“İdman ili”ni uğurla başa vurduq

Azərbaycan Beynəlxalq Olimpiya Hərəkatında şərəfli bir yolla irəliləyir. Təbii ki, bu, hər bir ölkə vətəndaşı kimi bizləri də sevindirir. Buna görə isə ilk növbədə dövlətimizin idmana göstərdiyi diqqət və qayğını xüsusi dəyərləndirmək lazımdır. Respublikamızın müxtəlif bölgələrində beynəlxalq standartlara cavab verən müasir olimpiya idman kompleksləri tikilir ki, bunlar da yüksək səviyyəli idmançılar hazırlamaq imkanına malikdir.

Bu sahədə atılmış düzgün addımların sayəsində ölkəmiz Avropanın və dünyanın idman mərkəzlərindən birinə çevrilib. Məhz dövlətin, Milli Olimpiya Komitəsinin gündəlik qayğısı sayəsində həyata keçirilən tədbirlərin, görülən işlərin nəticəsində Azərbaycan ümumdünya olimpiyaçılar ailəsində böyük nüfuz sahibi olmuşdur. Ölkəmizin son dövrlər beynəlxalq aləmdə qazandığı inam, tez-tez mötəbər idman tədbirlərinə ev sahibliyi etməsi bunun əyani sübutudur.

Təsadüfi deyildir ki, 2012-ci il ölkəmizdə Azərbaycan Respublikasının dövlət başçısı, Milli Olimpiya Komitəsinin Prezidenti İlham Əliyev tərəfindən “İdman ili” elan edilmişdir. Bu onu göstərir ki, idmana, doğrudan da dövlət tərəfindən böyük dəstək, idmançılara hər cür qayğı vardır.

Azərbaycan Respublikası Dövlət Neft Şirkəti Sosial İnkişaf İdarəsinin nəzdində fəaliyyət göstərən “Neftçi” İdman-Sağlamlıq Mərkəzi həmişə dövlətimizin bu istiqamətdə apardığı siyasətə öz əməli ilə dəstək verməyə çalışan öncül təşkilatlardandır. Mərkəz mütəmadi olaraq, neft, qaz və kimya sənayesi işçiləri arasında idmanın müxtəlif növləri üzrə yarışlar təşkil edir. Əsasən ilin əlamətdar günlərində keçirilən bu tədbirlər neftçilərin və onların ailə üzvlərinin sağlamlıqlarının qorunması ilə bərabər, həm də asudə vaxtlarının səmərəli təşkil olunmasına xidmət edir. Paralel olaraq, mərkəz peşəkar idmançıların yetişdirilməsi işində də misilsiz xidmətlər göstərir.

Ümumilikdə 2012-ci il “Neftçi” İSM üçün uğurlu olmuşdur. “Neftçi” İSM-in strukturunda fəaliyyət göstərən idman qurğularında idmanın 34 növü üzrə 187 peşəkar məşqçi-müəllimin rəhbərliyi altında minlərlə yeniyetmə və gənc, eləcə də 650-yə qədər neftçi idmanla məşğul olmuşdur.

Mərkəzin fəaliyyətinin əsas istiqaməti kimi, ARDNŞ strukturuna daxil olan neft, qaz və kimya sənayesi müəssisələrində çalışan işçilərə və onların ailə üzvlərinə müasir tələblərə cavab verən bədən tərbiyəsi və idman xidmətlərinin göstərilməsi istiqamətində mühüm addımlar atılmışdır. Bu müddət ərzində respublikamızın əlamətdar günlərinə və bayramlarına həsr olunmuş mini-futbol (Novruz bayramı və 31 Dekabr - Dünya Azərbaycanlılarının Həmrəyliyi Gününə həsr olunmuş turnirlər), voleybol (28 May - Respublika Gününə həsr olunmuş turnir), turizm növləri (“Səmti müəyyən etmə” və 1 İyun-Uşaqların Beynəlxalq Müdafiəsi Gününə həsr olunmuş “Atam, anam və mən” idman-turizm yarışları) və stolüstü tennis üzrə kütləvi bədən tərbiyəsi və idman tədbirləri təşkil olunub keçirilmişdir ki, bu yarışlarda da 1300-ə qədər neftçi iştirak etmişdir.

