Xəzər regionunun yeganə boru örtükləmə zavodu

“Caspian Pipe Coatings” MMC “Ümid” Layihəsi çərçivəsində boruların korroziyaya qarşı, eləcə də betonla örtüklənməsini müvəffəqiyyətlə başa çatdırdı

Xəzəryanı regionda fəaliyyət göstərən yeganə müasir boru örtükləmə zavodu “Caspian Pipe Coatings” (CPC) 2002-ci ildən etibarən Azərbaycanda fəaliyyət göstərir. Yarandığı dövrdən bu günə kimi CPC ümumi uzunluğu 2400 km-ə kimi müxtəlif diametrli boruların örtüklənməsini həyata keçirib. CPC Hasilatın Pay Bölgüsü Sazişi çərçivəsində BP/ABƏŞ-in sifarişi ilə “Azəri-Çıraq-Günəşli”, “Şahdəniz”, Bakı-Tbilisi-Ceyhan, “Çıraq Neft Layihəsi”, “Lay Suları” və ARDNŞ-in sifarişi ilə “Neft Daşları-Bahar”, “Bahar-Hövsan”, “Xarə-Zirə-NYM 1” və sonuncu “Ümid” Layihəsinin icrasında iştirak edib.

Xatırladaq ki, “Ümid” qaz-kondensat yatağını Azərbaycan Respublikası Dövlət Neft Şirkəti öz daxili imkanları hesabına, heç bir xarici tərəfdaşın köməyi olmadan kəşf edib və onun istismarına başlayıb. Hazırda qaz və kondensat verən bu yataq üçün lazım olan boruların keyfiyyətlə örtüklənməsi isə CPC-nin öhdəsinə düşüb.

Şirkətin icraçı direktoru Azər İsayevdən aldığımız məlumata görə, CPC zavodu Bakı şəhərinin sənaye zonasında Xəzər dənizinin sahilində 216 000 m2 sahəni əhatə edir. CPC-nin yerləşdiyi coğrafi mövqeyi ölkə ərazisində və Xəzər dənizi hövzəsində yerləşən dövlətlərdə layihələrin icrasında iştirak etmək imkanlarını yaradır. CPC-nin malik olduğu avadanlıqlar vasitəsilə 10-48 düymə ölçüsündə olan magistral boru xətlərinin dünya standartlarına uyğun olaraq korroziyaya qarşı birqat izolyasiya, 3-qat polietilen/polipropilen, boru xətlərinin daxili təmizlənməsi və örtüklənməsi, qaz boruların daxili divarlarındakı nahamarlıqların azaldılması məqsədilə örtüklənməsi, betonla örtükləməsini və anodların quraşdırılmasını yerinə yetirmək imkanlarını yaradır. Həmçinin, CPC-nin qaldırıcı avadanlıqlarının texniki göstəriciləri boruları və izolyasiyasını zədələməmək şərti ilə 25 ton ağırlığında olan boruların yükləmə-boşaltma əməliyyatlarını yerinə yetirməyə imkan verir.

A.İsayev qeyd etdi ki, CPC zavodunun unikal texniki göstəriciləri ilə bərabər malik olduğu ixtisaslı kadr potensialı layihələrin icrasında yüksək nəticələrin əldə olunmasına bilavasitə təkan verir. “CPC-də çalışan əməkdaşların 60%-ə şirkətdə 2002-ci ildən fəaliyyət göstərirlər. Həmçinin şirkətin idarəedici heyətin 70 %-i CPC-də fəaliyyətlərini mütəxəssis və inspektor vəzifələrində başlamış və peşəkarlıq səviyyələrini artırmaqla nəinki Azərbaycanda, Xəzəryanı regionda korroziyaya qarşı izolyasiya sahəsində yeganə və sayılan mütəxəssislərdəndirlər.”

Şirkətin icraçı direktoru vurğuladı ki, CPC-də daim diqqətdə olan iki əsas istiqamətlərdən biri keyfiyyətə nəzarət digəri isə SƏTƏMM hesab olunur. “Keyfiyyətə nəzarət borular CPC sahəsinə daxil oduğu andan istehsalın hər bir səviyyəsində xüsusi funksional proqram vasitəsilə həyata keçirilir. CPC boru örtükləmə sahəsində keyfiyyətə nəzarəti həyata keçirmək üçün qabaqcıl avadanlıqlarla təchiz olunmuş 2 laboratoriyaya və 8 nəzarət məntəqəsinə malikdir. CPC-nin SƏTƏMM qaydalarına nəzarət sistemi şirkətdə həyata keçirilən bütün əməliyyatları əhatə edir. Bu sistemi elə qurulub ki, hər bir əməkdaş və ya müştəri, insan və ya təbiət üçün təhlükəni hiss etdiyi an işi dayandırmaq ixtiyarına malikdirlər.

Xüsusi vurğulamaq yerinə düşər ki, şirkət Moody İnternational şirkətinin həyata keçirdiyi auditin nəticələrinə əsasən 2009-cu ildən etibarən İSO 9001:2008 (Keyfiyyətin idarə olunması sistemi), İSO 14001:2004 (Ekoloji idarəetmə sistemi) və OHSAS 18001: 2007 (Sağlamlıq və Əməyin təhlükəsizliyinin idarə olunması sistemi) sertifikatlarına layiq görülüb. CPC-nin fəaliyyətinin bu sertifikatlarla qiymətləndirilməsi bir daha sübut edir ki, şirkət dünya standartlarına uyğun olaraq fəaliyyət göstərir. 2009-2010 cu illərdə CPC müxtəlif nominasiyalarda “İlin Şirkəti” adına layiq görülmüşdür.

A.İsayev bildirdi ki, CPC zavodunun Azərbaycanda yerləşməsi ölkəmizdə həyata keçirilən neft-qaz layihələrinin rentabelliyini artırır. “Buna misal olaraq Azərbaycan Respublikası müstəqilliyi bərpa olunduqdan sonra ARDNŞ-in daxili qüvvələri hesabına həyata keçirdiyi “Ümid” layihəsini göstərmək olar. “Ümid” layihəsi çərçivəsində CPC tərəfindən həyata keçirilən xidmətlər boruların gəmi vasitəsilə qəbulu, betonla örtüklənməsi və anodların quraşdırılmasından sonra dənizə quraşdırılma sahəsinə göndərilməsindən ibarət olub.” Layihə çərçivəsində qəbul olunmuş boruların ümumi uzunluğu 18000 metr təşkil edib. İşlərin yerinə yetirilməsi tərtib olunmuş cədvələ uyğun olaraq aparılaraq layihənin icrası vaxtında başa çatdırılıb.

“Caspian Pipe Coatings” MMC-nin icraçı direktoru sonda onu da vurğuladı ki, yaxın gələcəkdə CPC “Şahdəniz-2” layihəsinin icrasında iştirak etmək üçün hazırlıq işlərini yerinə yetirir. Bu layihənin icrası üçün yeni texnologiyaların tədbiqi gözlənilir.

Orxan Vahidoğlu

İki sahil.- 2013.- 12 yanvar.- S.13.