Əlvida, Rio... Görüşənədək, Tokio!

2020-ci ildə gündoğar ölkədə keçiriləcək yarışlarda idmançılarımız Braziliyadakından daha artıq uğur qazanmaq əzmində olduqlarını qələbələri ilə təsdiqlədilər

Olimpiya hərəkatına 1996-cı ildə Atlantada keçirilən yarışlara qoşulmaqla başlayan, azsaylı tərkiblə müstəqil ölkəmizi təmsil edən idmançılarımız Sidney, Afina, Pekin, London yarışlarında qələbələrini də artırdılar. İnkişafda olan idmanımıza göstərilən dövlət qayğısına medalların sayını artırmaqla cavab verdilər.

Rio-de-Janeyroda idmanın 17 növü üzrə 56 iştirakçı ilə təmsil olunan gənclərimiz Azərbaycana 1 qızıl olmaqla 18 medal qazandırdılar. Medal sayına görə Olimpiadada iştirak edən 207 iştirakçı və 87 mükafatçı dövlət arasında 15-ci yeri qazanan idmançılarımız daha bir idman bayramını uğurla başa vurdular. Hər medal isə gərgin mübarizə, qələbə əzminə inamın ifadəsidir. Bu nəticəyə görə respublikamız İslam, türk və Cənubi Qafqaz ölkələri arasında liderlik əldə etdi. İdmançı sayının qazanılan medallara nisbətinə görə isə Azərbaycan Olimpiadanın lider dövləti, MDB ölkələri arasında ikinci, Avropa dövlətlərinin sırasında isə yeddinci oldu. Qızıl medal qazanmış taekvondoçumuz, mübarizəyə 1/8 finaldan start verərək bütün görüşləri uğurla davam etdirən, “Şöhrət” ordenli Radik İsayev isə öz çəki dərəcəsində dünyada ən güclü idmançı adına layiq görüldü.

18 medal qazanmaq həm də üçrəngli bayrağımızın idman arenalarında eyni sayda dalğalanması, milyardlarla ölçülən tamaşaçı auditoriyasında ölkəmiz haqqında təsəvvür yaranması deməkdir. Rio Olimpiadasının ölkəmizə uğur gətirən, tanıtdıran, yaddaqalan məqamlarından biri də güləş üzrə güclərini sınayan Monqolustan- Özbəkistan idmançılarının oyununu “idarə edən” azərbaycanlı hakim Hicran Şərifovun ədalətli qərarının Beynəlxalq Güləş Federasiyasının münsiflər heyəti tərəfindən təsdiqlənməsi oldu.

Ölkəmizi XXXI Yay Olimpiya Oyunlarında təmsil edən idmançılarımızın yolasalınma mərasimində “Azərbaycan idman ölkəsidir. Bunu bütün dünya, idman ictimaiyyəti qəbul edir, bilir. Azərbaycanda idmanla, Olimpiya hərəkatı ilə bağlı məqsədyönlü siyasət aparılır” söyləyən Prezident İlham Əliyevin vurğuladığı kimi, düşünülmüş siyasət, məqsədyönlü işlər idmanı Azərbaycanda, cəmiyyətdə önəmli ictimai amilə çevirmişdir.

