“Mətbuat və Azərbaycan ədəbi dilinin qorunması”

İyunun 30-da Azərbaycan Mətbuat Şurasında “Mətbuat və Azərbaycan

ədəbi dilinin qorunması” mövzusunda “dəyirmi masa” keçirilmişdir.

AzərTAc xəbər verir ki, bu, “Zərdabi Mətbuat Mərkəzi” İctimai Birliyinin (İB) Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə reallaşdırdığı “Mətbuatda ədəbi dilin qorunmasına dəstək: problemlərin aradan qaldırılmasında ictimai müzakirələr başlıca amil kimi” layihəsi çərçivəsində keçirdiyi üçüncü toplantıdır.

Dilçilik sahəsində tanınmış alimlərin, kütləvi informasiya vasitələri rəhbərlərinin iştirak etdikləri “dəyirmi masa”nı layihənin əlaqələndiricisi, “Zərdabi Mətbuat Mərkəzi” İB-nin sədri Rəhim Hüseynzadə açaraq, rəhbərlik etdiyi qurumun fəaliyyətindən və layihə çərçivəsində görülən işlərdən danışmışdır.

R.Hüseynzadə mart-iyun ayları ərzində gerçəkləşdirilən layihənin məqsədinin ölkənin mətbuat orqanlarında Azərbaycan ədəbi dilinin normalarının qorunması ilə bağlı meylləri müəyyənləşdirməkdən, mövcud problemlər barədə ictimaiyyətin məlumatlandırılmasını təmin etməkdən ibarət olduğunu bildirmiş, diqqəti dil probleminə kompleks yanaşılmasının vacibliyinə cəlb etmişdir. Bu mənada Prezident İlham Əliyevin “Azərbaycan dilinin qloballaşma şəraitində zamanın tələblərinə uyğun istifadəsinə və ölkədə dilçiliyin inkişafına dair Dövlət Proqramı haqqında” 2012-ci il 23 may tarixli Sərəncamının əhəmiyyətindən danışmışdır. Vurğulamışdır ki, sənəddə dövlətçiliyimizin başlıca rəmzlərindən olan ana dilinin istifadəsinə və tədqiqinə dövlət qayğısının artırılması, ölkəmizdə dilçilik elmi sahəsində vəziyyətin əsaslı surətdə yaxşılaşdırılmasını təmin etmək əsas götürülür, müvafiq qurumlar qarşısında vəzifələr müəyyənləşdirilir. Mətbu fəaliyyət dildən istifadə sahəsində ən spesifik məqam kimi diqqəti cəlb etməkdədir. Bu mənada kütləvi informasiya vasitələrində çalışanların ona xüsusi önəm verməsi əhəmiyyətlidir. Bu layihə də bunun üçün bir çağırış olmaqla yanaşı, dövlət miqyasında başlanılmış işə dəstəkdir.

Layihədə ekspert qismində iştirak edən “Jurnalist Araşdırmaları Mərkəzi” İctimai Birliyinin sədri Seymur Verdizadə bildirmişdir ki, son onilliklərdə cəmiyyətimizin həyatında baş verən ciddi dəyişikliklərlə bağlı dilimizə külli miqdarda yeni alınma sözlərin daxil olması təbii və qanunauyğun haldır. Bu sözlərin çoxuna dilimizin təbii ehtiyacı vardır. Ancaq ədəbi dilimizdə geniş şəkildə işlənən öz sözlərimiz ola-ola zəruri ehtiyac duyulmadan onların əcnəbi qarşılığının nitqimizə nüfuz etməsinin də şahidi oluruq. Layihə bu kimi məsələlərin aradan qaldırılmasına dəstək vermək üçün reallaşdırılır. İndiyədək Lənkəran və Şəkidə də eyni mövzuda tədbirlərimiz olmuşdur. Hesab edirəm ki, ictimaiyyət məsələyə kifayət qədər böyük dəstək verir.

“Xalq qəzeti”nin əməkdaşı Tahir Aydınoğlu qeyd etmişdir ki, dilə yanaşma məsələsində müsbət nəticələrin əldə olunması üçün ictimai təşkilatların üzərinə də böyük missiya düşür. Dilimizin pozulmasının qarşısı alınmalıdır. Bu, həyat və su qədər vacib məsələdir. Son vaxtlar elektron medianın geniş şəkildə təşəkkül tapması dil məsələlərinin arxa plana keçməsinə şərait yaratmışdır. Dil pozuntularının aradan qaldırılması mətbuatımızın peşəkarlıq səviyyəsinin yüksəldilməsi üçün ən vacib məsələlərdən biridir.

Azərbaycan Dillər Universitetinin professoru Fəridə Səfiyeva dilə yanaşma məsələsinin önəmindən bəhs edərək bildirmişdir ki, jurnalistika fakültəsində qabiliyyət imtahanı mexanizminin tətbiqi mövcud istiqamətdə əsaslı irəliləyişlər üçün nikbinlik yaradır.

Mətbuat Şurası sədrinin müavini, Jurnalistlərin Həmkarlar İttifaqının sədri Müşfiq Ələsgərli vurğulamışdır ki, dil normalarının qorunmasında dövlətin rolu ilə yanaşı, hər bir vətəndaşın üzərinə düşən missiya da önəmlidir.

Digər çıxış edənlər də “Mətbuatda ədəbi dilin qorunmasına dəstək: problemlərin aradan qaldırılmasında ictimai müzakirələr başlıca amil kimi” layihəsinin əhəmiyyətindən söz açaraq mediada ana dilimizin qorunmasına yönələn təşəbbüslərə daim ehtiyac olduğunu vurğulamışlar.

İki sahil.- 2014.- 1 iyul.- S.9.