Xətai Rayon İcra Hakimiyyətində hesabat yığıncağı keçirildi

Xətai Rayon İcra Hakimiyyətində (RİH) 2014-cü ilin 9 ayının sosial-iqtisadi inkişafının yekunları və qarşıda duran vəzifəllərə həsr edilmiş hesabat yığıncağı keçirildi. YAP Xətai rayon təşkilatının sədri, Milli Məclisin deputatı Hüseynbala Mirələmovun, rayonun müxtəlif idarə və müəssisə rəhbərlərinin iştirak etdiyi tədbirdə, əvvəlcə ulu öndər Heydər Əliyevin büstü özünə tər çiçək dəstələri düzüldü, Onun əziz xatirəsi yad edildi.

Hesabat məruzəsi ilə çıxış edən Xətai Rayon İcra Hakimiyyətinin başçısı Razim Məmmədov bildirdi ki, ölkəmizdə davam edən inkişaf tendensiyası Bakı şəhərinin aparıcı rayonlarından birinə çevrilmiş Xətai rayonunun sosial-iqtisadi inkişafında özünü göstərib, iqtisadi göstəricilər yüksək olub. İlin əvvəlindən rayon iqtisadiyyatının əsasını təşkil edən sənaye dinamik inkişaf edib, 931 milyon 290.6 min manatlıq, yəni keçən ilin eyni dövrü ilə müqayisədə 5,4 faiz çox sənaye məhsulu istehsal edilib. İstehlak və xidmət bazarlarında əhaliyə 1 milyard 56 milyon 725,5 min manatlıq və ya keçən ilin eyni dövrü ilə müqayisədə 12,3 faiz çox geniş çeşidli istehlak malları satılıb və pullu xidmət göstərilib. Pərakəndə əmtəə dövriyyəsi 12,6 faiz, pullu xidmətlərin həcmi isə 11,3 faiz çoxalıb.

Ölkəmizdə sahibkarlığın inkişaf etdirilməsi üçün hüquqi bazanın möhkəmləndirilməsi, dövlət tərəfindən hərtərəfli dəstəyin verilməsi Prezident İlham Əliyevin müəyyən etdiyi iqtisadi siyasətin əsas istiqamətlərindəndir. Xətai rayonunda sahibkarlığın dəstəklənməsi və inkişafı rayon rəhbərliyinin başlıca məqsədlərindən biri olub, onlara yaradılmış şəraitin nəticəsində hesabat dövründə 3527 yeni iş yeri, 2003-cü ilin oktyabrından bu ilin 1 oktyabrınadək 36773 yeni iş yeri yaradılıb ki, bunun da 36567-si daimi iş yerləridir. Hesabat dövrü ərzində rayon Məşğulluq Mərkəzinə müraciət etmiş 837 nəfərdən 823 nəfəri iş axtaran vətəndaş kimi qeydiyyatdan keçib, “Ərazi Məşğulluq Proqramı”na əsasən müraciət edən vətəndaşların 379 nəfəri daimi işlə təmin olunub.

R.Məmmədov qeyd etdi ki, pensiyaların, sosial müavinətlərin və ünvanlı sosial yardımların ödənilməsində gecikmə hallarının qarşısının alınması, məcburi dövlət sosial sığorta haqqı üzrə sığorta olunanlar barədə məlumatların emalı üçün tədbirlər görülüb və bu vacib məsələlər diqqətdə saxlanılıb. Hesabat dövrü ərzində rayon ƏSMM-nə ÜSY-la bağlı daxil olmuş 2131 ailənin müraciətinə baxılıb və 1679 ailəyə ÜSY təyin edilib, 190 ailəyə ÜSY verilməsindən imtina edilib. ÜSY təyin edilmiş ailələrin sayı keçən ilin eyni dövrü ilə müqayisədə 1073 ailə, başqa sözlə 39,0 faiz az olub.Ailələrdə adambaşına düşən ÜSY-ın məbləği 37,31 manat, hər bir ailə üzrə orta aylıq məbləğ 141,67 manat təşkil edib.

Xətai RİH başçısının sözlərinə görə, ölkə Prezidentinin həyata keçirdiyi düzgün, uzaqgörən, uğurlu sosial-iqtisadi siyasətin və uğurla icra olunan layihələrin real nəticəsidir ki, Bakı şəhəri və eləcə də respublikamızın regionları inkişaf edərək son illərdə öz simasını tam dəyişib. Bu dəyişiklik bizim rayonumuzda da əhəmiyyətli dərəcədə olub və inkişaf prosesi bu gün də uğurla davam etdirilir. İlin 9 ayı ərzində aparılan abadlaşma və yenidən qurma işlərinin həcmi xeyli yüksəlib. Bakı Ağ şəhər layihəsinin inşası sürətlə aparılıb, Boks Federasiyasının İdman Kompleksinin tikintisi davam etdirilib, Fransız məktəbinin tikintisi başa çatdırılıb, Yeni Ağ şəhər bulvar kompleksində işlər sürətləndirilib, Nobel prospektində yeraltı keçidin və Xəqani Rüstəmov küçəsinin Babək prospekti ilə birləşdirilməsi məqsədi ilə yeni yolun tikintisinə başlanıb. Rayon İcra Hakimiyyətinin inzibati binasının əsaslı təmiri də icra olunan layihələr sırasındadır. Estetik görünüşü, iş şəraiti müasir tələblərə uyğun gəlmədiyindən bina bütövlüklə yenidən qurulub, iş otaqları, akt, konfrans və müşavirə zalları, yeməkxana müasir standartlar səviyyəsində yenilənib.

