Neftçi əməyi yüksək qiymətləndirilir

ARDNŞ-in Geofizika və Geologiya İdarəsinin Kompleks Mühəndisi Axtarış İB-nin rəisi Şəmil Məsimov Prezident İlham Əliyevin Sərəncamı ilə ölkənin neft sənayesinin inkişafındakı xidmətlərinə görə “Tərəqqi” medalı ilə təltif olunub

1994-cü il sentyabrın 20-də dünyanın tanınmış neft şirkətləri ilə Xəzər dənizinin Azərbaycan sektorunda yerləşən “Azəri”, “Çıraq” yataqlarının və “Günəşli” yatağının dərinsulu hissəsinin birgə işlənilməsi və hasilatın pay bölgüsü haqqında Sazişin imzalanması ölkəmizin müasir tarixində əsl dönüş nöqtəsinə çevrildi, bugünkü və gələcək inkişafın etibarlı təməlini qoydu.

Həyata keçirilən genişmiqyaslı regional və qlobal layihələr nəticəsində ölkəmiz nəinki özünün enerji təhlükəsizliyini tam həcmdə təmin etdi, həmçinin neft, qaz, emal və neft-kimya məhsullarının etibarlı ixracatçısı kimi Avropanın enerji təhlükəsizliyi sisteminin vacib həlqələrindən birinə çevrilməkdədir. Neft sənayemizin flaqmanı olan Azərbaycan Respublikası Dövlət Neft Şirkəti qalibiyyətli inkişaf yolu ilə inamla irəliləyir.

Ölkə iqtisadiyyatının tərəqqisinə töhfələrini verən neftçilər bu uğurların davamlı olması üçün səylərini daha da artırır, onlara göstərilən etimadı əməli fəaliyyətləri ilə doğruldurlar. Dövlət başçısı İlham Əliyev və ARDNŞ rəhbərliyinin qayğısını gündəlik həyatlarında, getdikcə müasirləşən, ən yeni texnologiyalar əsasında aparılan iş prinsiplərində hiss edən neftçilər qeyd edirlər ki, uğurlarımızın əsasında onlara göstərilən diqqət dayanır. Dövlət başçısı İlham Əliyevin hər il neçə-neçə qabaqcıl neftçini yüksək dövlət mükafatı ilə təltif etməsi də deyilənlərə əyani sübutdur. ARDNŞ-in Geofizika və Geologiya İdarəsinin Kompleks Mühəndisi Axtarış İstehsalat Bölümünün rəisi Şəmil Məsimov da təltif olunanlar arasındadır. Dövlət başçısı İlham Əliyevin Azərbaycan neftçilərinin peşə bayramı ilə əlaqədar imzaladığı 19 sentyabr 2014-cü il tarixli Sərəncamı ilə ölkənin neft sənayesinin inkişafındakı xidmətlərinə görə Şəmil Məsimov “Tərəqqi” medalı ilə təltif olunub.

Şəmil Məsimov 1964-cü ildə Şəki rayonunun Böyük Dəhnə kəndində ziyalı ailəsində anadan olub. Orta məktəbi bitirən Ş.Məsimov neft sənayesinə böyük maraq göstərir, 1981-1982-ci illərdə neft operatoru üzrə peşə təhsili alır. Hərbi xidmətini başa vurduqdan sonra 1984-cü ildən Dənizdə Geoloji Kəşfiyyat Kontorunda qazmaçı köməkçisi kimi əmək fəaliyyətinə başlayır. İşlədiyi müddətdə neftçi peşəsinin sirlərini öyrənə öyrənə Şəmil müəllim M.Əzizbəyov adına Azərbaycan Neft və Kimya İnstitutunun İqtisadiyyat fakültəsinə (Azərbaycan Dövlət Neft Akademiyası) daxil olur. 1991-ci ildən Kompleks Dəniz Geoloji Kəşfiyyat İdarəsində Mexaniki təmir emalatxanasının rəisi təyin olunur. 1997-ci ildən həmin idarənin rəis müavini vəzifəsində işləyən Şəmil müəllim 2010-2012-ci illərdə GGİ-nin Kompleks Geoloji Kəşfiyyat və Topoqrafiya İdarəsinin rəisi, 2012-ci ilin sentyabrından isə Geofizika və Geologiya İdarəsinin Kompleks Mühəndisi Axtarış Ekspedisiyasının rəisi işləyib. 2014-cü ilin yanvarından GGİ-nin Geofizika və Geologiya İdarəsinin Kompleks Mühəndisi Axtarış İstehsalat Bölümünün rəisi vəzifəsinə təyin olunub və bu günə kimi həmin vəzifəni icra edir.