Bu tədbirlərdən ən möhtəşəmi və təntənəli keçiriləni isə hər ilin sentyabr ayında neftçilərin peşə bayramı (20 sentyabr - Neftçilər günü) ərəfəsində təşkil olunan spartakiadadır. 2012-ci ildə neft, qaz və kimya sənayesi işçilərinin XX Spartakiadası keçirilmişdir. Bu mötəbər yarışda 42 müəssisədən 1538 nəfər iştirak etmişdir ki, onlardan da 301-i qadınlar idi. Spartakiada iştirakçıları 14 idman növü (atletika, mini-futbol, üzgüçülük, voleybol, stritbol, daşqaldırma, şahmat, dama, nərd, stolüstü tennis, darts, kəndirdartma, qolgücü və güllə atıcılığı) üzrə mübarizə aparmışlar.

Mərkəzin digər fəaliyyət istiqaməti olan böyük idman və peşəkar idmançıların hazırlığı sahəsində də böyük uğurlara nail olunmuşdur. İl ərzində boks, yunan-Roma güləşi və akrobatika gimnastikası üzrə müxtəlif yaş qruplarında mərkəzin açıq birincilikləri təşkil olunub keçirilmişdir ki, bu yarışlarda 250-dək yeniyetmə və gənc iştirak etmişdir.

2012-ci ilin sonuna qədər mərkəzin idmançıları müxtəlif səviyyəli yarışlarda iştirak edərək 1975 medal qazanıblar ki, onlardan da 760-ı qızıl, 529-u gümüş, 686-sı isə bürüncdür. Bu göstəricilər əvvəlki illərdən xeyli yüksəkdir. Ancaq heç də o demək deyil ki, biz bununla kifayətlənirik. Əksinə, əldə olunan uğurları davamlı olaraq artırmaqda qərarlıyıq.

Azərbaycanın müstəqillik dönəmindən indiyə qədər idmançılarımız Atlanta, Sidney, Afina, Pekin olimpiadalarında iştirak etmiş və ölkəmizə medallarla dönmüşlər. 2012-ci ildə Londonda keçirilən XXX London Yay Olimpiya Oyunlarında 204 ölkənin on mindən artıq idmançısı 36 idman növündə 302 dəst medal uğrunda mübarizə aparırdı. Dünyanın ən böyük idman tədbirində Azərbaycanın olimpiya yığması idmanın 16 növündə 53 idmançı ilə təmsil olunmuşdur ki, onlardan da 18-i “Neftçi” İSM-in yetirmələridir. London Olimpiadasında uğurla çıxış edən idmançılarımız 2-si qızıl, 2-si gümüş və 6-sı bürünc olmaqla 10 medala layiq görülmüşlər. Bu nəticə isə indiyə qədər iştirak etdiyimiz olimpiadalar arasında bir ilkdir.

Fərəhli haldır ki, ölkəmizin qazandığı bu uğurda “Neftçi” İdman-Sağlamlıq Mərkəzinin idmançılarının da böyük rolu olmuşdur. Belə ki, mərkəzin sərbəst güləşçisi Toğrul Əsgərov bütün görüşləri qələbə ilə başa vuraraq Olimpiya çempionu titulunu qazanmışdır. Yunan-Roma güləşçimiz Rövşən Bayramov isə Pekin 2008-dəki uğurunu təkrarlayaraq, London Olimpiadasında da gümüş medala layiq görülmüşdür.

