərtərəfli inkişafına təkan verilməlidir. “Mən bu fikirdəyəm ki, ölkəmizin davamlı və uzunmüddətli inkişafı, bütün digər sahələrlə yanaşı, ilk növbədə, demokratiyanın inkişaf səviyyəsindən və hər bir vətəndaşın hüquq və azadlıqlarının təmin edilməsindən asılıdır. “ fikiri ilə İlham Əliyev ölkədə insan hüquqlarının, söz, mətbuat, vicdan azadlığının qorunmasına xüsusi diqqət və qayğı ilə yanaşdığını bir daha təsdiq edir.

İlham Əliyev “Son 10 ildə Azərbaycanda istər sosial məsələlərin həllində, xarici siyasətdə, iqtisadi islahatlarla, daxili siyasətlə bağlı bütün istiqamətlərdə bir yeniləşmə, böyük inkişaf vardır, konkret proqramlar, planlar, konsepsiyalar və icra mexanizmləri əsasında bütün infrastruktur :yollar, məktəblər, xəstəxanalar, olimpiya kompleksləri, qazlaşdırma, elektrik enerjisi, su xətləri, bütün infrastruktur yeniləşir. Biz bütün infrastruktur sistemimizi tamamilə yeniləşdiririk ki, bundan sonra ən azı 50-100 il bax, bu qurduğumuz infrastruktur insanlara xidmət göstərsin.”

2003-cü ildə İlham Əliyevin ölkəmizə rəhbəlik etməyə başladığı dövrdən etibarən Azərbaycan bütün sahələrdə inkişafın yeniləşmə, daha da dərinləşdirmə, iqtisadiyyatla yanaşı, elm, təhsil, tərbiyə, mədəniyyət, səhiyyə, hüquq və digər sahələrdə də böyük uğurlar əldə edilmişdir.

İlham Əliyev ölkəyə rəhbərlik fəaliyyətinin ilk günlərindən Azərbaycan elmini, onun inkişafını da diqqətdən kənarda qoymamış, bu sahənin inkişafını nəzərdə tutan dəqiq, əsaslandırılmış məqsədyönlü konsepsiya ilə çıxış etmişdir. Son 10 ildə Azərbaycan elmi, cahanşumül nailiyyətlər əldə etmişdir. Azərbaycan elminə və aliminə xüsusi qayğı bu gün də ardıcıl və sistemli şəkildə davam edir. Görkəmli alimlərin yubileyləri təşkil edilir, onlar dövlətin müxtəlif orden, medal və mükafatları ilə təltif edilir.

Dövlət başçısı İlham Əliyevin rəhbərliyi altında əldə etdiyimiz nailiyyətlərin biri də məhz Azərbaycan təhsilinin payına düşür. İlham Əliyev çıxışlarının birində deyirdi “Mən tam əminəm ki, yüksək təhsil səviyyəsi olmasa, peşəkarlıq olmasa, gənclər ən mütərəqqi texnologiyalara yiyələnməsə, həqiqətən inkişaf etmiş dövlət qurmaq mümkün deyil. Buna görə də təhsil bizim üçün prioritet sahədir”. Qloballaşma şəraitində Azərbaycan təhsil sisteminin dünya və Avropa standartlarına uyğunlaşdırılması, inteqrasiya edilməsi işi başa çatdırılmışdır. Ölkəmizdə təhsilin, səhiyyənin, mədəniyyətin, bədən tərbiyəsi və idmanın daha da inkişaf etdirilməsi, ali təhsilin Baloniya təhsilinə keçməsi, ümumtəhsil məktəblərinin 10 illik kompüter texnologiyası ilə təchizi proqramının hazırlanıb həyata keçirilməsi, təhsilin məzmununun yeniləşdirilməsi, yeni proqram, dərslik və dərs vəsaitlərinin hazırlanması, təhsilin idarə olunmasının təkmilləşdirilməsi, təhsil müəssisələrinin maddi-texniki və tədris bazasının möhkəmləndirilməsi, tədrisdə müasir informasiya-kommunikasiya texnologiyalarından istifadə olunması, konseptual xarakterli sənədin-güclü təhsil konsepsiyası milli Kurikulumun qəbulu və s.uğurlar da məhz İlham Əliyevin məqsədyönlü inkişaf strategiyası sayəsində milli təhsilimizin əldə etdiyi, ən ciddi nailiyyətlərdəndir.

