Ölkənin ictimai-siyasi həyatında qadınların

fəallığı yüksək səviyyədə təmin edilir

Müsahibimiz Yeni Azərbaycan Partiyası Qadınlar Şurasının sədr müavini, Milli Məclisin deputatı Sevinc Hüseynovadır

Günbəgün inkişaf edən, qüdrətlənən Azərbaycanda gender bərabərliyi yüksək səviyyədə qorunmaqdadır. Qadınlarımızın ölkənin ictimai-siyasi həyatında fəallığı yüksək səviyyədədir. İstər parlamentdə, istər bələdiyyələrdə, istərsə də digər orqanlarda təmsilçilik faizləri artan qadınlarımız Azərbaycanın inkişafına öz töfhələrini verməkdədirlər. Yeni Azərbaycan Partiyası Qadınlar Şurasının sədr müavini, Milli Məclisin deputatı Sevinc Hüseynova ilə söhbətimiz də bu kimi məsələlər ətrafındadır.

- Sevinc xanım, Azərbaycan qadınlarının bu gün ölkənin ictimai-siyasi həyatında fəaliyyətini necə şərh edərdiniz?

- Bildiyiniz kimi, Azərbaycanda qadın siyasəti dövlət siyasətinin əsas prioritetlərindəndir. Xalqımızın dahi lideri Heydər Əliyevin xalqın təkidli tələbi ilə hakimiyyətə qayıdışından sonra sərəncamı əsasında ilk yaradılan dövlət qurumlarından biri də məhz Qadın Problemləri üzrə Dövlət Komitəsi oldu. Bundan sonra da çoxlu sayda sərəncam və qərarlar qəbul olundu ki, bunlar ölkənin ictimai-siyasi həyatında qadınlarımızın fəallığını təmin etdi. Bu gün artıq bizim qadınlarımız ölkənin ictimai-siyasi həyatında fəal mövqe tutur. Ulu öndər Heydər Əliyevin yaradıcısı olduğu, hazırda nəinki ölkənin, regionun aparıcı siyasi təşkilatı olan Yeni Azərbaycan Partiyasının sıralarında birləşən 650 mindən artıq üzvün böyük əksəriyyətini qadınlar təşkil edir. Ümummilli lider Heydər Əliyev partiya sıralarında qadınların və gənclərin böyük çoxluq təşkil etməsini vacib amil kimi önə çəkmişdir. Məhz bu diqqət və qayğının nəticəsidir ki, YAP Qadınlar Şurası yaradılmışdır. Sevindirici haldır ki, YAP sıralarında qadınların sayı yetərincədir. Kiçik bir müqayisə aparsaq şahid olarıq ki, istər yerli özünüidarəetmədə, istərsə də qərar qəbul etmədə qadınlar kifayət qədər aktivlik nümayiş etdirir. Məlum olduğu kimi, Yeni Azərbaycan Partiyası dövlət başçısı İlham Əliyevin tapşırığına uyğun olaraq, son parlament və bələdiyyə seçkilərində qadınların təmsilçilik faizlərinin artırılması istiqamətində ciddi səylər göstərdi və nəticə də göz qabağındadır. Əgər 2004-cü ildə yerli özünüidarəetmədə qadınlarımızın sayı 3-4 faiz idisə, son bələdiyyə seçkilərində bu rəqəm 30 faizə çatdı. Parlament tərkibinin isə 16 faizini qadınlar təşkil edir. Demək olar ki, əksər rayon İcra Hakimiyyəti başçılarının bir müavini qadındır. Vətəndaş cəmiyyətində də qadınlar fəal mövqe tuturlar, hazırda 200-dən artıq qadın Qeyri-Hökumət Təşkilatı fəaliyyət göstərir. Eyni zamanda sahibkarlıq sahəsində də qadınlarımız iştirak edirlər.

- Yeni Azərbaycan Partiyasında qadınların ictimai-siyasi fəallığının artırılması istiqamətində hansı tədbirlər həyata keçirilir?

- Demək olar ki, Yeni Azərbaycan Partiyası mütəmadi olaraq qadınların ictimai-siyasi proseslərdə fəal mövqe tutması ilə bağlı işlər aparır. Partiyanın Qadınlar Şurasının qurultayından sonra respublikada bütün Qadınlar Şurasının rəhbərləri ilə bağlı ayrıca Respublika Müşavirəsi keçirildi və bu müşavirədə qarşıda duran vəzifələr nəzərdən keçirilərək tədbirlər planı hazırlandı. Son bələdiyyə seçkilərində YAP Qadınlar Şurası bölgələrdə maarifləndirici tədbirlər keçirdi, qadın namizədləri dəstəkləməklə yanaşı qadınlarımızın seçkilərdə fəal iştirak etməsini təşviq etdi. Partiyamızın məqsəd və vəzifələrinə uyğun olaraq müxtəlif səpkidə işlər aparılmaqdadır. Xeyriyyəçilik tədbirləri təşkil olunur, vətənpərvərlik ruhunun aşılanması və digər məsələlərlə bağlı layihələr həyata keçirilir. Qadınlarımız tez-tez cəbhə bölgələrinə, hərbi hissələrə səfərlər edir, şəhid ailələri ilə görüşür, ahıl və uşaq evlərində olurlar. Bundan başqa qadınlarımız Azərbaycanı dünyanın müxtəlif ölkələrində təmsil edir, Dağlıq Qarabağ münaqişəsini dünya ictimaiyyətinin diqqətinə çatdırır, Azərbaycanın milli adət-ənənələrini tanıdırlar.

