Gənclərin inkişafı üçün

ölkəmizdə lazımi şərait yaradılıb

Bakı Beynəlxalq Tələbə Klubunun (BBTK) rəhbəri Aysəba Umutlu bildirir ki, hər bir perspektivli Azərbaycan gəncinin yetişməsi üçün ölkəmizdə dövlət tərəfindən lazımi şərait yaradılıb. Prezident İlham Əliyevin qərarları ilə yaradılan çoxsaylı gənclər mərkəzlərinin və evlərinin açılışı xüsusi qeyd edilməlidir.

- Aysəba xanım, dövlətimizin həyata keçirdiyi gənclər siyasəti barədə fikirləriniz oxucularımız üçün maraqlı olar.

- Azərbaycan dövlətinin gənclər siyasətindən danışarkən Prezident İlham Əliyev tərəfindən 2005-ci ildə imzalanmış “Azərbaycan Gəncliyi 2005-2009-cu illərdə” və 2011-ci ildə imzalanmış “Azərbaycan gəncliyi 2011-2015-ci illərdə” dövlət proqramları xüsusi qeyd edilməlidir. Son 10 ildə dövlət tərəfindən gənclər siyasətinin davam etdirilməsi üçün ayrılmış büdcənin dəfələrlə artırılması, bu illər ərzində gənclər təşkilatlarının sayının 51-dən 250-yə çatması, gənclərin perspektivlərinin qiymətləndirilməsi, onların təşəbbüslərini və ictimai fəallığını stimullaşdırmaq məqsədi ilə onların layihələrinə ayrılmış maliyyə vəsaitlərinin 40 dəfəyədək yüksəlməsi və digər uğurlar, əslində, irəliyə doğru bir sıçrayışdır. Azərbaycan gənclərinin dünyanın ən tanınmış ali məktəblərində dövlətin dəstəyi ilə təhsil almaları, ixtisaslı kadrlar kimi ölkə iqtisadiyyatının qüdrətlənməsində fəaliyyət göstərməsi dövlətin bu sektora olan etibarının nəticəsidir. Gənclərimizi xarici ölkələrin ali təhsil müəssisələrinə göndərməklə Azərbaycanın ölkə sərhədlərindən kənarda tanınması və təbliği üçün zəmin yaradan ulu öndərin ənənəsi bu gün Prezident İlham Əliyev tərəfindən həyata keçirilir. İndi həmin kadrlar ölkəmizin inkişafının qüdrətlənməsində təcrübəli mütəxəssislər kimi çalışırlar. Azərbaycanın qısa müddətdə iqtisadi, sosial sahədə əldə etdiyi uğurları müəyyənləşdirilmiş düzgün siyasət və strategiyanın uğurlu addımları kimi dəyərləndirən gənclər dövlətin onlara göstərdiyi diqqəti əməli fəaliyyətləri ilə doğrultmaqla, əsl vətəndaşlıq məsuliyyətlərini ölkənin ictimai siyasi həyatında tutduqları sağlam mövqe ilə təsdiqləyirlər.

- Rəhbərlik etdiyiniz təşkilatı necə oldu ki, yaratdınız?

- Bakı Beynəlxalq Tələbə Klubu (BBTK) Beynəlxalq Avrasiya Mətbuat Fondunda könüllü çalışan bir qrup gənc tərəfindən 2006-cı ildən fəaliyyətə başlayıb. BBTK Azərbaycanda məhz əcnəbi tələblərlə işləyən bir qurumun olmaması zərurətindən təsis edildi. Ölkələrarası mədəni və mənəvi dəyərlərin inteqrasiyası, ictimai-siyasi həyatda baş verən hadisələr, ölkənin sosial-iqtisadi inkişafı haqqında real və dolğun informasiyaların Azərbaycanda təhsil alan xarici tələbə-gənclərə çatdırılması, qloballaşan dünyada terrora qarşı mübarizə, sülhün və əmin-amanlığın qorunması üçün tələbələrin beynəlxalq həmrəyliyinə nail olunması və bu istiqamətdə müxtəlif layihələr həyata keçirilməsi məqsədilə Bakı Beynəlxalq Tələbə Klubu fəaliyyətə başlamışdır. Bu təşkilat Azərbaycanda təhsil alan əcnəbi tələbələrin bir şəbəkəsi olsada məqsəd Azərbaycanlı və əcnəbi gənclər arasında dialoqun formalaşdırılması, xarici tələbələrin azərbaycan cəmiyyətinə inteqrasiya olunaraq ikinci vətəni hesab etməsinə də xidmət edir.

- Bakı Beynəlxalq Tələbə Klubunun əsas məqsədi nədən ibərətdir?