XIV London Yay Paralimpiya Oyunlarında paralimpiyaçılarımız olimpiyaçılarımızın uğurlarını davam etdirərək, Vətənə 12 medalla (4 qızıl, 5 gümüş və 3 bürünc) dönmüşlər. Sevindiricidir ki, bu medalların da 7-si “Neftçi” İSM-in təmsilçilərinə məxsusdur. Onlardan Ramin İbrahimov (cüdo), Oleq Panyutin (atletika, üç təkanla tullanma), Afaq Sultanova (cüdo) qızıl, Vladimir Zayets (atletika, üç təkanla tullanma) gümüş, İlham Zəkiyev (cüdo), Hüseyn Həsənov (atletika, uzunluğa tullanma), eləcə də Oleq Panyutin, Rza Osmanov, Elçin Muradov və Vladimir Zayetsdən ibarət qrup (atletika, estafet yürüşü) isə bürünc medal qazanmışdır.

Təkmübarizlik növləri ilə yanaşı, kollektiv oyun növləri üzrə də yüksək nailiyyətlər əldə olunmuşdur. Belə ki, futzal komandamız sonuncu Azərbaycan çempionatında 2-ci yerə çıxmışdır. Bundan əlavə, futbol üzrə ölkə çempionatının birinci divizionunda çıxış edən “Qaradağ Lökbatan” komandası əzmkar mübarizliyi sayəsində çempion adını qazanmışdır. Azərbaycan birinciliyinin U-14 liqasında çıxış edən “Neftçi” İSM-in “Siyəzən” komandası 2011-2012-ci il mövsümünü 3-cü yerdə başa vurmuşdur. Bakı Şəhər Gənclər və İdman Baş İdarəsinin təşkilatçılığı ilə futbol üzrə dörd yaş qrupunda keçirilən Bakı şəhər klub komanda birinciliyində “Neftçi” İSM bütün yaş qruplarında təmsil olunmuşdu. Uğurla çıxış edən komandalarımızdan ikisi mükafatçılar sırasında yer alıb. Belə ki, 1998-ci və 1997-ci il təvəllüdlülərdən ibarət komandalarımızın hər ikisi çempionatı 3-cü yerdə başa vurub. Bakı Futbol Federasiyasının təşkil etdiyi “Sabahın ulduzları” paytaxt çempionatında “Neftçi” İSM-in müxtəlif yaş qruplarında komandaları uğurla çıxış etməkdədirlər.

Əldə etdiyi yüksək nailiyyətlər sayəsində mərkəz Gənclər və İdman Nazirliyi tərəfindən 2007, 2008, 2009, 2010, 2011 və 2012-ci illərdə ardıcıl olaraq altı dəfə “İlin ən yaxşı idman cəmiyyəti” seçilmişdir. Bütün bu göstəricilər “Neftçi” İdman-Sağlamlıq Mərkəzinin ölkədə lider idman cəmiyyəti olmasının açıq təzahürüdür.

Sözsüz ki, bütün bu yüksək nəticə və göstəricilər ARDNŞ rəhbərliyinin, şəxsən Rövnəq Abdullayevin idmana göstərdiyi xüsusi diqqət və qayğının nəticəsində əldə olunmuşdur. Belə ki, “Neftçi” İSM-in idman qurğuları əsaslı və cari təmir olunmuş, ən müasir idman inventar və avadanlıqları ilə təchiz edilmiş, idmançı, məşqçi və hakimlər müxtəlif beynəlxalq yarışlara, təlim-məşq toplanışı və seminarlara ezam olunmuşlar. Bir sözlə, idmançılarımız üçün hər cür şərait yaradılmışdır ki, bu da onların zəfərlər qazanmasında müstəsna rol oynamışdır.

Sadıq Sadıqov,

“Neftçi” İSM-in icraçı direktoru,

“Neftçi” PFK-nın prezidenti,

MOK-un İcraiyyə Komitəsinin üzvü,

Əməkdar bədən tərbiyəsi və idman xadimi

İki sahil.- 2013.- 9 yanvar.- S.15.