Ölkəmizdə qanunun

aliliyi başlıca şərtdir

Bir qrup “hüquq müdafiəçisi”nin Avropa Şurası Parlament Assambleyasının prezidenti Ann Broşurla görüş zamanı quruma ünvanladıqları müraciətdə L.Yunusun xəyanətkar əməllərini Avropa Şurasının dəyərlərini müdafiəsi adı altında pərdələməyə çalışmaları riyakarlıqdır

Bu fikir hər zaman önə çəkilir ki, siyasət real məsələlər, görülən işlərdir. Bu konteksdən yanaşsaq, ölkəmizin hər sahədə böyük inkişaf, tərəqqi yolunda olduğunu görərik.

Bütün fəaliyyətləri boyu şəxsi maraqlarının quluna çevrilərək xarici dairələrin diktəsi əsasında oturub-duran, ictimai fikri çaşdırmaq üçün reallığı inkar yolunu tutan daxili bədxahlarımız bu gün də ənənələrinə sadiqlik nümayiş etdirməkdədirlər. “Freedom Hause”, “Amnesty İnternasional” kimi təşkilatların, eyni zamanda Avropa Parlamentinin özlərinin verdiyi əsassız məlumatlar əsasında tərtib etdiyi hesabat və qətnamələri “istinad mənbəyi” kimi qəbul edən bu ünsürlər ölkəmizi demokratik inkişaf baxımından “zəif” ölkə kimi beynəlxalq ictimaiyyətə təqdim etməyi sanki bir “qəhrəmanlıq” kimi dəyərləndirirlər. Amma unudurlar ki, bu kimi addımlar simasızlıq, mənəviyyatsızılıq, xəyanatkarlıqdır. Bu günlərdə Avropa Şurası Parlament Assambleyasının prezidenti Ann Broşurun ölkəmizə səfəri çərçivəsində vətəndaş cəmiyyəti nümayəndələri ilə görüşü, görüşdə bu ünsürlərin quruma müraciətində səsləndirdikləri fikirlər bir daha onların hansı məqsədə xidmət etdiklərini açıqladı. Azərbaycanda insan hüquqlarının qorunması sahəsində ciddi prrobolemlərin olduğunu bildirərək, bunu qeyri-ciddi, əsassız fikirlərlə sübut etməyə çalışan daxili bədxahlarımız hər halda reallığın onların apardığı təbliğatdan fərqli olduğunun fərqindədirlər.

Ölkəmizdə demokratik inkişafın, insan hüquq və azadlıqlarının qorunmasının hansı səviyyədə olduğu göz qabağındadır. Avropa Şurası Parlament Assambleyasının prezidenti Ann Broşurla vətəndaş cəmiyyəti nümayəndələrinin görüşünə qurum rəhbərliyinə təqdim olunan müraciətdə əksini tapan fikirlərə diqqət yetirsək, çirkin niyyətlər qabarıq şəkildə özünü büruzə verəcək. Avropa Şurasından Azərbaycan hakimiyyətinə təzyiq göstərilməsini xahiş edən görüş iştirakçıları Leyla Yunus kimi vətənə xəyanət yolunu tutan “hüquq müdafiəçisi”nin Avropa Şurasının dəyərlərini müdafiə etdiyinə görə həbs olunduğunu bildirmələri ikrah hissi doğurur. Yalanları ilə reallıqları ört-basdır etməyə çalışan bu ünsürlər hər halda Leyla Yunusun həs olunma səbəblərindən daha yaxşı xəbərdardılar. Vətənə xəyanət nə zamandan Avropa dəyəri olub? Leyla Yunusun fəaliyyətini izləyən hər kəs yalnız və yalnız bu reallığın şahidi olub ki, onun üçün vətəndaşlıq təəssübkeşliyi, dövlət marağı arxa plandadır. Müxtəlif tərkibli “siyasi məhbus” siyahıları da yəqin Avropa Şurasının dəyərlərinə “sadiqliyindən” irəli gəlir. Xatırladaq ki, AŞPA rəhbərliyi dəfələrlə bu məsələnin qapandığını bəyan etdiyi halda, Leyla Yunus müxtəlif tərkibli “siyasi məhbus” siyahısı ilə gündəm oldu. “Siyasi məhbus” məsələsindən biznes kimi yararlanan “hüquq müdafiəçisi” AŞPA rəsmiləri tərəfindən tənqid olunsa da, bundan nəticə çıxarmaq barədə düşünmür. Bir “hüquq müdafiəçisi” “mən öz maraqlarımı arxa plana keçirə bilmərəm” söyləyirsə, ondan Avropa Şurasının dəyərlərini, dövlət maraqlarını müdafiə etməyi gözləmək sadəlövlük olar.

Qeyd edək ki, Azərbaycan dövlətinin öz siyasətində iqtisadi və siyasi islahatların vəhdətliyini yüksək səviyyədə qoruması daim beynəlxalq səviyyədə təqdir olunur, bu təcrübənin tətbiqinin gərəkliyi bildirilir. İnsan hüquq və azadlıqlarının qorunması, yeni müdafiə mexanizmlərinin müəyyənləşdirilməsi istiqamətində atılan davamlı addımlar da bunun təsdiqidir. Məlum olduğu kimi, Prezident İlham Əliyevin 27 dekabr 2011-ci il tarixli sərəncamı ilə daha geniş sferanı əhatə edən “Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramı” təsdiq edilib. Ölkəmizdə həyata keçirilən demokratik islahatları dəstəkləyən Avropa Şurasının qəbul etdiyi “Azərbaycanda demokratik təsisatların inkişafına dair” qətnamədə yüksək dəyərləndirilən insan amilinə dəyər də bu Proqramda əksini tapıb. Azərbaycan dünya birliyində insanların azad, sərbəst yaşadığı tolerant ölkə kimi tanınır. İlk dəfə olaraq Azərbaycanda ölüm hökmünün ləğv olunması, amnistiya aktları və əfv fərmanları ilə azadlıqdan məhrum edilmiş minlərlə məhbusun cəzasının çəkilməmiş hissəsindən azad olunması insan amilinə diqqətin nümunəsi kimi dəstəklənir. Bu günə kimi 50-dən çox əfv fərmanı imzalanıb. Bundan əlavə, həmçinin amnistiya aktı həyata keçirilib. Bütövlükdə bu sərəncamlar əsasında minlərlə məhkum əfv edilib. Bu kimi sərəncamlar eyni zamanda vətəndaşların qanunlara hörmət etməsinə müsbət təsir göstərir və ulu öndərin humanizm siyasətinin ölkəmizdə layiqincə davam etdirildiyini əks etdirir.

