Xətai rayonunda inkişafın yeni mənzərəsi

Bu gün respublikanın bütün bölgələrində aparılan yenidənqurma, abadlıq və tikinti quruculuq işləri paytaxt Bakıda və onun ətraf qəsəbələrində geniş vüsət almışdır. Ölkəmizdə iqtisadi və digər sahələrdə əldə olunmuş nailiyyətlərdə Bakı şəhərinin və onun rayonlarının müstəsna rolu var. Bu sırada Bakı şəhərinin aparıcı rayonlarından birinə çevrilmiş Xətai rayonu xüsusi yer tutur. 2013-cü ilin yekunlarına görə rayon iqtisadiyyatının əsasını təşkil edən sənaye dinamik inkişaf etmiş, 2012-ci illə müqayisədə 12,4 faiz çox məhsull istehsal olunmuş və xidmətlər göstərilmişdir. Bu müddətdə parakəndə əmtəə dövriyyəsi 9,3 faiz, pullu xidmətlərin həcmi isə 6,3 faiz artmışdır.

Hesabat dövründə rayonun tikinti kompleksində iqtisadi və sosial sahələrin inkişafı üçün bütün mənbələr hesabına 327 milyon 470,2 min manat məbləğində investisiyadan istifadə olunmuş, əhaliyə, müəssisə və təşkilatlara 110 milyon 796,5 min manatlıq rabitə xidməti göstərilmiş, nəqliyyat xidməti 13,8 faiz artmışdır.

Rayonun iqtisadi və sosial sahələrində muzdla işləyənlərin orta aylıq əmək haqqı 2,6 faiz çoxalaraq 559,8 manata çatmış, bu göstərici sənayedə 8,3 faiz, tikinti kompleksində 3,9 faiz, nəqliyatda isə 4,3 faiz artmışdır. Sənaye məhsullarının istehsalında qeyri dövlət sektorunun payı da əvvəlki illə müqayisədə 0,6 faiz artmış, istehlak bazarında da müsbət irəliləyişlər əldə edilmişdir. Hesabat dövründə rayon əhalisinə 1milyard 265 milyon 777.2 min manatlıq və ya əvvəlki ilin eyni dövründəkindən 8.5 faiz çox geniş çeşidli istehlak malları satılmış və pullu xidmətlər göstərilmişdir. Əhaliyə göstərilən iaşə xidməti 5,5 faiz, məişət xidməti isə 7,0 faiz artmışdır.

Ölkəmizdə sahibkarlığın inkişaf etdirilməsi üçün hüquqi bazanın möhkəmləndirilməsi, dövlət tərəfindən hərtərəfli dəstəyin verilməsi. Azərbaycan Respublikasının Prezidenti cənab İlham Əliyevin müəyyən etdiyi iqtisadi siyasətin əsas istiqamətlərindəndir. Respublikamızın hər yerində olduğu kimi rayonumuzda da sahibkarlığın dəstəklənməsi və inkişafı başlıca məqsədlərimizdən biri olmuş, onlara yaradılmış şəraitin nəticəsində keçən il hamısı daimi olmaqla rayonumuzda 4554 yeni iş yeri, 2003-cü ilin oktyabrından indiyə kimi isə 33246 yeni iş yeri yaradılmışdır ki, bunun da 33040-ı daimi iş yerləridir.

Rayonda əmək ehtiyatlarından düzgün və səmərəli istifadə olunması məqsədilə işləməyən əhalinin uçotunun aparılması, keçirilən əmək yarmarkalarının səmərəliliyinin artırılması məqsədilə müəyyən işlər görülmüş, rayon Məşğulluq Mərkəzinə müraciət etmiş 1185 nəfər vətəndaşlardan 1121 nəfəri qanunvericiliyə uyğun olaraq işaxtaran vətəndaş kimi qeydiyyatdan keçmiş və 537 nəfər daimi işlə təmin olunmuşdur.

Hesabat dövründə Ünvanlı Sosial Yardımla bağlı 3722 müraciət daxil olmuş, araşdırmalar nəticəsində 3426 ailəyə,yəni 14726 nəfərə bu yardım təyin edilmişdir. Bir ailəyə düşən orta aylıq yardım məbləği 137,56 manat təşkil etməklə ayda 471285 manat ödənilir. 2013-cü ildə əmək pensiyaçılarının ümumi sayı rayon üzrə 36423 nəfər olmuş, 1512 nəfərə yeni pensiya təyinatı aparılmışdır.

