Novruz Məmmədov: Bu gün YAP

Qafqazın ən böyük ümumxalq partiyasıdır

Azərbaycan Prezidenti Administrasiyası rəhbərinin müavini, PA-nın Xarici

əlaqələr şöbəsinin müdiri Novruz Məmmədovun SƏS TV-yə müsahibəsi

- Novruz müəllim, Yeni Azərbaycan Partiyası hansı zərurətdən yarandı?

- Əslində Yeni Azərbaycan Partiyasının yaranması XX əsrin (müxtəlif ölkələrdə partiyaların yaranması) çox mühüm hadisələrindən biridir. Yəni, cəmiyyətin inkişafında artıq elə bir mərhələ özünə yer tapır ki, bu zaman cəmiyyətin inkişafında partiyaların rolu artır və zəruri olur. Bu nöqteyi-nəzərdən YAP-ın yarandığı dövrdə xüsusi bir situasiya, böyük təcrübə var idi. Dünyanın inkişaf etmiş bir çox ölkələrində partiyaların rolu haqqında məlumatlar bizdə çox idi. Azərbaycan isə bu dövrdə bütün cəmiyyətin bütün təbəqələrinin qüvvəsini, resurslarını bir yerə cəmləyib. Çünki çox çətin bir dövr idi. O dövrdə qarşıya çıxan həddindən artıq böyük çətinlikləri aradan qaldırmaq lazım idi. Partiyaların yaranmasında böyük şəxsiyyətlərin rol oynadığı danılmaz faktdır. Bəzən isə görürsən ki, partiyanın yaranması üçün şərait yaranıb, amma aparıcı qüvvə yoxdur və onun yaranması da problemə çevrilir. Lakin Azərbaycanın o dövründə, həmin o çətin anlarda xalqımız və ölkəmiz üçün şərait yaranmışdı. Çünki həmin dövrdə Ümummilli Lider Heydər Əliyevin mövqeyi, iradəsi var idi. Dahi şəxsiyyətə bağlı Azərbaycanda yüzlərlə, minlərlə, on minlərlə insan bu səylərin, qüvvələrin bir yerə toplanmasını və həmrəyliyin formalaşmasını istəyirdi. O zaman Azərbaycanın çətin vəziyyətdən çıxması üçün ciddi siyasi quruma ehtiyac var idi. Ona görə də, belə bir partiyanın, yəni YAP-ın yaradılması istəyi ortaya qoyuldu və yaradıldı.

- Yarandığı ilk gündən sıralarını genişləndirən YAP sözün əsl mənasında, ümumxalq partiyası kimi çıxış etdiyini demək olarmı?

- YAP yarandığı ilk vaxtlar ona ümumxalq partiyası deyilməsə də, əslində, ümumxalq ruhu üzərində qurulmuşdu. Çünki o zamanlar Azərbaycan üçün siyasi mənsubiyyəti olanların da, olmayanların da, hətta başqa partiyaların üzvü olanların da beynində, ürəyində bir fikir dolaşırdı, bu çətin vəziyyətdən Azərbaycanı yalnız Ümummilli Lider Heydər Əliyev qurtara bilər. Bu mənada YAP yaranan dövrdə artıq ümumxalq ruhlu bir partiya olaraq həyata vəsiqə aldı. Bu gün YAP Qafqazın ən böyük ümumxalq partiyasıdır. Təbii ki, bu ümumxalq ruhunu, statusunu da ona Ulu Öndər Heydər Əliyev verib.

- Siyasi təhlilçilər YAP-ı öz fəaliyyəti ilə Azərbaycanı müstəqillik ideyaları əsasında parlaq gələcəyə aparan avanqard qüvvə hesab edirlər. Sizin buna münasibətiniz necədir?

- Bəli, bu fikir tamamilə doğrudur. Bu gün Azərbaycanın indiki səviyyəyə çatmasında Ümummilli Lider Heydər Əliyevin, indi isə Prezident İlham Əliyevin çox böyük rolu var. Çünki Ulu Öndərin ideyaları partiyanın ideyalarıdır. Partiya Ümummilli Liderin ideyalarını həyata keçirir. Təbii ki, burada çox güclü bir vəhdət var. Əsas məqam isə Azərbaycanın milli maraqlarını qorumaqdan, onun müstəqil xarici siyasət kursunu həyata keçirməkdən ibarət idi. Bu illər ərzində bir çox müstəqil dövlətlər yarandı. Amma sadaladıqlarım heç birinə nəsib olmayıb. Azərbaycan müstəqilliyini qazandıqdan sonra ən böyük nailiyyətlərindən biri, onun bu müstəqilliyini sabitlik və təhlükəsizlik şəraitində qoruyub saxlaya bilməsidir. Ölkəmizin ikinci böyük tarixi nailiyyəti isə stabillik və təhlükəsizlik şəraitində çox böyük iqtisadi, siyasi, mədəni, idman və digər sahələrdə uğurlara nail olmasıdır. Bununla bağlı bu dövrdə Azərbaycanla müqayisə ediləcək ikinci bir dövlət tapmaq mümkün deyil.

