Kənd təsərrüfatının modernləşdirilməsini

sürətləndirmək prioritet məsələlərdəndir

Dövlət başçısı İlham Əliyevin Sərəncamı ilə 2015-ci ilin “Kənd təsərrüfatı ili” elan edilməsi qarşıya qoyulan məqsədə yüksək səviyyədə nail olmaq üçün mühüm tədbirlərin həyata keçirilməsini təmin edəcək

Nazirlər Kabinetinin 2014-cü ilin sosial-iqtisadi inkişafının yekunlarına və qarşıda duran vəzifələrə həsr olunmuş iclası ötən ilin uğurları fonunda cari ilə baxış kimi dəyərləndirildi. Dövlət başçısı İlham Əliyev əldə olunan uğurları rəqəmlər əsasında diqqətə çatdıraraq bu inamı ifadə etdi ki, 2015-ci il də ölkə iqtisadiyyatı üçün uğurlu olacaq. Bu inamı şərtləndirən əsas amillərdən biri həyata keçirilən islahatların zamanın tələbinə uyğunlaşdırılmasıdır. Dövlət başçısı İlham Əliyevin ölkəmizin 20 illik müstəqillik tarixində əldə etdiyi uğurlara söykənərək təsdiqlədiyi “Azərbaycan 2020: gələcəyə baxış” İnkişaf Konsepsiyasında yeni hədəflər müəyyənləşdirilib və konkret olaraq həlli yolları açıqlanıb.

2014-cü ilin statistikasına diqqət yetirək. Ümumi daxili məhsul 3 faiz, qeyri-neft sektoru 7 faiz artıb. Əhalinin pul gəlirləri 4,8 faiz çoxalıb. Ölkə iqtisadiyyatına 27 milyard dollar investisiya qoyulub. Valyuta ehtiyatları 50 milyard dollardan çoxdur. Bu, ÜDM-nin 70 faizini təşkil edir. Ötən il 123 min yeni iş yeri açılıb ki, onlardan 100 mini daimidir. İşsizliyin səviyyəsi 5 faizdən aşağı, yoxsulluğun səviyyəsi 5 faiz səviyyəsindədir. Əmək haqları və pensiyalar artırılıb. Reallıq bu faktı təsdiqləyir ki, iqtisadi tərəqqi güclü sosial siyasətlə tamamlanır. Dövlət başçısı İlham Əliyev 2003-cü ildə xalqın böyük əksəriyyətinin dəstəyini qazanaraq Prezident seçildiyi dövrdən bu fikri hər çıxışında bəyan edir ki, iqtisadi göstəricilər təkcə rəqəmlərdə deyil, insanların gündəlik həyatında öz əksini tapmalıdır. Buna əsas verən əsas amil isə uğurlu sosial-iqtisadi islahatlardır.

Dinamik inkişafın konturlarını müəyyənləşdirərkən regionların potensialından səmərəli istifadəni vacib şərt kimi önə çəkən dövlət başçısı İlham Əliyevin təsdiqlədiyi regional inkişaf proqramları qarşıya qoyulan məqsədlərə yüksək səviyyədə nail olmağa stimul verir. Bildirilir ki, Azərbaycanın hərtərəfli inkişafını təmin etmək üçün islahatlar regionlar üzrə, proqramlar əsasında həyata keçirilməlidir. Ən əsası gələcək planları gerçəkləşdirmək üçün ilk növbədə maliyyə intizamı olmalıdır. Neft gəlirlərinin idarə olunmasında şəffaflıq prinsipinin qorunması mühüm sosial-iqtisadi layihələrin həyata keçirilməsini daha da sürətləndirir. Məhz bu şəffaflığın, eyni zamanda kompleks tədbirlərin nəticəsidir ki, bu gün paytaxt və bölgələr arasında fərq müəyyən mənada aradan götürülmüş, bölgələr arasında sağlam rəqabət aparılaraq, quruculuq, abadlıq işlərinin geniş vüsət alıb. Dövlət başçısı İlham Əliyevin söylədiyi “Yalnız bütün əhalimiz özünün daha yaxşı yaşadığını hiss etdiyi bir vaxtda, hökumətimiz vəzifəsini yerinə yetirmiş hesab edə bilər. Budur, bizim məqsədimiz-vətəndaşlara eyni şərait yaratmaq” kimi fikirləri hər bir dövlət məmurundan məsuliyyətli olmağı, ölkənin inkişafına, xalqın problemlərinin həllinə öz töhfələrini verməyi tələb edir. Dövlət başçısı İlham Əliyev müşavirədə ötən ilin iqtisadi uğurlarının ümumiləşdirilmiş ifadəsi olaraq bildirdi ki, ölkəmizin əsas inkişaf dinamikasını iqtisadi gücümüz müəyyən edir və iqtisadi islahatların dərinləşməsində böyük uğurlara imza atıb. Azərbaycan son 11 ildə dünyada iqtisadi artım templərinə görə ən sürətlə inkişaf edən ölkədir. Ölkəmiz dünyanın ən rəqabətli 40 iqtisadiyyatı arasındadır. Dövlət başçısı İlham Əliyev bu inamı ifadə edir ki, qeyri-neft sektoru gələcəkdə Azərbaycanın iqtisadi inkişafını daha da böyük həcmdə təmin edəcək. Bu sektorun inkişafı iqtisadiyyatın dayanıqlı inkişafını təmin etməyə imkan yaradacaq.