Bu da səbəbsiz deyil. Son illərdə idmanın inkişafına göstərilən diqqətin məntiqi nəticəsi, gənclərin bu sahəyə artan marağı, beynəlxalq yarışlarda qazanılan qələbələri şərtləndirir. Azərbaycanda mükəmməl idman infrastrukturu yaradılır. Son illərdə bölgələrdə 40-dan çox Olimpiya idman mərkəzi, yeni komplekslər tikilmişdir. 2015-ci ildə ilk təşəbbüs olaraq standartları da Azərbaycanda müəyyənləşdirilən birinci Avropa Oyunlarının keçirilməsi üçün inşa edilən Milli Gimnastika Arenası, Bakı Olimpiya Stadionu, Beynəlxalq Atıcılıq Mərkəzi, Su İdmanı Sarayı idman obyektləri olmaqla gözəl memarlıq əsərləridir. Belə əhəmiyyətli infrastrukturun regionlarda yaradılması isə idmanın kütləviliyinə, paytaxtdan kənarda yaşayan istedadlı gənclərin fiziki hazırlığının artırılmasına imkan yaradır. “Bizim qabaqcıl, görkəmli idmançılarımız bütün idmançılar üçün nümunədir” sözləri ilə gəncləri yeni qələbələrə həvəsləndirən dövlət başçımız, Milli Olimpiya Komitəsinin prezidenti İlham Əliyev son illərdə idmana artan həvəsi, qazanılan uğurları, idmançılara göstərilən qayğını, ölkəmizdə keçirilən dünya, Avropa çempionatlarının rolu və əhəmiyyətini xüsusilə qeyd edir. Beynəlxalq Olimpiya Komitəsi, Avropa Olimpiya Komitəsi rəsmilərinin Azərbaycanda bu sahənin inkişafı ilə bağlı söylədikləri xoş sözlər idmançılarımızı beynəlxalq yarışlarda yüksək pillələrdə yer tutmasına daha da həvəsləndirir.

Təbii ki, bu yarışlar arasında ölkəmizə 56 medal qazandıran birinci Avropa Oyunları xüsusi yer tutur. Tarixdə ilk dəfə keçirilən qitə dövlətləri idmançılarının iştirak etdiyi Oyunlara hazırlıq, yarışların keçirildiyi idman arenalarında yaradılan yüksək standartlara cavab verən şərait ölkəmizi tanıtdırdı. “Hamımız yaxşı xatırlayırıq, bu Oyunlar bir il bundan əvvəl keçirilmişdir. Bu Oyunlar doğrudan da Yay Olimpiya Oyunlarının səviyyəsində keçirilmişdir. Bu Oyunlarda 6 min idmançı iştirak etmişdir, minlərlə qonaq Azərbaycanla tanış olmuşdur” söyləyən Prezident İlham Əliyevin vurğuladığı kimi, beynəlxalq yarışlar güclülər üçün sınaq meydanı olsa da eyni zamanda Azərbaycanın dünyaya təqdim olunması baxımından da əhəmiyyətlidir. Birinci Avropa Oyunları haqqında söylənilən xoş sözlərdə Azərbaycan dövlətinin, idmanının zəfəri ifadəsini tapır. Məhz həmin yarışlarda komanda hesabında ikinci yeri tutan idmançılarımızın qazandığı medallar bütün xalqımızda qürur hissi yaratmışdır. Təşəbbüskarlığı ilə yeniliklərə imza atmaq təcrübəsi qazanmış Azərbaycanda ilk dəfə keçirilən və tamaşaçı auditoriyası 500 milyon olan “Formula-1” yarışı beynəlxalq reytinqinə görə Yay Olimpiya Oyunları və futbol üzrə dünya çempionatı səviyyəsində diqqət çəkir. “Bu yarışın Azərbaycanda keçirilməsi əlbəttə ki, bizim tarixi nailiyyətimizdir, bir daha ölkəmizin gücünü göstərir. Bakı “Formula-1” yarışlarının keçirildiyi 21-ci yerdir. İyirmi şəhərdə keçirilirdi və Bakı 21-ci şəhərdir. Əgər o şəhərlərin siyahısına nəzər salsanız, görərsiniz ki, bu şəhərlər inkişaf etmiş şəhərlərdir. Bakı da o sıradadır” söyləyən Prezident İlham Əliyevin vurğuladığı kimi, bu seçim beynəlxalq səviyyədə ölkəmizə göstərilən diqqət və inamdır.