- YAP-ın Ümummilli Lider Heydər Əliyev ideyalarına söykənərək çox böyük və şərəfli yol keçdiyini daha hansı faktlarla ifadə edə bilərik?

- Ümumiyyətlə, Azərbaycanın keçdiyi yolu, qazandığı nailiyyətlərin hər birini YAP-la əlaqələndirmək lazımdır. Azərbaycanın müstəqilliyinin qorunması, onun bu illər ərzində sabitliyinin, təhlükəsizliyinin təmin olunması, eyni zamanda bütün sahələrdə qazandığı nailiyyətlərin hər birində YAP-ın özünün töhfələri var. Çünki bu gün YAP Azərbaycanda iqtidar partiyasıdır və bu partiyanın Sədri vasitəsilə idarə olunur. Heç şübhəsiz ki, bu gün ölkəmizdə müxtəlif vəzifələrdə, siyasi və məmur elitasında partiyanın üzvləri çoxdur. Təbii ki, bütün bunların hamısı sözün həqiqi mənasında Azərbaycanın idarəçiliyində çox mühüm yer tutur.

- Son olaraq Ulu Öndər Heydər Əliyev ideyalarına sadiq qalan və bu ideyalar əsasında fəaliyyət göstərən YAP Prezident İlham Əliyevin Sədrliyi ilə hansı uğurları əldə edib?

- Əslində bu gün xalqımız və ölkəmiz tarixinin qızıl dövrünü yaşayır. Azərbaycanın və xalqımızın tarixində hələ belə uğurlu 20 il olmayıb. Dövlətçilik, müstəqil xarici siyasət kursu baxımından, müstəqil inkişaf, eləcə də təhlükəsizlik baxımından bu cür uğurlu illərimiz heç bir zaman olmayıb. Təbii ki, bunun da əsasını qoyan Ümummilli Lider, eyni zamanda YAP-ın banisi Heydər Əliyev olub. Dahi şəxsiyyətin qazandığı nailiyyətlər, qoyduğu fundament Prezident İlham Əliyev tərəfindən modern formada möhkəmləndirilir. Bu iki böyük şəxsiyyətin ölkəmizə rəhbərliyi Azərbaycan xalqı üçün ən böyük tarixi şansdır. Əsas məqam isə ondan ibarətdir ki, Ümummilli Lider Heydər Əliyevin yolunu, onun kursunu (ölkənin daxili və xarici siyasəti ilə bağlı) Prezident İlham Əliyevdən başqa heç kim belə uğurla davam etdirə bilməzdi. Əgər siz fikir versəniz görərsiniz ki, sanki Ulu Öndər hələ də hakimiyyətdədir və onun ideyaları həyata keçirilir. Ulu Öndər böyük layihələrin əsasını, təməlini qoydu, Prezident İlham Əliyev isə onları həyata keçirdi və davam etdirdi. İndi isə cənab İlham Əliyev daha böyük və yeni layihələrin təməlini qoyub. Elə biz bu il çox böyük layihənin açılışını etdik. Gələn il isə daha böyük layihənin (Bakı-Tbilisi-Qars və s.) tam başa çatması prosesi olacaq. Biz siyasi, iqtisadi, mədəniyyət, idman, elm və digər sahələrdə tədbirlər həyata keçirmişik. Böyük beynəlxalq layihələrə misal olaraq 2012-ci ildə Bakıda keçirilən “Avroviziya” mahnı müsabiqəsini və s. göstərə bilərik. Gələn il isə idman sahəsində dünya və Avropa tarixində ilk Avropa Oyunlarını keçirəcəyik. Bu, Olimpiya oyunları səviyyəsində olan bir yarışdır. Yəni, bu gün bunların hamısı çox uğurla davam etdirilir. Təbii ki, bunu da davam etdirən cənab Prezident İlham Əliyevdir.

Ceyhun Rasimoğlu

İki sahil.- 2014.- 21 noyabr.- S.9.