- Milli Məclisin sosial siyasət Komitəsinin üzvü kimi, ölkəmizdə bu sahədə həyata keçirilən siyasətlə bağlı fikirlərinizi bilmək istərdik...

- Bu gün Azərbaycanda prioritet olan sahələrdən biri də sosial sahədir. Bu sahə hər zaman Prezidentimiz İlham Əliyevin diqqətindədir. Dövlət başçısı İlham Əliyev daim bildirir ki, iqtisadi tərəqqi güclü sosial siyasətlə tamamlanmalıdır. Dövlət büdcəmiz sosial yönümlüdür. Bu isə o deməkdir ki, ölkədə sosial-siyasət yüksək səviyyədə həyata keçirilməkdədir. Ümumən ölkə Prezidentinin yürütdüyü siyasətin kökündə Azərbaycan vətəndaşlarının rifah halının yaxşılaşdırılması amili dayanıb. Məhz bu baxımdan Azərbaycanda həyata keçirilən hər bir iş vətəndaşların daha da yaxşı yaşamasına hesablanır. Bu günlərdə “Regionların 2014-2018-ci illərdə sosial-iqtisadi inkişafı Dövlət Proqramı”nın icrasının birinci ilinin yekunlarına həsr olunan konfransda səsləndirilən rəqəmlər bir daha ölkəmizin bugünkü inkişaf səviyyəsinə və qarşıda duran vəzifələrə işıq saldı. Bu fikri dövlət başçısı İlham Əliyev böyük inam və qətiyyətlə bildirdi ki, bu gün Azərbaycan nəinki regionda, dünya miqyasında seçilən ölkələrdən biridir və dünyada bizə olan maraq artır. Dövlət başçısı İlham Əliyev konfransda bu inamı da ifadə etdi ki, 2015-ci il də ölkəmizdə uğurlu il kimi tarixdə qalacaq. Dövlətimizin siyasətində insan amilinə verilən dəyər beynəlxalq səviyyədə də yüksək dəyərləndirilir. Hər sahə üzrə konkret Dövlət Proqramlarının qəbulu və onların xalq tərəfindən dəstəklənməsi fonunda icrası ölkənin hərtərəfli inkişafını sürətləndirir. Azərbaycanı qarşıdakı illərdə inkişaf etmiş ölkələr sırasında görmək istəyimiz məhz bugünkü uğurlarımıza əsaslanır. Bütün bunlar onu təsdiqləyir ki, bu gün dünyada nadir Azərbaycan inkişaf modeli var.

- Deputat seçildiyiniz Gədəbəy rayonunda aparılan abadlıq-quruculuq işləri haqqında nə deyə bilərsiniz?