Bildirildi ki, rayonda ekoloji vəziyyətin yaxşılaşdırılması qarşıda duran mühüm məsələlərdəndir. Bu məsələlərin əhəmiyyəti nəzərə alınaraq rayonda yaşıllıq sahələrinin genişləndirilməsi üçün ayrıca proqram hazırlanaraq həyata keçirilməyə başlanılıb. Cari ilin əvvəlindən həyata keçirilməyə başlanan 2-ci və 3-cü yaşıllaşdırma proqramlarına uyğun olaraq Azadlıq prospekti-Hava Limanı istiqamətində Nobel prospekti boyunca yolun hər iki istiqamətində yaşıllaşdırma işləri başa çatdırılıb. Rayonda yolların təmiri və tikintisi də daim diqqətdə olub. Gəncə prospektində hərəkətin təhlükəsizliyi baxımından bu prospektin yolu ikitərəfli olmaqla yenidən qurulur və prospekt müasir işıqlandırma sistemi ilə təchiz olunur. Hesabat dövründə Xocalı prospektində yeraltı bütün kommunikasiya xətləri yenilənib və prospekt bütövlükldə yenidən qurulub.

Rayonun sosial-iqtisadi həyatında son illər müşahidə olunan sürətli inkişaf 2014-cü ilin 9 ayında da saxlanılaraq həm sosial, həm də iqtisadi sahələrdə yeni nailiyyətlərin qazanılması ilə müşahidə olunub. “2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı”nın icrası uğurla həyata keçirilib. Dövlət Proqramı, eləcə də son illərdə reallaşdırılan digər proqramlar və layihələr respublikamızın bütün regionları kimi Xətai rayonunun sosial-iqtisadi inkişafının daha da sürətlənməsi və hesabat dövründə bir sıra sahələrdə olduğu kimi təhsil, səhiyyə və mədəniyyət sahələrində də yüksək göstəricilərin əldə olunması ilə nəticələnib.

Dövlət Proqramına uyğun hesabat dövründə 194 nömrəli məktəbin yenidən inşası, 48 və 56 saylı orta məktəblərin əsaslı təmiri, 63 nömrəli məktəbin əlavə tədris korpusunun tikintisi, 171 saylı orta məktəbdə yeməkxana və akt zalının, 116 saylı orta məktəbdə isə istilik sisteminin təmiri işləri başa çatdırılaraq istifadəyə verilib. Təmir işləri bitmiş 181, 200, 202, 205, 223, 236, 250 və 316 saylı uşaq bağçaları fəaliyyətə başlayıb, 170, 186, 207 və 243 saylı uşaq bağçalarında isə təmir işləri davam etdirilir.

Bu tədris ilində 2549 nəfər buraxılış imtahanlarını müvəffəqiyyətlə verərək attestat alıb. Məzunların 2365 nəfəri ali məktəblərə qəbul üçün sənəd verib və 1637 nəfəri müvəffəq nəticə göstərərək ali məktəblərə qəbul olub. Ali məktəblərə qəbul olanların 194 nəfəri 500-600, 80 nəfər 600-650, 41 nəfər 650-700 bala qədər toplayıb. Rayon üzrə ali məktəblərə qəbul 69.21 faiz olub. 2 nəfər isə ən yüksək bal (700) toplayaraq Azərbaycan Diplomatik Akademiyasına daxil olub.

R.Məmmədov onu da əlavə etdi ki, hesabat dövründə yeni yaradılmış sahə inzibati dairə üzrə nümayəndəliklər fəaliyyətini davam etdirib, nümayəndəliklər tərəfindən vətəndaşların qəbulu təşkil edilib. Sahə inzibati nümayəndəlikləri ilə işin səmərəli təşkilini təmin etmək üçün Operativ İdarəetmə Mərkəzi yaradılıb. Bununla yanaşı, 9 ay ərzində vətəndaşların 2310 ərizəsi araşdırılıb, müxtəlif təşkilatlardan daxil olmuş 1011 məktuba baxılıb.

Nail Rəhimzadə

İki sahil. - 2014.- 18 oktyabr.- S. 18.