Milli Kurikulum ictimai - siyasi, mədəni və sosial həyatın qloballaşdığı və universallaşdığı, informasiyalı cəmiyyətdə informasiya-kommunikasiya texnologiyalarının rolunun artdığı, rəqabətin gücləndiyi bir dövrdə hər bir şəxsin istedad qabiliyyətinin müstəsna əhəmiyyət kəsb etdiyi nəzərə alınaraq, müstəqil qərarlar qəbul etməsi üçün onun zəruri təhsil səviyyəsinə və bacarıqlara malik olmasına, cəmiyyətin inkişafının əsas hərəkətverici qüvvəsi olan insanın formalaşdırılmasına və s problemlərin həllinə yönəlmişdir.

“İnkişaf etmiş ölkələrin təcrübəsinə nəzər salsaq görərik ki, onlarda uğurun əsas səbəbi neft-qaz deyil, bilikdir, savaddır, müasirlikdir.” . Bizdə isə həm bu olmalıdır, həm də əlbəttə ki, təbii ehtiyatlar da var. Bu amillərin sintezi “Azərbaycan çox qabaqcıl, müasir ölkəyə çevirəcəkdir”-deyəndə İlham Əliyevin müəyyənləşdirdiyi sosial - iqtisadi inkişaf strategiyasının mahiyyyətində dayanıqlı və sabit inkişaf edən iqtisadi sistemin formalaşdırılması, bu əvəzsiz təbii sərvətin -insan faktorunun inkişafına yönəldilməsi, elmi-texniki tərəqqinin son nailiyyətlərinin tətbiqi yolu ilə dayanıqlı milli inkişafın təmin edilməsi məqsədi dayanır.

XIX əsr informasiya əsridir. Müasir dövrdə informasiya-kommunikasiya texnologiyalarının inkişafı, cəmiyyətlərin informasiyalılıq səhiyyəsi bəşəriyyətin mədəni yüksəlişinin ən başlıca və mühüm amillərindən birinə çevrilmişdir. İnformasiya cəmiyyətinin əsas məqsədi, bütövlükdə cəmiyyətin və ayrı-ayrı şəxslərin informasiya tələbatını ödəmək üçün müasir informasiya texnologiyalar bazasında müxtəlif təyinatlı informasiya resurs və fazasının formalaşdırılmasından ibarətdir. Dünyada bütün sahələrdə, o cümlədən təhsil sahəsində baş verən qloballaşma prosesi, ölkələrarası inteqrativ münasibətlərin meydana gəlməsi və inkişafında informasiya cəmiyyəti müstəsna əhəmiyyətə malikdir. Təhsildə aparılan yeniləşmə, birinci növbədə təhsilin informasiyalaşdırılmasını tələb edir.

İlham Əliyev Azərbaycanda təhsilin yeniləşdirilməsi sahəsində bir sıra sərəncamlara, qanun və qərarlara imza atmışdır. 24 noyabr 2003-cü il tarixli “Azərbaycan Respublikasında sosial-iqtisadi inkişafın sürətləndirilməsi tədbiri haqqında, “11 fevral 2004-cü il tarixli “Azərbaycan Respublikası regionlarının sosial-iqtisadi inkişafı” Dövlət Proqramlarında bir sır sahələrlə yanaşı, informasiya texnologiyalarının inkişafına da xüsusi diqqət ayırılmışdır”.