İqtisadiyyatın inkişafının neft amilindən asılılığının azaldılması istiqamətində atılan addımların uğurlu nəticəsi kimi ÜDM-də özəl bölmənin payının 85 faiz təşkil etdiyini qeyd edə bilərik. Cənab İlham Əliyev Prezident kimi fəaliyyətə başladığı gündən iqtisadi artımın qeyri-neft sektorunun hesabına olmasını qarşıya mühüm vəzifə kimi qoyub. Qeyd etdiyimiz kimi, regional inkişaf proqramlarının uğurlu icrası qarşıya qoyulan məqsədlərə yüksək səviyyədə nail olmağa əsas yaradır. Dövlət başçısı İlham Əliyev müşavirədə qarşıda duran vəzifələrdən bəhs edərkən bildirmişdir: “Biz qeyri-neft sektorunun inkişafı üçün infrastruktur layihələrini icra edirik. Əgər bu layihələr icra edilməsəydi, regionlarda biznes imkanlarından söhbət gedə bilməzdi. Eyni zamanda, düşünülmüş iqtisadi siyasətlə düzgün prioritetlər seçmişik və ildən-ilə bu prioritetlərin növbəliliyi dəyişir. Bu da təbiidir, çünki biz doqmatik yanaşmadan çox uzağıq, çevik iqtisadi siyasət aparırıq. Daxili bazarı təmin etmək üçün yerli istehsalın artırılması da qeyri-neft sektorunun inkişafına birbaşa təsir edən amildir və bütün bu görülən işlər və digər tədbirlər nəticəsində dayanıqlı inkişaf artıq təmin edilib. Ümumi daxili məhsulumuzda qeyri-neft sektoru üstünlük təşkil edir. Gələcəkdə neft amilinin ümumi daxili məhsulumuzda aşağı düşməsi nəticəsində ölkə iqtisadiyyatının neft amilindən asılılığı daha da azalacaqdır. Bu, bizim vəzifəmizdir. Mən həmişə demişəm, bu gün də demək istəyirəm ki, neft-qaz amili bizim üçün bir vasitədir. Bu, inkişaf etmək, dayanıqlı və çoxşaxəli iqtisadiyyat qurmaq üçün bir vasitədir. Biz bu vasitədən səmərəli şəkildə istifadə edirik. Bu il də sahibkarlara güzəştli şərtlərlə kreditlərin verilməsi təmin ediləcəkdir. Bu təşəbbüsün çox gözəl nəticələri vardır. Biz bunu əyani şəkildə görürük. Bölgələrdə açılan yeni müəssisələr və iş yerləri bunu göstərir. Eyni zamanda, dövlət tərəfindən sahibkarlara böyük mənəvi dəstək göstərilir. Yerlərdə də bu işlər düzgün təşkil edilməlidir və sahibkarlara bu il o cümlədən öz vəsaitlərindən istifadə etməklə ölkəmizin real sektoruna vəsaiti qoymağı tövsiyə edirəm. Çünki dövlət sahibkarlara uzun illərdir ki, böyük dəstək verir. Güzəştli şərtlərlə verilən bu kreditlərin həcmi yüz milyonlarla ölçülür, bəlkə də milyardı ötüb. Sahibkarlar da həm o imkanlardan istifadə etməlidirlər, eyni zamanda, - artıq uzun illərdir ki, onlar da öz kapitallarını əldə ediblər, - ölkənin inkişafına, real sektorun inkişafına daha da çox sərmayə qoymalıdırlar. Eyni zamanda, biz xarici investorları da qeyri-neft sektoruna cəlb etməliyik. Əlbəttə ki, xarici investorlar daha çox neft-qaz sektoruna investisiya qoymağa maraqlıdırlar. Ancaq biz onları indi digər sektorlara da cəlb edirik və edəcəyik. Yaradılan xüsusi proqramlar çərçivəsində texnoparklar, aqroparklar salınacaq və bütün bunlar xarici investorları da cəlb edəcək.”

