YAP cəmiyyətimizin avanqardı,

böyük siyasi qüvvəsidir

21 noyabr 1992-ci il Müstəqil Azərbaycanın və xalqımızın taleyində müstəsna rol oynayan, millətin özünə inamını, gələcəyə nikbin baxışını təmin edən möhtəşəm bir tarixdir.

Ölkəmizdə ictimai-siyasi sabitliyin gərgin olduğu, anarxiya və hərc-mərcliyin tuğyan etdiyi həmin tarixi dövrdə Azərbaycan vətəndaşlarında gələcəyə inam bərqərar oldu, tarixi şəxsiyyət, Ümummilli Lider Heydər Əliyevin banisi olduğu, xalqın inandığı və güvəndiyi bir siyasi təşkilat - Yeni Azərbaycan partiyası yarandı.

Cəmiyyət ümümxalq inamına malik olan və ilk növbədə milli birliyə, vətəndaş həmrəyliyinə əsaslanaraq ölkəni böhrandan xilas etməyə qadir olan siyasi qüvvəyə ehtiyac duyurdu. Əslində, 1992-ci il noyabrın 21-də Ulu Öndərimiz Heydər Əliyevin rəhbərliyi ilə belə bir siyasi təşkilatın yaradılması Azərbaycan xalqının sosial sifarişi, cəmiyyətin tələbi idi.

Ötən əsrin 80-ci illərinin axırlarından başlanan iqtisadi, siyasi və hakimiyyət böhranı, həmçinin həmin illərdə Azərbaycanda rəhbərliyə gətirilən səriştəsiz, imperiya ağaları qarşısında əyilən, milli maraqlarımızdan xəbərsiz olan dairələrin gündən-günə güclənən erməni təcavüzünün qarşısını almaq, ordu yaratmaq, xalqı səfərbər etmək, Vətənin təhlükəsizliyini və əhalinin rifahını təmin etmək əvəzinə öz hakimiyyətlərini qorumaq uğrunda mübarizə aparmaları ölkəmizdə vəziyyəti daha da gərginləşdirmişdi. Ölkəni bürüyən total böhran AXC-”Müsavat” cütlüyünün bacarıqsızlığı və səriştəsizliyi səbəbindən daha da dərinləşmişdi. Məhz belə bir ərəfədə Azərbaycanın düçar ola biləcəyi daha böyük fəlakətlərin qarşısını almaq, uçurum qarşısında olan dövlətimizi xilas etmək məqsədilə xalqımızın milli maraqlar ətrafında birləşmiş sağlam qüvvələri, həmçinin ziyalılar dahi şəxsiyyət Heydər Əliyevə müraciət etdilər. Beləliklə, 1992-ci il oktyabrın 24-də ziyalıların müraciətinə cavab məktubunda Ulu öndər Heydər Əliyevin yaranmış vəziyyəti dərindən təhlil etməsi və çıxış yolunu göstərməsi noyabrın 21-də Naxçıvanda Yeni Azərbaycan Partiyasının təsis edilməsi zərurətini reallaşdırdı.

“YENİ, MÜSTƏQİL AZƏRBAYCAN UĞRUNDA!” ŞÜARI İLƏ SİYASİ MÜBARİZƏ MEYDANINA ATILAN YAP ÖTƏN 22 İLDƏ AZƏRBAYCAN DÖVLƏTÇİLİYİNİN GÜCLƏNMƏSİNƏ, XALQIMIZIN RİFAH HALININ YÜKSƏLMƏSİNƏ BÖYÜK TÖHFƏLƏR VERMİŞDİR.

Yarandığı gündən YAP-ın Ümummilli lider Heydər Əliyev tərəfindən müəyyənləşdirilən və uğurla tətbiq edilən əsas proqram məramı Azərbaycanın dövlət müstəqilliyinin qorunub möhkəmləndirilməsindən, ərazi bütövlüyünün təmin edilməsindən, demokratik, hüquqi, dünyəvi cəmiyyət qurulmasından, əmin-amanlıq, ictimai-siyasi sabitlik, milli həmrəylik, güclü və sosialyönümlü iqtisadiyyat yaratmaqdan ibarət olub və partiyamız bu 21 ildə öz məqsədlərinə uyğun fəaliyyət göstərib. Məhz buna görə də, ümumxalq partiyasına çevrilən, 640 minə yaxın üzvü olan YAP bu müddət ərzində ölkədə keçirilən prezident, parlament və bələdiyyə seçkilərində inamlı qələbələr qazanaraq qələbələr partiyası kimi çıxış edib.

Ulu öndər Heydər Əliyevin hakimiyyətdə olduğu 1993-2003-cü illər ərzində Azərbaycan öz dövlət müstəqilliyinin dönməzliyini təmin edib, sosial-iqtisadi və beynəlxalq sahədə mühüm nailiyyətlər qazanıb. Ermənistanın Azərbaycana qarşı təcavüzünün qarşısı alınıb, Dağlıq Qarabağ münaqişəsinin həlli yolunda, diplomatik cəbhədə düşmən üzərində üstünlük əldə edilib.

Ulu öndər 1993-cü ilin iyununda xalqın təkidli tələbi ilə yenidən siyasi hakimiyyətə qayıtdıqdan sonra bu proses davam etdirildi.

YAP-ın əldə etdiyi nailiyyətlərin ciddi tarixi və siyasi əsasları mövcuddur. Məhz bu yanaşmanın doğruluğunu isbat edən başlıca göstəricilər qismində partiyanın müxtəlif zaman kəsiklərində keçirdiyi qurultayların nəticələri və bütün ümummilli seçkilərdə əldə etdiyi parlaq qələbələrdir. YAP-ın yarandığı vaxtdan etibarən Azərbaycanda keçirilən bütün ümummilli seçkilərdə parlaq qələbələr qazanması hər kəsə bəllidir.

Bu gün həyatımızın bütün sahələrində böyük uğurların qazanılmasında YAP-ın yaradıcısı və qurucusu, ulu öndər Heydər Əliyevin ideyalarına sadiqliyini öz əməli fəaliyyəti ilə isbat edən Azərbaycan Prezidenti cənab İlham Əliyevin xidmətləri hər birimizdə böyük fərəh hissi doğurur. Cənab İlham Əliyevin YAP-ın Sədri kimi xalqla partiyanın sıx birliyinə nail olması da dövlət başçımızın müdrikliyini göstərir.

Monolit siyasi qüvvə və güc mərkəzi olan Yeni Azərbaycan Partiyası unikal qələbələrin qazanılmasında, Azərbaycanın tərəqqisində cəmiyyətimizin avanqardı, qüdrətli siyasi qüvvə kimi bundan sonra da böyük töhfələr verəcəkdir.

Zahid Rza

İki sahil.- 2014.- 21 noyabr.- S.3.