Dövlət başçısının 2004-cü il 21 avqust tarixli sərəncamı ilə təsdiq edilmiş, “Azərbaycan Respublikasında ümumtəhsil məktəblərinin informasiya və kommunikasiya texnologiyaları ilə təminatı Proqramı” (2005-2007 ci illər), 22 oktyabr 2005-ci il tarixli fərmanı ilə “Azərbaycan Respublikasında rabitə və informasiya texnologiyalarının inkişafı üzrə Dövlət Proqramı” (2005-2008 ci illər üçün), 10 iyul 2008-ci il tarixli, “2008-2012-ci illərdə Azərbaycan Respublikasında Təhsil Sisteminin informasiyalaşdırılması üzrə dövlət Proqramı”, 22 may 2009-cu il tarixli “2009-2013-cü illərdə Azərbaycan Respublikasının Ali Təhsil Sistemində islahatlar üzrə Dövlət proqramı”.

Bu Dövlət Proqramları ölkəmizdə yeni informasiya texnologiyalarından istifadə olunmaqla təhsilin keyfiyyətinin yüksəldilməsinə xidmət edən və dünya təhsil sisteminə inteqrasiya imkanı verən vahid təhsil informasiya mühitini yaratmaq və əhalini informasiya cəmiyyətinə hazırlamaq məqsədi daşıyır. Azərbaycan Respublikası təhsil sisteminin informasiya infrastrukturunun yaradılması, informasiya texnologiyaları əsasında müasir təhsilin metodologiyasının işlənib hazırlanması, tələbə və şagirdlər üçün distant təhsil sisteminin yaradılması, təhsil portalının və saytların tərtibi Azərbaycan dilində olan tədris və elmi-metodiki niformasiya və kommunikasiya texnologiyaları sahəsi üzrə terminologiyanın hazırlanması və elmi dövriyyəyə daxil edilməsi bu proqramlar çərçivəsində yerinə yetirilən vəzifələrdəndir. 2009-cu il yeni “Təhsil Qanunu” qəbul olunmuşdur. “Təhsil Qanunu”nda ölkədə təhsilin inkişafının yeni istiqamətləri (təhsildə millilik və bəşərilik qabaqlayıcı təhsil vermə, universal biliklərə yiyələnmə, bütün həyat boyu təhsilalma, yeni maliyyələşdirmə modelinə keçid) və əsas prinsipləri (şəxsiyyətyönümlülük, tələbəyönümlülük, nəticəyönümlülük, inteqrativlik) müəyyən edilmişdir.

Məktəblərin İKT ilə təminatının əhəmiyyəti İlham Əliyev tərəfindən dəqiq ifadə olunmuşdur: “İndi kompüterləşmə proqramı həyata keçirilir. Bütün məktəblərdə,kompüter sinifləri yaradılacaqdır və əminəm ki, təhsil sahəsində ciddi irəliləyiş olacaqdır. Biz Azərbaycanda bütün məktəbləri ən yüksək səviyyəyə çatdırmalıyıq. Əlbəttə, onlarda, necə deyərlər, həm gözəl şərait yaradılmalıdır, eyni zamanda infrastruktur da olmalıdır.” Bu gün ölkəmizin bütün ümumtəhsil və ali məktəbləri internet və kompüterlə təmin edilmişdir. İlham Əliyevin qərarı ilə 2013-cü ildə bütün təhsil müəssisələri, xüsusən ümumtəhsil məktəbləri kompüterləşdiriləcəkdir.

