“Fotoşəkillərin söhbəti”

Dünən Azərbaycan İstiqlal Muzeyinin ekspozisiyasında 20 Yanvar faciəsinin 23-cü ildönümünə həsr olunmuş eyni adlı sərgi təşkil olundu

Sərgi Azərbaycan Fotoqraflar Birliyi (AFB) ilə birlikdə hazırlanmışdı. İlk dəfə olaraq Azərbaycan İstiqlal Muzeyində AFB üzvlərinin - Fərid Məmmədovun, Asim Talıbın, Mirnaib Həsənoğlunun, Oleq Litvinin, Tahir Cəfərovun, Rauf Umudun və başqalarının 20 Yanvar faciəsini əks etdirən 30-dan artıq fotoşəkli nümayiş olundu. Həmçinin faciəni əks etdirən AFB-nin hazırladığı slayd-şou göstərildi. Slayd-şouda Hüseyn Hüseynzadə, Fərid Məmmədov, Asim Talıb, Rauf Umud, Mehdi Abbasov, Oleq Litvin, Tahir Cəfərov, Mirnaib Həsənoğlu, Vüqar İbadov, Tural Əliyev, Ruqiyyə Rəsulova, Polad Qasımov, AzərTAc-ın fotoxronikasından Yaşar Xəlilov, Oktay Məmmədov, Fərid Xayrulininin fotoları yer almışdı. Qeyd edək ki, muzeyə Bakı İncəsənət Mərkəzi Yaradıcılıq Birliyinin baş direktoru Rafael Gülməmmədli tərəfindən verilmiş 20 Yanvar hadisələrinin canlı şahidlərinin məktubları, kitabları və digər əşyaları təqdim olunub.

Tədbirdə Azərbaycan İstiqlal Muzeyinin direktoru Fəridə Şəmsi, Azərbaycan Fotoqraflar Birliyinin sədri Mirnaib Həsənoğlu, Bakı İncəsənət Mərkəzi Yaradıcılıq Birliyinin baş direktoru Rafael Gülməmmədli, 20 Yanvar hadisələrinin şahidləri çıxış etdilər. Azərbaycan Fotoqrafları Birliyinin sədri Mirnaib Həsənoğlu “İki sahil”ə eksklüziv açıqlamasında bildirdi ki, sərgiyə AFB-nin fotoları təqdim edilib: “Tədbirdə göstərilən slayd-şouda 15 nəfərə yaxın fotoqrafın işləri toplanıb. O zaman biz bu fotolarla öz vətəndaş mövqeyimizi göstərmişik. Əlbəttə, bu fotoşəkillərin hər birinə sənət əsəri demək olmaz. İlk öncə bu şəkillər sənədli informasiya daşıyır. Onlar elə tarixi sənədlərdir ki, heç bir müzakirəyə, inkara və ya təsdiqə ehtiyacı yoxdur. Bu sərgi 20 Yanvar 1990-cı ildə Azərbaycan xalqının başına gətirilən qanlı müsibətin daha bir göstəricisidir.” M.Həsənoğlu onu da xüsusi olaraq qeyd etdi ki, sərgi 20 Yanvar faciəsi haqqında informativ xarakter daşıyır. Öncəki illərdə AFB İçərişəhərdə dəfələrlə slayd-şou təşkil edib. Sadəcə bu il məkan dəyişikliyi edilib. Bu cür sərgilərin silsilə xarakter daşıdığını söyləyən AFB-nin sədri Tarix muzeyində də slayd-şou keçiriləcəyini dedi.

Sərgidə AFB-nin üzvləri, 20 Yanvar faciəsinin canlı şahidləri iştirak etdilər.

Qonaqlara 20 Yanvar faciəsinə həsr olunmuş sənədli film nümayiş etdirildi və 20 Yanvar faciəsi haqqında sorğu anketi təqdim olundu.

Günel Eyyubova

İki sahil.- 2013.- 18 yanvar.- S.21.