Etimad böyük məsuliyyət deməkdir

Müsahibimiz “Həmrəy” Gənclərin Maarifləndirilməsinə

Dəstək İctimai Birliyinin sədri Yəhya Babanlıdır

Azərbaycan gənclər ölkəsidir. Modernləşmə, yeniləşmə dövlət siyasətinin ana xəttini təşkil edir. Bu reallıq inkaredilməzdir ki, müasirlik, yüksək keyfiyyətli təhsil və işgüzarlıq olan yerdə gəncliyə xas yenilikçi düşüncə sivilizasiyanın bütövlükdə simasını dəyişə bilər. Bu inam da ifadə olunur ki, hazırda müasir dünyada qarşılaşdığımız bir çox problemlərin həlli məhz gəncliyin tükənməz enerjisi və qətiyyəti sayəsində həllini tapacaq.

Ölkəmizdə gənclər siyasəti dövlət siyasətinin əsas tərkib hissələrindəndir. Müstəqil Azərbaycan dövlətinin qurucusu ulu öndər Heydər Əliyev gəncləri Azərbaycanın gələcəyi kimi dəyərləndirərək bildirirdi ki, cəmiyyətin gələcək tərəqqisi bir çox cəhətdən indi gənclərimizə nəyi və necə öyrətməyimizdən asılı olacaq. Bu diqqət və qayğının, etimadın nəticəsidir ki, bu gün Azərbaycan gəncliyi ictimai həyatın bütün sferalarında fəallığı ilə seçilir, cəmiyyətin avanqard qüvvəsinə çevrilib.

“Həmrəy” Gənclərin Maarifləndirilməsinə Dəstək İctimai Birliyinin sədri, Odlar Yurdu Universitetinin müəllimi, AMEA-nın A.A. Bakıxanov adına Tarix İnstitutunun “Azərbaycan diasporu” şöbəsinin dissertantı Yəhya Babanlı ilə həmsöhbət olub, dövlətin gənclər siyasətinə bir baxış keçirdik

- Yəhya müəllim, ulu öndər Heydər Əliyevin “Gənclər Azərbaycanın gələcəyidir” tezisi özündə böyük etimadla yanaşı, məsuliyyəti də əks etdirir. Azərbaycan gəncliyi fəaliyyətində bu iki amilin vəhdətliyini necə qoruyur?

- Azərbaycanda uğurlu gənclər siyasətinin təməli ulu öndər Heydər Əliyev tərəfindən qoyulub. 1993-cü ildə dahi şəxsiyyət Heydər Əliyevin xalqın təkidli tələbi ilə hakimiyyətə qayıdışı digər sahələrdə olduğu kimi, gənclərə diqqət və qayğı istiqamətində də yeni mərhələnin təməlini qoydu. Bu fakt da inkaredilməzdir ki, Azərbaycan dövlətinin gənclər siyasətinin formalaşmasında və gənc nəslin geniş fəaliyyət meydanına çıxarılmasında ümummilli liderin təşəbbüsü və iştirakı ilə keçirilən ölkə gənclərinin I Forumu xüsusi rol oynadı. 1996-cı il fevralın 2-də keçirilən bu forum ulu öndər Heydər Əliyevin gəncliklə bağlı strategiyasının ilk təntənəsi kimi dəyərləndirildi. 1997-ci ildə ümummilli lider Heydər Əliyevin sərəncamı əsasında I Forumun keçirildiyi tarix- 2 fevral Azərbaycanda Gənclər Günü kimi elan edildi. Bu addım bir daha təsdiqlədi ki, gənclər siyasəti dövlətin siyasətində əsas yer tutur. Bunun ardınca 1999, 2003, 2005, 2008, 2011 və 2014-cü illərdə Azərbaycan gənclərinin forumlarının keçirilməsi gənclərimizin fəaliyyətində mühüm dönüş yaratmaqla, onların fəaliyyət istiqamətlərini genişləndirmələrində əhəmiyyətli rol oynadı. Onu da qeyd edək ki, gənclərə diqqət və qayğı ulu öndər Heydər Əliyevin hakimiyyətinin hər iki dövründə əsas yer tutub. Əgər ümummilli lider hakimiyyətinin birinci dövründə daha çox gənclərin bir kadr kimi yetişməsinə çalışırdısa, müstəqil Azərbaycana rəhbərliyi dövründə artıq onları dövlətin idarə edilməsində aparıcı qüvvə kimi görürdü.