Cənab Prezidentin həyata keçirdiyi düzgün, uzaqgörən, uğurlu sosial-iqtisadsi siyasət və uğurla icra olunan layihələr nəticəsində Bakı şəhərinin və eləcə də respublikamızın regionlarının görkəminin tam dəyişməsi davam etdirilir. Bu dəyişiklik bizim rayonumuzdan da yan keçməmişdir.

Rayonumuzda Bakı Ağ şəhər layihəsinin icrası hesabat dövründə sürətlə aparılmış, Xocalı prospektindəki İş Mərkəzində, Nobel prospektindəki “Yeni həyat” yaşayış kompleksində, Belarus səfirliyinin binasının tikintisində işlər başa çatdırılmışdır. Boks Federasiyasının tikintisi davam etdirilmiş, Neapol dairəsində şəhidlərin abidə kompleksində yenidən qurma işləri başa çatdırılmışdır. Abadlaşdırma layihələri çərçivəsində Nobel prospekti, Fəzail Bayramov və A.Cəlilov küçələri boyunca yaşayış binalarının fasadlarının üzlənməsi davam etdirilmiş, binaların işıqlandırma işləri başa çatdırılmışdır. Bu ünvanlardakı binalarının yararsız vəziyyətdə olan dam örtüklərinin yeni mansard tipli dam örtükləri ilə əvəz olunması işləri yekunlaşmışdır.

Rayonda ekoloji vəziyyətin yaxşılaşdırılmasının əhəmiyyəti nəzərə alınaraq yaşıllıq sahələrinin genişləndirilməsi üçün ayrıca proqram hazırlanmışdır. Həmin proqramla Zığ yolu-Nobel prospekti boyunca relyefə uyğun 100 min kvm-dən çox ərazidə yaşıllıq massivləri salınmış, suvarma sistemləri quraşdırılmış, artezian quyuları istismara verilmişdir. Səkilərə isə 12 min kvm-dən artıq müasir döşəmə plitələri döşənmişdir.

Hər il cənab Prezidentin iştirakı ilə ümumrespublika tədbirinin keçirildiyi Xocalı prospektində də yüksək səviyyədə abadlaşdırma işləri aparılmış, Türkiyə Respublikasından gətirilmiş 140 mindən çox gül və ağacların bir qismi buradakı park-xiyabana, digər hissəsi isə Rahib Məmmədov küçəsində yeni tikilmiş və cənab Prezident İlham Əliyevin açılşında iştirak etdiyi parkda və digər ərazilərdə əkilmişdir. Yeni tikilən bu parkdakı fəvvarələr kompleksi, şəlalə, uşaq əyləncə elementləri və qurğuları, digər sosial obyektlər bu parkı uşaqların ən sevimli yerinə çevirmişdir.

Hesabat dövründə Xəzər Dəniz Gəmiçiliyinin Gəmi Təmiri zavodunun və 1 saylı Çörək zavodunun tikintisi başa çatdırılmış, müasir üslubda tikilən və ən son avadanlıqlarla təchiz olunan hər iki zavodun açılışında Möhtərəm cənab Prezident iştirak etmişdir. Keçən ilin may ayında Vətəndaşlara Xidmət və Sosial İnnovasiyalar üzrə Dövlət Agentliyinin 2 saylı Bakı “ASAN xidmət” mərkəzi fəaliyyətə başlamış, xidmətin açılış mərasimində ölkə rəhbəri iştirak etmişdir. Bu gün rayon sakinləri bu xidmətdən asanlıqla istifadə edirlər.

Son illər Bakı şəhərində və regionlarda yeni sosial və infrastruktur layihələrin tətbiqi geniş vüsət almışdır. Belə layihələr sırasında Milli parkın genişləndirilməsi və Ağ şəhər layihələri də vardır. Keçən ilin may ayının sonlarında Bakı Ağ şəhər layihəsi çərçivəsində Milli parkın ikinci mərhələsinin təməlqoyma mərasimində iştirak edən cənab Prezident az bir vaxtdan sonra bu ərazilərin tanınmaz dərəcədə dəyişəcəyini, burada insanların istirahəti üçün hərtərəfli şərait yaradılacağını diqqətə çatdırmışdır. Artıq rayonumuzun bu ərazisində qızğın iş gedir və yaxın gələcəkdə layihədə nəzərdə tutulan digər tikililərin də inşasına başlanacaq.