Prezident İlham Əliyevin vurğuladığı kimi, yeni texnologiyaların, o cümlədən İKT sferasının inkişafı Azərbaycanı fərqləndirən cəhətlərdən biridir və bizim gələcəyimizi təmin edəcəkdir. “Azərbaycan -2020 : Gələcəyə baxış” inkişaf konsepsiyasında bütün sahələr kimi, İKT-nin inkişafı istiqamətində görüləcək işlərin parametrləri üzrə müəyyənləşdirilməsi, dövlət başçısının sərəncamı ilə 2013-cü ilin ölkəmizdə “informasiya- kommunikasiya texnologiyaları ili” elan olunması bu sektora göstərilən diqqətdən irəli gəlir. Cari ilin fevralında ilk peykimiz olan “Azərspes”-in orbitə buraxılması, 2015,2016-cı illərdə əlavə iki peyklə təmsilçimizin möhkəmləndirilməsi ilə ölkəmizdə kosmik sənayenin inkişafı üçün gözəl imkanlar yaradacaq. Azərbaycanın kosmik ölkəyə çevrilməsini tarixi hadisə adlandıran İlham Əliyev İKT-nin inkişafı istiqamətində görülən işləri, elektron xidmətlərin genişləndirilməsini ölkənin prestij, müasirlik və yeni texnologiyaların, biznesin inkişafı baxımından əsas fəaliyyət istiqaməti kimi qiymətləndirir.”

Biz kosmik sənayenin inkişafı ilə məşğuluq və bir neçə il bundan əvvəl bunu təsəvvür etmək belə çətin idi ki, vaxt gələcək və Azərbaycan kosmik ölkələrin sırasına daxil ediləcəkdir.” Bütün sahələrdə liderliyini qoruyan Azərbaycanda təhsilin inkişafında İKT-dən istifadəyə diqqət artırılır. İndi ölkə daxilində fəaliyyət göstərən bütün ümumtəhsil məktəblərində dərslər İKT-nin imkanlarından istifadə etdirilməklə tədris olunur. Pedoqoji kollektivlər məktəblərdə elektron kitabxanalardan, dərsliklərdən geniş istifadə edirlər. Hər il yüzlərlə müəllim İKT kurslarına cəlb olunur. Bu gün “hər şagirdə bir kompüter” çağırışı həyata keçirilir. İnternet sivilizasiyanın indiyə kimi topladığı nələr varsa, hamısını dəyişir.

İlham Əliyevin inkişaf konsepsiyasında elmə, elm adamlarına münasibət önəmli yer tutur. Azərbaycanda elmi araşdırmaların həyata keçirilməsinin zəngin ənənələri vardır. Yüz illər boyu mütəfəkkir sənətkarlarımız tərəfindən yaradılan və bədii estetik düşüncə, tariximizin incilərinə çevrilən əsərlərdə elmi-fəlsəfi fikirlər parlaq təcəssümünü tapmışdır. Bəşəriyyətin fəlsəfi , mədəni və elmi irsinin, Şərqlə Qərb arasında varislik əlaqələrinin qorunub saxlanmasında azərbaycanlı alimlər yaxından iştirak etmişlər. Dünya elmi fikir tarixinə görkəmli şəxsiyyətlər bəxş edən Azərbaycanda bütün dövrlərdə elm özünün yüksək səviyyəsi ilə seçilmişdir. Azərbaycan elminə və aliminə xüsusi qayğı göstərən İlham Əliyev bu sahədəki fəaliyyətini də ardıcıl və sistemli şəkildə bir neçə istiqamət üzrə həyata keçirir, ölkəmizdə elmi-tədqiqat institutlarının və elmi işçilərin sayı artır. Hazırda Azərbaycanda elmi araşdırmalar ali təhsil müəssisələrində və 80 mindən artıq elmi-tədqiqat institutlarında otuz minə yaxın elmi işçi tərəfindən həyata keçirilir. İlham Əliyev son 10 ildə əsas diqqəti elmi araşdırmalar sahəsində yaranmış boşluğu doldurmağa, sahə institutlarında və akademik qurumlarda, şöbə, mərkəz və laboratoriyalarda köhnəlmiş qayda və metodlarla işləmələrini aradan qaldırmağa, dövrün standartlarına cavab verən fundamental tədqiqatların aparılmasına yönəlmişdir.

