İlham Əliyev: Başlıca məqsəd insanların məşğulluq səviyyəsinin artırılması, yeni iş yerləri ilə təminatın gücləndirilməsidir

İşsizliyin 5 faiz səviyyəsində olması, əhalinin məşğulluq strategiyası üzrə dövlət siyasətinin uğuru, qeyri-neft sektorunun inkişafı ilə bağlıdır

Ayrı-ayrı ölkələrin deyil, bütünlükdə dünya iqtisadiyyatının inkişafının əsas göstəricilərindən olan əhalinin məşğulluq siyasəti iqtisadi və maliyyə böhranı illərində daha aktual və həllini gözləyən problemdir. Makroiqtisadi göstəricilərin dinamikasında müşahidə olunan sabit artım tempi, iqtisadiyyatın sosialyönümlü inkişafının təmin edilməsi, əhalinin həyat səviyyəsinin yüksəlməsi, yeni iş yerlərinin açılması, müasir texnologiya və avadanlıqların tətbiqi yeni istehsal mexanizmi ilə işləməyi tələb edir.

Zamanın qaçılmaz bu kimi tələbləri ilə ayaqlaşa bilməyənlər təbii ki, qarşıya qoyulan vəzifələrin həllində gücsüzlüklərini etiraf etməyə məhkumdurlar.

Xüsusilə Avropa ölkələrinin iqtisadiyyatına mənfi təsir edən maliyyə böhranın yaratdığı ən böyük fəsad iri şirkətlərdə belə işçilərin ixtisara salınması, işsizlər ordusunun yaranması ilə nəticələnir. Avropa İttifaqına daxil olan 27 ölkədə hazırda 25 milyon işsizin olması ürəkaçan mənzərə deyil.

İşsizliklə mübarizə humanitar, sosial xarakter daşıyır. Regionların sosial-iqtisadi inkişafı Dövlət Proqramlarının həyata keçirilməsi, özəl bölməyə göstərilən dövlət dəstəyi nəticəsində son illərdə 1 milyon 300 mindən çox iş yeri yaradılmışdır və işsizlik də kəskin şəkildə aşağı düşmüşdür. Artıq Azərbaycana başqa ölkələrdən iş tapmaq üçün miqrantlar gəlir. Bütün bunların təməlində düşünülmüş siyasət dayanır. Dovos İqtisadi Forumunun 2014-cü il hesabatında qeyd olunduğu kimi inkişaf etmiş 40 qüdrətli dövlət arasında (38-ci yer) mövqeyni qoruyan Azərbaycan iqtisadi baxımdan dünyada ən sürətlə inkişaf edən ölkədir. “Mən dəfələrlə demişəm ki, əvvəlki illərdə bizim əsas vəzifəmiz iqtisadi müstəqilliyimizi yaratmaq idi. Bunu da yaratmışıq. Biz iqtisadi cəhətdən tam müstəqilik, heç kimdən asılı deyilik və bu bizə imkan verir ki, siyasi sahədə də, o cümlədən xarici siyasətdə də müstəqil siyasət aparaq söyləyən Prezident İlham Əliyev əlavə edir ki, bizim əsas istinad nöqtəmiz, güc mənbəyimiz iqtisadi müstəqilliyimizdir.”

Təsadüfü deyil ki, BMT-nin İnkişaf Proqramının İnsan İnkişafı Hesabatının 20 illiyinə həsr olunmuş sənəddə insan inkişafı indeksinin orta illik tempinə görə Azərbaycan keçmiş ittifaq dövlətləri arasında lider olmuşdur. Aparılan islahatların uğurlu nəticəsi kimi nufuzlu beynəlxalq reytinq agentliklərinin sənədlərində Azərbaycanın iqtisadi göstəriciləri yüksələn xəttlə davam edən statistik rəqəmlərlə açıqlanır. İqtisadi böhran ilində Azərbaycanın kredit reytinqinin artırılması az-az ölkələrə nəsib olan nailiyyətdir. Bu ondan irəli gəlir ki, ölkəmizdə biznes mühitinin yaxşılaşdırılması daimi prosesdir. İnsanların işlə təminatı davamlı prosesdir.

Azərbaycanda isə bu sahədə vəziyyət çox müsbətdir. Doqquz ayda 19 milyard dollar investisiya qoyulub. İlin sonuna qədər bu rəqəm daha da artacaq və beləliklə, bizim inkişafımız daha da sürətlə gedəcək” söyləyən Prezident İlham Əliyev bildirir ki, sərmayələr çoxşaxəli iqtisadiyyatımızı bütün sahələrinə- sənayenin, kənd təsərrüfatının, turizm sektorunun, neft-qaz sənayesinin inkişafına yönəldilir. Əsas məqsəd neft amilindən asılılığımızı maksimum dərəcədə azaltmaq və qeyri-neft sektoru hesabına gələcəkdə Azərbaycanı inkişaf etdirməkdir.

Bizim kifayət qədər valyuta ehtiyatlarımız var. İlin əvvəlindən maliyyə resurslarımız 3 milyard 600 milyon dollar artıb. Bütövlükdə bizim 53 milyard dollardan çox valyuta ehtiyatlarımız var ki, bu da dünya miqyasında çox böyük göstəricidir. Adambaşına düşən valyuta ehtiyatlarımız isə, hesab edirəm ki, dünya miqyasında ən yüksək səviyyədədir.