Rayonun ərazisində həyata keçirilən belə böyük layihələrdə rayon İcra Hakimiyyəti də yaxından iştirak edir və müvafiq sərəncamla yaradılmış komissiya qısa müddətdə bu ərazidə yaşayan ailələrə və məcburi köçkünlərə müvafiq təzminatlar və birdəfəlik maddi yardımlar ödənilməklə onların ərazidən köçürülməsini təmin etmişdir.

Rayon ərazisindəki qəzalı vəziyyətdə olan binalarda yaşayan sakinlərin təhlükəsizliyinin təminatı da Rayon İcra Hakimiyyətinin diqqətində olmuşdur. Belə ki, müraciətimiz əsasında Nazirlər Kabineti müvafiq sərəncamlar qəbul etmiş və həmin sərəncamlarla Cavanşir küçəsi 36 və 38 ünvanlardakı iki ədəd 5 mərtəbəli yataqxana binasında yaşayan və məskunlaşan 288 ailənin hər birinə birdəfəlik maddi yardım ödənilməklə köçürülməsi və hər iki binanın sökülməsi prosesi başa çatdırılmışdır.

Bakı Şəhər İcra Hakimiyyəti başçısının keçən ilki 225 saylı sərəncamının icrası ilə əlaqədar da rayon İcra Hakimiyyətinin müvafiq sərəncamıı ilə yaradılan komissiya rayonun Babək prospekti, Xəqani Rüstəmov, Süleyman Vəzirov, Yavər Əliyev küçələrinin əhatəsində və Nobel prospekti ilə Xəzər Dənizi arasında yerləşən yaşayış və qeyri-yaşayış sahələrinin köçürülməsi işlərinin həyata keçirilməsinə başlamışdır. Ötən müddətdə ilkin mərhələdə sökülməsi nəzərdə tutulan Turşu küçəsindəki 229 ədəd mənzillərdən və fərdi yaşayış evlərindən 228-də sakinlərlə qarşılıqlı razılaşma əsasında əvvəlcədən təzminat ödənilməklə ərazidən köçürüldükdən sonra söküntü işləri aparılmışdır.

“2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı”na və ona edilmiş əlavələrə, həmçinin digər investisiya proqramlarına uyğun işlər davam etdirilmişdir. Bu Proqramla rayonda əsaslı təmiri nəzərdə tutulmuş 28 məktəbdən 21-də əsaslı təmir və tikinti işləri başa çatdırılmış, 194 nömrəli məktəbin binasının inşası, 63 saylı məktəbdə əlavə tədris korpusunun tikintisi, 48 və 56 saylı məktəblərin və 171 saylı orta məktəbdə yeməkxana və akt zalının təmiri işləri aparılır.

Tədris ilinin başlanması ərəfəsində Dövlət Proqramı çərçivəsində əsaslı təmirdən sonra 249 və 138 saylı tam orta məktəblərin açılış mərasimində cənab Prezident İlham Əliyev iştirak etmiş, görülən işlərin keyfiyyətindən razı qalmışdır. Keçən il əsaslı təmir olunmuş 221 və 165 saylı tam orta məktəblərdə, həmçinin yenidən inşa olunmuş 55 saylı tam orta məktəbdə, 287 saylı Zəkalar Liseyinin yeni tikilmiş tədris korpusunda yaradılan şəraitə görədə cənab Prezidentə minnətdarıq. Dövlət Proqramı ilə rayonumuzdakı uşaq bağçaları da əsaslı təmir olunur. Keçən il 8 və 315 saylı uşaq bağçalarının əsaslı təmirdən sonra açılışında Heydər Əliyev Fondunun prezidenti Mehriban xanım Əliyeva iştirak etmişdir.

