Narkomaniya bəşəriyyəti

düşündürən problemdir

Azərbaycan Respublikası Prezidentinin 24 iyun 2013-cü il tarixli 2966 nömrəli Sərəncamı ilə təsdiq edilmiş “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2013-2018-ci illər üçün Dövlət Proqramı”nın müvafiq bəndləri üzrə Təhsil Nazirliyi tərəfindən məqsədyönlü işlər həyata keçirilir.

Ölkənin sərhədyanı məntəqələrində narkomanlıqla bağlı yaranmış real vəziyyəti nəzərə almaqla bu inzibati ərazilərdə narkomaniyaya qarşı mübarizə, antinarkotik tərbiyə, təbliğat və maarifləndirmə işləri genişləndirilmişdir.

Bu məqsədlə hər il Azərbaycan Respublikasının Təhsil Nazirliyi, Gənclər və İdman Nazirliyi, Dövlət Sərhəd Xidməti ilə birgə tədbirlər planı hazırlanıb həyata keçirilir. Plana uyğun olaraq şagird və tələbələr arasında birgə müsabiqələr, görüşlər və oyunlar təşkil edilmişdir. Sərhəd məntəqələrinə şagirdlərin ekskursiyaları təşkil olunmuş, burada qaçaqmalçılıq, xüsusilə narkotiklərin ziyanı barədə uşaq və gənclərə, valideynlərə və təhsil işçilərinə məlumatlar verilmişdir.

Hüquqpozmalara meyilli olan yetkinlik yaşına çatmayanların yaşayış yerləri, işlədiyi və təhsil aldığı inzibati ərazilər üzrə yerli icra hakimiyyəti və bələdiyyələr, polis orqanları, əmək kollektivləri və müvafiq komissiyalar arasında əlaqələrin genişləndirilməsi, onların narkomaniya ilə bağlı profilaktiki tədbirlərlə əhatə olunması məqsədilə təhsil müəssisələrinin rəhbərlərinə müvafiq göstərişlər verilmişdir. Yerlərdə, xüsusən polis idarələrinin yetkinlik yaşına çatmayanlarla iş üzrə müvəkkilləri ilə daim əlaqədə olmağın, tibb işçiləri ilə birlikdə mütəmadi olaraq pedaqoji kollektivlərin görüşlərini təşkil etməyin zəruriliyi xüsusi qeyd olunmuşdur.

Təhsil müəssisələri narkomanlığa və narkotik vasitələrin qanunsuz dövriyyəsinə qarşı mübarizədə iştirak edən dövlət və qeyri-dövlət təşkilatlarının maddi-texniki bazasının möhkəmləndirilməsinə yönəlmiş həmin qurumların təşkil etdiyi xeyriyyə tədbirlərində fəal iştirak etmişlər. Qeyd olunan tədbirlərdə təhsil işçiləri təşkilati, mənəvi və maddi köməklərini əsirgəməmişlər.

Təhsil müəssisələrində “Narkomaniya əsrin bəlasıdır”, “Narkotiklərə yox deyək”, “Siqaretə yox deyək”, “Gənclər sağlam həyat tərzini seçirlər”, “Narkotiksiz Azərbaycan” mövzuları üzrə toplantılar, görüşlər, müzakirələr keçirilmişdir.

Təhsil nazirinin xüsusi göstərişi ilə hər il ənənəvi olaraq Bakı Şəhəri Müəllimləri Təkmilləşdirmə İnstitutunda “Narkomanlığın profilaktikası sahəsində təhsil müəssisələrinin rolu” mövzusunda elmi-praktik konfrans keçirilir.

Təhsil Nazirliyinin təşkilatçılığı ilə keçirilən bu tədbirdə Bakı şəhərində fəaliyyət göstərən bütün ali məktəblərin tərbiyə işləri üzrə prorektorların, texnikum və orta məktəblərin tərbiyə işləri üzrə direktor müavinləri, Bakı Şəhəri üzrə Təhsil İdarəsinin məsul əməkdaşları, məktəbdənkənar müəssisələrin direktorları iştirak edirlər. Konfransda narkomaniya ilə mübarizə bəşəriyyəti düşündürən ən vacib problemlərdən biri kimi qiymətləndirilmişdir. Bu tədbirlərin ən vacib əhəmiyyəti də ondan ibarət olur ki, konfrans iştirakçıları narkomaniyanın profilaktikası ilə praktik məşğul olan müəllim və təhsil işçiləridirlər.

