Tarixi qayıdış və xalqın qurtuluşu

Kürdəmir şəhərindəki Heydər Əliyev Mərkəzində 15 İyun - Milli Qurtuluş Gününə həsr olunmuş “dəyirmi masa” keçirildi.

Tədbir iştirakçıları əvvəlcə ulu öndər Heydər Əliyevin abidəsini ziyarət edərək önünə tər gül-çiçək dəstələri düzdülər. Heydər Əliyev Mərkəzinin foyesində 15 İyun - Milli Qurtuluş Günü münasibətilə təşkil olunmuş kitab və rəsm sərgisi ilə tanışlıq oldu. Daha sonra tədbirdə “15 iyun - Tarixin şanlı səhifələri” adlı sənədli film nümayiş etdirildi.Atakişili kənd tam orta məktəbinin tarix müəllimi Sevinc Əzimova “Tarixi qayıdış və xalqın qurtuluşu”, Mürtülü kənd tam orta məktəbinin tarix müəllimi Şəbnəm Məmmədəliyeva “Heydər Əliyev müstəqilliyimizin təminatçısıdır” və Sor-sor kənd tam orta məktəbinin direktoru Zeynal Səfərov “Heydər Əliyev siyasətinin uğurlu davamı” mövzularında məruzə edərək Ulu Öndərin xalqın təkidli tələbi ilə hakimiyyətə gəldikdən sonra fəaliyyətindən, Azərbaycan dövlətçiliyinin inkişaf etdirilməsindən ətraflı danışdılar.Rayon İcra Hakimiyyətinin başçısı Ceyhun Cəfərov qeyd etdi ki, hər kəs üçün əziz olan Milli Qurtuluş Günü Azərbaycanın tarixinə milli mentalitetimizin, özünüdərketmənin qayıdışı günü kimi daxil olub: “Milli Qurtuluş Günü vətəndaş müharibəsinin, küçə və meydan mitinqlərinin, dövlət çevrilişlərinə cəhdlərin, siyasi hakimiyyətdəki özbaşınalığın birdəfəlik qarşısının alınmasının məntiqi nəticəsi, müstəqil Azərbaycan dövlətinin təməlinin qoyulması günü idi. Ulu öndər Heydər Əliyevin ikinci dəfə siyasi hakimiyyətə qayıdışı Azərbaycan dövlətinin müstəqilliyinin bərqərar olması, dövlət quruculuğu sahəsindəki islahatlar, cəmiyyətin bütün sahələrinin reformasiyası, ölkəmizin sosial-iqtisadi potensialının daha da güclənməsi, beynəlxalq aləmdəki nüfuzunun artması, ən əsası isə atəşkəsə nail olunması idi.”Sonda Yeni Azərbaycan Partiyasına daxil olmuş bir qrup gəncə üzvlük vəsiqələri təqdim edildi.

Orxan Vahidoğlu

İki sahil.- 2016.- 14 iyun.- S.9