“Qaraca qız” yenidən səhnədə...

“Özünün 85 illik yubileyi çərçivəsində 2013-cü il Azərbaycan Dövlət Gənc Tamaşaçılar Teatrı üçün önəmli hadisələrlə zəngin olacaqdır”.

Xəbəri Azərbaycan Dövlət Gənc Tamaşaçılar Teatrının direktoru, Beynəlxalq ASSİTEJ-in Azərbaycan Milli Mərkəzinin sədri, Əməkdar artist Mübariz Həmidov verib.

O bildirib ki, artıq teatrda yeni ilin ilk həftəsi 4 yeni tamaşanın hazırlanmasına start verilib. S.S.Axundov və A.Şaiqin “Qaraca qız” əsəri əsasında eyniadlı tamaşa üzərində Xalq Artisti Vaqif Əsədov yaradıcılıq prosesi həyata keçirir. Tamaşanın quruluşçu rəssamı Qurban Məsimov, bəstəkarı Sərdar Fərəcovdur. Səhnədə əməkdar artistlər Gülər Nəbiyeva, Leyli Vəliyeva, Seyidşah Məmmədov, aktyorlar Vüsal Mehrəliyev, Manaf Dadaşov, Sona Babayeva, Güşvər Şərifova, Sevinc Mehrəliyeva, Simuzər Atakişiyeva, Almaz Mustafayeva, Asya Atakişiyeva, Elşən Çarhanlı, Zümrüd Quliyeva, Şəbnəm Hüseynova, Kərəm Hadızadə, İlqarə Tosova, İlham Əsədov, Nuriyyə Əliyeva və başqaları çıxış edəcəklər.

M.Həmidov qeyd etdi ki, teatrın yeni quruluşda tamaşaçılara təqdim edəcəyi ikinci tamaşa bolqar yazarı Panço Pançevin “Dörd əkiz qardaşın nağılı” əsəridir. Tamaşanın quruluşçu rejissoru Ağalar İdrisoğlu, rəssamı Elşən Sərxanlıdır. Əsas obrazlar üzərində əməkdar artistlər Naibə Allahverdiyeva, Nübar Novruzova, Qəmər Məmmədova, aktyorlar Günel Məmmədova, Elnur Hüseynov, Kərəm Hadızadə, Vüsal Mehrəliyev, Anar Səfiyev, Zümrüd Quliyeva, Sona Babayeva və teatrın başqa aktyorları canlandıracaqlar.

Kollektivin hazırda üzərində məşq etdiyi 3-cü tamaşa İsveç yazarı və tanınmış teatrşünas Lars Nurenin “Müharibə” əsəridir. Tamaşada əsas obrazları Əməkdar artistlər Kəmalə Hüseynova, Qurban İsmayılov, aktyorlar Nigar Məmmədova, Roza İbadova, Rasim Cəfərov ifa edəcəklər.

Teatrın direktorunun sözlərinə görə hər il olduğu kimi bu il də Novruz bayramı ərəfəsində teatr məktəbliləri yeni tamaşa ilə sevindirəcəkdir. Bu dəfə onlar M.Müfiqin “Şəngülüm, Şüngülüm, Məngülüm” poeması əsasında səhnələşdirilmiş eyniadlı tamaşanı izləyəcəklər.

Tamaşanın quruluşçu rejissoru Nicat Kazımovdur. Səhnə əsərində əsas rolları Əməkdar artist Kəmalə Hüseynova, aktyorlar Mehriban Hüseynova, Vüsal Mehrəliyev, Ceyhun Məmmədov, Asya Atakişiyeva, Elnur Kərimov, Səfa Mehdi, Eşqin Quliyev, Sevinc Mehrəliyeva, Zülfiyyə Alhüseynova, Anar Seyfullayev, Müşfiq Əliyev və başqaları ifa edəcəklər.

Qeyd edək ki, sözügedən yeni tamaşaların premyeraları bu ilin fevral və mart aylarında baş tutacaqdır.

Günel Eyyubova

İki sahil.- 2013.- 22 yanvar.- S.29.