2003-cü ildən sonrakı dövr dövlət gənclər siyasətində yeni bir mərhələnin əsası kimi dəyərləndirildi. Ulu öndər Heydər Əliyevin siyasi kursunun layiqli davamçısı Prezident İlham Əliyevin həyata keçirdiyi biri-birindən əhəmiyyətli tədbirlər, imzaladığı fərman və sərəncamlar, təsdiqlədiyi Dövlət Proqramları gənclərin fəallığının daha da artırılmasına, öz potensiallarını ortaya qoymalarına geniş imkanlar açır. Prezident İlham Əliyevin sərəncamı ilə təsdiqlənən “Azərbaycan gəncliyi 2011-2015-ci illərdə Dövlət Proqramı”, Azərbaycan Respublikasının Gənclər və İdman Nazirliyi yanında Gənclər Fondunun yaradılması, “Gənclər üçün Prezident Mükafatı”nın təsis edilməsi və s kimi mühüm addımlar bir daha bu sahəyə diqqətin davamlı olduğunu göstərir. 23 ilə yaxın müstəqillik tarixinə malik olan ölkəmizdə ictimai fəal gənclərin 200-dən çox QHT-də birləşməsi də onlara göstərilən diqqət və qayğıdan irəli gəlir. Gənclərimiz onlara göstərilən etimadı əməli fəaliyyətləri ilə doğrultmağa çalışırlar. Təbii ki, etimad böyük məsuliyyət deməkdir. Bu gün hər bir Azərbaycan vətəndaşının, o cümlədən gənclərimizin əsas vəzifəsi günbəgün qüdrətlənən, möhkəmlənən, müasirləşən Azərbaycanın inkişafına dəstək olmaq, dövlətçiliyimizi qorumaq, ölkə reallıqlarının təbliğinə öz töhfəsini verməkdir. Etimad-məsuliyyət vəhdətliyi fonunda qarşıya qoyulan məqsədlərə yüksək səviyyədə nail olmağa çalışırıq.

- Hər bir ölkənin inkişafında elmin, təhsilin, yeni texnologiyaların rolu böyükdür. Elmin inkişafı, gənc alimlər nəslinin yetişdirilməsi dövlət siyasətinin əsas prioritetlərindəndir...

- Dövlət başçısı İlham Əliyevin sərəncamı ilə təsdiqlənən “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı” Azərbaycan gənclərinin intellektual səviyyəsinin artırılmasına, elmi biliklərə dərindən yiyələnmələrinə, dünyanın qabaqcıl ölkələrinin təcrübəsini öyrənib, ölkəmizdə tətbiqinə, eyni zamanda yeni texnologiyaların mənimsənilməsinə xidmət edir. Möhtərəm Prezidentimiz bildirir ki, neft-qaz Tanrıdan verilən böyük nemətdir. Biz bundan uğurla və məharətlə istifadə edirik. Amma gec-tez, bu təbii sərvətlər tükənəcək və bilik, zəka, səviyyə isə ölkəmizin dayanıqlı inkişafını uzun illər bundan sonra da təmin edəcəkdir. Ən yaxşı inkişaf etmiş ölkələrin təcrübəsinə baxsaq görərik ki, o ölkənin inkişafında ən aparıcı rol oynayan neft-qaz deyil, bilikdir, elmi-texniki tərəqqidir, yeni texnologiyalardır.

Dövlət başçısı İlham Əliyevin “neft kapitalını insan kapitalına çevirək” tezisi də bugünümüzün reallığıdır. Bu gün dünyanın elə nüfuzlu ali məktəbi yoxdur ki, oradan Azərbaycan gəncinin səsi gəlməsin. Bu günlərdə Bakıda gənc alimlərin Ümumdünya Forumu keçirildi. Dünyanın müxtəlif ölkələrindən ümumilikdə 400-dək gənc alimin iştirak etdiyi “Dünya elmində yeni çağırışlar: gənc alimlərin birgə yanaşmaları” mövzusunda Beynəlxalq Bakı Forumu gənc alimlərimizin potensial imkanlarına işıq saldı, bu əminlik ifadə edildi ki, Forum Azərbaycan tədqiqatçıları və alimlərinin dünya elminə inteqrasiyasını sürətləndirəcək və alim şəbəkələrinin işinə öz töhfəsini verəcək.

