Horadiz şəhəri abadlaşır, inkişaf edir

Prezident İlham Əliyev: “Biz burada, düşmənlə üz-üzə Horadizdə bir gülüstan, bir abad şəhər görürük”

Son bir neçə ildə müasir infrastrukturların yaradılması, paytaxtın və eləcə də regionların sosial-iqtisadi inkişafının sürətləndirilməsi üçün Prezident İlham Əliyev tərəfindən 20-dən çox Dövlət proqramları imzalanıb. Onların bir çoxu artıq uğurla icra olunub və yüksək nəticələr mövcuddur. Artıq bu gün ölkə vətəndaşı məişət firavanlığı səviyyəsinə görə, Avropa ölkələri standartlarına uyğun bir həyat tərzi sürür. Xüsusən, davamlı qazı, işığı, suyu olan, hətta ən ucqar dağ rayonlarında belə müasir infrastrukturu qurulan ölkənin vətəndaş olmaq insanlarda xoş əhval-ruhiyyə yaradır.

Təbii ki, belə bir inkişaf tendensiyası cəbhə xəttində yerləşən Füzuli rayonunda da mövcuddur. Əslində, bu rayonun davamlı abadlaşması, inkişaf etməsi bir həyat tərzinə çevrilmişdir. Xüsusən rayon rəhbərliyinin işgüzarlığı və ciddiliyi qədər də onun sosiallığı da daim diqqət çəkir. Bir mətbuat işçisi kimi mənim daim izlədiyim informasiyalar arasında rayon rəhbərliyinin sosial məsələlərə mühüm diqqət yetirməsi və bu istiqamətdə səmərəli, maarifləndirici tədbirlər keçirməsidir. Elə məhz bu səbəbdəndir ki, füzulililər, xüsusən də gənclər təşəbbüskarlıqları və sosial-siyasi fəallıqları ilə daim fərqlənirlər.

Füzuli rayonunun iqtisadi yüksəlişi davamlıdır. Burada sənayenin və kənd təsərrüfatının inkişafı üçün sözün həqiqi mənasında geniş imkanlar yaradılıb. Xüsusən ölkə başçısı İlham Əliyevin Füzuli rayonuna mütəmadi səfərləri və burada aparılan abadlıq-quruculuq işlərinin nəticəsi kimi böyük istehsalat, mədəni-maarif obyektlərinin açılışlarında iştirak etməsi rayonun inkişafına yeni sürət gətirir. Rayon İcra Hakimiyyətinin başçısı Alı Alıyev bildirir ki, hər bir füzulilinin həyatında dərin iz buraxan hadisələrdən də biri, bu il avqustun 28-də Prezident İlham Əliyevin Füzuli rayonuna növbəti səfəri zamanı, burada görülən işlərlə, həyata keçirilən infrastruktur layihələrlə tanış olduqdan sonra rayon ictimaiyyəti nümayəndələri ilə keçirilən görüş olmuşdur. Qeyd edim ki, möhtərəm ölkə başçımızın rayona builki növbəti gəlişi cənab İlham Əliyevin füzulililərə böyük inamı, füzulililərin Prezidentə böyük məhəbbəti hesab olunmalıdır. Cənab Prezident görüşdə çox möhtəşəm bir nitq söyləyərək demişdir: “Bu mənim Füzuli rayonuna beşinci səfərimdir. Hər dəfə burada olarkən yeniliklər görürəm, ürəyim sevinir və əldə edilmiş bütün uğurlar münasibətilə Sizi ürəkdən təbrik edirəm. Demək istəyirəm ki, füzulililəri çox sevirəm və çox sevinirəm ki, Füzulidə indi bu qədər inkişaf var. Siz düşmənlə üz-üzə yaşayırsınız, siz böyük cəsarət, mərdlik göstərirsiniz. Biz burada, düşmənlə üz-üzə Horadizdə bir gülüstan, bir abad şəhər görürük. Getsinlər öz şəhərlərinə baxsınlar. Bu gün Horadiz abadlığına görə onların paytaxtı olan qədim Azərbaycan şəhəri İrəvandan bir neçə dəfə üstündür. Bu, reallıqdır. Bunu hər kəs görür və görməlidir. Azərbaycan ictimaiyyəti də bunu bilməlidir.”

Təbii ki, ölkə başçısı cənab İlham Əliyevin bu fikirləri biz füzulililəri olduqca sevindirir və gələcək inkişaflar üçün daha məsuliyyətli olmağımızı tələb edir.

