“Sənayedə qaynaq istehsalı üzrə

yeni texnologiyalar və materiallar”

ARDNŞ-in Təlim, Tədris və Sertifikatlaşdırma İdarəsinin Qobustan Regional Təlim Mərkəzində bu mövzuda seminar keçirildi

Martın 18-də Azərbaycan Respublikası Dövlət Neft Şirkətinin (ARDNŞ) Təlim, Tədris və Sertifikatlaşdırma İdarəsinin Qobustan Regional Təlim Mərkəzində “Sənayedə qaynaq istehsalı üzrə yeni texnologiyalar və materiallar” mövzusunda seminar keçirildi. Tədbirdə Azərbaycan, Türkiyə, Almaniya, İngiltərə və Rusiya mütəxəssisləri iştirak edirdilər.

Mərasimdə çıxış edən ARDNŞ-in kadr, rejim və informasiya texnologiyaları üzrə vitse-prezidenti Xalik Məmmədov bildirdi ki, Azərbaycan neftin hələ kustar üsulla çıxarıldığı zamanlardan neft diyarı kimi tanınıb, sonradan Bakı neftçilərinin sənayedə tətbiq etdikləri mütərəqqi yeniliklər dünya praktikasında geniş yayılıb. Neftin ilk dəfə sənaye üsulu ilə çıxarılması, emal olunması, tankerlərlə, dəmir yolu ilə, boru kəmərləri ilə nəql edilməsi, sahildə, açıq dənizdə, Xəzərin dərinsulu hissələrində neft yataqlarının kəşfiyyatına və istismarına Azərbaycanda başlanılıb.

X.Məmmədovun sözlərinə görə, neft-qaz sənayesi Azərbaycanın bugünkü yüksəlişində, müstəqil dövlətimizin transformasiyası proseslərində böyük rol oynayıb: “Ümummilli lider Heydər Əliyev ötən əsrin sonlarında müstəqilliyini yeni qazanmış respublikanın enerji strategiyasını işləyib hazırladı və xaricdən, daxildən göstərilən siyasi, iqtisadi təzyiqlərə, hərbi təcavüzə baxmayaraq 1994-cü ildə transmilli neft şirkətləri ilə “Əsrin müqavilə”sinin imzalanmasına nail oldu. Xəzər dənizi hövzəsinin enerji ehtiyatlarını ilk dəfə olaraq bütün dünyaya açdı, bununla da dünyanın enerji xəritəsini dəyişmiş həmin strategiya çərçivəsində regional və qlobal əhəmiyyətli iri neft-qaz layihələri həyata keçirildi. Ötən ilin sonlarında isə Prezident cənab İlham Əliyevin rəhbərliyi altında Avropa Birliyi ilə 5 il ərzində davam etmiş danışıqlar prosesi uğurla nəticələndi və Xəzərin Azərbaycan sektorunda yerləşən “Şahdəniz” yatağının işlənilməsinin 2-ci mərhələsi üzrə yekun investisiya qərarı imzalandı. Möhtərəm Prezidentimiz bu müqaviləni “XXI əsrin müqaviləsi” adlandırıb.”

X.Məmmədov bildirdi ki, Bakı davamlı inkişaf yolunda sürətli templərlə irəliyə doğru addımlayan Azərbaycanın yeni simasını əks etdirir: “Ölkəmizdə neft gəlirləri xalqın rifahı naminə, iqtisadiyyatın şaxələndirilməsi, enerji sektorundan asılılığın azaldılması, qeyri-neft sektorunun genişləndirilməsi və inkişafı naminə effektiv istifadə olunur. Neft kapitalı insan kapitalına çevrilir. Həyat səviyyəsi gün-gündən yüksəlir, XXI əsrin çağırışlarına cavab verməyə qadir olan yeni gənc nəsil yetişir. Azərbaycan enerji resursları ilə zəngin bir ölkədir. Hazırda respublikamızın təsdiqlənmiş və proqnozlaşdırılan neft-qaz ehtiyatları ümumilikdə 10 mlrd. ton şərti yanacaq həcmində qiymətləndirilir. Bu sərvətlər hələ 100 il də bizə kifayət edəcək. Azərbaycanın neft-qaz sənayesini qarşıda daha böyük perspektivlər gözləyir və bu sənaye ölkənin ümumi yüksəlişinə bundan sonra da ləyaqətlə xidmət göstərəcək. Maşınqayırma və inşaat sahələri ilə birlikdə neft-qaz sənayesinin inkişafında da qaynaqçıların mühüm rolu var.”