Konfranslarda problemin aradan qaldırılması yollarından biri kimi gənclərin asudə vaxtlarının təşkilinə ciddi diqqət yetirilməsi vurğulanır. Məktəbdənkənar müəssisələrə uşaq və gənclərin daha çox cəlb olunması, xüsusilə idman məktəblərində müxtəlif bölmələrin sayının artırılması, sağlam həyat tərzinin təbliğinə və digər zərərli vərdişlərdən xilas olmaq üçün müxtəlif elmi-kütləvi tədbirlərdə daha çox təhsil ictimaiyyətinin iştirakı prioritet istiqamətlər olaraq qəbul edilir.

Təhsil Nazirliyi tərəfindən müxtəlif beynəlxalq humanitar təşkilatların maddi və təşkilati dəstəyi ilə uşaq və gənclərimizə sağlam həyat tərzinin aşılanması istiqamətində müxtəlif layihələr həyata keçirilməkdədir. Bu təşkilatların texniki dəstəyi ilə müxtəlif dərs vəsaitləri, xüsusi kurikulumlar hazırlanmış və ümumtəhsil məktəblərində, məktəbdənkənar təhsil müəssisələrində xüsusi kurslar tədris olunmuşdur.

Təhsil Nazirliyinin xüsusi əmrləri ilə təsdiq olunmuş “Ali və orta ixtisas təhsili müəssisələrində tərbiyə işləri üzrə prorektorlar və direktor müavinləri haqqında”, “Texniki-peşə və ümumtəhsil məktəblərində tərbiyə işləri üzrə direktor müavinləri haqqında” təlimata uyğun yerlərdə tərbiyə işləri üzrə prorektorların və direktor müavinlərinin işi tənzimlənir.

Bir neçə ildir ki, BMT-nin Qlobal Fondunun maliyyə və YUNİSEF-in texniki dəstəyi ilə ümumtəhsil məktəblərinin I-XI siniflərində fakultativ məşğələlər üçün nəzərdə tutulmuş saatlar hesabına həftədə 1 saat olmaqla “Həyati bacarıqlara əsaslanan təhsil” adlı fakultativ kurs tədris olunur. Həmin kursun dərs vəsaitinə hər sinif üzrə narkomaniyanın zərəri, sağlam həyat tərzi, zərərli vərdişlər və s. barədə mövzular daxil edilmişdir.

Qeyd olunan fakultativ kurs respublikanın bütün tam orta məktəblərini əhatə edir.

“Həyati bacarıqlara əsaslanan təhsil” fakultativ kursun tədrisi vəziyyətini təhlil etmək üçün mütəmadi monitorinqlər aparılır. Nəticədə bölgələrdə ümumi vəziyyətin qənaətbəxş olduğu müəyyən olunmuşdur.

2012-ci ilin aprel ayında Bakı şəhərində akademik Zərifə Əliyeva adına liseydə Təhsil və Səhiyyə nazirlikləri arasında maarifləndirmənin gücləndirilməsi istiqamətində memorandum imzalanmışdır. Memoranduma əsasən Bakı şəhərinin bütün tam orta məktəblərində öyrədici müşavirə-seminarlar təşkil olunacaqdır. Bu işi Səhiyyə Nazirliyinin Respublika Narkoloji Mərkəzi və Təhsil Nazirliyinin Tərbiyə və məktəbdənkənar müəssisələrlə iş şöbəsi birgə həyata keçirməkdədir.

Memoranduma əsasən Bakı şəhərinin 80-dən çox ümumtəhsil məktəbində bu qəbildən seminarlar təşkil edilmişdir.

Cari ildən etibarən bu kampaniyaya Bakı şəhərində yerləşən internat məktəblərinin qoşulması məqsədəuyğun hesab edilmişdir.

Belə ki, 30 yanvar 2014-cü il tarixdə Sağlamlıq imkanları məhdud uşaqlar üçün 12 nömrəli xüsusi internat məktəbində praktik konfrans təşkil olunmuşdur.

Şagird və tələbələrin antinarkotik dünyagörüşünün formalaşdırılması məqsədi ilə narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı kütləvi idman tədbirləri mütəmadi təşkil olunur. Bu qəbildən 19 dekabr 2013-cü il tarixdə Respublika Olimpiya Mərkəzində Nazirliyin Təhsil Respublika İdman Mərkəzinin Uşaq-Gənclər Futbol məktəbi tərəfindən respublika miqyaslı turnir keçirilmişdir.

Hüseyn Əliyev

Nazir müşaviri

İki sahil.- 2014.- 22 fevral.- S.14.