Həmçinin Elmin İnkişafı Fondunun, Bilik Fondunun yaradılması da bu sahənin inkişafına yönələn addımlardandır.

- Yəhya müəllim, “Həmrəy” Gənclərin Maarifləndirilməsinə Dəstək İctimai Birliyi hansı zərurətdən yaradıldı?

- Təbii ki, ən mühüm məqsədimiz gənclərin birliyinə, həmrəyliyinə nail olmaqdır. Biz gənclərin savadlı, dünyagörüşlü, müasir düşüncəli və yüksək intellektli aparıcı qüvvəyə çevrilməsinə, onların vətənpərvərlik ruhunda inkişafına, onlarda humanizm və tolerantlıq, ləyaqətlilik və mübarizlik kimi vicdani və əxlaqi keyfiyyətlərin formalaşmasına töhfə verməyi qarşımıza vəzifə qoymuşuq. Biz bu məqsədimizə çatmaq üçün gənclərin inkişafı ilə bağlı həyata keçirilən tədbirlərə dəstək verir, gənclərin bilik və bacarıqlarının artırılmasına yardım edir, onlara milli mənəvi dəyərləri aşılayır, sağlam həyat tərzini təbliğ edirik. Təbii ki, bu vəzifələrin yüksək səviyyədə həyata keçirilməsi üçün zəruri addımların atılması mütləqdir. Əsas devizimiz budur- “Həmrəy olaq ki, gələcək nəslə örnək olaq!, “Həmrəyliyimiz gələcəyimizin uğurudur!”

Birliyi yaratmaqda digər məqsədimiz gəncləri maarifləndirmə işinə öz töhfəmizi verməkdir. Qarşıdakı ildə ölkəmizi çox mühüm hadisə gözləyir. Bu, Avropa Olimpiya Oyunlarının Bakıda keçirilməsidir. Hər bir tədbirin ölkəmiz haqqında dolğun məlumatların əldə olunmasında mühüm amil olduğunu nəzərə alsaq, gənclərimizin bu istiqamətdə səylərini daha da artırmaları üçün maarifləndirmə işini daha da gücləndirməliyik. Ölkəmizin idman yarışlarında qələbəsi üçrəngli bayrağımızın yüksəklərdə dalğalanmasına, Azərbaycanın nüfuzunun daha da artmasına stimul verir. Biz Azərbaycan gəncləri qüdrətli Azərbaycanımızla qürur duyur, üzərimizə düşən vəzifələri lazımi səviyyədə yerinə yetirməyə çalışırıq. Ulu öndər Heydər Əliyevin “Gənclər Azərbaycanın gələcəyidir” tezisinin davamı olaraq Prezident İlham Əliyevin söylədiyi “Gənclərimizin əksəriyyəti böyük qürur hissi ilə deyə bilərlər ki, onlar artıq müstəqillik illərində formalaşmış nəslə mənsubdurlar.

“Həmrəy” yarandığı gündən qarşıya qoyduğu məqsədin gerçəkləşdirilməsi istiqamətində ciddi səylər göstərir, fəaliyyətini genişləndirir. Keçirdiyimiz tədbirlərin də sayı az deyil. Ölkəmiz üçün əlamətdar bayram günlərini yüksək səviyyədə qeyd edirik. Gənclər Fondunun elan etdiyi üçüncü qrant müsabiqəsinin qaliblərindən biri olmuşuq. Üç regionda- Qəbələ, Oğuz və Şəkidə təxminən 500-dən artıq gəncin iştirakı ilə “Region gənclərinin ictimai-siyasi fəallığının artırılması” adlı tədbir keçirmişik. Bu tədbirlər də maarifləndirici xarakter daşıyır. Xəzər Universiteti ilə xüsusi layihələr həyata keçirilib. Bakı Ali Neft Məktəbi ilə birgə təşkilatçılıq əsasında abuturiyentlərin psixoloji hazırlığına dair tədbir keçirilib. Naxçıvan Muxtar Respublikasının 90 illiyi ilə əlaqədar “Naxçıvan: Tarix, müasirlik və gənclik” mövzusunda geniş tədbir keçirilib. Təbii ki, hər bir tədbir öz mahiyyəti baxımından xüsusi əhəmiyyət kəsb edir. Müasir dövr informasiya-kommunikasiya texnologiyaları əsridir. Keçirilən tədbirlərin sosial şəbəkələrdə yayılmasına və fikir mübadiləsi aparılmasına səy göstəririk. Tədbirlərimiz davamlıdır. Siyəzən, Şabran, Xızı, Quba, Xaçmaz rayonlarında 1000-dən artıq gənci əhatə edən tədbirin keçirilməsi nəzərdə tutulub. Tədbirlər gənclərin malik olduqları potensialın ortaya qoylumasına öz müsbət təsirini göstərir.

