“Neftqaztikinti” tresti

yeni uğurlara imza atır

ARDNŞ-nin mühüm struktur vahidlərindən olan “Neftqaztikinti” Tresti podrat proqramlarının yerinə yetirilməsi, eləcə də Şirkətin ayrı-ayrı idarə və müəssisələrinin, həmçinin digər yerli və xarici şirkətlərin sifarişləri əsasında dənizdə və quruda təmir, tikinti və quraşdırma işlərinin icrası istiqamətində mühüm tədbirlər həyata keçirir. Yola saldığımız 2013-cü il Trestin fəaliyyətində daha əlamətdar olmuşdur.

Ötən il Trest tərəfindən “Neft Daşları” yatağında 501A saylı meydança əsaslı təmir edilmiş, 418A saylı meydançanın, “Darvin bankası” yatağında 740 saylı özülün tikintisi başa çatdırılmış, “Günəşli” yatağında 10, 11 və 13 saylı dərin dəniz özüllərində əlavə quyuların qazılması üçün yenidənqurma işləri aparılmış, “Bibiheybətneft” NQÇİ-nin 1, 2, 3 və 5 saylı sexləri üzrə lay məhsulların yığım-nəql sistemi tikilmiş, “Qaradağ-2” Qaz Kompressor Stansiyası yenidən qurulmuş, “Ələt-dəniz” yatağındakı 63 saylı stasionar dəniz özülü ilə 7/15/41 saylı özül arasında 6 düymlük sualtı maye xətti çəkilmiş, “Qazıməmməd-Qazax” magistral qaz kəmərinin istismara yararsız hala düşmüş hissələri əsaslı təmir edilmiş, Etilen-polietilen zavodun yeni susoyutma qurğusu inşa olunmuş, “Salyan Oyl” Əməliyyat Şirkətinin sifarişi əsasında Qarabağlı sahəsində hasil olunan aşağı təzyiqli səmt qazının tam həcmdə yığılıb itkisiz təhvil verilməsi üçün sistem tikilmiş, Böyük Zirə adasında yanalma körpüsü bərpa edilərək genişləndirilmiş, Dənizdə İnsan Həyatının Mühafizəsi üzrə Təlim Mərkəzinin “İxtisaslaşdırılmış üstü örtülü hovuzu, həmin Mərkəzdə 2 mərtəbəli tədris korpusu, Qobustan tədris mərkəzində qaynaq sexi, Qaradağ rayonu ərazisində Asfalt-beton istehsalı zavodu tikilərək istismara verilmişdir.

Ümumiyyətlə, “Neftqaztikinti” tresti tərəfindən 2013-cü ildə ümumilikdə 312,6 kilometr (o cümlədən, 53,76 kilometr estakada və özüllərdə, 45,6 kilometrm sualtı, 89,5 kilometr quruda) uzunluğunda müxtəlif diametrli neft-qaz xətləri, 365 kilometr uzunluğunda quru, 5,8 kilometr uzunluğunda isə sualtı kabel xətləri çəkilmişdir. Eyni zamanda, ümumi çəkisi 35610 ton olan metal və metal-konstruksiya quraşdırılmış, 50 mindən çox qaynaq birləşmələrinin defektoskopiyası işləri yerinə yetirilmiş, 20443 kubmetr həcmində dəmir-beton və əmtəə betonu istehsal olunmuş, 4597 metrlik estakadada və 24937 kvadrat metrlik meydançada tikinti-təmir işləri aparılmış, 535043 kvadrat metr sahədə asfalt örtük vurulmuşdur.

Trest müxtəlif xarici və yerli şirkətlərlə səmərəli əməkdaşlıq edərək üzərinə düşən vəzifələri vaxtında və yüksək keyfiyyətlə yerinə yetirmişdir. 2011-ci ildə “Bakı Gəmiqayırma Zavodunun Tikintisi” Layihəsi üzrə elan edilmiş tenderin qalibi olan Trest inşaat işlərini uğurla başa çatdırmışdır. 20 sentyabr 2013-cü il tarixdə Azərbaycan Respublikasının Prezidenti cənab İlham Əliyev və Sinqapurun Ticarət və Sənaye Nazirliyinin baş dövlət naziri cənab Li Yi Şyanın iştirakı ilə Bakı Gəmiqayırma Zavodunun açılış mərasimi olmuşdur. Bundan başqa, “MakDermott”, “Saipem” Asiya şirkətinin Azərbaycan filialı, “Heavy Crane” FZE şirkətinin Azərbaycan filialı, “Caspian Pipe Coatings” MMC, “İlk İnşaat Taahhüt Sanayi və Ticaret Ltd”, “Nobel Oil”, Gürcüstan Neft Qaz Korporasiyası, Minilliyin Çağırışı Gürcüstan Fondu və digər bu kimi beynəlxalq şirkətlər 2013-cü ildə də Trestlə sıx əməkdaşlıq etmişlər. Trestin Gürcüstan Nümayəndəliyi qonşu respublikada neft-qaz boru kəmərlərinin və digər hidrotexniki qurğuların tikintisini, infrastruktur layihələrinin icrasını həyata keçirmişdir. Nümayəndəlik “SOCAR Georgia Gas Ltd”-nin sifarişinə əsasən “Bolnisi rayonunun Talavani (Faxralı) kəndinin qazlaşdırılması”, “Marneuli rayonunun Keşalo kəndində orta təzyiqli qaz xətlərinin tikintisi” və eyni zamanda “Gürcüstan Neft Qaz Korporasiyası” SC-nin sifarişi ilə “Abaşa-Senaki qaz xəttinin (28”) 29 km-lik hissəsinin tikintisi” layihələrinin icrasını uğurla başa çatdırmışdır.

Trestin həyata keçirdiyi əməliyyatlar yüksək beynəlxalq standartlar səviyyəsində, təhlükəsiz, ətraf mühitə ziyan vurmadan, vaxtında və yüksək keyfiyyətlə icra edilmişdir.

İki sahil.- 2014.- 28 yanvar.- S.8.