Dövlət başçısı İlham Əliyev bu məqamı da diqqətə çatdırdı ki, dünyada indi bir tərəfdən iqtisadi böhran davam edir, vəsait qıtlığı müşahidə olunur, eyni zamanda, investisiya qoymaq üçün o qədər böyük seçim də yoxdur. Çünki böhran içində çabalayan ölkələrə kim investisiya qoyacaq? Ona görə sabit ölkələrə, ictimai-siyasi sabitliyi, iqtisadi inkişafı olan ölkələrə xarici investisiyalar cəlb etmək daha asandır. “Burada əlbəttə ki, informasiya qıtlığı öz rolunu oynayır. Amma son illər ərzində keçirilən təqdimatlar, biznes forumlar, Azərbaycan ilə bağlı dünya ictimaiyyətinə, o cümlədən biznes strukturlarına dolğun informasiyaların ötürülməsi artıq xarici investorlar üçün Azərbaycanı çox cəlbedici ölkəyə çeviribdir.”

Qeyri-neft sektorunun ən prioritet sahələrindən biri təbii ki, aqrar sahədir. Aqrar sahənin də ən aktual mövzularından biri ərzaq təhlükəsizliyidir. Müşavirədə dövlət başçısı İlham Əliyev bu məsələyə də diqqət yönəltdi: “Ərzaq təhlükəsizliyi ilə bağlı olan planlarımız vaxtında müəyyən olunmuşdur və icra edilməyə başlamışdır” söyləyən cənab İlham Əliyev bildirmişdir: “Çünki ərzaq təhlükəsizliyi hər bir ölkə üçün enerji təhlükəsizliyi qədər önəmlidir. Əlbəttə, Azərbaycanın bəzi ərzaq məhsullarını xarici bazarlardan idxal etməsinə baxmayaraq biz çalışmalıyıq ki, öz daxili istehsalımızı maksimum artıraq, fövqəladə hallardan özümüzü qoruyaq. Çünki keçən il də biz görmüşük ki, bir sıra ərzaq məhsullarının ixracı ilə bağlı bəzi ölkələrdə qadağalar qoyulmuşdur. Yəni, özümüzü təmin etmək üçün daxili bazarların daxili resurslar hesabına təmin edilməsi prosesi davam etdiriləcəkdir.”

Daim vurğulandığı kimi, hər ilin konkret bir sahənin adı il bağlanması qarşıya qoyulan məqsədə, ən əsası ölkənin hərtərəfli inkişafına yüksək səviyyədə nail olmağa stimul verir. 2015-ci il dövlət başçısı İlham Əliyevin 12 yanvar 2015-ci il tarixili Sərəncamı ilə “Kənd təsərrüfatı ili” elan edildi. Sərəncamda da vurğulandığı kimi, ölkədə həyata keçirilən aqrar islahatlar nəticəsində kənd təsərrüfatının dinamik inkişafı üçün zəmin yaradılıb. Aqrar sektorda əsaslı dəyişikliklər baş vermiş, yeni iqtisadi və mülikiyyət münasibətləri formalaşmış, normativ hüquqi baza təkmilləşdirilmişdir. İdarəetmədə səmərəliliyin və şəffaflığın artırılması üçün elektron kənd təsərrüfatı sistemi tətbiq edilməkdədir. Kənd təsərrüfatının inkişafına yeni təkan vermək və onun modernləşdirilməsini sürətləndirmək, aqrar sektorda mövcud problemlərin həllinə sistemli və kompleks yanaşmanı təmin etmək, bu sahəyə dövlətin inzibati və maliyyə resurslarını səmərəli şəkildə cəlb etmək, ölkəmizin aqrar potensialını geniş təbliğ etmək məqsədilə imzalanan sərəncam qarşıya qoyulan məqsədlərə çatmaq üçün mexanizm rolunu oynayır.

“Bizim ixrac potensialımızın artırılması da gündəlikdə duran məsələlərdən biridir” söyləyən Prezident İlham Əliyev bu əminliyi ifadə etmişdir ki, yaxın gələcəkdə özümüzü bütün əsas ərzaq məhsullarımızla təmin edəcəyik. Beləliklə, ixrac üçün bizim yeni məhsullarımız olacaq.

Qeyd edək ki, dövlət başçısı İlham Əliyevin 16 yanvar 2014-cü il tarixli “Kənd təsərrüfatı və ərzaq məhsulları bazarının fəaliyyətinin təkmilləşdirilməsi sahəsində əlavə tədbirlər haqqında” Sərəncamında da qeyri-neft sektorunun, o cümlədən kənd təsərrüfatının inkişafının dövlət tərəfindən iqtisadi siyasətin prioritet istiqamətlərindən biri kimi müəyyən edildiyi qeyd olunaraq, görüləcək işlər öz əksini tapmışdır. Məqsəd qeyd olunduğu kimi, ölkənin hərtərəfli inkişafını təmin etmək, insanların rifah halını daha da yaxşılaşdırmaqdır.

Yeganə Əliyeva

İki sahil.- 2015.- 15 yanvar.- S.7.