-Siz eyni zamanda A.A. Bakıxanov adına Tarix İnstitutunun “Azərbaycan diasporu” şöbəsinin dissertantısınız. Azərbaycan gənci olaraq bu gün ölkə həqiqətlərinin təbliğində gənclərin rolunu necə görürsünüz?

- Dünyanın müxtəlif ölkələrində yaşayan soydaşlarımızın bir amal, ideya-azərbaycançılıq məfkurəsi ətrafında sıx birləşməsini qarşıya ən ümdə məqsəd kimi qoyan ulu öndər Heydər Əliyev dünya azərbaycanlılarına müraciətində bildirmişdir: “Biz istərdik ki, müxtəlif ölkələrdə yaşayan azərbaycanlılar həmin ölkələrin vətəndaşları kimi yaşasınlar. Ancaq heç vaxt öz milli köklərini, milli mənsubiyyətlərini itirməsinlər. Çünki bizi birləşdirən milli mənsubiyyətimizdir, tarixi köklərimizdir, milli-mənəvi dəyərlərimizdir. Vətənini, millətini sevən hər bir azərbaycanlı müstəqilliyimizin dönməzliyi üçün ciddi səy göstərməli, vətənimizin, respublikamızın taleyi hər bir soydaşımızın taleyi olmalıdır.”

Ulu öndər Heydər Əliyevin 1993-cü ildə xalqın təkidli tələbi ilə hakimiyyətə qayıdışından sonra xaricdə yaşayan azərbaycanlıların birliyi və təşklatlanması məsələsi dövlət siyasətinin əsas istiqamətlərindən birinə çevrilmiş və bu istiqamətdə mühüm addımlar atılmışdır. Dünyanın müxtəlif ölkələrində yaşayan soydaşlarımızın və həmvətənlərimizin müstəqil Azəbaycanla əlaqələrinin daha da möhkəmləndirilməsi, dünya azərbaycanlıları arasında mənəvi, siyasi birliyin və həmrəyliyin təmin olunması, Azərbaycan icmaları, cəmiyyət və birliklərinin fəaliyyətinin gücləndirilməsi və əlaqələndirilməsi ilə bağlı məsələlərin ətraflı müzakirə edilməsini nəzərə alaraq, 2001-ci ilin mayın 23-də imzalanan sərəncama əsasən həmin ilin noyabrın 9-10-da Bakıda Dünya azərbaycanlılarının I qurultayının keçirilməsi diaspor hərəkatının inkişafında yeni mərhələnin başlanğıcını qoydu. Ulu öndər Heydər Əliyevin siyasi kursunu uğurla davam etdirən cənab İlham Əliyevin təşəbbüsü ilə 2006-cı ilin martında Dünya azərbaycanlılarının II qurultayı, 2011-ci ilin iyulunda Dünya azərbaycanlılarının III qurultayı keçirildi. Azərbaycan reallıqlarının, həqiqətlərinin dünya ictimaiyyətinə çatdırılmasında diaspor təşkilatlarının üzərinə böyük məsuliyyət düşür. Bunun üçün onların birliyi vacib amil kimi önə çəkilir. Nəzərə alsaq ki, diaspor bir ölkənin xaricdə varlığı deməkdir, bu halda birliyi zərurətə çevirən səbəblər özünü daha qabarıq şəkildə büruzə verər. Müharibə şəraitində yaşayan ölkə olaraq həqiqətlərimizin təbliği, erməni yalanlarının ifşası istiqamətində daha səylə çalışmalıyıq. Dünyada Azərbaycana qarşı əks təbliğat kampaniyası aparan erməni diasporunun olduğunu unutmamalıyıq. Möhtərəm Prezidentimiz İlham Əliyev bildirir: “Birlik olmasa, biz güclü ola bilmərik. Bu aksiomadır. Ona görə hesab edirəm ki, diaspor təşkilatlarının fəaliyyətinin inkişafı üçün biz birliyi tam şəkildə təmin etməliyik.”

