Qaradağ gəncləri

narkomaniyaya yox deyir!

Azərbaycan Respublikası XX əsrin sonlarında yenidən əldə etdiyi müstəqillik illərinin başlanğıcında çox böyük çətinliklərlə qarşılaşmış, vətəndaş müharibəsi təhlükəsilə üzləşmiş, ölkədə hərc-mərclik hökm sürməyə başlamışdı. Cəmiyyət iqtisadi və siyasi böhranlar astanasında, hakimiyyətsizlik burulğanında boğulurdu. Bütün bunlar yenidən qazandığımız müstəqilliyimizi itirmək təhlükəsi yaradırdı. Azərbaycan xalqının təkidi ilə ulu öndər Heydər Əliyevin hakimiyyətə qayıdışı dövlətimizi məhv olmaq, dağılmaq məngənəsindən xilas etdi və yeni inkişaf mərhələsinin əsası qoyuldu.

Ölkədə aparılan əsaslı demokratik islahatlar həyatımızın bütün sahələrində öz müsbət nəticələrini göstərir. Bu illər ərzində respublikamızın beynəlxalq aləmə inteqrasiyası və dünyada gedən qloballaşma prosesləri fonunda xalqımızın milli-mənəvi dəyərlərinin qorunub saxlanılması və inkişaf etdirilməsi müstəqil dövlət quruculuğu işində daha çox diqqət yetirilən sahələrdən biri olmuşdur. Bu baxımdan cəmiyyətin inkişafına, insanların sağlamlığına, mənəviyyatına, xalqımızın genefonduna ağır zərbə vuran narkomaniyanın gətirəcəyi fəsadlar hər kəsi narahat etməyə başlamış və onunla mübarizə işi Azərbaycan dövlətinin ümummilli siyasətinin əsas tərkib hissəsinə çevrilmişdir.

Azərbaycan Respublikasının 1992-ci ildə BMT-nin “Narkotik vasitələrin və psixotrop maddələrin qanunsuz dövriyyəsinə qarşı mübarizə haqqında” 1988-ci il Konvensiyasına, 1998-ci ildə isə “Narkotik vasitələr haqqında” 1961-ci il Vahid Konvensiyasına və “Psixotrop maddələr haqqında” 1971-ci il Konvensiyasına qoşulması, eyni zamanda 18 iyun 1999-cu il tarixində “Narkotik vasitələrin, psixotrop maddələrin və prekursorların qanunsuz dövriyyəsi ilə mübarizə haqqında” Azərbaycan Respublikasının Qanununu qəbul etməsi prinsipial əhəmiyyət kəsb edir.

Ulu öndər Heydər Əliyev öz nitqində “Biz narkomaniyanı, narkotik maddələrdən qanunsuz istifadə olunmasını, onların ölkəmizdə yayılmasının, cəmiyyətimizin, xalqımızın bu günü və gələcəyi üçün təhlükəli hal hesab edirik. Ona görə də bunlara qarşı mübarizə aparmağı dövlət orqanlarının əsas vəzifələrindən biri sayıram” deməklə bu məsələyə dövlətin xüsusi əhəmiyyət verdiyini vurğulamışdır. Azərbaycan Respublikası Prezidentinin 26 avqust 1996-ci il 485 nömrəli Fərmanı ilə Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyası yaradılmışdır. Həmin Fərman əsasında “Azərbaycan Respublikasında 2000-ci ilədək” daha sonra isə “2000-2006-ci ilədək narkomanlığın yayılmasına, narkotik vasitələrin və psixotrop maddələrin qeyri-qanuni dövriyyəsinə qarşı mübarizə üzrə” qəbul edilmiş Ümummilli Proqramlar ölkəmizdə narkomanlığa və narkotik vasitələrin qanunsuz dövriyyəsinə qarşı mübarizə işinin təşkilinə xüsusi təkan vermişdir.

Müasir dünyamızın ən ağrılı problemlərindən biri olan narkomaniyanın yayılması, xüsusilə gənclərin buna aludəçiliyi bütün sivil ölkələrdə olduğu kimi Azərbaycanda da ciddi narahatlıq doğurur. Ona görə də heç təsadüfi deyildir ki, ölkəmizdə həyata keçirilən gənclər siyasətinin prioritet istiqamətlərindən biri - yeniyetmə və gənclər arasında sağlam həyat tərzinin bərqarar olması, idman və bədən tərbiyəsinin geniş inkişafı, cinayətkarlığın, xüsusilə onun narkomaniya ilə bağlı növlərinin profilaktıkasıdır. Məhz bu siyasət çərçivəsində gənclərlə işin təşkilinin qanunvericilik bazası yaradılmış və təkmilləşdirilmiş, onların məşğulluğunun təmini məqsədilə ölkəmizdə mövcud idman obyektləri yenidən qurulmuş, təzələri tikilib istifadəyə verilmiş və idmançılar üçün bütün şərait yaradılmışdır.

