Firəngiz Əlizadə: 2013-cü ildə planlar müvəffəqiyyətlə həyata keçiriləcək

Bu il Bakıda Heydər Əliyev Fondunun təşəbbüsü ilə “Muğam Dünyası” Beynəlxalq musiqi festivalı olacaq

XXI əsr Azərbaycan musiqi mədəniyyətinin inkişafını Azərbaycan Bəstəkarlar İttifaqının fəaliyyət dairəsindən kənarda təsəvvür etmək qeyri-mümkündür. Qeyd edək ki, hal-hazırda ittifaq sıralarında 200 nəfər yüksək ixtisaslı peşəkar bəstəkar və musiqişünaslar ordusunu birləşdirir. Təşkilata sədrliyi isə Qara Qarayev məktəbinin ən parlaq nümayəndələrindən biri olan və beynəlxalq aləmdə öz sözünü demiş, yüksək nüfuz qazanmış bir şəxsiyyət- respublikanın Xalq artisti, professor, YUNESKO-nun “Dünya artisti” fəxri titulunu şərəflə daşıyan Firəngiz Əlizadə edir.

Qeyd edək ki, F.Əlizadə ötən ilin dekabrın 20-də keçirilən seçkilərdə növbəti 5 il müddətinə Azərbaycan Bəstəkarlar İttifaqının sədri seçildi. Həmişə gərgin işləyən, Azərbaycan incəsənətinin, musiqisinin inkişafında və tanınmasında əlindən gələni əsirgəməyən F.Əlizadə “İki sahil”ə yola saldığımız ilin uğurları və qarşıda duran planlar barədə danışdı. Həmsöhbətimiz xüsusi olaraq son nailiyyətlərini vurğulayaraq qeyd etdi ki, 2012-ci il dekabrın 14-dən 18-nə kimi ABİ-nin IX qurultayı baş tutdu. Qurultay çərçivəsində simfonik, kamera, estrada konsertləri düzənləndi, müxtəlif bəstəkarların əvvəlki və yeni əsərləri səsləndi, Tofiq Bakıxanovun “Xeyir və Şər”, Elnarə Dadaşovanın “Sayalı” (premyera) baletləri, Üzeyir Hacıbəylinin “Ər və arvad” musiqili komediyası (əsərin partiturası bəstəkar Sərdar Fərəcov tərəfindən bərpa edilib), Fikrət Əmirovun “Sevil” operası və Ramiz Mirişlinin “Amerikalı kürəkən” musiqili komediyası nümayiş olundu.

F.Əlizadə sözlərinə onu da əlavə edərək bildirdi ki, önümüzdə bizi yenə də gözəl və gərgin il gözləyir. “Bilirsiniz ki, hər iki ildən bir Bakıda beynəlxalq musiqi festivalı keçirilir. “Muğam Dünyası” Beynəlxalq musiqi festivalı Heydər Əliyev Fondunun təşəbbüsüdür. Muğam sənəti əsrlər boyu Azərbaycan xalqının milli tanıtma nişanlarından olan milli mədəni irsimizin əsas hissəsini təşkil edib. Festivalın prezidenti Heydər Əliyev Fondunun prezidenti, Azərbaycanın birinci xanımı, YUNESKO və İSESKO-nun xoşməramlı səfiri, Milli Məclisin deputatı Mehriban xanım Əliyevadır. Çox yüksək səviyyədə 2009 və 2011-ci ildə artıq sözügedən festivalı keçirdik. 2009-cu ildə beynəlxalq musiqi festivalı çərçivəsində üç gün ərzində muğama həsr olunmuş beynəlxalq elmi simpozium keçirildi. Simpoziumun nəticələrinə dair xüsusi kitab nəşr olundu.”

ABİ sədrinin sözlərinə görə simpoziumun işində ABŞ, Böyük Britaniya, Rusiya, Fransa, İtaliya, Almaniya, Türkiyə, Niderland, Macarıstan, Çin, Tunis, Özbəkistan, İran, Mərakeş, Hindistan və Tacikistandan olan 30-a yaxın elm adamı və musiqiçi iştirak edib. “Bu il isə üçüncü festivalı keçirməyə hazırlaşırıq. Bu festival çox böyük həcmli hadisədir.”