- Təsis etdiyiniz İctimai Birlik gənclərin həmrəyliyinə çağırış olmaqla yanaşı, eyni zamanda ölkədə QHT sektorunun inkişafına yaradılan şəraitin də göstəricilərindəndir. Bu gün ölkəmizdə üçüncü sektorun inkişafına göstərilən diqqəti necə dəyərləndirirsiniz?

- Ümumiyyətlə, demək istərdim ki, Azərbaycan QHT sektorunun inkişaf səviyyəsinə görə dünyaya örnəkdir. Prezident İlham Əliyevin müvafiq sərəncamı ilə “Azərbaycan Respublikasının qeyri-hökumət təşkilatlarına dövlət dəstəyi Konsepsiya”sının təsdiqlənməsi, bu sənədə uyğun olaraq QHT-lərə Dövlət Dəstəyi Şurasının yaradılması da buna bariz nümunədir. Ölkəmizdə 4 mindən artıq QHT fəaliyyət göstərir. Bu, demokratik şəraitin lazımi səviyyədə mövcudluğundan irəli gəlir. Bu fakt eyni zamanda onu göstərir ki, vətəndaş cəmiyyətinin inkişafı prioritet məsələdir. Gənclər təşkilatı olduğu üçün daha çox Gənclər Fondu ilə işləməyə üstünlük veririk. İnanıram ki, yaxın gələcəkdə QHT-lərə Dəstək Şurasına müraciət edəcək və çox uğurlu əməkdaşlığımız yaranacaq.

- Təbii ki, uğurlu başlanğıc növbəti uğurlar üçün açar rolunu oynayır. İctimai Birliyin yaradılmasından ötən qısa müddət-bir il sizdə gələcək fəaliyyətinizlə bağlı hansı təəssüratı yaradır?

-Birliyimizin məqsədi, məramı var, bu məqsədə doğru daim irəliləyəcəyik. Əminəm ki, ölkədə gənclərə göstərilən diqqət və qayğı fonunda biz də üzərimizə düşən vəzifəni layiqincə yerinə yetirəcəyik. Çalışacağıq ki, ulu öndər Heydər Əliyevin siyasi xəttinə sadiq olaq. Bu yol Azərbaycanı, Azərbaycanımızın gələcəyi olan gənclərimizi işıqlı, parlaq gələcəyə aparır. Möhtərəm Prezidentimiz İlham Əliyev ulu öndər Heydər Əliyevin siyasi xəttini uğurla davam etdirir. Gənclərimizin qarşısında böyük vəzifələr qoyulub. Biz çalışacağıq ki, o vəzifələrin yerinə yetirilməsində ön sıralarda gedək, gənclərimizin həmrəy olmasına nail olaq. Azərbaycan deyəndə hər bir gənc iftixar hissi keçirməli, azərbaycanlı olması ilə qürur duymalıdır. Dövlətçiliyimizin, milli dəyərlərimizin, mədəniyyətimizin, tariximizin qorunmasına və inkişafına səy göstərməliyik.

Bu gün ölkəmizin yeganə problemi Ermənistan-Azərbaycan, Dağlıq Qarabağ münaqişəsidir. Problemin mahiyyəti, erməni yalanları sosial şəbəkələrdə öz əksini tapmalıdır. Ərazilərimizin işğal tarixləri var. Bu tarixlər hər gün yad olunmalıdır. Dövlət başçısı İlham Əliyevin qeyd etidyi kimi, təbliğat gündəlik işimiz olmalıdır. Gənclərimiz göstərilən etimada sədaqətlə xidmət etməlidirlər.

Yeganə Əliyeva

İki sahil.- 2014.- 21 iyun.- S.15.