ARDNŞ-in vitse-prezidenti qeyd etdi ki, hazırda ARDNŞ-in müxtəlif struktur bölmələrində 2000-dən çox qaynaqçı çalışır: “Onların əksəriyyəti peşə bacarıqlarına uyğun olaraq sertifikatlaşdırılıb. Qaynaq texnikasının sürətlə yayıldığı müasir dövrdə mütəxəssis hazırlığı və ixtisas artırılması Şirkətimiz üçün xüsusi aktuallıq kəsb edir. Yeni qaynaq avadanlıqlarının istehsalatda tətbiqi, müasir texnologiyaların mənimsənilməsi qarşımızda duran əsas vəzifələrdən biridir. Şirkətimizdə qaynaqçıların praktiki sınağı, attestasiyası və sertifikatlaşdırılması işləri Təlim, Tədris və Sertifikatlaşdırma İdarəsi tərəfindən aparılır. Müəssisələrin sifarişlərinə və tətbiq edilən standartların şərtlərinə uyğun olaraq, ayrı-ayrı diametrli borular və müxtəlif markalı poladlar üzrə qaynaq prosedurlarının hazırlanması ilə məşğul olan bu İdarə TS EN 17024 “Personal sertifikatlaşdırılmasını həyata keçirən müəssisələr üçün ümumi kriteriyalar” beynəlxalq standartının EN 287-1 “Qaynaqçıların bacarıqlılıq sınağı” üzrə sertifikatlara layiq görülüb. Hazırda idarədə 7 müxtəlif metod üzrə qaynaqçıların sertifikatlaşdırılması həyata keçirilir və attestasiyadan müvəffəqiyyətlə keçən qaynaqçılara SOCAR və ya beynəlxalq TÜRKAK loqolu sertifikatlar təqdim olunur. Eyni zamanda qaynaq tikişlərinin keyfiyyəti də burada yoxlanılır və müvafiq rəylər verilir. İdarə tərəfindən təşkil olunmuş müvafiq kursları müvəffəqiyyətlə başa vurmuş 26 mühəndisimiz “Qaynaq inspektoru” sertifikatına layiq görülüb. 2012 və 2013-cü illərdə şirkətimizin müxtəlif təşkilatlarının sifarişi əsasında 2800-dən çox qaynaqçının peşə bacarığı yoxlanılmış və məqbul nəticə göstərən 1584 nəfərə müvafiq sertifikatlar təqdim edilib.”

X.Məmmədov əlavə etdi ki, idarənin Qobustan Regional Təlim Mərkəzinin nəzdində qaynaq mərkəzi yaradılıb, beynəlxalq standartlara cavab verən müasir qaynaq aparatları və müxtəlif təyinatlı dəzgahlarla, 32 nəfər qaynaqçının paralel surətdə çalışmasına imkan verən kabinələrlə təchiz olunub: “Mərkəzdə virtual proqram təminatı əsasında qurulmuş 3D tipli simulyasiya avadanlıqlarından ibarət qaynaq simulyasiyası otağı da fəaliyyət göstərir. Bu ilin peşə tədrisi proqramında 48 qaynaqçının hazırlanması nəzərdə tutulur. ARDNŞ-in digər struktur bölmələrində, o cümlədən “Neftqaztikinti” Trestində və Heydər Əliyev adına Bakı Dərin Özüllər Zavodunda da qaynaq mərkəzləri yaradılıb. Şirkətimizdə xüsusi diqqət yetirilən sahələrdən biri də sualtı qaynaq texnologiyasının inkişafı, sualtı qaynaq əməliyyatlarını həyata keçirən dalğıcların hazırlanmasıdır. Bu məqsədlə, Təlim, Tədris və Sertifikatlaşdırma İdarəsi Ukrayna Milli Elmlər Akademiyasının Paton adına Elektrik Qaynağı İnstitutu və Böyük Britaniyanın TWI şirkəti ilə sıx əməkdaşlıq edir və yeniliklərin tətbiqi istiqamətində qabaqcıl qurumların praktikasını öyrənir. Müasir dövrdə qabaqcıl təcrübələri mənimsəmədən uğur qazanmaq mümkün deyil. Bu məqsədlə toplaşdığımız seminar mühüm nəzəri və praktiki əhəmiyyət kəsb edir.”

Tədbirdə çıxış edən Böyük Britaniyanın TWI şirkətinin Azərbaycan üzrə meneceri Kərim Şakuri, Bakı Ali Neft Məktəbinin rektoru Elmar Qasımov, Ukraynanın Paton adına Qaynaq İnstitutu və Qaynaq Avadanlıqları Zavodunun Azərbaycandakı nümayəndəsi Qoşqar Əsədov, Türkiyənin 9 Eylül Universitetinin doktoru Süleyman Karadeniz seminarın əhəmiyyətini bildirdilər.

Sonda seminar iştirakçıları Qobustan Regional Təlim Mərkəzinin qaynaq emalatxanası və qaynaq simulyasiya otağı ilə tanış oldular. Qonaqlara məlumat verildi ki, emalatxanada beynəlxalq standartlara cavab verən ən müasir qaynaq aparatları, müxtəlif təyinatlı dəzgahlar, simulyasiya otağında isə 3D tipli qaynaq avadanlıqları quraşdırılıb və eyni vaxtda 40 nəfərin çalışa bilməsi üçün şərait yaradılıb.

Nail Rəhimzadə,

Vüsal Cahanov (foto)

İki sahil.- 2014.- 19 mart.- S.7.