Bu dövr ərzində Azərbaycan Respublikasında elmi qurumlarının strukturunun müəyyənləşdirilməsi, tədqiqatların müasir standartlar səviyyəsində aparılması və maliyyələşdirilməsi, elmi kadr potensialının artırılması, onun sosial müdafiəsinin gücləndirilməsi, bütövlükdə elmin inkişafı üzrə milli strategiyanın həyata keçirilməsi və Azərbaycan elminin beynəlxalq elm məkanına inteqrasiyasının təmin olunması və digər məsələlər də diqqətdən kənarda qalmamışdır. Son 10 ildə Azərbaycan elmi çox irəliyə getmiş, özünün nə qədər qüdrətli və güclü olduğunu bütün dünyaya göstərmişdir.

Azərbaycan elminin, təhsil, mədəniyyət və iqtisadiyyatının, bütövlükdə müasir Azərbaycan cəmiyyətinin inkişafında xalqımızın milli sərvəti, təhsilimizin bayraqdarı,böyük elm məbədgahı olan Bakı Dövlət Universitetinin misilsiz rolu olmuşdur. Yarandığı gündən Bakı Dövlət Universiteti ölkəmizdə baş verən bütün ictimai - siyasi proseslərin önündə getmiş, xalqımızın müasir tarixinin ən məsuliyyətli məqamlarında, ən vacib tale yüklü məsələlərin həll olunduğu anlarda universitet kollektivi əsl vətəndaşlıq mövqeyi nümayiş etdirmiş, tarixin sərt sınaqlarında milli dövlətçiliyimizin, sabitliyin və əmin - amanlığın qorunub saxlanılması işində öz sözünü demişdir. Bakı Dövlət Universiteti Azərbaycanın yalnız elm məbədi deyil, həm də milli-mənəvi dəyərlərimizin özünəməxsusluğunun daşıyıcısıdır. Elmsiz mənəviyyat kimi, mənəviyyatsız elm də heç şübhəsiz mənsub olduğu xalqı yüksəldə, onu dünyanın mədəni xalqları sırasına çıxara bilməz. Bu gün Bakı Dövlət Universiteti təkcə respublikamız üçün deyil, bir çox xarici ölkələr üçün də yüksək ixtisaslı kadrlar hazırlayır. Bu illər ərzində 55 dövlətin üç mindən artıq vətəndaşı onun auditoriyalarından çıxmışdır. Neçə - neçə məzun universitet alimlərinin rəhbərliyi altında alimlik dərəcəsinə yiyələnərək gərəkli mütəxəssis kimi öz xalqlarına xidmət etməyə başlamışdır. Universitetin yüzlərlə məzunu Azərbaycanı dünyanın əksər ölkəsində layiqincə təmsil etmişlər. Ölkənin əsas elmi potensialının toplandığı Bakı Dövlət Univesitetinin çoxşaxəli fəaliyyəti, təbii ki, Prezident İlham Əliyevin diqqətindən kənarda qala bilməzdi. Bakı Dövlət Universitetinin professor müəllim heyəti dövlət başçısı İlham Əliyevin diqqət və qayğısını həmişə hiss etmişlər. Bakı Dövlət Universitetinin özünün sosial dayağı hesab edən cənab İlham Əliyev universitetin yaranmasının 90 illik yubileyindəki çıxışından öz fikrini belə ifadə etmişdir: “Bu gün sizinlə bərabər olmağımdan çox məmnunam. Bir şeyi demək istəyirəm ki, hesab edirəm ki, siz çox xoşbəxt insanlarsınız. Ona görə ki, Bakı Dövlət Universiteti kimi elm və təhsil ocağında çalışırsınız. Bakı Dövlət Universiteti çox böyük və gözəl bir inkişaf tarixi keçmişdir.