Qeyd edək ki, Prezident İlham Əliyev bu rayona sonuncu səfərində 10 obyektin açılışında iştirak etdi. Görülmüş işlərlə tanış oldu və həyata keçirilən abadlıq-quruculuq işlərindən məmnunluq ifadə etdi. Ölkə başçısının açılışını etdiyi müəssisələrdən biri Horadiz tikiş fabriki oldu. Fabrikdə işçilərin fəaliyyəti üçün hərtərəfli şərait yaradılıb. Müasir texnika və dəzgahların quraşdırılması keyfiyyətli məhsul istehsalına geniş imkanlar açır. Bu fabrikdə ilkin dövrdə məktəbli formalarının və hərbçi geyimlərinin istehsalı həyata keçiriləcək. Məhsullar daxili bazara yönəldiləcək. Təxmini hesablamalara görə müəssisənin ilkin mərhələdə illik dövriyyəsi 2 milyon manat təşkil edəcək. Fabrikdə açılan yeni iş yerlərinin sayı hazırda 100-ə çatır. Yaxın gələcəkdə bu rəqəmin bir qədər də artırılması diqqət mərkəzindədir.

Horadiz şəhərində 10 hektar ərazidə salınan Bayraq meydanı da şəhərə gözəllik verən digər bir layihədir. Bayraq Meydanından bütün Horadiz şəhəri görünür. Burada geniş yaşıllaşdırma və abadlıq işləri görülüb. Meydana qalxmaq üçün sağ və sol tərəflərdə hər biri 287 pillədən ibarət olan sütunlu pilləkən tikilib. Əraziyə avtomobil yolu çəkilib və dayanacaq inşa olunub. Bayraq dirəyinin yerdən hündürlüyü 68 metrdir və demək olar ki, bütün ətraf ərazilərdən aydın görünür. Meydanın əhəmiyyətini artıran mühüm amillərdən biri də burada 3 istirahət guşəsinin yaradılmasıdır. Beləliklə, Horadizdəki Bayraq Meydanı və burada ucaldılan dövlət bayrağı da öz möhtəşəmliyi ilə diqqəti cəlb edir. Ölkə başçısı rayona səfəri zamanı Bayraq meydanında olaraq oradan Horadiz şəhərinin gözəlliyini seyr etmişdir.

Heydər Əliyev Fondunun təşəbbüsü ilə Horadiz şəhərində inşa olunan 2 nömrəli körpələr evi-uşaq bağçasının açılışında iştirak edib. Həmçinin ölkə başçısı Horadizdə işğal zamanı dağıdılmış 227 evin və çoxmənzilli 3 binanın bərpasından sonra istifadəyə verilməsi mərasimində iştirak edib. Ümumiyyətlə, Ermənistan-Azərbaycan, Dağlıq Qarabağ münaqişəsi nəticəsində ciddi ziyan görən Horadiz şəhərinin yenidən qurulması, burada geniş abadlıq-bərpa tədbirlərinin həyata keçirilməsi istiqamətində son illərdə bir çox mühüm işlər görülüb. Şəhərin simasının daha da gözəlləşdirilməsi istiqamətində həyata keçirilən layihələr bu gün də davam etdirilir. Müharibə zamanı dağıntılara məruz qalan şəhərdə quruculuq işləri geniş vüsət alıb, yeni evlər tikilib. Bu sırada 227 evin və çoxmənzilli 3 binanın bərpasından sonra istifadəyə verilməsi də mühüm əhəmiyyət daşıyır. Bu cür tədbirlər Prezident İlham Əliyevin rəhbərliyi ilə Azərbaycan dövlətinin həyata keçirdiyi siyasətin mərkəzində insan amilinin durduğuna daha bir əyani misaldır. Bundan əlavə, “Mən hər bir azərbaycanlının Prezidenti olacağam” deyən dövlət başçısının fəaliyyətinin real nəticələridir. Bu layihələr Azərbaycan dövlətinin ilk növbədə, cəbhə xəttində yaşayan vətəndaşların sosial-rifah halının və mənzil-məişət şəraitinin yaxşılaşdırılması naminə gördüyü işlər sırasındandır. Bu, həm də Azərbaycanın iqtisadi gücünü və potensialını nümayiş etdirir.