Bu gün ölkəmiz demokratik təsisatlarla, beynəlxalq seçki institutları ilə əməkdaşlıq edir, sivil qanunların respublikamızda tətbiqi üçün təcrübə mübadiləsi aparılır. Siyasi kampaniyalarda vətəndaşlara sərbəst seçim hüququnun verilməsi, şəffaf seçkilərin təşkili, obyektivliyin təminatı demokratik dəyərlərə sadiqlik, Azərbaycan təcrübəsinin təbliği kimi dəyərləndirilir. 2009-cu ildə ölkədə keçirilmiş və əhali tərəfindən dəstəklənmiş Konstitusiyaya əlavə və dəyişiklikləri nəzərdə tutan referendumda da məqsəd və ən çox diqqət yetirilən sahə insanların azad, firavan, sərbəst yaşaması üçün təkmil qanunvericilik bazasını dövrün tələbinə, müasirləşən və dünyaya sürətli inteqrasiya yolu ilə irəliləyən Azərbaycanın inkişafına uyğunlaşdırmaq, zənginləşdirmək idi.

Bu gün ölkəmizdə insan hüquq və azadlıqlarının qorunmasından, müdafiəsindən “narazılıqlarını” ifadə edən “hüquq müdafiəçilərimiz”ə diqqət yetirmək kifayətdir ki, onların bu canfəşanlığının kökündə hansı maraqların dayandığı, maliyyələşmələrində gizli məqamlar bəlli olsun. Yazının əvvəlində fəaliyyətindən bəhs etdiyimiz Sülh və Demokratiya İnstitutunun direktoru Leyla Yunus erməni müdafiəçisi olduğunu hər addımında nümayiş etdirir. Onun Böyük Britaniyanın Azərbaycan və Ermənistandakı səfirliklərinin dəstəyi əsasında Ermənistandakı “Region” Araşdırma Mərkəzi ilə birgə sayt yaratması artıq çox məqamlara aydınlıq gətirmişdir. Hansı ki, həmin sayt ermənilərin müdafiəsinə xidmət edir. Hər dəfə bu fikir beynəlxalq ekspertlər tərəfindən də bəyan edilir ki, xarici təşkilatlar öz hesabatlarını hazırlayanda, yaxud bu və ya digər beynəlxalq qurumun təmsilçiləri ölkəmizdə səfərdə olanda nədənsə ancaq Sülh və Demokratiya İnstitutunun direktoru L.Yunusla görüşə maraq göstərir, onun məlumatlarını “etibarlı” hesab edirlər. NATO PA-nın Bakıda keçirilən “Cənubi Qafqaz: Çağırışlar və imkanlar” mövzusunda 86-cı Rouz-Rout seminarında L.Yunus erməni sevgisini bir daha ortaya qoymuşdur. Ermənilərlə işbirliyində olduğunu açıq-aşkar etiraf edən bir şəxsdən Azərbaycanın xeyrinə hansısa addımı gözləmək, yaxud ölkəmiz haqqında hansısa ürəkaçan bir fikri eşitmək nə dərəcədə real görünə bilər?

Bu kimi faktları xeyli sayda sadalamaq olar. Ölkə ictimaiyyəti hər zaman L.Yunusun dövlətin mənafeyinə zidd hərəkətlərinin şahidi olub. “Hüquq müdafiəçisi” bu “xidmətlərinin” qarşılığında aldığı külli miqdarda vəsaiti müxtəlif ölkələrdə mülklər və s obyektlər əldə etməyə xərcləyir. Şəxsi maraq milli mənafeni üstələyirsə, o şəxsdə vətən, xalq təəssübkeşliyindən danışmaq qeyri-mümkündür. L.Yunus beynəlxalq təşkilatların təmsilçiləri tərəfindən də antimilli ünsür kimi tanınır. Bu gün daxili bədxahlarımızın L.Yunusun Avropa Şurasının dəyərlərini müdafiə etdiyinə görə həbs edildiyini dilə gətirmələri və bununla bağlı quruma müraciət ünvanlamaları riyakarlıqdır. Demokratiya anlayışının mahiyyətini dərk etməyən “hüquq müdafiəçisi”nin Avropa dəyərlərinə sadiqlikdən danışması gülüncdür. Hadislərə ən böyük dəyəri zaman özü verir. Bir reallığı da unutmayaq ki, zaman baş verən hadisələrin düzgün dəyərlərilməsi üçün yaddaşdır. L.Yunus kimilərin keçmişini vərəqləyən hər kəs onun üçün “Leyla Yunus dəyərlərinin” olduğunu görər. O dəyərlər ki, hər zaman Azərbaycan dövlətinin əleyhinə xidmət edib.

Yeganə Əliyeva

İki sahil.- 2014.- 25 sentyabr.- S.19.