Bakı Dövlət Universitinin keçdiyi bütün keşməkeşli, sınaqlarla dolu tarixi xalq qarşısında müqəddəs bir missiyanı - xalqı maarifləndirmək, onu dünyaya tanıtmaq, görkəmli ziyalılar yetişdirmək, elmin, təhsilin ali səviyyəsinə çatmaq, xalqın milli şüurunu formalaşdırmaq, ona öz böyüklüyünü, qüdrətini lazımi səviyyədə dərk etdirmək, onun övladlarına vətəni, xalqı sevmək, dövləti və dövlətçiliyi qorumağı aşılamaq kimi vəzifələri yerinə yetirməyin bariz nümunəsidir. Bakı Dövlət Universitetinin tarixi və gerçəkliyi daim Azərbaycanın ümumi taleyi ilə, Azərbaycan gerçəkliyi ilə bağlı olmuşdur. Ümummilli lider Heydər Əliyev Bakı Dövlət Universitetinin ən böyük məzunu olmuşdur. Heydər Əliyev Bakı Dövlət Universitetinin məzunu olmağı ilə fəxr etdiyini dəfələrlə vurğulayıb və bu təhsil, elm ocağını Azərbaycan xalqının milli sərvəti adlandırıb.

Müqəddəs elm ocağı olan Azərbaycan Milli Elmlər Akademiyasının 60 illik yubileyində çıxışında İlham Əliyev elmə və elm adamlarına ehtiramını belə ifadə etmişdir: “Mən çox şadam ki, bu bayramda sizinlə birlikdəyəm. Çalışacağam ki, akademiyanın inkişafında bundan sonra da öz əməyimi əsirgəməyim. Mən bir daha demək istəyirəm ki, bu, qəti fikrimdir ki, hər bir ölkənin normal inkişafı üçün ilk növbədə, bilik, savad, elmin inkişafı lazımdır. Azərbaycanda çox güclü elmi potensial vardır. Azərbaycan Milli Elmlər Akademiyasının üzvləri çox dəyərli şəxslərdir. Mən fəxr edirəm ki, Azərbaycan Milli Elmlər Akademiyası bu gün çox yüksək səviyyədədir.” Milli tariximizin, milli mənəvi dəyərlərimizin daha böyük həssaslıqla öyrənilməsi, bütün dünyada təbliği, virtual qüdrəti ilə çağdaş dünyamızın sərhədsizləşdirilməsində elmin rolu tükənməzdir.

Prezident İlham Əliyev Azərbaycanda gənclərin problemini də diqqət mərkəzində saxlamış, onları sağlam, güclü şəxsiyyət, vətənpərvər kimi formalaşmasına yüksək qayğı göstərmişdir. Gənclər bütün dövrlərdə cəmiyyətin gələcəyi, dayağı, ümid yeri olduğundan həmişə diqqət mərkəzində saxlanmışdır. Ölkəmizdə gənclərin fiziki-bioloji, mənəvi sağlamlığı, artıq bütün ictimaiyyətin, həm də dövlətin qayğısına çevrilmişdir.

İlham Əliyevin 30 avqust 2005-ci ildə imzaladığı “Azərbaycan Gəncliyi Dövlət Proqramı (2005-2009-cu illər)” gəncliyin bir çox problemlərinin həllinə kömək etdi Proqramda gənclərin ideya-siyasi və mənəvi tərbiyəsini təkmilləşdirmək; milli-mənəvi dəyərlərə dərindən yiyələnmək, milli tariximizi mükəmməl öyrənmək, mədəni irsə hörmət və qayğı bəsləmək, ölkənin hər cür təhlükədən müdafiəsinə hər an hazır olmaq, konstitusiyaya, qanunlara riayət etmək kimi mühüm məsələlər irəli sürülmüşdür. Qanunda gənclər siyasətinin əsas prinsipləri öz əksini tapmış, gənclərin vətənpərvərlik, azərbaycançılıq, dövlətçilik prinsipləri əsasında Azərbaycan xalqının tarixinə, mədəni irsinə, adət-ənənələrinə, dövlət dilinə və rəmzlərinə, milli mənəvi və ümumbəşəri dəyərlərə hörmət ruhunda tərbiyə olunması əsas istiqamətlər kimi müəyyən edilmişdir.