Vaxtı ilə uşaq baxçası kimi fəaliyyətə başlamış, sonralar təyinatı dəyişmiş və yararsız vəziyyətdə olan bina Heydər Əliyev fondu tərəfindən sökülərək yerində ümumu sahəsi isə 5300 kvm olan və ən müasir avadanlıqlarla təchiz olunmuş yeni uşaq bağçası tikilmişdir. Akademik Zərifə xanım Əliyevanın adını daşıyan və respublikamızda analoqu olmayan bu uşaq bağçasının açılış mərasimində Heydər Əliyev Fondunun prezidenti Mehriban xanım Əliyeva iştirak etmişdir. Dövlət Proqramı ilə rayonumuzdakı 5 səhiyyə müəssisəsi əsaslı təmir olunmuş, Əhmədli qəsəbəsindəki 14 saylı poliklinika və 2 saylı vərəm dispanseri isə sökülərək yerində müasirləri tikilmişdir. Digər investisiya proqramları ilə də rayonumuzun səhiyyə müəssisələrinin əsaslı təmiri aparılmışdır.

Yeni tikilmiş və ya əsaslı təmir olunmuş bütün təhsil və səhiyyə müəssisələrinin,uşaq bağçalarının maddi-texniki bazaları yaxşılaşdırılmış, bu günkü tələbata cavab verən ən müasir avadanlıqlarla,informasiya-kommunikasiya texnologiyaları ilə təchiz olunmuşdur. Rayonda fəaliyyət göstərən 9 tam orta məktəbin,4 uşaq bağçasının, 1 uşaq evinin və 1 Peşə liseyinin əsaslı təmiri 2014-2016-cı illərin Dövlət Proqramına daxil edilmişdir.

Rayon ərazisində bir qəsəbə və dörd sahə inzibati ərazi dairəsi üzrə nümayəndəlik fəaliyyət göstərir. Həmin nümayəndəliklərdə keçirilmiş hesabat yığıncaqlarında da qeyd olunduğu kimi yeni yaradılmış nümayəndəliklərdə idarəetmənin ilkin təzahürləri formalaşmış, ev təsərüfatının uçotunun aparılması işləri davam etdirilmiş, ərazilərində fəaliyyət göstərən idarə, müəssisə və təşkilatlarla, özəl strukturlarla əlaqəli fəaliyyətlərinə səy göstərmiş, onlarla işin səmərəli təşkilini təmin etmək üçün operativ idarəetmə mərkəzi yaradılmışdır. Xətai və Əhmədli bələdiyyələri ilə birgə fəaliyyət planı əsasında iş aparılmış, bələdiyyələrlə işin təşkili ilə bağlı əlaqələndirmə şurasının fəaliyyəti yaxşılaşdırılmışdır.

Keçən ilin ölkəmizin ictimai-siyasi həyatının ən mühüm hadisəsi Azərbaycan Respublikası Prezidentinin seçkiləri olmuşdur. Azərbaycan xalqı bu seçkilərdə də ümummilli lider Heydər Əliyevin siyasi kursunu layiqincə davam etdirən cənab Prezident İlham Əliyevin uğurla apardığı real siyasətə,onun gördüyü real işlərə öz səsini verdi. Azərbaycan Respublikasının Prezidenti cənab İlham Əliyev seçkilərdə uğurlu qələbə qazandı.

Rayonda təhsil, səhiyyə və mədəniyyət sahəsində də yüksək nəticələrə nail olunmuşdur. 2013-cü il də məzunlarımızın 90.24 faizi ali məktəblərə qəbul üçün sənəd vermiş və 66.98 faizi yaxşı nəticə göstərərək ali məktəblərə qəbul olmuşdur. Ali məktəblərə qəbul olanların 277 nəfəri 500-650 və 28 nəfər 650-700 bala qədər toplamışlar. Rayonumuzda ali məktəblərə qəbul Bakı şəhəri üzrə göstəricidən 10,34 faiz yüksək olmuşdur. 98saylı tam orta məktəbin məzunu Müslümov Osman Hüseyn oğlu 700 bal toplayaraq Azərbaycan Tibb Universitetinə daxil olmuşdur. 650 baldan yuxarı bal toplamış məzunlar rayonumuzun 16 məktəbinin yetirmələridirlər. Tədris ilində 11 məzunumuz məktəbi qızıl medalla bitirmiş, məzunlarımızdan 77 nəfəri dünyanın müxtəlif Universitetlərinə qəbul olmuşlar. 5 məzun tələbəmiz Prezident təqaüdünə layiq görülmüş, 6 müəllimimiz ilin “Ən yaxşı müəllim”i, 5 məktəbimiz isə ilin “Ən yaxşı məktəb”i müsabiqəsinin qalibi olmuşdur. Hesabat dövründə yüksək nəticələr əldə edən tələbələrlə və rayonumuzun bir qrup qabaqcıl pedoqoji işçiləri ilə Rayon İcra Hakimiyyətində keçirilmiş görüşdə onlara fəxri fərmanlar, digər qiymətli hədiyyələr verilmişdir. Keçirilən həmin görüşdə səsləndiyi kimi təhsil sahəsində də əldə etdiyimiz bu nailiyyətlər şübhəsiz ki, bizi sevindirir və yeni uğurlara ruhlandırır.