Firəngiz Əlizadə söylədi ki, digər tərəfdən bu il həm də yubileylər ilidir. Azərbaycan klassik musiqisinin inkişafında əvəzsiz xidmətləri olan dahi bəstəkarlarımızdan biri Qara Qarayevin 95 illik yubileyi qeyd olunacaq. Bizim də çoxlu sayda tədbirlərimiz var- kamera konsertləri, simfonik əsərlər, Q.Qarayevin adına, onun şəxsiyyətinə həsr olunmuş əsərlərdən ibarət konsertlər keçirəcəyik. O, ilin ən əhəmiyyətli yubileyi haqqında danışaraq qeyd etdi ki, bundan başqa 2013-cü il ulu öndər Heydər Əliyevin anadan olmasının 90-cı ildönümü ilə əlaqədar bəstəkarlarımız yeni əsərlər yaradırlar. Böyük həcmli əsərlər də yazılır, yəni kantata-oratoriya janrlarında və bununla yanaşı mahnılar da bəstələnir, kliplər çəkilir.

Onu da qeyd etdi ki, yaranan yeni əsərlər arasında, onların peşəkarlığı və qeyri-peşəkarlığı arasında tarazlılıq prinsipi də əsas tutulur. “Qoy xalqımız özü seçsin, hansı daha gözəldi, hansı daha yadda qalır, sözlərlə musiqi arasında vəhdət harada dəqiq yaradılıb və s. Bütün bunların hamısı çox mühüm məsələlərdir.” F.Əlizadə vyrğuladı ki, bu il həm də bəstəkar Musa Mirzəyevin 80 illik yubileyi qeyd olunacaq. Bəstəkarın kamera musiqisi, Azərbaycan Dövlət Filarmoniyasının simfonik konsertləri təşkil ediləcək, musiqişünasların M.Mirzəyev haqqında yazdıqları təqiqatları, kitabları, məqalələri müzakirə ediləcək. “Digər bir bəstəkarımız Yaşar İmanovun da anadan olmasının 80 illiyi qeyd olunacaq. Bir sıra musiqişünasların və bəstəkarların kitablarının təqdimatı gözlənilir.”

F.Əlizadə uğurlarını sıralayaraq nəzərə çatdırdı ki, hər il 18 sentyabr -Milli Musiqi günündən başlayan böyük beynəlxaq festival keçirilir. Təbii ki, bu il də festival olacaq. Ötən ildəki kimi bu il də silsilə tədbirlər var. Məsələn, müasirlərlə dialoq, Azərbaycan bəstəkarlarının yeni əsərlərinin, təzə çapdan çıxmış kitabların, kompakt disklərin, respublikanın bölgələrində olan bəstəkarların hesabat konsertlərinin təqdimatları təşkil olunacaq. “Yola saldığımız ilin 12-16 iyun tarixində gənc bəstəkarların əsərlərindən ibarət plenium öz işinə başladı. Bundan başqa iyunun 30-da Şəki şəhərində növbəti “İpək yolu” beynəlxalq musiqi festivalı start götürdü. Düzdür, Azərbaycanda çox festivallar keçirilir - Q.Qarayev, Ü.Hacıbəyli, M.Rostropoviç adına və s. Bu festivalın fərqi isə ondan ibarətdir ki, biz konsertlərimizi həmişə tarixi məkanlarda keçiririk. Yəni milli kostyumlar, milli musiqi və müxtəlif xalqların yaradıcılığını məhz turistik məkanlarda göstəririk. 2011-ci il bu festival Xalça muzeyində başladı. Musiqiçilər improvizasiya edə-edə, muğamları çala-çala xalçalar göstərilirdi, şeirlər səslənirdi və bu tamamilə başqa effekt verdi. Qeyd edim ki, “İpək yolu” layihəsində də, 1999-cu ildən başlayaraq muğam öz layiqli yerini tutdu. Bu il isə festival Şəkidə və Gəncədə keçiriləcək.”

Azərbaycan Bəstəkarlar İttifaqının sədri F.Əlizadə yola saldıqları 2012-ci ilin musiqi, incəsənət həyatı üçün çox uğurlu olduğunu vurğulayaraq, “Düşünürəm ki, 2013-cü il də önümüzə qoyduğumuz planları müvəffəqiyyətlə həyata keçirəcəyik”.

Günel Eyyubova

İki sahil.- 2013.- 10 yanvar.- S.18.