- Cənab Prezident İlham Əliyevin yürütdüyü siyasətin mühüm üstünlüklərindən biri də regionların malik olduğu potensialdan səmərəli istifadənin həyata keçirilməsidir. Bu məqsədlə təsdiqlənən regionların sosial-iqtisadi inkişafına dair Dövlət Proqramları uğurla icra edilir. Artıq üçüncü Proqramın icrası həyata keçirilir. Bu səbəbdən digər rayonlarda olduğu kimi, Gədəbəydə də böyük və sürətli abadlıq-quruculuq, yenidənqurma işləri görülməkdədir. Əminliklə deyə bilərəm ki, görülən işlər nəticəsində rayonun siması tamamilə dəyişib, yeniləşib. Rayona gedən magistral yol sərhəd kəndi olan Qaravəllər kəndinə kimi asfaltlanıb, hazırda isə kəndarası yolların salınması istiqamətində işlər aparılır. Çoxlu sayda mədəniyyət, təhsil, səhiyyə və digər sosial obyektlər tikilərək istifadəyə verilib. Xüsusi olaraq qeyd etməliyəm ki, rayonda 85 ümumtəhsil müəssisəsi var ki, bunlardan yalnız dördü birtipli layihələr üzrə tikilmiş məktəblər idi. Qalan bütün məktəblər isə uyğunlaşdırılmış binalarda yerləşirdi. Bu gün isə 70-dən çox məktəbdə təmir-tikinti və yenidənqurma işləri aparılaraq, günün tələblərinə cavab verən səviyyədə təchiz olunaraq şagirdlərin istifadəsinə verilib. Həmçinin tibb məntəqələri, ATS, poçt binaları, mədəniyyət evləri, klublar və digər obyektlərdə təmir-tikinti işləri aparılıb. Respublikada yeganə olaraq Aşıq Mərkəzi məhz Gədəbəy rayonunda yüksək standartlara uyğun səviyyədə tikilərək istifadəyə verilib. Bundan başqa yüksək zövqlə Yaşıl teatr, park, idman kompleksi, şahmat məktəbi və çox sayda binalar, mərkəzlər tikilərək sakinlərin ixtiyarına verilib. Əvvəllər tez-tez qəzaların baş verdiyi və əhali arasında “qanlı körpü” adlanan şəhər girişindəki körpü tamamilə yenidən tikildi, Novosaratovka kəndində təhlükəli vəziyyətdə olan körpü əsaslı təmir olundu, hansı ki, bunlar böyük məbləğdə maliyyə tələb edən layihələr idi. Bu cür tədbirlər çoxdur. Digər bir mühüm addım isə rayon əhalisinin içməli su ilə təmin olunması istiqamətində həyata keçirilən tədbirlərdir. Ötən ilin sonunda “Azərbaycanın 6 rayonunda Milli Su Təchizatı və Kanalizasiya Proqramı” layihəsi” çərçivəsində Gədəbəy şəhərinin su təchizatı və kanalizasiya sistemlərinin yenidən qurulması işlərinə başlanılması münasibətilə təməlqoyma mərasimi keçirildi. İşlər yekunlaşdıqdan sonra rayon əhalisi 24 saat içməli su ilə təmin olunacaq. Sözsüz ki, bütün bu görülən işlər əhali tərəfindən yüksək qiymətləndirilsə də, öz həllini gözləyən müəyyən problemlər də yox deyil. İndi insanları narahat edən əsas məsələ yaşayış məntəqələrinin təbii qazla təmin edilməsi, kəndarası yolların və keçidlərin təmir olunmasıdır. Rayonda bir neçə kəndlərarası yol var ki, onların təmirə, yenidən qurulmasına ehtiyac var. Sözsüz ki, bu məsələlər də həllini tapacaq. Amma bütün işlər Dövlət Proqramı çərçivəsində, mərhələli şəkildə həyata keçiriləcək. Əgər biz 10-15 il əvvəl əsas magistral yolun asfalt olunmasını istəyirdiksə, artıq bu gün kəndarası yolların təmirini istəyirik. Bu amilin özü də inkişafın bir göstəricisidir. Heç kimin şübhəsi olmasın ki, Azərbaycan qarşıdakı illərdə daha da güclənəcək, inkişaf edəcək və bütün problemlər həll olunacaq. Bu gün paytaxt və bölgələr arasında fərqin müəyyən mənada aradan götürülməsi də iqtisadi inkişafa, tərəqqiyə əsaslanır.

- Sevinc xanım, ölkəmizin iqtisadi inkişafı bu gün onun beynəlxalq əhəmiyyətli tədbirlərin keçirilməsi üçün əsas məkana çevrilməsində də əhəmiyyətli rol oynayır. Azərbaycan bu il I Avropa Oyunlarına ev sahibliyi edəcək. Sizcə bu kimi tədbirlər ölkəmizə nə vəd edir?

- Təbii ki, belə bir tədbirin Bakıda keçirilməsi ilk olaraq Azərbaycanın yüksək iqtisadi inkişafından xəbər verir. Artıq Azərbaycan beynəlxalq tədbirlərin tez-tez keçirildiyi bir ölkəyə çevrilib. Azərbaycan yeni iqtisadi və sosial çağırışların müzakirə olduğu məkan olmaqla yanaşı, eyni zamanda beynəlxalq aləmdə idman ölkəsi kimi də tanınır və nüfuz qazanır. Ölkəmizin bu il I Avropa Oyunlarına ev sahibliyi etməsi də bunun göstəricilərindəndir. Hər bir tədbir Azərbaycan reallıqlarının təbliğində əhəmiyyətli rola malikdir. Ölkəmizə gələn qonaqlar Azərbaycan haqqında təsəvvürlərində hər zaman müsbət mənada dəyişiklik edirlər. Onlar ölkəmizin iqtisadi inkişafından, gözəlliyindən heyrətlənir, insanların yüksək rifah şəratində yaşadığının şahidi olurlar. Təbii ki, hər bir uğur böyük səylərin, qətiyyətin nəticəsidir. Azərbaycan daim inkişafa, tərəqqiyə, yeniliyə meyil göstərir. Bu yarışın ölkəmizdə keçirilməsinin ən maraqlı və qürurverici tərəflərindən biri də odur ki, möhtərəm Prezidentimiz İlham Əliyevin qeyd etdiyi kimi, Birinci Avropa Oyunlarının standartları məhz Azərbaycanda müəyyənləşəcək. Təşkilat komitəsinin sədri Heydər Əliyev Fondunun Prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın rəhbərliyi ilə dünyanın müxtəlif ölkələrində keçirilən Avropa Oyunlarının təqdimatı ilə bağlı tədbirlər bu möhtəşəm beynəlxalq tədbirin də “Eurovision” mahnı yarışması kimi yüksək səviyyədə keçiriləcəyinə və tarixdə öz yerini tutacağına böyük inam yaradır. Hər birimiz Azərbaycanın bu yarışlar ərəfəsində ən yaxşı səviyyədə təbliğ edilməsinə dəstək verməliyik.

Taleh Bağırov

İki sahil.- 2015.- 4 fevral.- S.14.