- BBTK-nın əsas məqsədi Xarici tələbələrin cəmiyyətimizə inteqrasiyasına kömək etmək, Azərbaycanın tarixi, mədəniyyəti haqda obyektiv informasiyanı Azərbaycanda oxuyan xarici tələbələrə çatdırmaq, qarşılıqlı mədəni, elmi və təcrübə mübadiləsinə nail olmaq, BBTK-nun üzvü olan xarici tələbələrin problemlərinin həllinə yardımçı olmaq, Azərbaycanda təhsil almış xarici tələbələrlə yaxın əlaqələrin qurulması, dünyanın digər ölkələrində fəaliyyət göstərən tələbə gənclər təşkilatları ilə əlaqələr qurmaq, onlara Azərbaycan gəncləri və tələbələri haqda məlumat vermək, Azərbaycan və xarici gənclərin asudə vaxtlarının səmərəli təşkili, üzvlərin təmsil etdiyi ölkələrin reallıqlarının nümayişi və təbliği üçün tədbirlər və görüşlərin təşkilidir.

- Hansı layihələri həyata keçirmisiniz?

- Qarşıya qoyulan məqsədlərə nail olmaq üçün BBTK bir sıra layihələr həyata keçirmişdir. 23 fevral 2007-ci ildə BBTK Xocalı soyqırımı qurbanlarının anım gününə həsr olunmuş “Terrora yox deyək!” mərasimi keçirmişdir. Mərasim iştirakçılarının dünya ictimaiyyətinə, beynəlxalq qurumlara, beynəlxalq tələbə klublarına müraciəti qəbul olunub. Bundan başqa, ən qədim bayramımız olan “Novruz” Bayramında Azərbaycanın milli adət-ənənələri, tarixi keçmişi, tarixi abidələri, milli mətbəxi, musiqisi və s. barəsində məlumatlandırılması və bu yolla xaricdən olan tələbələrə Azərbaycan həqiqətlərinin olduğu kimi çatdırılması, gördükləri və əldə etdikləri informasiyaları doğma ölkələrinə qayıtdıqdan sonra da yaymaları üçün “Novruz həftəsi” adlı layihə həyata keçirib. Xarici tələbələrlə sıx əlaqələrin qurulması və onların BBTK ətrafında birləşməsini təmin etmək üçün Bakı Slavyan Universiteti, Xəzər Universiteti, Turizm Universiteti və s. universitetlərlə əməkdaşlığa nail olmuşdur. Bakı Beynəlxalq Tələbə Klubunun ən böyük layihələrindən biri 2008-ci ilin dekabr ayında həyata keçirilən Geriye yurda doğru devizi altında “Qaçqın və məcburi köçkün probleminə yeni bir yanaşma” layihəsidir. Bu layihə çərçivəsində dünyanın müxtəlif ölkələrindən xüsusən Avropa ölkələrindən 18 gənc və yerli gənclərimizlə bərabər 25 gəncin Qarabağın sərhəd rayonlarınasəfəri təşkil olunmuşdur. Digər böyük layihəmiz Azərbaycan Respublikası Prezidenti yanında QHT-lərə Dövlət Dəstəyi Fondunun maliyyə dəstəyi ilə 2011-ci ildə Azərbaycanda Təhsil Alan Əcnəbi Tələbələrin birinci ümumrespublika forumu idi. Bu forumun ikincisinin keçirilməsi nəzərdə tutulur. Bakı Beynəlxalq Tələbə Klubunun ən son və böyük marağa səbəb olan layihəsi Gənclər Fondunun Maliyyə dəstəyi ilə Azərbaycanda Təhsil Alan Əcnəbi Tələbələr arasında birinci Azərbaycan dili olimpiadası oldu. Burada Azərbaycan dilində ən yaxşı dil biliklərinə malik əcnəbi tələbələr mükafatlandırıldılar.

- Beynəlxalq tələbə mübadiləsinə təşkilatınız hansı səviyyədə yardımçı ola bilir?

- Klubumuz həm də Avropanın ən nüfuzlu gənclər təşkilatlarından biri olan Erasmus Tələbələri Şəbəkəsinin Azərbaycanda nümayəndəliyidir. Bu təşkilat Erasmus və Erasmus mundus proqramı ilə mübadilə olunan tələbələrlə işləyir. Erasmus Tələbə Şəbəkəsi Beynəlxalq Bakı Tələbə Klubu ilə eyni məqsədlərə yönəlik işlər gördüyü, Avropa gənclərinə açılan bir təşkilat olduğu üçün bizim təşkilat onların üzvlüyünə nail olmuşdur.

- Gələcək planlarınız nədən ibarətdir?

- Gələcəkdə ilk öndə öz fəallığı ilə seçilən xarici tələbələri Bakı Beynəlxalq Tələbə Klubunun fəaliyyətinə cəlb edəcəyik. Çalışacağıq ki, gələcəkdə tələbə şəbəkəmizi daha da genişləndirək, koordinasiya işlərimizi gücləndirək. Azərbaycan həqiqətlərini dünya ictimaiyyətinə daha yaxşı çatdırmaq üçün xarici tələbələrin ölkəmizin müxtəlif bölgələrinə, o cümlədən qaçqın və məcburi köçkünlər məskunlaşan qəsəbələrə, cəbhəyanı rayonlara ardıcıl səfərlərini təşkil etməyi nəzərdə tutmuşuq.

Orxan Vahidoğlu

İki sahil.- 2014.- 20 dekabr.- S.29.