Qlobal əhəmiyyətli məsələlərin müzakirə olunduğu Azərbaycanda keçirilən forumlar, dialoqlar ölkəmizi Şərq ilə Qərbi birləşdirən körpü, sivilizasiyalararası dialoq mərkəzi kimi tanıtdırmışdır. İllərin təcrübəsi göstərir ki, Azərbaycan eyni zamanda mühüm idman yarışlarına da ev sahibliyi etmək imkanına malikdir. “Formula-1”-dən sonra Azərbaycanda keçiriləcək Dünya Şahmat Olimpiadasında şahmatçılarımız potensiallarını ortaya qoyacaq. Gələn il Azərbaycan İslam ölkələrinin Həmrəylik Oyunlarına ev sahibliyi edəcək. 2015-ci ildə Avropa, 2017-ci ildə İslam Həmrəylik Oyunlarının keçirilməsi ölkəmizin nadir şəraitini əks etdirməklə ölkəmizin tarixini və multikulturalizm təcrübəsinin zənginliyini göstərir. Bu zənginlik Avropa və İslam Həmrəylik Oyunlarında təcəssümünü tapır. “Əminəm İslam Oyunları ilk növbədə İslam həmrəyliyini gücləndirəcək, həm İslam aləminə, həm dünyaya bir daha göstərəcək ki, İslam dini sülh, mərhəmət və qardaşlıq dinidir. Eyni zamanda, dünyaya göstərəcək ki, Azərbaycan böyük imkanlara malik olan ölkədir və ən mötəbər beynəlxalq yarışları keçirməyə qadirdir” sözləri ilə bütün yarışlara eyni dərəcədə önəm verildiyini bildirən cənab İlham Əliyev yarışların dostluq, qardaşlıq bayramı olduğunu da vurğulayır.

Azərbaycanda bütün millətlərin, bütün xalqların nümayəndələri bir ailə kimi, dostluq, qarşılıqlı anlaşma şəraitində yaşayırlar. Avropa və İslam Oyunlarının Bakıda keçirilməsində də məqsəd Azərbaycanın multikultural cəmiyyət kimi əldə etdiyi uğurları beynəlxalq səviyyədə təbliğ etməkdir. Rioda keçirilən yarışlarda iştirak edən Azərbaycanın komanda heyətində müxtəlif millətlərdən olan idmançıların təmsilçiliyinin özü ölkəmizdə yaranan siyasi sabitliyin, birgə yaşayış qaydalarına hamının eyni dərəcədə hörmətlə yanaşmasının məntiqi nəticəsidir. “Biz öz yolumuzla gedirik. İdman uğurları ölkəmizin uğurlarının tərkib hissəsidir. Ancaq güclü dövlətlərdə güclü idman var. Olimpiya Oyunlarının nəticələrinə baxın. Hansı komandalar birinci yerlərdədir. Onların böyük əksəriyyəti inkişaf etmiş ölkələrin komandalarıdır. Yəni, idmanı ümumi inkişafdan ayırmaq olmaz. Ona görə, Azərbaycan idmanının inkişafı ümumi inkişafımızın təzahürüdür. Əgər bizdə iqtisadi, maliyyə müstəqilliyi olmasaydı və biz iqtisadi cəhətdən inkişaf etməsəydik, idmanın inkişafına istədiyimiz səviyyədə vəsait qoya bilməzdik. Amma bu gün bir daha demək istəyirəm ki, Azərbaycan inamla, uğurla inkişaf edir, 2016-cı ildə də qarşıda duran bütün vəzifələr icra edilir” söyləyən Prezident İlham Əliyev bölgədə, dünyada getdikcə artan nüfuzumuzun möhkəmlənməsində idmanın xüsusi rolu olduğunu fəxrlə bildirir.”

Rio görüşləri arxada qaldı. Bu möhtəşəm idman yarışı dostluq, qardaşlıq bayramına çevrildi. Estafet isə gündoğar ölkə adlandırılan Yaponiyaya verildi. Rioda qazandıqları uğurları təzələmək üçün üzərilərində daha ciddi çalışacaq idmançılar indidən “Görüşənədək, Tokio!” deyərək qələbələr sorağındadırlar.

Xuraman İsmayılqızı,

İki sahil.- 2016.- 24 avqust.- S.11.