Qeyd edək ki, Horadiz şəhərində erməni işğalı zamanı yandırılmış və dağıdılmış 227 evin və çoxmənzilli 3 binanın bərpa edilməsi məqsədi ilə Prezident İlham Əliyevin müvafiq Sərəncamı ilə Füzuli rayon İcra Hakimiyyətinə 2013-cü il dövlət büdcəsində nəzərdə tutulmuş Prezidentin ehtiyat fondundan vəsait ayrılıb. Yüksək keyfiyyətlə və müasir tikinti normaları nəzərə alınmaqla həyata keçirilən inşaat işləri zamanı evlərin hamısı tam bərpa edilib. Mənzillərin hamısı kommunal infrastrukturla təmin olunub, insanların rahat yaşamaları üçün hər cür şərait yaradılıb. Bütün bunlar da bir daha göstərir ki, Prezident İlham Əliyevin bu sahədəki fəaliyyəti çətin sınaqlardan çıxan füzulilərdə sabaha ümid yaradıb, dövlət başçısının hər zaman onların yanında olduğunu təsdiqləyib. Yol mədəniyyətdir sözlərinə istinad etsək bu istiqamtdə Füzuli rayonunda böyük işlər görülüb. Belə ki, Prezident bu il Əhmədalılar- Mollaməhərrəmli-Arayatlı-Babı kəndlərarası avtomobil yolunun açılışında iştirak etmişdir. Bu yol Prezident İlham Əliyevin ötən ilin oktyabrında imzaladığı Sərəncama əsasən tikilib. 2013-cü və 2014-cü illərin dövlət büdcələrindən ayrılan müvafiq vəsait hesabına bu yolun ümumi uzunluğu 32 kilometrdən çoxdur. Eni 8 metr olan yol 4-cü texniki dərəcəlidir. Yol üzərində 28 su keçidi yerləşir. Kəndlərarası avtomobil yolunun əhəmiyyətini artıran ən mühüm amil onun 13 yaşayış məntəqəsini birləşdirməsidir. Uzun illər bu sarıdan əziyyət çəkən həmin kəndlərin əhalisi artıq müasir standartlara uyğun yoldan istifadə edə biləcəklər.

Dövlətimizin başçısı yolun rəmzi açılışını bildirən lenti kəsmişdir.

Füzulinin Tarix-Diyarşünaslıq Muzeyi indi Qafqazda ən zəngin tarixi eksponatları ilə zəngin mədənyyət obyektidir. Heydər Əliyev Fondunun təşəbbüsü ilə tikilən bu muzeydə İbtidai dövr, Tunc dövrü, Orta əsrlər, Yeni və Ən yeni dövrlərə aid bölmələr var. Xüsusi memarlıq üslubunda tikilən bina bütün lazımi kommunikasiya xətləri və müvafiq avadanlıqla təchiz olunub. Muzey 1981-ci ildə yaradılıb. 1993-cü ildə Qarabağ müharibəsinin gedişində muzeyin 7 mindən çox eksponatı rayondan çıxarılaraq Bakıdakı “İstiqlal” muzeyində saxlanılıb. Mədəniyyət və Turizm Nazirliyi toplanmış çoxsaylı eksponatların tarixi əhəmiyyətini nəzərə alaraq 2006-cı ildə rayonun Bala Bəhmənli kəndində Füzuli Tarix-Diyarşünaslıq muzeyinin filialını açıb. Hazırda filialın fondunda xalqımızın qədim tarixinin və dövlətçilik ənənələrinin müxtəlif dövrlərinə işıq salan 1000-ə yaxın eksponat var. Muzeydə Azıx mağarasının maketi və ibtidai dövrdə istifadə olunan məişət və əmək alətləri nümayiş etdirilir.

Horadiz şəhərinə füsunkar gözəllik verən digər bina rayon İcra Hakimiyyətinin binasıdır. Foyesində ümummilli lider Heydər Əliyevin büstü qoyulan binada Ulu Öndərin və Prezident İlham Əliyevin ölkəmizin tərəqqisi naminə çoxşaxəli fəaliyyətlərini əks etdirən fotoguşələr yaradılıb. Fotoguşələrdə ümummilli lider Heydər Əliyevin və Prezident İlham Əliyevin Füzuli rayonunda müxtəlif illərdə keçirilən tədbirlərdə iştirakını əks etdirən şəkillər böyük maraq doğurur.