Dövlətin gənclərlə bağlı fəaliyyəti “Gənclər Siyasəti haqqında Azərbaycan Respublikasının Qanunu (26 dekabr 2007-ci il)” ilə tənzimlənir. Bu qanunda dövlət siyasətinin ardıcıl, normal həyata keçirilməsinin fəaliyyət istiqaməti müəyyənləşdirilmişdir. Qanunda: Gənclərin mənəvi və fiziki cəhətdən sağlam, yüksək mədəniyyətli gəncliyin formalaşması, gəncliyə dövlət qayğısının ilbəil artırılması, gənc ailələrə dövlət yardımını ən prioritet sahəyə çevirmək, gənclərə yüksək səviyyəli, keyfiyyətli təhsil vermək, onların ictimai-siyasi, sosial-iqtisadi, hüquq-mühafizə sahələrdə işlə təmin etmək, gəncləri gələcək dövlət idarəçiliyinə hazırlamaq, mükəmməl, monolit, işgüzar, təşəbbüskar, ictimai-faydalı fəaliyyətlə məşğul ola bilən mütəxəssis kimi formalaşması və s. məsələlər öz ifadəsini tapmışdır. Son illər həyata keçirilən tədbirlər gənclərin hərtərəfli inkişafının təmin olunması üçün siyasi, sosial-iqtisadi, təşkilatı-hüquqi şərait və təminatlarının yaradılması sürətləndirilmiş, gənclərin ictimai-siyasi fəallığının artmasına kömək etmişdir .

2011-ci il aprel ayının əvvəlində İlham Əliyev “Azərbaycan Gəncliyi Dövlət Proqramı haqqında” imzaladığı ikinci sərəncamda (Proqram 2011-2015-ci illəri əhatə edir). Gənclər problemləri ilə bağlı dəqiq icra mexanizminin hazırlanması, gəncləri narahat edən məsələlər, gənclərin məşğulluğu məsələsi, gənclərin yaşayış problemlərinin həlli, gənclərin fiziki sağlamlığı, hərbi hazırlıq məsələləri, intellektual problemlərin inkişafı, Bakıda “Gənclər evinin tikilməsi barədə” və s. məsələlər əks olunmuşddur. Azərbaycan Gənclərinin Yol Xəritəsi hazırlanmışdır. 21 aprel 2011-ci il tarixində İlham Əliyev bir qrup gənclərlə görüş keçirdi. Görüşdə gənclərin problemləri, fəaliyyətlərinin təşkili barədə geniş söhbət apardı.

İlham Əliyev demişdir: “Siyasi sistemimizin ən əsas sütünu olan və 600 min nəfərə yaxın üzvü olan Yeni Azərbaycan Partiyasında Gənclər 50 faiz təşkil edirlər. Bu, təkcə kəmiyyət dəyişiklikləri yox, həm də əsaslı keyfiyyət dəyişiklikləridir, inkişafdır”. Gənclərin cəmiyyətdəki fəallığı ölkə başçısını həmişə sevindirir, onları təhsildə, idman yarışlarında, istehsalatdakı uğurlarını daim diqqətdə saxlayır. İlham Əliyev Milli Olimpiya Komitəsinin Prezidenti kimi, gənclərin sağlam, güclü, qüvvətli, şəxsiyyət kimi formalaşması istiqamətində təxirəsalınmaz işləri həyata keçirmişdir. İndi respublikamız Olimpiya ölkəsinə çevrilmiş, ən mötəbər dünya idman yarışları ölkəmizdə keçirilir. 2015-ci ildə Avropa idman oyunlarının ölkəmizdə keçirilməsi üçün məkan seçilməsinin özü ölkəmizin beynəlxalq nüfuzunun artmasına sübutdur. Bütün şəhər və regionlarımızda olimpiya kompleksləri tikilib gənclərin istifadəsinə verilmişdir. Gənc idmançılarımızın olimpiya yarışlarında əldə etdikləri parlaq nailiyyətlər imkan verir ki, dövlət başçımız, MOK-un Prezidentimizin rəhbərliyi ilə Azərbaycanda olimpiya idman hərakatı daha da inkişaf edərək, Dövlət bayrağımız dünyanın bir çox ölkələrində yüksəklərdə dalğalanacaq, dövlət himnimiz səslənəcəkdir.