Bütün bunlara baxmayaraq narkomaniya ilə mübarizə hər zaman aktual olmuşdur. Bəs narkomaniya nədir? Narkomaniya psixi və fiziki asılılıq yaradan xəstəlikdir. Narkotik vasitələrdən istifadə edən şəxslər gücdən düşür, zəifləyir, öz iradəsini, insani hisslərini itirir, ailə üzvlərindən və getdikcə cəmiyyətdən uzaqlaşır. Müasir dünyamız inkişaf etdikcə narkotik vasitələrdən istifadə edənlərin də yaşı cavanlaşır, xüsusilə məktəb yaşlı uşaqlar arasında geniş yayılır. Gənclərin narkomaniyaya qurşanması onların təhsildən kənarlaşmasına, ətraflarındakı insanlara daha çox cinayətkar simasının aşılanmasına və ən əsası sağlamlıqlarının zərbə altında qalmasına səbəb olur. Bütün bunun fonunda demək olar ki, narkomaniyaya qarşı mübarizə yalnız dövlətin işi deyil eləcə də cəmiyyətimizin və dövlətimizin təməlini formalaşdıran hər bir ailənin - valideynin işidir. Məktəb yaşlı uşaqlara daim valideyn nəzarəti olmalı, onların asudə vaxtlarını səmərəli və faydalı keçirmələri üçün onlara istiqamət verilməlidir. Çox acınacaqlı hal odur ki, bu gün narkomaniya qadınlar arasında da geniş yayılmaqdadır. Bu isə öz növbəsində, bugünün qadını sabahınsa anası olacaq, prinsipilə baxsaq cəmiyyətimizə çox ciddi və narahatlıq doğuran bir işarədir. Çünki sağlam cəmiyyətin və dövlətin təməlini sağlam ailələr təşkil edir.

Bu gün Qaradağ rayonunda da narkomaniyaya qarşı geniş, səmərəli və maarifləndirici işlər görülməkdədir. Azərbaycan Respublikasının Prezidenti cənab İlham Əliyevin 28 iyun 2007-ci il tarixli 2271 saylı Sərəncamı ilə “Narkotik vasitələrin, psixotrop maddələrin və prekursorların qanunsuz dövriyyəsi və narkomanlığın yayılmasına qarşı mübarizə üzrə” Dövlət Proqramı təsdiq olunmuşdur. Həmin Proqramın icrası ilə bağlı Qaradağ Rayon İcra Hakimiyyəti başçısının sərəncamı ilə “Narkomanlığa və narkotik vasitələrin qanunsuz dövriyyəsinə qarşı mübarizə üzrə rayon komissiyası” yaradılmış və təsdiq olunmuş tədbirlər planı komissiya tərəfindən yerinə yetirilməkdədir.

Bu günə kimi komissiya tərəfindən Qaradağ rayonunun bütün qəsəbələrində “İİV-İnsanın immunçatışmamazlığının virusudur”, “Azərbaycan gəncləri narkotik əleyhinə”, “Narkomanlıq və onun fəsadları”, “Zərərli vərdişlərdən qorun” kimi mövzularda elmi-praktik konfranslar, dəyirmi masalar təşkil edilmişdir. Hər il məktəblilər, yeniyetmə və gənclər arasında “Biz narkotiklərə yox deyirik”, “Gənclər narkomanlığa qarşı”, “Uşaqlarımızın hüquqlarını qoruyaq” və bu kimi mövzularda rəsm, inşa yazı müsabiqələri və ədəbi-bədii kompozisiya keçirilir. Hər tədbirin əvvəlində narkomaniyanın yaratdığı ağır fəsadları göstərən video-çarx nümayiş olunur və broşürlər paylanır. Təşkil olunan tədbirlərdə yeniyetmə və gənclərin narkomaniya kimi zərərli vərdişlərdən çəkindirilməsinə, onlar arasında sağlam həyat tərzinin formalaşmasına diqqət yetirilmiş və onların da bu barədə fikirləri öyrənilmişdir. Bundan əlavə Ə.Əmirov adına mədəniyyət sarayında “Narkomanlıq XXI əsrin bəlasıdır” mövzusunda tədbir keçirildi və “Bəla” tamaşası səhnədə nümayiş olundu.

Əlbəttə, bu gün müstəqil dövlətimizin gələcəyi olan gənc nəslin hərtərəfli inkişaf etdirilməsi, onların sağlam düşüncəli, vətənpərvər gənclər kimi yetişməsi üçün hər bir dövlət orqanı, hər bir Azərbaycan vətəndaşı əlindən gələni əsirgəməməlidir. Azərbaycan xalqının qədim tarixi və mədəni irsinə, əxlaqi keyfiyyətlərinə sadiq qalaraq narkomaniyaya qarşı birlikdə mübarizə aparmalıyıq. Hər birimiz çalışmalıyıq ki, narkotikaya qurşanan vətəndaşımızı itirməyək, əksinə onu sağlam şəkildə cəmiyyətimizə yenidən qaytaraq.

Eldar Sadıqov,

Qaradağ Rayon İcra Hakimiyyəti başçısı

aparatının İnformasiya təminatı

və təhlil sektorunun müdiri

İki sahil.- 2014.- 15 mart.- S.14.