Prezident İlham Əliyevin “Azərbaycan Respublikası Regionlarının 2014-2018-ci illərdə sosial-iqtisadi inkişafı Dövlət Proqramı”nın təsdiq edilməsi haqqında 27 fevral 2014-cü il tarixli 118 №-li Fərmanına uyğun olaraq Füzuli rayonunda bir sıra tədbirlərin həyata keçirilməsi nəzərdə tutulmuşdur. Belə ki, Dövlət Proqramında rayonda cins heyvandarlıq, taxılçılıq, üzümçülük, tərəvəzçilik, meyvəçilik, toxumçuluq, tingçilik sahələrinin inkişafı, iri taxılçılıq təsərrüfatlarının yaradılması, kənd təsərrüfatı istehsalının inkişafına xidmət edən infrastrukturun maddi-texniki bazasının möhkəmləndirilməsi, yaşayış məntəqələrində modul tipli su təmizləyici qurğuların quraşdırılması, rayon ərazisində kəndarası yolların tikintisinin, yenidən qurulmasının davam etdirilməsi, elektrik enerjisi təminatının yaxşılaşdırılması sahəsində işlərin davam etdirilməsi, istilik təchizatının yaxşılaşdırılması tədbirlərinin davam etdirilməsi, qaz təchizatının yaxşılaşdırılması, rabitə və informasiya xidmətlərinin yaxşılaşdırılması, torpaqların su təminatının yaxşılaşdırılması üçün meliorasiya-irriqasiya işlərinin həyata keçirilməsinin davam etdirilməsi, 20 ədəd artezian quyusunun qazılması, Horadiz şəhərinin müfəssəl planının hazırlanması, abadlıq-quruculuq işlərinin davam etdirilməsi, səhiyyə müəssisələrinin əsaslı təmiri və tikintisi sahəsində işlərin həyata keçirilməsi, mədəniyyət obyektlərinin əsaslı təmiri, tikintisi və tarix-mədəniyyət abidələrinin bərpası sahəsində işlərin aparılması, idman-sağlamlıq obyektlərinin əsaslı təmiri və tikintisi sahəsində işlərin davam etdirilməsi, təhsil müəssisələrinin əsaslı təmiri və tikintisi sahəsində işlərin aparılması nəzərdə tutulmuşdur. Dövlət Proqramının qəbul olunmasından 8 aya yaxın qısa müddət keçməsinə baxmayaraq Füzuli rayonu üzrə icrası nəzərdə tutulan tədbirlərin yerinə yetirilməsinə başlanmışdır və uğurla davam etdirilir.

Bu il rayonun taxılçılıq sahəsində uğurları ürəkaçandır. 30 min hektar sahənin məhsulu nəzərdə tutulmuş müddətdə biçilərək 90 min tona yaxın taxıl əldə edilmişdir. Qeyd edək ki, ölkə başçısının taxılçılığın inkişafına dair göstərişindən sonra rayonda 300 hektar sahədə məhsuldar toxumluq təsərrüfatı yaradılmışdır və həmin sahələrdən 60 sentnerə yaxın taxıl götürülmüşdür. Rayonda heyvandarlıq məhsulları istehsalı da dinamik inkişaf etdirilir. Hazırda rayonda 31622 baş qaramal, 115490 baş qoyun-quzu, 407190 min baş ev quşları vardır. Cari ilin 9 ayı ərzində heyvandarlıq məhsulları istehsalında yenə dinamik inkişafa nail olunmuş, 3489 ton ət, 13473 ton süd, 5840 milyon ədəd yumurta, 152 ton yun istehsal edilmişdir. Bunlar isə öz növbəsində əvvəlki ilin müvafiq dövrü ilə müqayisədə xeyli çoxdur. Başqa kənd təsərrüfatı məhsulları istehsalında da nəticələrimizin yüksək olacağı proqnozlaşdırılır.

Rayonda sahibkarlığın inkişafına ciddi fikir verilir. Son 3 ildə iş adamlarına yaradılmış şərait nəticəsində Əhmədbəyli kəndi ərazisində 5 min ton kənd təsərrüfatı məhsulları saxlayan Soyuducu anbar kompleksi, ildə 2,5-3 min ton quş əti istehsal edən “Qarabağ-Broyler” MMC fəaliyyətə başlamış, müasir üslubda Qarabağ Ailəvi İstirahət Mərkəzi, bir neçə şadlıq evləri tikilərək istifadəyə verilmişdir. Heyvandarlığın aparıcı sahə olduğunu nəzərə alaraq ölkə başçısının tapşırıqlarına uyğun olaraq iş adamları rayonun Haramı adlanan hissəsində 5000 baş ətlik və südlük heyvandarlıq kompleksi və sutkada ilk növbədə 10 ton süd qəbul edəcək zavodun tikintisini sürətlə davam etdirirlər. Rayonun Üçüncü Zobucuq qəsəbəsində gündə 40 ton çörək-un məmulatları istehsal edən zavodun istifadəyə verilməsinə az qalmışdır. Dövlət Proqramına uyğun olaraq rayonun içməli və suvarma suyuna ehtiyac olan yaşayış məntəqələrində 20 ədəd artezian quyusu qazılmasına yaxın günlərdə başlanacaqdır. Bunun nəticəsində mövcud problemlər həll olunacaqdır.

