Narkomaniyaya qarşı mübarizə

tədbirləri gücləndirilir

Xətai Rayon İcra Hakimiyyətində (RİH) Narkomanlığa və narkotik vasitələrin qanunsuz dövriyyəsinə qarşı mübarizə üzrə rayon komissiyanın növbəti iclası keçirildi. Tədbirdə çıxış edən Xətai RİH başçısının müavini, Narkomanlığa və narkotik vasitələrin qanunsuz dövriyyəsinə qarşı mübarizə üzrə rayon komissiyasının sədri Xeyrulla Hüseynli bildirdi ki, respublikada narkotiklərin qanunsuz dövriyyəsi ilə mübarizənin güclənməsinə xidmət edən qanunvericilik bazasının təkmilləşdirilməsinə, beynəlxalq əməkdaşlığın genişləndirilməsinə, hüquq-mühafizə orqanlarının fəaliyyətinin effektivliyinin artırılmasına böyük diqqət yetirilir.

Prezident İlham Əliyevin 28 iyun 2007-ci il tarixli Sərəncamı ilə təsdiq edilmiş “Narkotik vasitələrin, psixotrop maddələrin və onların prekursorlarının qanunsuz dövriyyəsi və narkomanlığın yayılması ilə mübarizə üzrə Dövlət Proqramı” (2007-2012-ci illər) buna əyani sübutdur. Bu Proqramın icrası respublikada olduğu kimi, Xətai rayonu miqyasında da uğurla həyata keçirilib. Eyni zamanda ölkə Prezidenti İlham Əliyevin 24 iyun 2013-cü il tarixli Sərəncamı ilə təsdiq edilmiş “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2013-2018-ci illər üçün Dövlət Proqramı” qəbul edilib. Proqramın əsas məqsədi ölkədə narkotik vasitələrin, psixotrop maddələrin və onların prekursorlarının qanunsuz dövriyyəsi və narkomanlığın yayılması ilə mübarizənin gücləndirilməsi, maarifləndirmə yolu ilə narkotiklərin qanunsuz dövriyyəsinin və narkomanlığın yayılmasının qarşısının alınması, narkomanlığa düçar olmuş şəxslərin müalicə edilməklə sağlam həyata qaytarılması, həmçinin beynəlxalq əməkdaşlığın inkişaf etdirilməsindən ibarətdir.

Bildirildi ki, hesabat dövründə Narkomanlığa və narkotik vasitələrin qanunsuz dövriyyəsinə qarşı mübarizə üzrə komissiyanın tədbirlər planı təsdiq edilib. Tədbirlər planına uyğun olaraq rayon ərazisində fəaliyyət göstərən idarə, müəssisə və təşkilatlarda, təhsil və səhiyyə ocaqlarında narkomanlığın cəmiyyətə və insanların sağlamlığına vurduğu ziyan barədə təbliğat və kompleks profilaktik tədbirlər həyata keçirilib. Rayonun yeniyetmə və gəncləri arasında narkomanlığın yayılmasının qarşısının alınması və narkotik vasitələrin qanunsuz dövriyyəsinə qarşı mübarizə, komissiyanın daim diqqət mərkəzində olub. Bu məqsədlə rayon məktəblərində keçirilən tədbirlərdə komissiyanın üzvləri, rayon Gənclər və İdman İdarəsinin, rayon polis bölmələrinin əməkdaşları tərəfindən gənclər və yeniyetmələrə narkomaniyaya qarşı mübarizə hissi aşılanıb.

X.Hüseynli qeyd etdi ki, hazırda Xətai rayonu üzrə qeydiyyatda olan narkoman xəstələrin sayı 986 nəfərdir, onlardan 15-i cari ilin 3-cü rübündə qeydiyyata götürülüb. Xətai rayon İcra Hakimiyyətinin nəzdində fəaliyyət göstərən Müsadirə edilmiş narkotik vasitələrin, psixatrop maddələrin və prekursorların məhv edilməsi üzrə komissiya da öz işini günün tələbləri səviyyəsində qurmağa çalışır. Rayon ərazisində olan aptek və xəstəxanalar müvafiq orqanlar tərəfindən mütəmadi nəzarətdə olub və hesabat dövründə həmin müəssisələrdə narkotik maddələrlə bağlı fakt aşkar olunmayıb. Narkotiklərdən sui-istifadə edən şəxslərin aşkara çıxarılması işində komissiya ilə rayon Polis İdarəsi daimi olaraq qarşılıqlı tədbirlər həyata keçirir. Narkotik maddələrdən sui-istifadə etməsi hallarına görə Polis İdarəsinə düşən şəxslərdə həqiqətən asıllığın olmasını təyin etmək məqsədilə rəsmi sənədlər əasasında yoxlamalar keçirilir. Hesabat dövründə Polis İdarəsinin narkotiklərlə mübarizə bölməsi tərəfindən bir sıra kompleks əməliyyat-axtarış və profilaktik tədbirlər həyata keçirilib. Belə ki, həyata keçirilmiş əməliyyat-axtarış tədbirləri nəticəsində 2014-cü ilin 9 ayı ərzində narkotik vasitələrin qanunsuz dövriyyəsi ilə bağlı 71 fakt aşkarlanıb ki, onlardan 24-ü satışla bağlı cinayətlərdir.

O da vurğulandı ki, “Narkotik vasitələrin, psixatrop maddələrin və prekursorların qanunsuz dövriyyəsi və narkomanlığın yayılması ilə mübarizə üzrə” Dövlət Proqramı (2013-2018-ci illər) ölkəmizdə narkomaiyaya qarşı mübarizənin gücləndirilməsi üçün qarşıda konkret vəzifələr müəyyən edib. Bu vəzifələrin həyata keçirilməsi ilə əlaqədar müntəzəm olaraq rayon ərazisində mübarizə üzrə təbliğat və təşviqat işləri aparılır.

Tədbirdə çıxış edən Xətai rayon Prokurorunun müavini, Müsadirə edilmiş narkotik vasitələrin, psixotrop maddələrin və prekursorların aktlaşdırılaraq məhv edilməsi üzrə Komissiyanın sədri Fəqan Mahmudov, Respublika Narkoloji Mərkəzin şöbə müdiri Afət Məmmədova, 28 saylı şəhər poliklinikasının baş həkimi Ələkbər Nəzərov, Bakı şəhər Gənclər və İdman Baş İdarəsinin rəisi Raqif Abbasov, Narkomaniyaya Qarşı Mübarizə üzrə Dövlət Komissiyasının işçi qrupunun əməkdaşı Şahin İsmayılov narkotiklərin qanunsuz dövriyyəsi ilə mübarizə sahəsində görülən işlərdən danışdılar. Sonda videoçarx nümayiş etdirildi, iştirakçılara bukletlər paylanıldı.

Nail Rəhimzadə

İki sahil.- 2014.- 19 noyabr.- S.6.