Biz əlbəttə ki, neftdən əldə edilmiş gəlirləri şəffaf saxlamaqla və ölkəmizin inkişafına, o cümlədən sosial layihələrin icrasına yönəltməklə dinamik inkişafımızı təmin edirik.

Regionların sosial-iqtisadi inkişafı Dövlət Proqramlarının uğurlu icrası nəticəsində siması dəyişilən, ölkə əhalisinin yerli, daha keyfiyyətli ərzaq , sənaye , məişət malları ilə təmin edən edilmiməsində imkanları artan bölglərdəki emal müəssisələrində minlərlə insan iş yeri ilə təmin olunur. Yüz mindən çox yeni iş yeri açılmışdır, onlardan 80 mini daimi iş yerləridir.

Təbii resurslardan istifadə etməklə istehsala sahələrini genişləndirən iş adamları ölkədə yaradılan sağlam biznes mühitindən səmərəli istifadə etməklə daxili bazarımızı qoruyur və təmin edir, əlavə iş yerlərinin açılmasında mühüm rol oynayırlar.

Bəzi inkişaf etmiş ölkələrdə işsizlik 25, 30 faizdir, gənclər arasında isə 50 faizə çatır. Ancaq Azərbaycanda işsizliklə bağlı problemlər öz həllini tapır və burada əlbəttə ki, dövlət investisiyaları, gözəl sərmayə iqlimi, biznes mühitinin yaxşılaşdırılması faktorları öz rolunu oynayır.

Ona görə əsas hədəf qeyri-neft sektorunun inkişafıdır idi. O sektorda iş yerlərinin açılması əlbəttə ki, işsizliyin aşağı düşməsinə xidmət göstərmişdir.

Bu istiqmətdə həyata keçirilən ən önəmli islahatlar isə özəl bölmənin inkişafı, emal müəssisələrinin, fermer təsərrüfatlarının yaradılması ilə bağlıdır.

Xidmət sahələrində elektron sistemə keçid müsbət nəticələrini göstərməkdədir. Bu statistika bir daha göstərir ki, Azərbaycanın uğurlu dövlət siyasətinin əsasında insan amili dayanır. Siyasi və iqtisadi strategiya vətəndaşların azad və bərabər mühitdə yaradıcı düşüncələrini, istedadlarını inkişaf etdirmələrinə və onların qloballaşan müasir dünyaya inteqrasiyasını təmin etməyə imkan verir. “Bizim siyasətimizin mərkəzində Azərbaycan vətəndaşı dayanır” söyləyən Prezident İlham Əliyevin vurğuladığı kimi, ənənəvi xarakter daşıyan regionlarda aparılan quruculuq, abadlıq işləri ölkə əhalisinin rahat yaşayışının təminatına yönəldilir.

Yeni regional inkişaf strategiyası olan “Azərbaycan-2020: gələcəyə baxış” İnkişaf Konsepsiyasında qarşıdakı on ilin istiqamətləri müəyyənləşdirilir. Ən əsası odur ki, ölkəmizdə əhalinin rahatlığı üçün aparılan bütün islahatlar kompleks şəkildə həyata keçirilir. Bölgələrdə aparılan abadlıq, quruculuq işlərinə Prezidentin Ehtiyat Fondundan xeyli vəsaitin ayrılması da insanların sosial təminatının müdafiəsi üçündür. Xarici ölkələrin şirkətlər ilə müştərək fəaliyyət göstərən “Holcim”, “Norm” sement zavodları kimi başqa iri müəssisələr də əhalinin məşğulluq səviyyəsinin yüksəldilməsində mühüm rol oynayırlar.

4 il ərzində Avropada davam edən iqtisadi böhran ilə əlaqədar ölkəmizin əmək bazarında artan miqrantlarla müqayisədə ilk növbədə Azərbaycan vətəndaşlarının işlə təminatına diqqət yetirilməsini başlıca vəzifə kimi tövsiyə edən Prezident İlham Əliyev vurğulayır ki, bu sahədə dəqiq sistem tətbiq olunmalı, nəzarət gücləndirilməlidir.

Tək paytaxtda deyil bölgələrdə, iri şəhərlərdə keçirilən “Əmək yarmarkaları”nda gənclərin ixtisaslarına uyğun işlə təmin edilməsi əhalinin məşğulluq səviyyəsinin artırılmasında əsas amillərdəndir.

Azərbaycanda korrupsiya və rüşvətxorluğa qarşı mübarizənin gücləndirilməsinin də əsasında insan amilinə diqqət və qayğı kimi humanist prinsiplər dayanır. Prezident İlham Əliyevin vurğuladığı kimi kampaniya xarakterli olmayıb davamlı proses kimi daim diqqətdə saxlanılacaq korrupsiya ilə mübarizənin nəticələri barədə ictimaiyyət mütəmadi məlumatlandırılır.

Xuraman İsmayılqızı

İki sahil. - 2014.- 25 oktyabr.- S.4.