Möhtəşəm infrastruktur layihələri sayəsində Azərbaycanın simasının kökündən dəyişdirilməsi və müasirləşdirilməsi, ölkəmizin beynəlxalq nüfuzunun əhəmiyyətinin durmadan artmasını təmin edən xarici siyasət konsepsiyasının uğurla həyata keçirilməsi, paytaxt Bakının dünyanın siyasi, mədəni və idman yarışları arenası kimi tanıdılması, 2012-ci ilin “Eurovision” mahnı müsabiqəsinə ev sahibliyi edilməsi, 2015-ci ildə ilk Avropa Olimpiya Oyunlarının Azərbaycanda keçirilməsi haqqının qazanılması, ölkənin gündən-günə artan iqtisadi gücünün, hərbi, siyasi və diplomatik amilə çevrilməsi və bütün bunların birbaşa nəticəsi olaraq prezident cənab İlham Əliyevin şəxsi nüfuzunun yüksəlməsi, regional və beynəlxalq proseslərə təsir imkanının artması göstərir ki, Azərbaycan adlı nəhəng bir gəminin sükanı etibarlı əldədir. Möhtəşəm İlham Əliyevin müdrikliyi, xalqla səmimiliyi, hədsiz təvazökarlığı, alicənablığı, insanlara təmannasız münasibəti, xalqına, millətinə, vətəninə, sələfinə, üstəlik öz şəxsiyyətinə hörmət və ehtiramı yüksək, ali tərbiyəsindən, zəngin mənəviyyatından, siyasi yetkinliyindən xəbər verir.

Hörmətli oxucu, qarşıdan prezident seçkiləri gəlir.

Azərbaycan xalqının və altı yüz minlik Yeni Azərbaycan Partiyasının üzvlərinin iradəsini, növbəti beş ildə Azərbaycanın hərtərəfli inkişfına, güclü, qüdrətli, bütöv, azad, müstəqil dövlətə çevrilməsinə daha əzəmətli töhfələr verəcəyinə dərin inamını bəyan edərək, YAP-ın beşinci qurultayında Azərbaycan Respublikasının Prezidenti, Yeni Azərbaycan Partiyasının sədri İlham Heydər oğlu Əliyev 2013-cü ilin prezident seçkilərində Azərbaycan Respublikasının prezidentliyinə vahid namizəd kimi irəli sürülmüş və qəbul edilmişdir. Çünki İlham Əliyevin namizədliyi yenə də Azərbaycan cəmiyyətinin alternativsiz sosial-siyasi sifarişidir.

İlham Əliyev Yeni Azərbaycan partiyasının beşinci qurultayındakı çıxışında demişdir: “Biz seçkilərə də uğurla gedəcəyik. Çünki bizim amalımız qüdrətli Azərbaycandır, müstəqillikdir, inkişafdır, sosial rifahdır. Heç bir şübhəmiz yoxdur ki, Azərbaycan inamla, uğurla irəli gedəcəkdir”

İnanırıq ki, 2013-cü ildə keçiriləcək Prezident seçkilərində Azərbaycan seçiciləri, bütün Azərbaycan xalqı bir daha müasir dünyamızın güclü lideri, İlham Heydər oğlu Əliyevə dərin inamını, etibarını, sevgisini və etimadını öz səsləri ilə təsdiq edəcəklər. İlham Heydər oğlu Əliyev bu sevgiyə, bu etibara layiqdir!

GÜCLÜ LIDER, GÜCLÜ AZƏRBAYCAN DEMƏKDIR!

İLHAM ƏLIYEV GÜCLÜ AZƏRBAYCAN DEMƏKDIR!

Nübar Muxtarova,

P.e.d., BDU-nun professoru, Yeni Azərbaycan Partiyası,

Səbail rayon Qadınlar Məclisinin sədri

İki sahil.- 2013.- 23 sentyabr.- S.2-4.