Prezident İlham Əliyevin tapşırıqlarına və Dövlət Proqramına uyğun olaraq rayona təbii qaz çəkilişi sürətlə davam etdirilir. İndiyədək 29 yaşayış məntəqəsində əhali təbii qazdan istifadə edir. Bu ilin sonunadək rayonun 39 yaşayış məntəqəsinin hamısında əhali təbii qazdan istifadə edəcəkdir. Ölkə başçısının Sərəncamına uyğun olaraq rayonun 13 yaşayış məntəqəsinin - Qarabağ-Əhmədbəyli-Böyük Bəhmənli-Kərimbəyli-Arayatılı-Qazaxlar-Mirzənağılı kəndlərinin yararsız vəziyyətdə olan 34,6 kilometrlik yolları əsaslı bərpa olunmuşdur. Yaxın vaxtlarda Qayıdış qəsəbələrinin yolları da bərpa olunacaqdır. Dövlət Proqramına uyğun olaraq rayonda təhsil və səhiyyənin inkişafı da diqqət mərkəzindədir. Hazırda Qazaxlar kəndində tam orta məktəb, Əhmədbəyli kəndində musiqi təmayüllü gimnaziya binaları tikilir. Heydər Əliyev Fondunun dəstəyi ilə Horadiz şəhərində 100 yerlik, Bala Bəhmənli kəndində 60 yerlik uşaq bağçaları tikilmişdir. Böyük Bəhmənli kənd xəstəxanası üçün 15 çarpayılıq yardımçı binalar tikilməkdədir. Mədəniyyət müəssisələrinin bərpası və yenilərinin tikintisi də nəzərdə tutulmuşdur. Dövlət Proqramının tələblərinə uyğun olaraq rayon ərazisindəki qəzalı vəziyyətdə olan ictimai binalarda, yol kənarlarında, yataqlarda məskunlaşmış 721 ailə üçün yeni qəsəbə salınmasına yaxın günlərdə başlanacaqdır.

Qeyd edək ki, rayon İcra Hakimiyyətinin başçısı Alı Alıyev sakinlərlə yerlərdəki davamlı görüşləri icra aparatı ilə vətəndaşlar arasındakı etimadı və inamı artırmışdır. Belə ki, bu ilin doqquz ayında rayon icra hakimiyyətinin başçısı tərəfindən kənd və qəsəbələrdə müntəzəm olaraq səyyar qəbullar keçirilmişdir. Keçirilən onlarla səyyar qəbul-görüşlərdə 4 mindən çox sakin iştirak etmişdir. Onların bir çox xahiş və istəkləri problemləri həll edilmişdir. Hazırda Horadiz şəhərində abadlıq işləri davam etdirilir, şəhərin küçə və prospektləri tamet daşlarla üzlənilir, yaşıllıq ərazilərinin həcmi genişlənir, müasir tipli park və istirahət yerləri yaradılır. Rayon rəhbərliyi bir qayda olaraq şəhid ailələrinə, Qarabağ əlillərinə, ərazidə fəaliyyət göstərən hərbi hissələrin əsgər və zabitlərinə qayğı və diqqətlə yanaşır, onlara imkan daxilində köməklik göstərir. Vətəndaşların ərizə, şikayət və müraciətlərinə baxılması və gecikdirilmədən həll edilməsi məsələləri də daim diqqətdə saxlanılır.

Sonda: şəxsi qənaətimə görə, rayonun abadlaşması, sakinlərin sosial-məişət rahatlığının təmin olunması rayon rəhbərliyinin işgüzarlığından, onun təşkilatçılığından və dövlətə, onun rəhbərinə sədaqətindən qaynaqlanır. Eyni zamanda, məmurun vətən qarşısında məsuliyliyət və vicdan borcu da daim öndə olanda bu işlərin rəvanlığı daimi olur. Bu mənada, mən Füzuli rayonunda gedən böyük abadlıq və quruculuq işlərinin genişliyini və səmərəliliyini, eyni zamanda, rayon rəhbərliyinin şəxsi işgüzarlığında görürəm. Çünki Prezident İlham Əliyevin ölkə vətəndaşlarına diqqət və qayğısının rayonlarda yüksək səviyyədə təzahür tapmasında məhz yerli məmurların iş bacarığı mühüm rol oynayır. Bütün bunlara rəğmən demək olar ki, cəbhə xəttindəki bütün təhlükələrə baxmayaraq füzulilər ölkəmizin gələcəyinə, Prezident İlham Əliyevin siyasi kursuna sədaqətlidirlər və ölkəmizin bundan sonra da inkişafına əmindirlər.

Elçin Zaman

İki sahil.- 2014.- 28 noyabr.- S.8; 17.