Peşəkar fəaliyyəti dövründə özünü bacarıqlı və təcrübəli mütəxəssis kimi göstərən, öz peşəsinə məsuliyyətlə yanaşan Şəmil müəllim əmək məhsuldarlığının yüksəldilməsi, nizam-intizamı, tələbkarlığı heç vaxt diqqətdən qaçırmayıb. Şəmil müəllimin iştirakı və rəhbərliyi ilə Xəzərin Azərbaycan, Rusiya, Qazaxıstan və Türkmənistan sahillərində Kompleks Mühəndisi Axtarış İB mühəndisi geoloji axtarış işlərini uğurla yerinə yetirib. Son dövrlərdə Ş.Məsimov “Ümid” sahəsində, “Z.Vəliyev”, “Ə.Əmirov” adına gəmilərlə Xəzərin Qazaxıstan sektorunda, “Xərə-Zirə”, “Qərbi Abşeron” sahələrində, Ələtdə tikiləcək yeni dəniz limanında mühəndisi geoloji işlərə rəhbərlik edib. Həmçinin Şəmil müəllimin quruda aparılan mühəndisi axtarış işləri nəticəsində mürəkkəb mühəndis qurğularının tikiləcəyi ərazilərin mühəndisi geoloji şəraitin öyrənilməsi işlərində - Bakı Olimpiya stadionu, ARDNŞ-in yeni inzibati binasının, “Azərsu” ASC-nin yeni binasının tikintisi, o cümlədən dənizdə platformaların, özüllərin və digər hidrotexniki qurğuların tikintisində mühəndisi geoloji işlərdə xidmətləri olduqca böyükdür. Bu kimi tikililərin mühəndisi geoloji şəraitinin, kəsilişi təşkil edən süxurların fiziki, mexaniki və davamlılıq xüsusiyyətlərinin öyrənilməsi, lokal qaz yığımlarının varlığının dəqiqləşdirilməsi, tektonik pozulma və qırılmaların mövcudluğunun öyrənilməsində və düzgün layihə qərarlarının çıxarılması işlərində Şəmil Məsimovun xidmətləri olduqca böyükdür.

Nailiyyətlərin əldə olunması həm ölkə Prezidenti, həm də ARDNŞ rəhbərliyi tərəfindən diqqətdən kənarda qalmayıb. Belə ki, Dövlət Neft Şirkətinin Geofizika və Geologiya İdarəsinin Kompleks Mühəndisi Axtarış İstehsalat Bölümünün rəisi Şəmil Məsimov dövlət başçısı İlham Əliyevin Azərbaycan neftçilərinin peşə bayramı ilə əlaqədar imzaladığı 19 sentyabr 2014-cü il tarixli Sərəncamı ilə ölkənin neft sənayesinin inkişafındakı xidmətlərinə görə “Tərəqqi” medalı ilə təltif olunub. Şəmil müəllim neftçilərə fəxri adların verilməsi haqqında sərəncamı çoxminli neftçilər ailəsinin əməyinə verilən qiymət kimi dəyərləndirir. “Bu mükafatı ARDNŞ-in GGİ-nin, o cümlədən Kompleks Mühəndisi Axtarış İB-nin bütün əməkdaşlarına göstərilən diqqət və qayğı kimi dəyərləndirir, möhtərəm Prezidentimiz İlham Əliyevə dərin minnətdarlığımı bildirirəm. Qazanılan nailiyyətlərdə Azərbaycan Respublikası Dövlət Neft Şirkətinin prezidenti Rövnəq Abdullayevin neftçilərə göstərdiyi diqqət və qayğının böyük rolu vardır. Həmçinin Geofizika və Geologiya İdarəsinin rəhbərliyinin göstərdiyi etimadı yüksək qiymətləndirirəm. Bu qayğıya cavab olaraq bundan sonra da neft sənayesinin inkişafı naminə səylə çalışacaq, əlimizdən gələni edəcəyik.”

Orxan Vahidoğlu

İki sahil.- 2014.- 26 sentyabr.- S.16.