Rayondakı mənzil-kommunal obyektlərinin istismarındakı vəziyyətin yaxşılaşdırılması da icra olunan layihələr çərçivəsində həyata keçirilir. Nobel 5 ünvanda inşa olunmuş modul tipli istilik qazanxanası bu ərazidə 20 ildən artıq müddətdə istilik almayan 18 çox mərtəbəli binanın istilik təchizatını təmin etmiş, N.Tusi 31 ünvanda müasir tipli yeni istilik qazanxanasının istismara verilməsi ətrafdakı obyektlərin və yaşayış binalarının istilik təminatını yaxşılaşdırmışdır.

İ.İsmayılov, Şıxlinski və Mehmandarov küçələrində 8 istilik məntəqəsinin qazanxanaya çevrilməsi isə sürüşmə meyilliyinin müşahidə olunması ilə əlaqədar istilik təminatı dayandırılmış uşaq bağçalarının, səhiyyə müəssisəsinin və 91 yaşayış binasının istilik sisteminin bərpa olunmasına imkan vermişdir. İstismar müddəti başa çatmış liftlərin yeniləri ilə əvəz olunması istiqamətində də işlər aparılır. Keçən il 693 lift yenisi ilə əvəz olunmuş, 192 liftdə isə əsaslı təmir işləri aparılmışdır. Rayonun sanitar təmizliyi də gündəlik fəaliyyətimizin əsasını təşkil etmişdir. Mərkəzi küçə və prospektlərdən küçə ticarətinin ləğv edilməsi, rayon ərazisində keçirilən kənd təsərrüfatı məhsullarının satış yarmarkalarının təşkili daim nəzarətdə saxlanılmış, burada sanitar təmizliyə, qiymət intizamına nəzarət gücləndirilmişdir.

Hesabat dövründə qaçqın və məcburi köçkünlərin həyat şəraitinin yaxşılaşdırılmasına diqqət artırılmış, Rayon İcra Hakimiyyətinin nəzdində fəaliyyət göstərən digər komissiyaların işi də xeyli yaxşılaşdırılmışdır. Vətəndaşların yazılı və şifahi şəkildə təkliflər vermək, ərizə ilə müraciət etmək hüquqlarının həyata keçirilməsi üçün zəruri şərait yaradılaraq, qanunvericiliklə müəyyən edilmiş qaydada və müddətlərdə onlara cavab verilməsi təmin olunmuş, vətəndaşların mütəmadi qəbulu təşkil edilmiş, səyyar görüş-qəbullara daha çox üstünlük verilmişdir. Vətəndaşların müraciətlərinin təkmilləşdirilməsində elektron müraciətlərin əhəmiyyətini nəzərə alaraq Rayon İcra Hakimiyyətinin internet saytı hesabat dövründə də fəaliyyətini davam etdirmişdir.

Rayonda sağlam mühitin yaradılması, vətəndaşların müraciətləri zamanı süründürməçilik və digər xoşagəlməz hallara yol verilməməsi, dövlət qulluqçusunun etik davranış qaydalarına ciddi riayət etmələri üçün tədbirlər görülmüş, hər bir müşavirədə deyildiyi kimi korrupsiya ilə mübarizə sahəsində effektli mübarizə tədbirləri həyata keçirilmiş, bütün rəhbər işçilərə kollektivlərində hər hansı neqativ halın baş verməməsi üçün ciddi tapşırıqlar verilmişdir.

Nail Rəhimzadə

İki sahil.- 2014.- 4 mart.- S.12-13.